1-3. Kakɔna kakalange Jehowa dia Ɛzɛkiyɛlɛ mɛna lo tɛmpɛlɔ ka la Jɛrusalɛma, ndo lande na? (Enda ɛtɛkɛta wa mbɔtwɛlɔ ndo osato wa Etenyi 2.)

OKO wakinde ɔnaki ɔlɔmbɛdi, omvutshi Ɛzɛkiyɛlɛ akeyaka Ɛlɛmbɛ wa Mɔsɛ dimɛna efula. Diakɔ diele, nde akekesanɛ la tɛmpɛlɔ ka la Jɛrusalɛma ndo woho wakahombaka ɔtɛmwɛlɔ wa pudipudi wa Jehowa salema lɔkɔ. (Ɛzk. 1:3; Mal. 2:7) Koko kakianɛ, lo 612 N.T.D., kɛnɛ keta lo tɛmpɛlɔ ka Jehowa kakahombe nyangiya ose Juda tshɛ la kɔlamelo, mbidja ndo Ɛzɛkiyɛlɛ.

² Jehowa nangaka dia Ɛzɛkiyɛlɛ mɛna awui wa kɔlɔ weta lo tɛmpɛlɔ, ko oma laasɔ nde mbutɛ “dikumanyi dia Juda,” asekande w’ase Juda wakatɔlama lo lɔhɔmbɔ wakatshumana lo luudu lande awui wɛnande. (Adia Ɛzɛkiyɛlɛ 8:1-4; Ɛzk. 11:24, 25; 20:1-3) Lo tshimbo ya nyuma k’ekila, Jehowa ambɛmba Ɛzɛkiyɛlɛ (lo ɛnɛlɔ) oma lo luudu lande la la Tɛlɛ-Abiba, suke la ɔkɛdi wa Kebara la Babilɔna, kilɔmɛtrɛ nkama otsha lo owɛstɛ wa Jɛrusalɛma. Jehowa ambodjashiya omvutshi ɔsɔ lo tɛmpɛlɔ, lo soko dia lo nɔrdɛ dia lo sɛkɛ dia l’etei. Oma lɛkɔ, Jehowa ambowɔsa lo ɛnɛlɔ dia nde mbeetshetsha lo tɛmpɛlɔ.

³ Kakianɛ Ɛzɛkiyɛlɛ ambɛna akambo anɛi wa kɔlɔ ka ditshi wɛnya di’ɔtɛmwɛlɔ wa pudipudi waya tshɛ mindo. Kakɔna kambokomɛ  ɔtɛmwɛlɔ wa pudipudi wa Jehowa? Kitshimudi yakɔna yele l’ɛnɛlɔ kɛnɛ le so ɛlɔ kɛnɛ? Nyɛsɔ tonge oko anto wateeteta kaamɛ la Ɛzɛkiyɛlɛ lo tɛmpɛlɔ. Ntondotondo, sho pombaka nsɛdingola kɛnɛ mɛtɛ kalongamɛ Jehowa oma le atɛmɔdi ande.

4. Kakɔna kalongamɛ Jehowa oma le atɛmɔdi ande?

⁴ Ɛnɔnyi oko nkama divwa la ntondo k’Ɛzɛkiyɛlɛ, Jehowa akɛnya hwe kɛnɛ kalongamɛnde oma le atɛmɔdi ande. Lo ɔlɛmbɛ wa hende wa lo Ɛlɛmbɛ Dikumi, nde akatɛ ase Isariyɛlɛ ɔnɛ: * “Dimi Jehowa Nzambi kayɛ lekɔ Nzambi kalɔmba dia mamemami paka dimɛ oto.” (Eto. 20:5) Etelo k’ɔnɛ “mamemami paka dimɛ oto,” mɛnyaka dia Jehowa hetawɔki pondjo ɔtɛmwɛlɔ wa tozambizambi tokina tshɛ. Oko wakatɛnyi lo tshapita ya 2 ya dibuku nɛ, dui dia ntondo dialɔmbama l’ɔtɛmwɛlɔ wa pudipudi ele, Jehowa mbele ɔnɛ lahombaso ntɛmɔla. Atɛmɔdi ande pombaka mbeetsha lo dihole dia ntondo lo nsɛnɔ yawɔ. (Eto. 20:3) Lo tshena pe, Jehowa nongamɛka di’atɛmɔdi ande monga pudipudi lo nyuma ndo aha la nsɔhanya ɔtɛmwɛlɔ wa mɛtɛ la wa kashi. Lo 1513 N.T.D., ase Isariyɛlɛ waketawɔ mbɔtɔ lo sheke y’Ɛlɛmbɛ la lolango lawɔ. Lo nsala ngasɔ, vɔ waketawɔ dia tɛmɔlaka paka Jehowa oto. (Eto. 24:3-8) Jehowa ekɔ la kɔlamelo lo toseke tande, ndo nde nongamɛka di’anto ande wadja la nde sheke monga la kɔlamelo ya ngasɔ.​—Eoh. 7:9, 10; 2 Sa. 22:26.

