1-3. a) Ngande wakakakitɔna Yeso la apɔstɔlɔ ande ndo lande na kele okakitwanelo ɔsɔ komonga dikambo dia lonyangu? b) Lande na kahombaso mbeka dia mbeya kɛnɛ kakasale Yeso tatɛ lam’akandakalola l’olongo?

 APAMI dikumi l’ɔtɔi wakasangana lo dikona dimɔtshi. La ngandji ndo la lowando tshɛ, vɔ wakendaka onto la dikumi l’ahende. Kaanga mbakinde l’efanelo k’onto, ɔsɔ aki Yeso lakolwama lakakome nto etongami ka lo nyuma koleki ditongami tshɛ dia Jehowa wolo. Yeso akahomana l’apɔstɔlɔ ande mbala k’ekomelo lo Dikona di’esongo w’ɔlivɛ.

² Dikona sɔ diekɔ l’atei w’olui w’akona w’ave. Okidi wa Kidirɔna mbakakitola olui w’akona ɔsɔ la Jɛrusalɛma. Dihole sɔ diakohola Yeso akambo efula. L’okidi wa dikona sɔ mbaki osomba wa Bɛtaniya, lɛnɛ akolola Yeso Lazaro. Mingu ngana tsho la ntondo, oma la Bɛtɛfangɛ suke la dihole sɔ mbakatatɛ Yeso wɔtwɛlɔ ande wa la lotombo la Jɛrusalɛma. Ondo ekambɔ ka Ngɛtɛsɛmanɛ, lɛnɛ aketsha Yeso wenya ande w’ekomelo w’ɔkɛyi la ntondo ka nde mindama kaki lo Dikona di’esongo w’ɔlivɛ. Paka lo dikona sɔ mbakalɔngɔsɔla Yeso dia ndakana la ambeki ande. Nde akalakana la wɔ lo mbatɛ ɛtɛkɛta wa ngandji ka mamba. Oma laasɔ, nde akatatɛ mbidɛ otsha l’olongo! Apɔstɔlɔ wakemala wenda woho wakatadɛka Nkumɛwɔ otsha l’olongo polo ndo lam’akandashishɔ lo wange.​—Etsha 1:6-12.

³ Onde wɛ ambonga oko onto lɛna olakanelo wa pondjo, w’ɔngɛnɔngɛnɔ, wa kandji ndo w’olengolengo ɔsɔ? Ɔsɔ komonga olakanelo wa pondjo nɛ dia oko wakayohola andjelo ahende apɔstɔlɔ, lɔsɛnɔ la Yeso kokomɛ laasɔ. (Etsha 1:10, 11) Lo toho efula, wodelo ande otsha l’olongo aki paka etatelo.  Ɔtɛkɛta wa Nzambi hawototshike l’okandokando lo kɛnɛ kendana l’awui wakakomɛ Yeso oma laasɔ. Lande na kele ekɔ ohomba dia sho mbeka dia mbeya lɔsɛnɔ laki Yeso tatɛ lam’akandakalola l’olongo? Tohɔ ɛtɛkɛta wakatɛ Yeso Petero ɔnɛ: “Tetemala ndjelami.” (Joani 21:19, 22) Sho tshɛ pombaka nkitanyiya didjango sɔ, aha lo tshanda mɔtshi tsho, koko lɔsɛnɔ laso l’otondo. Dia sho nsala dikambo sɔ, sho pombaka mbeya kɛnɛ kasala Owandji aso kakianɛ ndo ɛkɛndɛ wakandalongola l’olongo.

