1, 2. Kakɔna kakasale Yeso la dikɔlɔ di’ekomelo diakandetsha kaamɛ la apɔstɔlɔ ande ndo lande na kaki diaaso sɔ ohomba efula le nde?

 ETENA kakasangana Yeso kaamɛ la apɔstɔlɔ ande lo luudu lɔmɔtshi la la diko la la Jɛrusalɛma, nde akeye ɔnɛ ɔsɔ mbaki dikɔlɔ di’ekomelo dia nde nsangana kaamɛ la wɔ. Etena ka nde nkalola l’olongo le She kaki suke la nkoka. Nde akahombe mindama l’ɔkɔngɔ wa wenya engana eto ndo mbetawɔ kande kaki suke la pembama lo yoho yoleki tshɛ. Koko, kaanga nyɔi kande kaki k’emembe kɛsɔ kombokonya dia nde minya yimba l’ehomba w’apɔstɔlɔ ande.

² Kaanga mbakalɔngɔsɔla Yeso apɔstɔlɔ ande lo woho wakinde suke la mbatshika, nde aki l’akambo akina efula wa mbatɛ dia mbakeketsha lo kɛnɛ kendana la akambo wakaakongɛka la ntondo. Ɔnkɔnɛ, nde aketsha wenya w’ekomelo ɛsɔ dia mbaetsha awui w’ohomba efula wakahombe mbaakimanyiya dia vɔ ntshikala la kɔlamelo. Awui wakandawatɛ la dikɔlɔ sɔ waki l’atei w’awui wakaleke nkɛnɛmɔla ngandji kakandawaokaka. Ko, lande na kakaleke Yeso ndjakiyanya dikambo di’apɔstɔlɔ ande oleki dikambo diande ndamɛ? Lande na kakandɔshi dia wenya w’ekomelo wakandetsha la wɔ ɛsɔ wakaleke ohomba le nde? Ele l’ɔtɛ wa ngandji k’efula kakandawaokaka.

3. Ngande weyaso dia Yeso kokonga paka la dikɔlɔ di’ekomelo ko nde ndjɛnya ngandji kakandokaka ambeki ande?

³ Ɛnɔnyi akumi l’ɔkɔngɔ, etena kakandayotatɛka mfunda ɔkɔndɔ ande wakasambiyama w’akambo wakete la dikɔlɔ sɔ, ɔpɔstɔlɔ Joani akafunde ɔnɛ: “Lam’ele nde akeyaka la ntondo ka fɛtɛ k’Elekanelo dia wonya ande ambokoka dia nde mimɔ oma l’andja ɔnɛ ko nde ntshɔ le She, Yeso akalange anto ande waki l’andja ndo akaalange polo l’ekomelo.” (Joani 13:1)  Yeso kokonga dia paka la dikɔlɔ sɔ ko nde ndjɛnya ngandji kakandokaka “anto ande.” L’edja tshɛ k’olimu ande w’esambishelo, lo toho totshikitanyi, nde akɛnya ngandji kakandokaka ambeki ande. Ekɔ ohomba sho nsɛdingola toho tɔmɔtshi takandɛnya ngandji kɛsɔ, nɛ dia lo mbookoya lo dikambo sɔ, sho mɛnyaka dia tekɔ ambeki ande wa mɛtɛ.

4, 5. a) Lande na kaki Yeso l’ohomba wa monga la solo dia lotutsha otsha le ambeki ande? b) Kakɔna kakasale Yeso etena kakandatane apɔstɔlɔ ande asato walala djɔ l’ekambɔ ka Ngɛtɛsɛmanɛ?

⁴ Ngandji la solo dia lotutsha kambaka kaamɛ. 1 Kɔrɛtɔ 13:4 mbutaka ɔnɛ: “Ngandji ekɔ la solo dia lotutsha.” Onde Yeso aki l’ohomba wa monga la solo dia lotutsha otsha le ambeki ande? Eelo, nɛ dia oko wakatadiɛnyi lo tshapita 3, apɔstɔlɔ komonga suke dia nkɛnɛmɔla dionga di’okitshakitsha. Vɔ wakawane mbala efula dia mbeya ɔnɛ lakaleke woke l’atei awɔ. Kakɔna kakasale Yeso? Onde nde akomala ndo akawaombɛ tokumbɛkumbɛ? Keema, la solo dia lotutsha tshɛ, nde akakane la wɔ yimba, kaanga etena kakayotombaka ‘owanu wa wolo’ wendana la dikambo sɔ la dikɔlɔ di’ekomelo diakandetsha la wɔ!​—Luka 22:24-30; Mateo 20:20-28; Makɔ 9:33-37.