5, 6. Lande na kakahombe ase Isariyɛlɛ mamema paka Jehowa ndamɛ oto?

⁵ Onde aki dimɛna dia Jehowa nɔmba ase Isariyɛlɛ dia mbɔtɛmɔlaka paka ndamɛ oto? Eelo! Nde ekɔ Nzambi Kanga-Wolo-Tshɛ, Owandji Waheme Laadiko dia Tshɛ ndo nde mbele Kiɔkɔ ya lɔsɛnɔ ndo Ɔnɛ lalisukɛ. (Os. 36:9; Ets. 17:28) Jehowa aki nto Otshungodi w’ase Isariyɛlɛ. Etena kakandawasha Ɛlɛmbɛ Dikumi, nde akawaohola ɔnɛ: “Dimi kele Jehowa Nzambi kayɛ lakakotondja oma lo wodja w’Edjibito, oma lo luudu la lɔhɔmbɔ.” (Eto. 20:2) Mbokɛmaka hwe dia, aki dimɛna di’ase Isariyɛlɛ tɛmɔlaka paka Jehowa ndamɛ oto.

⁶ Jehowa hatshikitana. (Mal. 3:6) Nde okolongamɛka di’anto mbɔtɛmɔla paka ndamɛ oto. Ohokanyiya woho wakayaoke Jehowa lo dikambo dia akambo wa kɔlɔ anɛi wakandɛnya Ɛzɛkiyɛlɛ lo ɛnɛlɔ.

7. a) Kakɔna kakasalaka ase Juda waki waa apɔsta lo soko dia lo nɔrdɛ dia tɛmpɛlɔ, ndo dui sɔ diakakonya Jehowa dia nsala na? (Enda osato wele lo mbɔtwɛlɔ.) b) Lo yoho yakɔna yaki Jehowa la kandjema? (Enda nɔtɛ ka l’ɛse ka dikatshi 2.)

⁷ Adia Ɛzɛkiyɛlɛ 8:5, 6. Ɛzɛkiyɛlɛ akahombe mɛtɛ monga la lonyangu! Lo soko dia lo nɔrdɛ ka tɛmpɛlɔ, ase Juda wanɛ waki waa apɔsta wakatɛmɔlaka djembetelo ya ekishi kana lohingu. Ondo ɔsɔ aki kimɛta ka l’osongo kaki didjidji dia Ashɛra, jambizambi ya womoto yakɔsaka ase Kanana oko wadi aki Baala. Oyadi aki ngasɔ kana bu, ase Isariyɛlɛ wanɛ wakatɛmɔlaka dikishi asɔ kokotsha alaka awɔ otsha le Jehowa. Lo ntɛmɔla ekishi kɛsɔ, etena kele  Jehowa ndamɛ oto mbahombawɔ ntɛmɔla, ase Isriyɛlɛ wakatshutshuya Nzambi dia monga la kandjema ndo wakawootsha nkɛlɛ ka losembwe. * (Eoh. 32:16; Ɛzk. 5:13) Ohokanyiya dui nɛ: L’edja k’ɛnɔnyi ndekana 400, tɛmpɛlɔ k’ekila kaki la diɔtɔnganelo la woongelo wa Jehowa. (1 Ku. 8:10-13) Koko kakianɛ, lo mbɔtshiya ɔtɛmwɛlɔ wa dikishi lo tɛmpɛlɔ, atɛmɔdi wa dikishi asɔ wakasale dia Jehowa “mangana etale la tɛmpɛlɔ [kande] k’ekila.”