4. Ngande wakɛnya Bible la ntondo kɛnɛ kakahombe salema l’olongo yema tshitshɛ l’ɔkɔngɔ wa Yeso nkalola lɛkɔ?

⁴ Afundelo hawototɛ ndooko dui lo kɛnɛ kendana la okomelo wa Yeso l’olongo, woho wakandalongɔma ndo ɔngɛnɔngɛnɔ waki la nde dia monga nto kaamɛ la She. Koko, edja efula la ntondo, Bible kakatɛnyisha kɛnɛ kakahombe salema yema tshitshɛ l’ɔkɔngɔ wa Yeso nkalola l’olongo. L’edja ka ntambe ndekana 15, ase Juda wakɛnaka woho wakasalemaka sɛlɛmɔnyi kɛmɔtshi k’ekila mbala la mbala. Mbala ɔtɔi l’ɔnɔnyi, ɔlɔmbɛdi a laadiko akɔtɔka lo dihole dioleki ekila dia nde mɔnga dikila di’olambo la ntondo ka ɔshɛtɛ wa sheke. Lo lushi lɔsɔ, ɔlɔmbɛdi a laadiko akikɔ didjidji dia Mɛsiya. Yeso akakotsha kitshimudi ya sɛlɛmɔnyi ka prɔfɛsiya kɛsɔ mbala ɔtɔi lo pondjo etena kakandakalola l’olongo. Nde akatshu la ntondo ka woongelo wa lotombo wa Jehowa wa l’olongo, mbuta ate dihole dioleki tshɛ ekila l’andja w’otondo ndo akasha She nɛmɔ di’olambo ande w’oshinga w’etshungwelo. (Hɛbɛru 9:11, 12, 24) Onde Jehowa aketawɔ olambo ɔsɔ?

5, 6. a) Dikambo diakɔna diakɛnya ɔnɛ Jehowa aketawɔ olambo w’oshinga w’etshungwelo waki Kristo? b) Waa na wakondja wahɔ oma l’olambo ɔsɔ ndo ngande?

⁵ Sho tanaka okadimwelo lo nsɛdingola kɛnɛ kakasalema nshi ngana tsho l’ɔkɔngɔ wa Yeso mbidɛ l’olongo. Djui ya  tshitshɛ ya Akristo 120 wakasangana lo luudu lɔmɔtshi la la diko la Jɛrusalɛma ndo londjo la wolo lakatombe oko lɔpɛpɛ la wolo lakalole lo luudu. Nemi ya dja yakɛnama l’ɛtɛ awɔ vɔ tshɛ, vɔ wakalodiama la nyuma k’ekila ndo wakatatɛ ntɛkɛta l’ɛtɛkɛta wotshikitanyi. (Etsha 2:1-4) Dikambo sɔ diakɛnya wotwelo wa wodja w’oyoyo, mbuta ate Isariyɛlɛ wa lo nyuma wakakome “dioho di’ɛsɔnami” ndo “ɛlɔmbɛdi wakamba oko nkumi ya dikanga” dia nkotsha lolango laki Nzambi la nkɛtɛ. (1 Petero 2:9) Akɛnama hwe dia Jehowa Nzambi aketawɔ ndo akangɛnangɛna olambo w’oshinga w’etshungwelo wa Kristo. Otshulwelo wa nyuma kɛsɔ mbaki l’atei w’ɛtshɔkɔ wa ntondo wakaye oma l’oshinga w’etshungwelo.

⁶ Tatɛ oma ko etena kɛsɔ, oshinga w’etshungwelo ɔsɔ wekɔ la wahɔ le ambeki wa Kristo wa l’andja w’otondo. Oyadi tekɔ l’atei wa “leemba la tshitshɛ” l’akitami wele l’elongamelo ka tolɛ kaamɛ la Kristo l’olongo kana l’atei wa “ɛkɔkɔ ekina” wayɔsɛna la nkɛtɛ l’ɛse k’ɛlɔmbwɛlɔ kande, sho kondjaka wahɔ oma l’olambo ɔsɔ. (Luka 12:32; Joani 10:16) Oma lo olambo ɔsɔ mbeso l’elongamelo ndo mbakondjaso edimanyielo ka pɛkato yaso. Edja tshɛ katetemalaso ‘monga la mbetawɔ’ lo olambo ɔsɔ ndo kayelaso Yeso lushi la lushi, sho kokaka monga la nkum’otema ka pudipudi ndo la elongamelo ka diambo efula lo nshi yayaye.​—Joani 3:16.