⁵ L’ɔkɔngɔ diko la dikɔlɔ di’ekomelo sɔ, etena kakatshu Yeso la apɔstɔlɔ ande 11 wa kɔlamelo l’ekambɔ ka Ngɛtɛsɛmanɛ, solo diande dia lotutsha diakatɔtɔka l’ohemba nto. Yeso akatshike apɔstɔlɔ akina enanɛi ko akɔshi Petero, Jakɔba la Joani ndo akatshu la wɔ l’atei w’ekambɔ. Yeso akawatɛ ate: “Dimi lekɔ la lonyangu l’efula polo lo nyɔi. Nyotshikale lanɛ ndo nyɔsɛnake kaamɛ la mi.” Nde akangana la wɔ tshalola ndo akatatɛ nɔmba l’etete. L’ɔkɔngɔ wa nde nɔmba etena k’otale, nde akakalola oya le apɔstɔlɔ ande asato. Kakɔna kakandaatane wasala? Lo etena k’ohemba wakaleke wolo le nde kɛsɔ, vɔ wakalalaka djɔ! Onde nde akaahangwɛ lo woho wakiwɔ kotetemala nsungukala? Keema, la solo dia lotutsha tshɛ nde akaakeketsha. Ɛtɛkɛta ande wa la ngandji wakɛnya dia nde  akashihodia lonyangu laki la wɔ kaamɛ ndo wɛɔdu awɔ. a Nde akate ate: “Otema nangaka, koko demba mbele wɔdu.” Yeso akatetemala monga la solo dia lotutsha la dikɔlɔ sɔ, kaanga etena kakandaye ko ndjaatana lo djɔ mbala nkina hiende nto!​—Mateo 26:36-46.

6. Ngande wakokaso mbokoya Yeso lo woho wasalɛso anto akina akambo?

⁶ Ekɔ dui diekeketshelo dia mbeya dia Yeso kɔmbɔsa di’apɔstɔlɔ ande hawotshikitanaki. Solo diande dia lotutsha diaki l’etombelo w’ɛlɔlɔ nɛ dia apami wa kɔlamelo asɔ wakakondja wetshelo w’ohomba efula wa monga l’okitshakitsha ndo sungukalaka. (1 Petero 3:8; 4:7) Ngande wakokaso mbokoya Yeso lo woho wasalɛso anto akina akambo? Lo yoho ya laande, dikumanyi pombaka monga la solo dia lotutsha. Asekaso ambetawudi mbeyaka ndja le ekumanyi dia ndjowotɛ ekakatanu wele la wɔ, etena kele ekumanyi ndamɛ ambɔlɛmba kana ekɔ lo ndjakiyanya l’ɔtɛ w’ekakatanu ande hita. Tena dimɔtshi, mbeyaka monga ko anto wele l’ohomba w’ekimanyielo hawokambe l’alako walongolawɔ. Koko, dikumanyi diele la solo dia lotutsha wayowakimanyiya la “memakana” ndo ‘wayosalɛ ɛkɔkɔ akambo la ngandji.’ (2 Timɔte 2:24, 25; Etsha 20:28, 29) Ambutshi vɔ lawɔ pombaka mbokoya Yeso lo monga la solo dia lotutsha, nɛ dia lo tena dimɔtshi mbeyaka monga ko ana hawoke alako kana mbetawɔ engwelo kalongolawɔ. Ngandji ndo solo dia lotutsha ayokimanyiya ambutshi diaha vɔ mpekɔ dia mbidja welo dia mbetsha anawɔ. Solo dia lotutsha dia ngasɔ mbelaka ɛlɔlɔ efula.​—Osambo 127:3.