8. Kitshimudi yakɔna yele la ɛnɛlɔ ka Ɛzɛkiyɛlɛ ka djembetelo ya ekishi ka kandjema le so ɛlɔ kɛnɛ?

⁸ Kitshimudi yakɔna yele la ɛnɛlɔ ka Ɛzɛkiyɛlɛ ka djembetelo ya ekishi ka kandjema le so ɛlɔ kɛnɛ? Aha la taamu, wodja wa Juda w’apɔsta toholaka Lokristokristo. Ɔtɛmwɛlɔ wa dikishi wambokokanɛ lo ɛtɛmwɛlɔ wa Lokristokristo wasɛma dia vɔ tɛmɔlaka Nzambi, koko Nzambi hetawɔ ɔtɛmwɛlɔ awɔ nɛ dia vɔ tɛmɔlaka dikishi. Lam’ele Jehowa hatshikitana, sho koka monga l’eshikikelo dia l’ɛnyɛlɔ ka wodja wa Juda w’apɔsta, Lokristokristo lambootsha Jehowa nkɛlɛ kande ka losembwe. (Jak. 1:17) Lo mɛtɛ, Jehowa mangana etale la Lokristokristo lɔsɔ!

9, 10. Ɔhɛmwɛlɔ akɔna wakokaso nkondja oma le atɛmɔdi wa dikishi waki lo tɛmpɛlɔ?

⁹ Ɔhɛmwɛlɔ akɔna wakokaso nkondja oma le atɛmɔdi wa dikishi waki lo tɛmpɛlɔ asɔ? Dia ntɛmɔla Jehowa paka ndamɛ oto, sho pombaka ‘ndawɔ ɔtɛmwɛlɔ wa dikishi.’ (1 Kɔr. 10:14) Sho koka mbuta ɔnɛ: ‘Hatokambaki pondjo la mpingu kana dikishi dia ntɛmɔla Jehowa!’ Koko ɔtɛmwɛlɔ wa dikishi mongaka lo toho totshikitanyi, toho tɔmɔtshi tekɔ ta mayɛlɛ efula ndeka tokina. Dibuku dimɔtshi dialembetshiya awui wa lo Bible mbutaka dui sɔ lo yoho nyɛ ɔnɛ: “Naka ɛngɔ tshɛ ka nɛmɔ kana lowandji, ambonga ohomba le so ndeka ntɛmɔla Nzambi, kete dui sɔ diekɔ woho akɔ waamɛ la ntɛmɔla dikishi.” Ɔnkɔnɛ, ɔtɛmwɛlɔ wa dikishi koka mendana la lomombo la l’emunyi, falanga, awui wa dieyanelo, tɔkɛnyɔ, mbuta ate ɛngɔ tshɛ kakoka mbeta lo dihole dia ntondo lo nsɛnɔ yaso. Lo nsala ngasɔ, tɔ mbɔsaka omamemelo aso wa la tshondo wahombaso mamema Jehowa. (Mat. 6:19-21, 24; Ɛf. 5:5; Kɔl. 3:5) Sho pombaka ndjalama oma lo weho tshɛ w’ɔtɛmwɛlɔ wa dikishi, nɛ dia Jehowa ndamɛ oto mbahombaso mamema l’etema aso tshɛ, mbuta ate mbɔtɛmɔlaka paka ndamɛ oto!​—1 Jni. 5:21.

¹⁰ Dikambo dia ntondo diakɛnya Jehowa Ɛzɛkiyɛlɛ mendanaka la “akambo wa diambo wa wɔnɔnyi.” Koko, Jehowa akatɛ omvutshi ande wa kɔlamelo ate: “Wɛ ayɛna akambo wa wɔnɔnyi woleki ndo wanɛ diambo efula.” Akambo akɔna wa wɔnɔnyi wakakoke ndeka ɔtɛmwɛlɔ wa djembetelo ya ekishi ka kandjema lo tɛmpɛlɔ?