7. Lowandji lakɔna lakalongola Yeso l’ɔkɔngɔ wa nde nkalola l’olongo ndo ngande wakokayɛ mbosukɛ?

⁷ Kakɔna kasala Yeso l’olongo tatɛ lam’akandakalola? Nde ekɔ la lowandji la mamba. (Mateo 28:18) Lo mɛtɛ, Jehowa akawodje owandji w’etshumanelo k’Akristo ndo nde ekɔ lo nkotsha ɔkɛndɛ ɔsɔ la ngandji tshɛ ndo la losembwe. (Kɔlɔsayi 1:13) Oko wakadiatatami la ntondo, Yeso akasɔnɛ apami wambotshunda dia vɔ kotshaka ehomba w’ɛkɔkɔ ande. (Ɛfɛsɔ 4:8) Ɛnyɛlɔ, nde akasɔnɛ Pɔɔlɔ dia nde monga “ɔpɔstɔlɔ w’ase wedja,” ndo nde akootome dia dianganya lokumu l’ɔlɔlɔ lo wedja wa tale. (Rɔmɔ 11:13; 1 Timɔte 2:7) Oya l’ekomelo ka ntambe ka ntondo, Yeso akatomɛ tshumanelo  esambele dia lo prɔvɛnsɛ ka Rɔmɔ ka l’Asiya nsango ya lowando, ya engwelo ndo akadisha alako. (Ɛnyɛlɔ, tshapita 2-3) Onde wɛ mbetawɔka dia Yeso ekɔ Ɔtɛ w’etshumanelo k’Akristo? (Ɛfɛsɔ 5:23) Dia ntetemala mboyela, wɛ pombaka monga la yimba y’okitanyiya ndo nkamba kaamɛ l’ase etshumanelo kanyu.

8, 9. Lowandji lakɔna lakalongola Yeso lo 1914, ndo dikambo sɔ pombaka monga la shɛngiya yakɔna lo tɛdikɔ tɔsaso?

⁸ Yeso akanyomolongola lowandji l’efula lo 1914. L’ɔnɔnyi ɔsɔ, nde akasɔnama oko Nkumekanga ka lo Diolelo diaki Jehowa. Etena kakatatɛ Yeso mbolɛ, “ta diakatombe l’olongo.” Etombelo akɔna wakonge? Satana la ɛdiɛngɛ ande wakakashema la nkɛtɛ ndo andja wakɔtɔ l’etena k’ekakatanu wa wolo. Ata, diakatanelo, wɔma, hemɔ, adidimu wa nkɛtɛ ndo ndjala yahɛnyahɛnya anto nshi nyɛ toholaka dia Yeso ekɔ lo mbolɛ l’olongo. Satana eke “owandji w’andja ɔnɛ” lo ‘etena ka mondo keto.’ (Ɛnyɛlɔ 12:7-12; Joani 12:31; Mateo 24:3-7; Luka 21:11) Koko, Yeso ekɔ lo mbisha anto wa l’andja w’otondo diaaso dia vɔ mbetawɔ lowandji lande.

⁹ Ekɔ ohomba efula dia sho mbeta lo wedi wa Mɛsiya Nkumekanga. Lo tɛdikɔ tshɛ tɔsaso lushi la lushi, sho pombaka nyanga dia mbetawɔma le nde, koko aha le andja ɔnɛ wa kɔlɔ. Oko wende “Nkumekanga ka nkumi ya dikanga ndo Nkumi ka waa nkumi” kasɛdingola anto, otema ande wosembwe ndola tɔɔ la nkɛlɛ ndo l’ɔngɛnɔngɛnɔ. (Ɛnyɛlɔ 19:16) Lande na?