7. Lo toho takɔna takakotshaka Yeso ehomba wa l’emunyi w’ambeki ande?

⁷ Ngandji mɛnamaka oma lo etsha waha la lokaki. (1 Joani 3:17, 18) Ngandji “hayange wahɔ ande hita.” (1 Kɔrɛtɔ 13:5)  Ngandji kakatshutshuyaka Yeso dia nkotsha ehomba wa l’emunyi w’ambeki ande. Mbala efula nde akasalaka akambo lo wahɔ awɔ kaanga la ntondo ka vɔ mbotɛ ehomba awɔ. Etena kakandɛnyi dia vɔ wambɔlɛmba, nde akawatɛ dia vɔ ntshɔ la nde ‘lo dihole dia diɛta dia vɔ tomuya yema.’ (Makɔ 6:31) Lam’akandɛnyi dia vɔ wekɔ la ndjala, nde akɔsɛ yɛdikɔ ya mbalesha vɔ la nunu di’anto akina wakaye dia ndjohokamɛ wetshelo ande.​—Mateo 14:19, 20; 15:35-37.

8, 9. a) Kakɔna kɛnya dia Yeso akeyaka ehomba wa lo nyuma waki ambeki ande ndo akaakotshaka? b) Etena kakandahanema l’otamba, ngande wakɛnya Yeso dia nde akayakiyanyaka efula dikambo dia nyango?

⁸ Yeso akeyaka ehomba wa lo nyuma waki l’ambeki ande ndo akaakotshɛkawɔ. (Mateo 4:4; 5:3) Mbala efula lo wetshelo ande, nde akalekaka mbidja yimba le wɔ. Dako dia lo dikona diakaleke mendana l’ambeki ande. (Mateo 5:1, 2, 13-16) Etena kakandetshaka la wɛɛla, “nde akalembetshiyaka ambeki ande akambo tshɛ lo shɔpɔ.” (Makɔ 4:34) Yeso akate dia  nde ayɔsɔna “ɔhɔmbɔ wa kɔlamelo ndo kɛsɔ” dia mbishaka ambeki Ande mbo ya ndɛ ya lo nyuma lo nshi y’ekomelo. Ɔhɔmbɔ wa kɔlamelo ɔsɔ, wokengami la djui y’anango Yeso w’akitami wa nyuma weke la nkɛtɛ, wekɔ lo mbisha ‘mbo ya ndɛ ya lo nyuma lo etena kahombama’ ntatɛ oma lo 1919 lo T.D.​—Mateo 24:45.

⁹ Lushi la nyɔi kande, Yeso akɛnya lo yoho yananda otema woho wakandayakiyanyaka dikambo di’ehomba wa lo nyuma w’anto wakandokaka ngandji. Ɔsa diele oko wɛ ekɔ lo mɛna akambo anɛ: Yeso ambohanema l’otamba w’asui adiɛnɛ la kandji k’efula. Dia nde mpɛnga, ondo nde pombaka ndjaonyiya yema, ndo aha la taamu dui sɔ mboshaka paa efula l’anya ndo l’ekolo nɛ dia demba tatɛka mpota yema yema l’ahole wakawɔkɔkɔdi sɛti ndo ɔkɔngɔ ande wele vwa la mpota wekɔ lo mpokama l’otamba. Dia nde ntɛkɛta pombaka nde mpɛnga ndo dui sɔ mboshaka paa efula. Koko, yema tshitshɛ la ntondo ka nde mvɔ, Yeso ambotondja ɛtɛkɛta wɛnya ngandji k’efula kokande Mariya wa nyango. Oko wambondɛna  ɔpɔstɔlɔ Joani suke la Mariya, Yeso ambotɛ Mariya la dui dia wolo dia anto tshɛ mboka ate: “Womoto, enda ɔnayɛ!” Oma laasɔ, nde ambotɛ Joani ate: “Eenda nyɔ!” (Joani 19:26, 27) Yeso akeyaka dia ɔpɔstɔlɔ wa kɔlamelo ɔsɔ ayokotshaka ehomba wa l’emunyi ndo wa lo nyuma waki Mariya. b

