1, 2. a) Ngande waki Isariyɛlɛ oko ɔkɔkɔ wele vɔamɛ l’atei wa ndjaondo? (Enda osato wele lo mbɔtwɛlɔ.) b) Kakɔna kaketawɔ ase Isariyɛlɛ ndo nkumi ya dikanga yawɔ dia tɔ salema?

L’EDJA k’ɛnɔnyi nkama, Isariyɛlɛ aki oko ɔkɔkɔ waki vɔamɛ l’atei wa ndjaondo. Ase Amɔna, ase Mɔaba ndo ase Ɛdɔmɛ wakaanɛka ase Isariyɛlɛ oma l’olelo awɔ wa lo ɛstɛ. Ase Filistiya waki atunyi wa Isariyɛlɛ l’edja k’ɛnɔnyi efula ndo vɔ waki oma l’owɛstɛ. Lo nɔrdɛ mbaki osomba wa Tura, osomba waki l’ɔngɔnyi ndo waki dihole diakalekaka anto nsala okanda lo diolelo dia woke efula. Lo sidɛ mbaki wodja w’Edjibito w’edjedja wakalɔmbɔmaka oma le nkumekanga Farawɔ, lakɔsamaka oko jambizambi.

² Etena kakayaɛkɛka ase Isariyɛlɛ le Jehowa, nde akaakokɛka oma le atunyi awɔ. Koko, mbala la mbala ekambi ande ndo nkumi ya dikanga yawɔ waketawɔka dia mbidjama mindo oma le wedja wakaadinge. Nkumekanga Ahaba ekɔ ɛnyɛlɔ kɛmɔtshi k’onto laketawɔ di’anto akina mbokonya diaha monga la kɔlamelo le Jehowa. Nde akolɛka waoho dikumi wa diolelo dia Isariyɛlɛ etena kakolɛka nkumekanga Jɛhɔshafata diolelo dia Juda. Nde akatshuke ɔna aki nkumekanga ka Sidɔna lakalɔmbɔlaka osomba w’ɔngɔnyi wa Tura. Womoto ɔsɔ lakelamɛka Jezabɛlɛ akasukɛ l’ohetoheto  tshɛ ɔtɛmwɛlɔ wa Baala lo Isariyɛlɛ ndo nde akatshutshuya omɛnde dia mbidja ɔtɛmwɛlɔ wa pudipudi mindo lo yoho yahatasalemaka.​—1 Ku. 16:30-33; 18:4, 19.

3, 4. a) Waa na wakatɛ Ɛzɛkiyɛlɛ kɛnɛ kakahombe mba- komɛ? b) Ambola akɔna wayotɔsɛdingola?

³ Jehowa akewola ekambi ande lo dikambo di’etombelo wakahombe monga naka vɔ nshisha kɔlamelo yawɔ le nde. Kakianɛ solo diande dia lotutsha diaya l’ekomelo. (Jɛr. 21:7, 10; Ɛzk. 5:7-9) Lo 609 N.T.D., alembe w’ase Babilɔna wakayokalolaka lo Nkɛtɛ ya Daka mbala ka sato. Dui sɔ diakasalema suke l’ɛnɔnyi dikumi ntatɛ lam’akawakalola mbala k’ekomelo. L’etena kɛsɔ, vɔ wakahombe nyukola mpele dia Jɛrusalɛma ndo ntɛtshatɛtsha wanɛ wakatɔmbɔkwɛ Nɛbukadinɛza. Lam’ele odingelo wakatatɛ ndo prɔfɛsiya ya Ɛzɛkiyɛlɛ yakasambiyama yakakotshama tshɛ lo tshɛ, omvutshi ɔsɔ akatatɛ mbuta kɛnɛ kakahombe komɛ wedja wakadinge Nkɛtɛ ya Daka.

⁴ Jehowa akɛnya Ɛzɛkiyɛlɛ dia atunyi w’ase Juda wayɔngɛnangɛna lam’ayolanyema Jɛrusalɛma ndo wayɔhɛnyahɛnya wanɛ wayohandɔ. Koko, wedja wakatɛngaka lokombo la Jehowa ndo wakahɛnyahɛnyaka kana wakadje ekambi ande mindo, takawahombe pandɔ oma l’etombelo w’etsha awɔ. Wetshelo akɔna w’ohomba wakokaso nkondja oma lo diɔtɔnganelo diaki lam’asa ase Isariyɛlɛ la wedja ɛsɔ? Ndo ngande wele prɔfɛsiya ya Ɛzɛkiyɛlɛ yendana la wedja ɛsɔ toshaka elongamelo ɛlɔ kɛnɛ?