11. Naa akambo wa kɔlɔ wakɛnyi Ɛzɛkiyɛlɛ l’ɔkɔngɔ wa nde mbɔtɔ lo sɛkɛ dia l’etei sukana la elambwelo ka lo tɛmpɛlɔ?

¹¹ Adia Ɛzɛkiyɛlɛ 8:7-12. Lo ntondola wosho l’ehele ndo lo mbɔtɔ lo sɛkɛ dia l’etei diosukanyi l’elambwelo ka lo tɛmpɛlɔ, Ɛzɛkiyɛlɛ ambɛna l’ehele esato wa kɔlɔ wa “diangɔ diayakotola ndo nyama  ya wɔnɔnyi ndo dikishi tshɛ dia nyɛtɛɛtɛ.” * Esato wa l’ehele ɛsɔ waki didjidji dia tozambizambi ta kashi. Dui dikina dioleki kɔlɔ diambɛna Ɛzɛkiyɛlɛ oma laasɔ ko: “Dikumanyi 70 dia lo luudu la Isariyɛlɛ” wemadi “lo wodjima” ndo watshumbɛ tozambizambi ta kashi olambo wa tshɔ. Lo ndjela Ɛlɛmbɛ, ntshumba tshɔ yele l’opumu wa dimɛna aki didjidji di’alɔmbɛlɔ wetawɔma wakasalaka atɛmɔdi wa kɔlamelo. (Os. 141:2) Koko, tshɔ yakatshumbɛka dikumanyi 70 sɔ tozambizambi ta kashi komonga dui di’ekila le Jehowa. Alɔmbɛlɔ awɔ wakikɔ oko solo ka kɔlɔ le nde. (Tok. 15:8) Dikumanyi sɔ wakayakese lo mfɔnya ɔnɛ: ‘Jehowa hawaɛnyi.’ Ko tete le Jehowa akawaɛnaka ndo nde akɛnya Ɛzɛkiyɛlɛ paka kɛnɛ mɛtɛ kakawasalaka lo tɛmpɛlɔ kande!

12. Lande na kahombaso ntshikala la kɔlamelo kaanga “lo wodjima,” ndo djekoleko waa na wahomba mbisha ɛnyɛlɔ ka dimɛna lo dikambo sɔ?

¹² Wetshelo akɔna wakokaso nkondja oma l’ɔkɔndɔ wa Ɛzɛkiyɛlɛ wa dikumanyi 70 dia lo Isariyɛlɛ sɔ diakatshumbɛka tozambizambi ta kashi tshɔ? Dia Nzambi mboka alɔmbɛlɔ aso ndo dia sho nama ɔtɛmwɛlɔ aso pudipudi lo washo ande, sho pombaka ntshikala la kɔlamelo kaanga “lo wodjima.” (Tok. 15:29) Nyɛsɔ tohɔke dia Jehowa koka mɛna oseka dui tshɛ diasalaso. Naka Jehowa ekɔ onto la mɛtɛ le so, kete hatotosala ndooko dui lo woshɛshɛ dieyaso ɔnɛ diayowonyangiya. (Hɛb. 4:13) Lo yoho ya laande, dikumanyi  dia l’etshumanelo pombaka mbisha ɛnyɛlɔ k’ɔlɔlɔ lo kambaka l’atɔndɔ w’oma lo Bible. (1 Pe. 5:2, 3) Ase etshumanelo nongamɛka dia ekumanyi kemala la ntondo kawɔ ndo kaalɔmbɔla l’awui w’ɔtɛmwɛlɔ sɛnaka lo ndjela atɔndɔ w’oma lo Bible kaanga “lo wodjima,” mbuta ate, kaanga etena kele anto akina hawowɛnyi.​—Os. 101:2, 3.