10. Eongelo kakɔna kele la Yeso ndo kakɔna kookonya dia nde monga la nkɛlɛ ka losembwe?

¹⁰ L’ɛnyɛlɔ ka She, Owandji aso okongaka nshi tshɛ l’ɔngɛnɔngɛnɔ. (1 Timɔte 1:11) Etena kakinde la nkɛtɛ, Yeso komonga kanga diɔnyɔ kana kanga awui wolo. Koko, akambo efula wasalema la nkɛtɛ ɛlɔ kɛnɛ mboshaka nkɛlɛ ka  losembwe. Nde ekɔ lo mboka atshunda tshɛ w’ɛtɛmwɛlɔ wa kashi wayata ɔnɛ enyimpala ande mbewɔ nkɛlɛ. Nde akatatshi ɔnɛ: “Aha onto tshɛ latombelɛka ate: ‘Nkumadiɔndjɔ, Nkumadiɔndjɔ’ mbayɔtɔ lo Diolelo dia l’olongo, koko paka ɔnɛ latosalaka lolango la Papa lele l’olongo mbayɔtɔ. Lushi lɔsɔ, anto efula wayombutɛ vate: ‘Nkumadiɔndjɔ, Nkumadiɔndjɔ,  . . sho kosalaka akambo wa diambo efula lo lokombo layɛ?’ Ko dimi layowatɛ nte: ‘Dimi haanyeye kaanga yema! Nyomangane, nyu atshi w’akambo wa kɔlɔ!’”​—Mateo 7:21-23.

11-13. Lande na kakoka anto amɔtshi mamba lo kɛnɛ kendana l’ɛtɛkɛta wa wolo wakatɛ Yeso wanɛ wasala “akambo wa diambo efula” lo lokombo lande ndo lande na kawaomalɛnde? Sha ɛnyɛlɔ.

¹¹ Ɛlɔ kɛnɛ, anto efula wayata ɔnɛ Akristo mbewɔ mbeyaka mamba etena kokawɔ ɛtɛkɛta wa ngasɔ. Lande na kakatondja Yeso ɛtɛkɛta wa wolo wa ngasɔ otsha le anto wasala “akambo wa diambo efula” lo lokombo lande? Ɛtɛmwɛlɔ wa lo Lokristokristo mbishanaka weshasha wa kɛtshi, kimanyiyaka ase wola, mbikishaka mpitadi la kalasa ndo vɔ salaka akambo akina efula. Ko lande na kawaomalɛ Yeso? Tɔsɛdingole ɛnyɛlɔ kayela kɛnɛ.

¹² Papa la mama kɛmɔtshi wekɔ lo nanga minda lɔkɛndɔ. Vɔ hawokoke ntshɔ l’anawɔ, ɔnkɔnɛ vɔ wamboyanga onto ɔmɔtshi dia nde mbalamɛka ana. Vɔ wambowotɛ tsho ɔnɛ: “Otolamɛke anaso dimɛna. Leshakawɔ, sala dia vɔ mongaka pudipudi ndo kokɛkawɔ oma lo waale.” Koko etena kambokalola ambutshi asɔ, vɔ wambonyanga efula lo mɛna anawɔ wambɔnda la ndjala, mindo, la hemɔ ndo wekɔ tɔkɛtshikɛtshi toto. Vɔ wekɔ lo ndelɛ onto lakawaatshikɛ, koko nde hawadje yimba. Lande na? Nɛ dia nde akade lo kibandola ndo ekɔ lo nsola adidishi. La nkɛlɛ tshɛ, ambutshi wambowombola lande na kasalande ngasɔ. Nde ambaakadimola ate: “Ohonyenda kɛnɛ kamomosala! Shi adidishi waya pudipudi? Dimi lakanyokite pɛmbɛ lo luudu lanyu!” Onde ambutshi wayɔngɛnangɛna? Ndooko! Vɔ kombɔlɔmba dia nde  nsala elimu ɛsɔ, koko vɔ wakawotɛ tsho dia nde mbalamɛka anawɔ dimɛna. Woho wakinde kokotsha kɛnɛ kakawɔlɔmbɛ ambowaomadia efula.

¹³ Ase Lokristokristo wekɔ lo nsala akambo oko onto ɔsɔ. Yeso akadjangɛ enyimpala ande dia vɔ ndeshaka anto lo nyuma lo mbaetsha akambo wa mɛtɛ wa l’Ɔtɛkɛta wa Nzambi ndo mbakimanyiya dia vɔ mongaka pudipudi lo nyuma. (Joani 21:15-17) Koko, ase Lokristokristo hawokitanyiya didjango sɔ. Vɔ wekɔ lo ntshika anto la ndjala ka lo nyuma, lo wengengo lo mbanganyiya la wetshelo wa kashi ndo haweye kaanga wetshelo w’etatelo wa lo Bible. (Isaya 65:13; Amɔsɛ 8:11) Kaanga welo wadjawɔ dia nɔngɔsɔla andja ɔnɛ hakoke monga yɛkɛ nɛndɛ lo woho wewɔ bu l’okitanyiya. Lo mɛtɛ, dikongɛ di’akambo nɛ diekɔ oko luudu layanga pandjɔma! Ɔtɛkɛta wa Nzambi mɛnyaka dia keema edja dikongɛ di’akambo diaki Satana diayanga ndanyema.​—1 Joani 2:15-17.