5, 6. Diɔtɔnganelo diakɔna diaki lam’asa ase Amɔna la ase Isariyɛlɛ?

⁵ Amɔna, Mɔaba, Ɛdɔmɛ waki lo yoho mɔtshi ewotɔ wa lo dikila w’Isariyɛlɛ. Kaanga mbakawotɔka lo ndjela ɔkɔndɔ, wedja ɛsɔ wakahetsha ekambi wa Nzambi l’edja k’ɛnɔnyi efula ndo wakaasalɛ akambo lo nkamba la “ɛtɛkɛta wa diɔnyɔ.”​—Ɛzk. 25:6.

⁶ Tɔsɛdingole dikambo dia ase Amɔna. Vɔ waki tokanula ta Lɔta l’ɔnaki ɔnango Abrahama oma le ɔnande la womoto la kose. (Eta. 19:38) Ɔtɛkɛta awɔ wakafɔnaka efula l’ɔtɛkɛta wa Hɛbɛru, diakɔ diele ekambi wa Nzambi wakakokaka mboka. L’ɔtɛ wa diwotɔ sɔ, Jehowa akatɛ ase Isriyɛlɛ diaha vɔ ntatɛ ndɔsha ase Amɔna. (Eoh. 2:19) Koko lo nshi y’embadi, ase Amɔna wakasangana la Ɛngɛlɔna nkumekanga ka Mɔaba dia mpɛnyahɛnya Isariyɛlɛ. (Emb. 3:12-15, 27-30) L’ɔkɔngɔ diko, etena kakayonga Saolo nkumekanga, ase Amɔna wakalɔsha Isariyɛlɛ. (1 Sa. 11:1-4) Ndo lo nshi ya nkumekanga Jɛhɔshafata, vɔ wakasangana nto l’asɔlayi w’ase Mɔaba dia mbɔtwɛ Nkɛtɛ ya Daka la ta.​—2 Ɛk. 20:1, 2.

7. Ngande wakasalɛ ase Mɔaba ewotɔ awɔ akambo, mbuta ate tokanula ta Isariyɛlɛ?

⁷ Ase Mɔaba vɔ lawɔ waki tokanula ta Lɔta lo tshimbo y’ɔnande la womoto l’enondo. (Eta. 19:36, 37) Jehowa akatɛ ase Isariyɛlɛ diaha vɔ ndɔsha ase Mɔaba. (Eoh. 2:9) Koko, ase Mɔaba kosalɛ  ase Isariyɛlɛ akambo la ngandji. Lo dihole dia vɔ nkimanyiya ewotɔ awɔ wakayatombaka oma lo lɔhɔmbɔ l’Edjibito, vɔ wakatone dia vɔ mbɔtɔ lo Nkɛtɛ ya Daka. Balaka nkumekanga k’ase Mɔaba akasha Balama falanga dia nde mbidja ase Isariyɛlɛ mananu, ndo Balama akɛnya Balaka woho wa nkonya apami w’ase Isariyɛlɛ dia vɔ nsala awui wa mindo wa dieyanelo ndo ntɛmɔla dikishi. (Wal. 22:1-8; 25:1-9; Ɛny. 2:14) L’edja k’ɛnɔnyi nkama, ase Mɔaba wakatetemala nsoya ewotɔ awɔ polo ndo lo nshi ya Ɛzɛkiyɛlɛ.​—2 Ku. 24:1, 2.