13. Kakɔna kakɛnyi Ɛzɛkiyɛlɛ kakasalaka wamato waki waa apɔsta lo soko dimɔtshi dia lo tɛmpɛlɔ?

¹³ Adia Ɛzɛkiyɛlɛ 8:13, 14. L’ɔkɔngɔ wa nde mbɛnya akambo ahende wa ntondo wa kɔlɔ wakasalemaka, Jehowa akanyomotɛ Ɛzɛkiyɛlɛ nto ate: “Wɛ ayɛna akambo wa wɔnɔnyi wa diambo efula wasalawɔ woleki ndo wanɛ.” Ko kakɔna kakɛnyi omvutshi ɔsɔ oma laasɔ? Lo “ɛɔtwɛlɔ ka soko dia lo nɔrdɛ dia lo luudu la Jehowa,” nde akɛnyi “wamato wodjashi ndo walela jambizambi Tamuza.” Ɔsɔ aki jambizambi ya la Mezɔpɔtamiya. Lo ndjela efundelo w’ase Sumɛriya, Tamuza mbelamɛka ɔnɛ Dumuzi ndo vɔ wakafɔnyaka dia nde mbakalanganaka la jambizambi ya womoto y’ɛtɛtɔ yelamɛ ɔnɛ Ishitara. * Ondo wamato w’ase Isariyɛlɛ wakalelaka lo dikambo dia nyɔi ka Tamuza ndo kɛnɛ kakawasalaka kɛsɔ kaki etenyi kɛmɔtshi ka sɛlɛmɔnyi ka lo ɔtɛmwɛlɔ kakɔtɔnɛka la nyɔi ka Tamuza. Lo ndela Tamuza lo tɛmpɛlɔ ka Jehowa, wamato asɔ wakela mbekelo kɛmɔtshi k’apanganu lo dihole diakalɔmbɔmaka ɔtɛmwɛlɔ wa pudipudi. Nsala awui wendana l’ɔtɛmwɛlɔ wa kashi lo tɛmpɛlɔ ka Jehowa, hasale dia awui akɔ mbetawɔma le Nzambi. Diakɔ diele, lo kanyi ya Jehowa, wamato w’apɔsta asɔ wakasalaka ‘akambo wa wɔnɔnyi’!

14. Wetshelo akɔna wakokaso nkondja oma lo woho wakɔsaka Jehowa kɛnɛ kakasalaka wamato waki waa apɔsta?

¹⁴ Wetshelo akɔna wakokaso nkondja oma lo woho wakɔsaka Jehowa wamato asɔ lo ndjela kɛnɛ kakawasalaka? Dia sho nama ɔtɛmwɛlɔ aso pudipudi, hatohombe pondjo mbosanganya la ditshelo dia mindo di’apanganu. Ɔnkɔnɛ, hatohombe nsala ndooko dui diele kiɔkɔ yadiɔ yekɔ oma l’ɔtɛmwɛlɔ wa kashi. Onde ekɔ mɛtɛ ohomba mbeya oma lɛnɛ oye mbekelo kɛmɔtshi? Eelo! Ɛlɔ kɛnɛ, ditshelo diɔtɔnɛ la osalelo wa fɛtɛ mɔtshi, ɛnyɛlɔ oko fɛtɛ ka Nɔɛlɛ ndo ka Pasaka mbeyaka mɛnama oko bu waale. Koko tatohɛke dia Jehowa akɛnyi woho wakatatɛ mbekelo ya l’ɛtɛmwɛlɔ shɔ yosala anto ɛlɔ kɛnɛ. Lo kanyi ya Jehowa, nde hetawɔ mbekelo shɔ paka l’ɔtɛ w’ɔnɛ anto wakatatɛ ndjisala aya edja efula kana l’ɔtɛ wayisanganyawɔ l’ɔtɛmwɛlɔ wa pudipudi.​—2 Kɔr. 6:17; Ɛny. 18:2, 4.

15, 16. Kakɔna kakasalaka apami 25 lo sɛkɛ dia l’etei dia tɛmpɛlɔ, ndo lande na kele etsha awɔ wakanyangiya Jehowa efula?