14. Olimu akɔna wangɛnyangɛnya Yeso ɛlɔ kɛnɛ ndo lande na?

¹⁴ Lo wedi okina, Yeso pombaka ngɛnangɛna efula etena kendande oma l’olongo ndo kɛnande dia miliyɔ y’anto wekɔ lo nkitanyiya didjango dia mbetɛ anto ambeki diakandasha ambeki ande la ntondo ka nde mbidɛ otsha l’olongo. (Mateo 28:19, 20) Ande diɛsɛ diele la so dia ngɛnyangɛnya Mɛsiya Nkumekanga lee! Nyɛsɔ toyashikikɛ dia ntetemala nkimanyiya “ɔhɔmbɔ wa kɔlamelo ndo kɛsɔ.” (Mateo 24:45) Otshikitanyi l’ewandji w’ɛtɛmwɛlɔ wa lo Lokristokristo, djui y’akitami shɔ y’anango Kristo wekɔ lo nɔmbɔla l’okitanyiya tshɛ olimu w’esambishelo ndo wa ndesha ɛkɔkɔ ande.

15, 16. a) Ngande wayaoka Yeso lo woho wahayoleka anto efula mbokana ngandji ɛlɔ kɛnɛ ndo ngande weyaso dikambo sɔ? b) Ngande womadia ase Lokristokristo Yeso?

¹⁵ Sho koka ndjashikikɛ dia Nkumekanga ekɔ la nkɛlɛ etena kɛnande woho wele anto efula hawokana ngandji ɛlɔ kɛnɛ. Sho koka mbohɔ woho wakɔnyɔla Afarisɛ Yeso l’ɔtɛ wakandakɔnɔla onto ɔmɔtshi lushi la Sabato. Etema wa kɔlɔ waki  la wɔ wakaakonya dia vɔ nkomɛ paka lo yoho ya kɔlɔ yakawalembetshiyaka vɔamɛ Ɛlɛmbɛ wa Mɔsɛ ndo ɛlɛmbɛ wa l’onyɔ. Ahindo waki Yeso wakakimanyiyaka anto lo yɛdikɔ y’efula! Koko, ɔngɛnɔngɛnɔ, ekimanyielo ndo woho wakakeketshaka ahindo waki Yeso mbetawɔ komonga ohomba le wɔ. Ngande wakayaoke Yeso? Lo diaaso dimɔtshi, nde akawaende “la nkɛlɛ, ele la lonyangu l’efula l’ɔtɛ wa lonyu l’etema awɔ.”​—Makɔ 3:5.

¹⁶ Awui wɛna Yeso ɛlɔ kɛnɛ ‘mbonyangiyaka efula.’ Ewandji wa lo Lokristokristo wamboyaetɛ totshungu lo woho wamamemawɔ mbekelo ndo wetshelo wahɔtɔnɛ l’Afundelo. Ndo nto, esambishelo ka lokumu l’ɔlɔlɔ la Diolelo diaki Nzambi mbaomadiaka efula. Lo wedja efula, ewandji w’ɛtɛmwɛlɔ wekɔ lo ntshutshuya anto dia vɔ mpɛnyahɛnya Akristo wasala la wolo dia nsambisha l’otema ɔtɔi losango lakasambishaka Yeso. (Joani 16:2; Ɛnyɛlɔ 18:4, 24) L’etena kakɔ kaamɛ, ewandji w’ɛtɛmwɛlɔ ɛsɔ tshutshuyaka anto awɔ dia vɔ ntshɔ l’ata ndo ndjakana, wate kana oko nsala dui sɔ ngɛnyangɛnyaka Yeso Kristo!