10. Ngande wakoka ambutshi mbokoya Yeso lo nkotsha ehomba w’anawɔ?

¹⁰ Ambutshi wele la ngandji mɛnaka ohomba wa mbokoya ɛnyɛlɔ ka Yeso. Papa koka nkumbo kande ngandji ka mɛtɛ mbakotshɛka ehomba awɔ wa l’emunyi. (1 Timɔte 5:8) La wɛdimo, owandji wa nkumbo wele la ngandji nɔngɔsɔlaka tena dia nkumbo kande momuyaka ndo kɔkɔlaka demba. Kɛnɛ koleki ohomba ele, ambutshi w’Akristo kotshaka ehomba wa lo nyuma w’anawɔ. Lo woho akɔna? Ambutshi wa ngasɔ nɔngɔsɔlaka wekelo wa Bible wa lo nkumbo mbala la mbala ndo vɔ salaka la wolo dia wekelo ɔsɔ monga tena diakeketsha ndo di’ɔngɛnɔngɛnɔ le anawɔ. (Eohwelo k’Ɛlɛmbɛ 6:6, 7) Oma l’ɛtɛkɛta ndo oma l’ɛnyɛlɔ kawɔ, ambutshi mbetshaka anawɔ dia olimu w’esambishelo mbele olimu woleki ohomba ndo ɔnɛ nɔngɔsɔla nsanganya y’Akristo ndo ndjiɔtɔ ekɔ etenyi kɛmɔtshi k’ohomba efula k’awui wa lo nyuma wasalema lushi la lushi.​—Hɛbɛru 10:24, 25.

11. Kakɔna kaketsha Yeso ambeki ande lo kɛnɛ kendana la dimanyiyana?

¹¹ Edimanyielo ekɔ djembetelo ya ngandji. (Kɔlɔsayi 3:13, 14) 1 Kɔrɛtɔ 13:5 mbutaka dia ngandji “hadia akambo wa kɔlɔ wosalɛwɔ.” Lo waaso efula Yeso aketsha ambeki ande ohomba wa dimanyiyana. Nde akaakeketsha dia vɔ dimanyiyaka anto akina, “aha polo mbala 7, koko polo mbala 77,” mbuta ate mbala yaheyama mbadia. (Mateo 18:21, 22) Nde akawaetsha dia otshi wa pɛkato pombaka dimanyiyama naka nde  amboyatshumoya l’ɔkɔngɔ wa nde nongola lohango. (Luka 17:3, 4) Yeso komonga oko Afarisɛ wa dungi pende wanɛ waketshaka tsho l’ɛtɛkɛta, koko nde aketsha nto oma l’ɛnyɛlɔ kande. (Mateo 23:2-4) Nyɛsɔ tende woho waketawɔ Yeso dimanyiya kaanga etena kakosalɛ ɔngɛnyi ande w’oshika kɔlɔ.

12, 13. a) Lo woho akɔna wakasalɛ Petero Yeso kɔlɔ l’otsho wakandandama? b) Ngande wɛnya kɛnɛ kakasale Yeso l’ɔkɔngɔ wa nde mbolɔ dia nde kokomɛ tsho lo mbetsha anto dia dimanyiyanaka?

¹² Yeso aki la diɔtɔnganelo dia ma ma nde l’ɔpɔstɔlɔ Petero, pami k’osalosalo ndo kakasalaka awui tena dimɔtshi l’ekombakomba. Oko wakandeyaka waonga w’ɛlɔlɔ waki la Petero, Yeso akawosha ɛkɛndɛ wa laande. Petero kaamɛ la Jakɔba ndo Joani wakɛnyi ahindo amɔtshi wele apɔstɔlɔ akina kɔmɛna. (Mateo 17:1, 2; Luka 8:49-55) Oko wakatadiɛnyi la diko, ndo Petero mbaki l’atei w’apɔstɔlɔ wakatshu kaamɛ la Yeso l’atei w’ekambɔ ka Ngɛtɛsɛmanɛ l’otsho wakawawonde. Koko, l’otsho akɔ waamɛ ɔsɔ, etena kakafungama Yeso ndo kakandandama, Petero la apɔstɔlɔ akina wakolawɔ. L’ɔkɔngɔ diko, la dihonga tshɛ Petero akatshu suke la dihole diakawalomboshaka Yeso kilombo kaha la losembwe. Koko, Petero akatondama la wɔma ndo nde akasale munga ka woke efula ka manguna Yeso mbala shato y’etondo ɔnɛ nde haweye. (Mateo 26:69-75) Kakɔna kakasale Yeso? Kakɔna kakokayɛ nsala naka ɔngɛnyi ayɛ w’oshika ambokosalɛ kɔlɔ ka ngasɔ?