¹⁵ Adia Ɛzɛkiyɛlɛ 8:15-18. Jehowa akɔtshiya dikambo dia nɛi ndo di’ekomelo lo nkamba l’ɛtɛkɛta wakeyaka omvutshi dimɛna wata ɔnɛ: “Wɛ ayɛna akambo wa wɔnɔnyi wa diambo efula woleki ndo wanɛ.” Ondo omvutshi akayambolaka ate: ‘Akambo akɔna asɔ woleki ndo wanɛ wamomoshila mɛna diambo?’ Kakianɛ Ɛzɛkiyɛlɛ  ekɔ lo sɛkɛ dia l’etei dia tɛmpɛlɔ. Lɛkɔ, lo mbɔtwɛlɔ ka tɛmpɛlɔ, nde akɛnyi apami 25 wakusamɛ ndo watɛmɔla “wonya lo ɛstɛ.” Apami asɔ wakatɛngɛ Jehowa lo yoho yamboleka tshɛ kɔlɔ. Lo ngande?

¹⁶ Ohokanyiya dui nɛ: Mbɔtwɛlɔ ka tɛmpɛlɔ ka Nzambi kaki mbɛlɛnganɛ la lɛkɛ la ɛstɛ. Atɛmɔdi wakɔtɔka lo tɛmpɛlɔ wakahombaka mbɛlɛ otsha lo owɛstɛ ko mbɛdiya ɛkɔngɔ awɔ otsha le wonya wayatombe lo ɛstɛ. Koko, apami 25 wa lo ɛnɛlɔ kɛnɛ wakɛdiya “ɛkɔngɔ awɔ otsha lo tɛmpɛlɔ” ndo wakɛlɛ otsha lo ɛstɛ dia vɔ ntɛmɔla wonya. Lo nsala ngasɔ, vɔ wakoke Jehowa ɔkɔngɔ nɛ dia tɛmpɛlɔ kɛsɔ kaki “luudu la Jehowa.” (1 Ku. 8:10-13) Apami 25 asɔ waki waa apɔsta. Vɔ wakanya Jehowa yimba ndo wakɔnyɔla didjango diande diatanema lo Eohwelo k’Ɛlɛmbɛ 4:15-19. Vɔ wakanyangiya Nzambi, Ɔnɛ lahombaso mamema la tshondo yaso tshɛ!

17, 18. a) Wetshelo akɔna wakokaso nkondja oma l’ɔkɔndɔ w’atɛmɔdi wa wonya lo tɛmpɛlɔ? b) Waa apɔsta w’ase Isariyɛlɛ wakalanya diɔtɔnganelo diakɔna, ndo ngande?

¹⁷ Wetshelo akɔna wakokaso nkondja oma l’ɔkɔndɔ w’atɛmɔdi wa wonya asɔ? Dia nama ɔtɛmwɛlɔ aso pudipudi, sho pombaka mendɛka le Jehowa dia sho nshihodia akambo wa lo nyuma ndo monga la lomba. Tohɔ dia “Jehowa Nzambi ekɔ wonya,” ndo Ɔtɛkɛta ande wekɔ “osase” lo mboka kaso. (Os. 84:11; 119:105) Lo tshimbo y’Ɔtɛkɛta ande ndo y’ekanda walembetshiya Bible watondja okongamelo ande, nde tongamulɛka osase l’etema ndo lo timba taso lo tɛnya kɛnɛ kahombaso nsala dia sho monga la lɔsɛnɔ l’oshika oma ko kakianɛ ndo ndjokondja lɔsɛnɔ la pondjo lo nshi yayaye. Naka sho mendɛ le andja ɔnɛ dia sho monga la lomba ndo mbeya woho wa nsɛna, kete tayoka Jehowa ɔkɔngɔ. Dui dia ngasɔ diayowonyangiya efula ndo diayowosha paa efula. Tatetawɔke pondjo dia salɛ Nzambi kaso dui dia ngasɔ! Ɛnɛlɔ ka Ɛzɛkiyɛlɛ tɔhɛmɔlaka nto dia mbewɔ wanɛ woka akambo wa mɛtɛ ɔkɔngɔ, mbuta ate waa apɔsta.​—Tok. 11:9.