17. Ngande wangɛnyangɛnya ambeki wa mɛtɛ wa Yeso otema ande?

¹⁷ Otshikitanyi la wɔ, ambeki wa mɛtɛ waki Yeso salaka la wolo dia mboka wanyawɔ anto ngandji. Vɔ sambishaka “anto tshɛ” lokumu l’ɔlɔlɔ oko wakasale Yeso, kaanga l’atei w’ɔlɔshamelo. (1 Timɔte 2:4) Ndo ngandji kokanawɔ ekɔ dikambo dia diambo efula ndo oma lɔkɔ mbalekawɔ mbeyama. (Joani 13:34, 35) Etena kasalɛwɔ asekawɔ Akristo akambo la ngandji, la dilɛmiɛlɔ ndo la kɛnɛmɔ, vɔ wekɔ mɛtɛ lo ndjela Yeso ndo wekɔ lo ngɛnyangɛnya otema wa Mɛsiya Nkumekanga!

18. Kakɔna kanyangiya Owandji aso, ndo ngande wakokaso mbɔngɛnyangɛnya?

¹⁸ Tatohɛke dia Owandji aso nyangaka etena kahatondoya ambeki ande dia mbikikɛ, kɔɔla ngandji kokawɔ Jehowa ndo katshikawɔ dia mbokambɛ. (Ɛnyɛlɔ 2:4, 5) Koko, Yeso ngɛnangɛnaka wanɛ wakikɛ polo l’ekomelo. (Mateo 24:13) Ɔnkɔnɛ,  nyɛsɔ tohɔke tena tshɛ didjango diaki Yeso di’ɔnɛ: “Tetemala ndjelami.” (Joani 21:19) Nyɛsɔ tɔsɛdingole ɛtshɔkɔ ɛmɔtshi wayosha Mɛsiya Nkumekanga wanɛ wayokikɛ polo l’ekomelo.

19, 20. a) Ɛtshɔkɔ akɔna wayotokondja oma ko kakianɛ lo ndjela ɛlɔmbwɛlɔ kaki Yeso? b) Ngande wele ndjela Kristo ayotokimanyiya dia nkotsha ohomba wele laso wa shɛso?

¹⁹ Ndjela Yeso ekɔ yoho ya lɔsɛnɔ yela ɛtshɔkɔ oma ko kakianɛ. Naka sho mbetawɔ Kristo oko Owandji aso lo ndjela ɛlɔmbwɛlɔ kande ndo nkamba la ɛnyɛlɔ kande, kete tayokondja ɛlɔlɔ wahakondjaki anto wa l’andja ɔnɛ. Tayonga l’olimu wayosha nsɛnɔ yaso oyango, tayonga lo nkumbo k’asekaso ambetawudi kele kaamɛ lo dimama dia mɛtɛ dia ngandji, tayonga la nkum’otema ka pudipudi ndo la wɔladi wa lo yimba. Lo tshena pe, tayonga la lɔsɛnɔ l’ɔngɛnɔngɛnɔ ndo l’ɔlɔ. Koko, aha laasɔ ato.

²⁰ Jehowa akatosha sho wanɛ wele l’elongamelo ka nsɛna pondjo pondjo la nkɛtɛ Yeso oko “Shɛso ka Pondjo.” Yeso akɔshi dihole dia Adama shɛso k’onto laki kokotsha ɔkɛndɛ waki la nde otsha le tokanula tande. (Isaya 9:6, 7) Naka sho mbetawɔ Yeso oko “Shɛso ka Pondjo,” ndo naka sho monga la mbetawɔ le nde, kete tayonga l’elongamelo ka shikaa ka lɔsɛnɔ la pondjo. Ndo nto, lo nsala ngasɔ, tayoleka ndjasukanya la Jehowa Nzambi. Oko wakatadiɛnyi, nsala la wolo dia ndjela ɛnyɛlɔ ka Yeso lushi la lushi mbele yoho yoleki dimɛna ya nkitanyiya didjango diaki Nzambi diata ɔnɛ: “Nyokoyake Nzambi, oko wenyu anande wa ngandji.”​—Ɛfɛsɔ 5:1.