8. Lande na kakate Jehowa dia Ɛdɔmɛ aki ɔnango Isariyɛlɛ, ko ngande wakasalɛ ase Ɛdɔmɛ ase Isariyɛlɛ akambo?

⁸ Ase Ɛdɔmɛ waki tokanula ta Esao laki diasa dia Jakɔbɔ. Diwotɔ diaki lam’asa ase Isariyɛlɛ l’ase Ɛdɔmɛ diaki dia ma ma, diakɔ diele Jehowa akɔsaka ase Ɛdɔmɛ l’ase Isariyɛlɛ oko onto l’ɔnango. (Eoh. 2:1-5; 23:7, 8) Kaanga mbakidiɔ ngasɔ, ase Ɛdɔmɛ waki atunyi w’ase Isariyɛlɛ ntatɛ oma l’etena kakawatombe oma l’Edjibito polo l’etena kakalanyema Jɛrusalɛma lo 607 N.T.D. (Wal. 20:14, 18; Ɛzk. 25:12) L’etena kɛsɔ, ase Ɛdɔmɛ kɔngɛnangɛnaka tsho asui w’ase Isariyɛlɛ, lo ntshutshuya ase Babilɔna dia ndanya Jɛrusalɛma, koko ndo lo nshimba diaha kaanga ose Isariyɛlɛ ɔtɔi ndawɔ ndo lo mbaakimɔ le atunyi awɔ.​—Os. 137:7; Oba. 11, 14.

9, 10. a) Kakɔna kakakomɛ ase Amɔna, Mɔaba ndo Ɛdɔmɛ? b) Bɛnyɛlɔ diakɔna diɛnya dia aha ase wedja ɛsɔ tshɛ mbakahetshaka ase Isariyɛlɛ?

⁹ Jehowa akakoya l’ewotɔ w’ase Isariyɛlɛ ɛsɔ lo menda yoho yakawasalɛ ekambi Ande akambo. Nde akate ate: “Dimi [layo]kimɔ . . . ase Amɔna oko ɛngɔ le anto wa lo Ɛstɛ, ko ase Amɔna hawotohɔma nto l’atei wa wedja.” Nde akate nto ate: “Ndo dimi layela elombwelo le Mɔaba, ko vɔ wayohomba mbeya dia dimi kele Jehowa.” (Ɛzk. 25:10, 11) Ɛnɔnyi etanu l’ɔkɔngɔ wa Jɛrusalɛma nkɔ, prɔfɛsiya shɔ yakatatɛ kotshama etena kakalɛndja ase Babilɔna ase Amɔna ndo ase Mɔaba. Lo dikambo dia Ɛdɔmɛ, Jehowa akate ate: “Layodiaka anto la dongalonga dia lɔkɔ” ndo nde akahombe ‘mbeetɛ tɔngɔ to.’ (Ɛzk. 25:13) Oko wakadiatatami, Amɔna, Mɔaba, ndo Ɛdɔmɛ wakashilama oshiki.​—Jɛr. 9:25, 26; 48:42; 49:17, 18.

¹⁰ Koko, aha anto tshɛ wa lo wedja ɛsɔ mbakahɛnyahɛnyaka ekambi wa Nzambi. Ɛnyɛlɔ, Zɛlɛkɛ laki ose Amɔna ndo Itima laki ose Mɔaba, wakayonga l’atei w’andɔshi wa ta wa wolo wa nkumekanga Davidɛ. (1 Ɛk. 11:26, 39, 46; 12:1) Ndo Ruta laki ose Mɔaba akayonga ɔtɛmɔdi wa kɔlamelo wa Jehowa.​—Ruta 1:4, 16, 17.

11. Wetshelo akɔna wakokaso nkondja oma lo diɔtɔnganelo diaki lam’asa ase Isariyɛlɛ la wodja wa Amɔna, Mɔaba ndo Ɛdɔmɛ?

¹¹ Wetshelo akɔna wakokaso nkondja oma lo diɔtɔnganelo di’ase Isariyɛlɛ la wedja ɛsɔ? Ntondotondo, etena kakayetawɔ ase Isariyɛlɛ sɛngiyama oma le ewotɔ awɔ, vɔ wakayoyasha lo ditshelo dia mindo dia l’ɛtɛmwɛlɔ wa kashi di’ewotɔ awɔ, ɛnyɛlɔ oko ntɛmɔla Baala ka Pɛɔrɛ laki jambizambi y’ase Mɔaba, ndo Mɔlɛka laki jambizambi y’ase Amɔna. (Wal. 25:1-3; 1 Ku. 11:7) Dui dia ngasɔ  koka tokomɛ. Sho koka mpomana la shɛngiya y’oma le ewotɔ aso wele bu ambetawudi watokeketsha dia sho nsekola ɛlɛmbɛ. Ɛnyɛlɔ, mbeyaka monga ko vɔ hawoshihodia lande na kahatasale fɛtɛ ka Pasaka, kahatashana weshasha lo Nɔɛlɛ, kana kahatayasha lo mbekelo yambokokanɛ le anto yɔtɔnɛ la dietawɔ dia l’ɛtɛmwɛlɔ wa kashi. Oyadi vɔ wekɔ l’eyango w’amɛna, vɔ koka nsala la wolo dia tokonya dia nsekola atɔndɔ aso. Koko, dui di’ohomba ele, aha sho nkɔ pondjo lo shɛngiya shɔ! Oko wadiɛnya ɔkɔndɔ w’ase Isariyɛlɛ, naka sho nsekola ɔlɛmbɛ kaanga lo dui dia tshitshɛ, dui sɔ diayolanya diɔtɔnganelo diasaso la Jehowa.