¹⁸ Oko wambotɛna, Ɛzɛkiyɛlɛ akɛnyi akambo anɛi wa kɔlɔ ka ditshi wendana la ɔtɛmwɛlɔ wa dikishi ndo l’ɔtɛmwɛlɔ wa kashi. Akambo asɔ mɛnyaka woho wakalana tshɛ lo tshɛ ɔtɛmwɛlɔ w’ase Juda waki waa apɔsta. Lo ndjadja mindo lo nyuma, ase Isariyɛlɛ asɔ wakalanya diɔtɔnganelo diasawɔ la Nzambi. Koko, mindo ka lo nyuma ndo ka lo lɔkɛwɔ kɛndakɛndaka kaamɛ. Diakɔ diele, keema dui dia diambo lo woho wakasalaka ase Isariyɛlɛ waki waa apɔsta asɔ awui tshɛ wa kɔlɔ ndo woho wakawalanya aha tsho diɔtɔnganelo diasawɔ la Nzambi koko ndo diasawɔ l’anto akina. Kakianɛ, nyɛsɔ tende woho wakɔndɔla omvutshi Ɛzɛkiyɛlɛ lakalɔmbɔma la nyuma k’ekila woho wakalana lɔkɛwɔ la wodja wa Juda w’apɔsta.

19. Ngande wakɔndɔla Ɛzɛkiyɛlɛ woho wakalana lɔkɛwɔ la wanɛ wakadje la Jehowa sheke?

¹⁹ Adia Ɛzɛkiyɛlɛ 22:3-12. Wodja w’otondo waki la lɔkɛwɔ la mindo, oyadi emboledi kana anto k’anto. ‘Ewandji,’ kana ɛnɔmbɔdi  wakakambaka la lowandji lawɔ dia nkɛdia dikila diaha l’onongo. Mɛnamaka dia anto lo tshɛ kawɔ wakayelaka ɛnɔmbɔdi awɔ lo ntona dia nkitanyiya Ɛlɛmbɛ wa Nzambi. Lo nkumbo, ana ‘wakɔnyɔlaka’ ambutshi awɔ ndo wanɛ wotɔ wakeyanaka lam’asawɔ. Lo wodja, ase Isariyɛlɛ w’atɔmbɔki wakakesaka angɛndangɛnda ndo wakɛngiyaka ana wa tshike la wadi waki edo. Apami w’ase Isariyɛlɛ wakeyanaka la wadi w’asekawɔ la wolo. Anto wakayasha efula l’awui wa lokaki, lo mbetawɔ kɔta mishiko, lo nkɔsɔla anto diangɔ diawɔ la wolo ndo lo nkesa. Jehowa akanyange efula lo mɛna dia anto wakadje la nde sheke wambotona dia nkitanyiya Ɛlɛmbɛ ande l’okonda tshɛ, ndo vɔ wakohɛ dia Jehowa akawasha ɛlɛmbɛ ande nɛ dia nde akawaokaka ngandji! Woho wakalana lɔkɛwɔ lawɔ akanyangiya Jehowa woho w’anyanya. Nde akatɛ Ɛzɛkiyɛlɛ dia nde mbutɛ anto waki la lɔkɛwɔ la mindo asɔ ate: ‘Nyambombohɛ tshɛ lo tshɛ.’