21. Ngande wangamula ambeki waki Yeso osase l’andja ɔnɛ wa wodjima?

²¹ Lo mbokoya Yeso la Jehowa She, tekɔ la diɛsɛ dia woke. Sho ngamulaka osase. Lo andja ɔnɛ wele lo wodjima wa tshududu, wele miliyara y’anto wambonganyiyama oma le  Satana ndo wekɔ lo mbokoya waonga ande, sho ambeki waki Kristo tekɔ lo dianganya osase wa wolo l’ahole tshɛ, mbuta ate osase w’akambo wa mɛtɛ wa l’Afundelo, osase wa waonga w’amɛna w’Okristo, osase w’ɔngɛnɔngɛnɔ wa mɛtɛ, wa wɔladi wa mɛtɛ ndo wa ngandji ka mɛtɛ. L’etena kakɔ kaamɛ, tekɔ lo ndeka ndjasukanya la Jehowa ndo ɔsɔ mbele oyango woleki tshɛ wahomba mbesa ditongami diele la yimba.

22, 23. a) Ɛtshɔkɔ akɔna wayokondja wanɛ watetemala ndjela Yeso la kɔlamelo tshɛ? b) Yɛdikɔ yakɔna yahombaso mbɔsa?

²² Ohokanyiya nto kɛnɛ kayokosalɛ Jehowa lo tshimbo ya Mɛsiya Nkumekanga. Kem’edja, Nkumekanga kɛsɔ ayanga ndɔsha Satana la dikongɛ diande di’akambo dia kɔlɔ ta dia losembwe. Yeso mɛtɛ ayodja otshumba! (Ɛnyɛlɔ 19:11-15)  Oma laasɔ, Kristo ayotatɛ Ɛlɔmbwɛlɔ kande k’ɛnɔnyi kinunu la nkɛtɛ. Lowandji lande l’oma l’olongo lɔsɔ layosha anto efula wele la kɔlamelo ɛtshɔkɔ w’oma l’oshinga w’etshungwelo ndo ayokonya anto asɔ kokele. Ohɔsa dia wɛ aya la yoonge ya dimɛna, ele la wolo w’ɔlɔngɔlɔngɔ, akamba l’ɔngɛnɔngɛnɔ tshɛ kaamɛ la nkumbo k’otondo kele kaamɛ dia nkadimola nkɛtɛ paradiso! L’ekomelo k’ɛnɔnyi kinunu, Yeso ayokaloya lowandji le She. (1 Kɔrɛtɔ 15:24) Naka wɛ ntetemala ndjela Kristo la kɔlamelo tshɛ, kete wɛ ayɔtshɔkwama lo yɛdikɔ yahayakoke nkanyiya, mbuta ate wɛ ayonga “la lotshungɔ la lotombo la ana wa Nzambi”! (Rɔmɔ 8:21) Eelo, tayokondja ɛtshɔkɔ tshɛ wakashisha Adama l’Eva. Oko wayotonga ana wa la nkɛtɛ waki Jehowa, tayotshungɔ pondjo oma lo pɛkato ka Adama. Lo mɛtɛ, “nyɔi hatoyala nto.”​—Ɛnyɛlɔ 21:4.

²³ Tohɔ dikambo dia ɔlɔngɔlɔngɔ waki owandji w’ɔngɔnyi wakatatɛkɛta dikambo diande lo tshapita 1. Nde akatone leeta laki Yeso l’ɔnɛ: “Yaka, ondjele.” (Makɔ 10:17-22) Tatosalake munga ka ngasɔ pondjo! Tetawɔ leeta laki Yeso l’ɔngɛnɔngɛnɔ ndo l’osalosalo tshɛ. Tɔshi yɛdikɔ ya ntetemala mbikikɛ ndo ndjela Olami w’ɔlɔlɔ w’ɛkɔkɔ lushi la lushi, ɔnɔnyi l’ɔnɔnyi, ko tayɛna ekotshamelo ka diambo ka asangwelo tshɛ waki Jehowa!