¹³ Yeso aki suke dia dimanyiya Petero. Nde akeye dia Petero akayakiyanya efula l’ɔtɛ wa pɛkato kakandasale. Lo mɛtɛ, ɔpɔstɔlɔ wakayatshumoya ɔsɔ “akasongotɔ ndo akatatɛ ndela.” (Makɔ 14:72) Lushi lakandolɔ, Yeso akɛnama le Petero, ondo dia mbokeketsha. (Luka 24:34; 1 Kɔrɛtɔ 15:5) La ntondo ka ngɔndɔ hiende koka, Yeso akasha Petero nɛmɔ lo mbosha diɛsɛ dia nde mbeta la ntondo lo kɛnɛ kendana l’esambishelo kakasalema la Jɛrusalɛma la ntondo k’olui w’anto lushi la Pɛntɛkɔsta. (Etsha 2:14-40) Tatohɛke nto dia Yeso komombɛ apɔstɔlɔ tokumbɛkumbɛ l’ɔtɛ wakawolawɔ. Kaanga l’ɔkɔngɔ wa nde mbolɔ, nde akatetemala mbaelɛ ɔnɛ “analengo.” (Mateo  28:10) Mbokɛmaka hwe dia Yeso kokomɛ tsho lo mbetsha anto dia dimanyiyanaka, koko nde akadimanyiyanaka.

14. Lande na kahombaso mbeka dia dimanyiyaka anto akina ndo ngande wakokaso mɛnya dia tekɔ suke dia dimanyiya?

¹⁴ Oko weso ambeki wa Kristo, sho pombaka mbeka dia dimanyiyaka anto akina. Lande na? Nɛ dia otshikitanyi la Yeso, sho keema kokele oko wele ndo anto wakoka tosalɛ kɔlɔ. Mbala ko mbala sho tshɛ takanaka l’ɛtɛkɛta ndo l’etsha. (Rɔmɔ 3:23; Jakɔba 3:2) Naka sho dimanyiya anto akina etena kakokaso nsala dui sɔ, kete Nzambi ayokoka todimanyiya pɛkato yaso. (Makɔ 11:25) Ko, ngande wakokaso mɛnya dia tekɔ suke dia dimanyiya wanɛ watosalɛ kɔlɔ? Mbala efula, ngandji tokimanyiyaka dia minya washo lo pɛkato ndo munga ya totshitshɛ yatosalɛ anto akina. (1 Petero 4:8) Etena kayatshumoya onto lotosale pɛkato l’otema ɔtɔi, l’ɛnyɛlɔ ka Petero, sho mbokoyaka Yeso lo mbodimanyiya. Hatowombɛ kumbɛkumbɛ. (Ɛfɛsɔ 4:32) Lo nsala ngasɔ, sho kimanyiyaka dia wɔladi monga l’etshumanelo ndo dia shoamɛ monga la wɔladi wa lo yimba ndo wa l’etei k’otema.​—1 Petero 3:11.

15. Lande na kakɛkɛka Yeso otema le ambeki ande kaanga mbakawasalaka munga?

¹⁵ Ngandji kakatana la wɛkɛlɔ w’otema. Ngandji “mbetawɔka akambo tshɛ.” c (1 Kɔrɛtɔ 13:7) Oma lo ngandji kaki la nde, Yeso akɛnya dia nde aki suke dia mbɛkɛ otema le ambeki ande, kaanga mbakawasalaka munga. Nde akɛkɛka otema le wɔ ndo nde akeyaka dia vɔ mbokaka Jehowa ngandji ka mɛtɛ l’etema awɔ ndo wakalangaka nsala lolango Lande. Kaanga etena kakawasalaka munga, Yeso komvɔ eyango waki la wɔ tshɔdia. Ɛnyɛlɔ, etena kakatshu ɔpɔstɔlɔ Jakɔba nde la Joani kaamɛ la nyangɛwɔ dia tɔlɔmba dia nde mbetawɔ dia vɔ  mbidjasɛ suke la nde lo Diolelo diande, Yeso kombuta ɔnɛ vɔ wamboshisha kɔlamelo ndo nde kombanya l’ɔnɔngɔ w’apɔstɔlɔ ande.​—Mateo 20:20-28.

16, 17. Ɛkɛndɛ akɔna wakasha Yeso ambeki ande?