20. Lande na kele ɛtɛkɛta wa Ɛzɛkiyɛlɛ wendana la lɔkɛwɔ la mindo l’ase Juda wekɔ la kitshimudi le so ɛlɔ kɛnɛ?

²⁰ Lande na kele ɛtɛkɛta w’Ɛzɛkiyɛlɛ wendana la lɔkɛwɔ la mindo l’ase Juda wekɔ la kitshimudi le so ɛlɔ kɛnɛ? Lɔkɛwɔ la kɔlɔ laki lo wodja wa Juda w’apɔsta toholaka lɔkɛwɔ la kɔlɔ lele l’andja wasɛnaso ɛlɔ kɛnɛ. Ewandji wa pɔlitikɛ wekɔ lo nkamba la lowandji lawɔ dia nsoya anto k’anto. Ewandji w’ɛtɛmwɛlɔ, djekoleko andjashi Nzambi wa lo Lokristokristo wekɔ lo ntshɔkɔla ata wa lam’asa wedja wadakisha miliyɔ y’anto waheyama mbadia. Ewandji  w’ɛtɛmwɛlɔ wambengesola atɔndɔ wa pudipudi ndo wokɛma hwe wa lo Bible wendana l’awui wa dieyanelo. Etombelo wele la dui sɔ ele, atɔndɔ wendana la lɔkɛwɔ wa l’andja wekɔ lo tatetemala nshila nɛmɔ. Lo mɛtɛ, Jehowa koka mbutɛ Lokristokristo kɛnɛ kakandatɛ wodja wa Juda w’apɔsta ɔnɛ: ‘Nyambombohɛ tshɛ lo tshɛ.’

21. Wetshelo akɔna wakokaso nkondja oma lo lɔkɛwɔ la mindo la wodja wa Juda w’edjedja?

²¹ Oko weso ekambi wa Jehowa, wetshelo akɔna wakokaso nkondja oma lo lɔkɛwɔ la mindo la wodja wa Juda w’edjedja? Dia sho ntɛmɔla Jehowa lo yoho yetawɔnde, sho pombaka monga la lɔkɛwɔ la pudipudi l’awui tshɛ wa lo lɔsɛnɔ laso. Ɔsɔ keema dui dia wɔdu l’andja ɔnɛ wele anto la nkɛwɔ ya mindo. (2 Tim. 3:1-5) Koko, sho mbeyaka woho wayaoka Jehowa lo menda woho wambolana lɔkɛwɔ lo toho tshɛ ta kɔlɔ. (1 Kɔr. 6:9, 10) Sho kitanyiyaka atɔndɔ wa Jehowa wendana la lɔkɛwɔ nɛ dia sho mbolangaka ndo nangaka ɛlɛmbɛ ande. (Os. 119:97; 1 Jni. 5:3) Naka sho monga la lɔkɛwɔ la mindo, kete tayɛnya dia hatolange Nzambi kaso k’ekila ndo ka pudipudi. Sho hatolange pondjo nkonya Jehowa dia nde totɛ ɔnɛ: ‘Nyambombohɛ tshɛ lo tshɛ.’

22. a) L’ɔkɔngɔ wa nsɛdingo- la kɛnɛ kakate Jehowa lo dikambo dia wodja wa Juda w’edjedja, kakɔna kamboyoyashikikɛ dia nsala? b) Kakɔna kayotɔsɛdingola lo tshapita yayela?

²² Tambokondja wetshelo ɛmɔtshi w’ohomba lo nsɛdingola kɛnɛ kakate Jehowa lo menda woho wakalana lonyuma ndo lɔkɛwɔ la wodja wa Juda w’edjedja. Lo mɛtɛ, tambokeketshama lo yɛdikɔ yaso ya mamema paka Jehowa ndamɛ oto nɛ dia nde mɛtɛ mbahombaso salɛ ngasɔ. Dia nkotsha oyango ɔsɔ, sho pombaka ndjalama oma lo toho tshɛ t’ɔtɛmwɛlɔ wa dikishi ndo nama lɔkɛwɔ laso pudipudi. Ko kakɔna kakasale Jehowa lo dikambo di’ekambi ande waki komonga la kɔlamelo? L’ekomelo ka wembwelo wa Ɛzɛkiyɛlɛ wa tɛmpɛlɔ, Jehowa akatɛ omvutshi ande ɔsɔ ate: “Dimi layosala akambo la nkɛlɛ.” (Ɛzk. 8:17, 18) Sho nangaka mbeya kɛnɛ kakasalɛ Jehowa ase Juda waki komonga la kɔlamelo, nɛ dia kilombo kakɔ kaamɛ kayosalema lo dikambo di’andja ɔnɛ wa kɔlɔ. Tshapita yayela yayɛnya woho wakakotshama dombwelo dia Jehowa otsha le wodja wa Juda.