¹⁶ Lo mɛnya woho wakandɛkɛka otema le wɔ, Yeso akasha ambeki ande ɛkɛndɛ efula. Lo waaso ehende, etena kakandafudia diangɔ dia ndɛ lo dihindo ndo kakandalesha elui w’anto, nde akasha ambeki ande ɔkɛndɛ wa nkahanya diangɔ sɔ. (Mateo 14:19; 15:36) Dia nɔngɔsɔla Elekanelo k’ekomelo, nde akatome Petero la Joani la Jɛrusalɛma dia vɔ tɔlɔngɔsɔla akambo. Vɔ wakayange dia nkondja ɔna ɔkɔkɔ, wanu, mapa waha la wodoya ndo diangɔ dikina. Ɔsɔ komonga ɔkɛndɛ w’anyanya, nɛ dia Ɛlɛmbɛ wa Mɔsɛ wakadjangaka dia Elekanelo salema lo yoho ya dimɛna ndo Yeso akakitanyiyaka ɛlɛmbɛ ɛsɔ. Ndo nto, l’ɔkɔngɔ la dikɔlɔ sɔ, Yeso akayokamba la wanu ndo la mapa waha la wodoya oko tolembetelo t’ohomba efula etena kakandahɔhɔla Eohwelo ka nyɔi kande.​—Mateo 26:17-19; Luka 22:8, 13.

¹⁷ Yeso akɛnyi dimɛna dia mbisha ambeki ande ɛkɛndɛ ekina w’ohomba efula. Tohɔ nto dia nde akasha ambeki ande ɔkɛndɛ w’ohomba efula wa nsambisha ndo mbetɛ anto ambeki. (Mateo 28:18-20) Oko wakatadiɛnyi, nde akatatshi dia nde ayosha djui y’ambeki ande w’akitami wa la nkɛtɛ ɔkɛndɛ w’ohomba efula wa mbisha anto mbo ya ndɛ ya lo nyuma. (Luka 12:42-44) Kaanga mbele ɛlɔ kɛnɛ nde hɛnama ndo ekɔ lo mbolɛ l’olongo, Yeso akasha “apami wele oko weshasha” wele l’akoka ɔkɛndɛ wa kotshaka ehomba wa lo nyuma w’etshumanelo kande.​—Ɛfɛsɔ 4:8, 11, 12.

18-20. a) Ngande wakokaso mɛnya dia sho mbɛkɛka otema le asekaso ambetawudi? b) Ngande wakokaso mbokoya woho waketawɔka Yeso dia mbisha anto akina ɛkɛndɛ? c) Kakɔna kayotɔsɛdingola lo tshapita yayela?

¹⁸ Ngande wakokaso ndjela ɛnyɛlɔ ka Yeso lo woho wasalɛso anto akina akambo? Woho wɛkɛso etema le asekaso ambetawudi mɛnyaka dia sho mbaokaka ngandji. Tatohɛke dia ngandji mɛnaka akambo la sso di’ɔlɔlɔ. Etena katosalɛ anto akina  kɔlɔ, oko wayowotosalɛka mbala la mbala, ngandji kayotokimanyiya diaha sho mbuta esadi eto ɔnɛ vɔ wekɔ l’eyango wa kɔlɔ. (Mateo 7:1, 2) Naka sho ntetemala mɛna asekaso ambetawudi la sso di’ɔlɔlɔ, kete tayowasalɛka akambo lo yoho ya mbakeketsha koko aha ya mbatɛwɔla.​—1 Tɛsalɔnika 5:11.

¹⁹ Onde sho kokaka mbokoya woho waki Yeso suke dia mbisha anto akina ɛkɛndɛ? Ekɔ ohomba efula dia wanɛ wele la yema ya lowandji l’etshumanelo mbisha anto akina ɛkɛndɛ wakokawɔ nkotsha dia vɔ mɛna ɔnɛ vɔ mbɛkɛka etema le wɔ. Diakɔ diele, dikumanyi diambohokɔ akambo ndowanyaka ndo mbetshaka ɛlɔngɔlɔngɔ wele l’akoka dia vɔ ‘nkotsha kɛnɛ kalɔmbama’ dia nkimanyiya etshumanelo. (1 Timɔte 3:1; 2 Timɔte 2:2) Wetshelo ɔsɔ wekɔ ohomba efula. Oko watatetemala Jehowa mpamia olimu wa Diolelo, ohomba w’apami wele l’akoka ndo wambolowanyema wekɔ lo tatetemala monga.​—Isaya 60:22.

²⁰ Yeso akatotshikɛ ɛnyɛlɔ koleki tshɛ dimɛna ka mboka anto akina ngandji. Mbokoya ngandji kande mbele yoho yoleki ohomba yakokaso mboyela. Lo tshapita yayela tayɔsɛdingola djembetelo yoleki woke ya ngandji kakatoke Yeso, mbuta ate woho wakandetawɔ nkimɔ lɔsɛnɔ lande.