12, 13. Ɔlɔshamelo akɔna wakoka mpomana la so, ko kakɔna kakoka tokomɛ naka sho ntshikala la kɔlamelo?

¹² Sho koka nkondja wetshelo okina oma lo kɛnɛ kakakomɛ ase Isariyɛlɛ la ase Amɔna, ase Mɔaba ndo ase Ɛdɔmɛ. Sho koka mpomana l’ɔlɔshamelo wa wolo oma le ase nkumbo kaso wele bu ambetawudi. Yeso akate dia lo tena dimɔtshi, losango lasambishaso “[layodja] diatɔnelo lam’asa ɔna pami la she, ɔna womoto la nyango.” (Mat. 10:35, 36) Jehowa akatɛ ase Isariyɛlɛ diaha vɔ ntatɛ monga l’ewanu l’ewotɔ awɔ ndo sho hatokoke nyanga dia mana la ewotɔ aso wele bu ambetawudi. Koko, hatohombe kashimɔ etena kaya ɔlɔshamelo.​—2 Tim. 3:12.

¹³ Oyadi ewotɔ aso hawɔlɔsha mbala kakɔ ɔtɔi ɔtɛmwɛlɔ watɛmɔlaso Jehowa, hatohombe mbetawɔ dia vɔ monga la shɛngiya y’efula le so ndeka Jehowa. Lande na? Nɛ dia Jehowa kahomba monga lo dihole dia ntondo l’otema aso. (Adia Mateo 10:37.) Laadiko dia laasɔ, naka sho ntetemala monga la kɔlamelo le Jehowa, kete ewotɔ aso ɛmɔtshi mbeyaka ndjonga oko Zɛlɛkɛ, Itima ndo Ruta, mbuta ate ndjonga la so lo ɔtɛmwɛlɔ wa pudipudi. (1 Tim. 4:16) Oma laasɔ, vɔ lawɔ wayoyonga l’ɔngɛnɔngɛnɔ waya lo kambɛ Nzambi ɔtɔi ka mɛtɛ, wayokama ngandji ndo wayokokamɛ oma le Nde.

14, 15. Ngande wakasalɛ ase Filistiya ase Isariyɛlɛ akambo?

¹⁴ Ase Filistiya wakonɔ oma lo disɛnga dia Kɛrɛtɛ otsha lo nkɛtɛ yakayolakaka Jehowa Abrahama la tokanula tande. Abrahama la Isaka waki la diɔtɔnganelo la anto asɔ. (Eta. 21:29-32; 26:1) Etena kakɔtɔ ase Isariyɛlɛ lo Nkɛtɛ ya Daka, ase Filistiya wakayonga wodja wa wolo waki la asɔlayi wa wolo efula. Vɔ wakatɛmɔlaka tozambizambi ta kashi tele oko Baala-Zɛbubɛ ndo Dangɔna. (1 Sa. 5:1-4; 2 Ku. 1:2, 3) Lo tena dimɔtshi, ase Isariyɛlɛ wakayotatɛ ntɛmɔla tozambizambi tɔsɔ.​—Emb. 10:6.

¹⁵ Lam’ele ase Isariyɛlɛ komonga la kɔlamelo, Jehowa aketawɔ dia ase Filistiya mbahemɛ ekambi ande l’edja k’ɛnɔnyi efula. (Emb. 10:7, 8; Ɛzk. 25:15) Vɔ wakasha ase Isariyɛlɛ wadjango wa wolo * ndo wakadiake efula ka l’atei awɔ. (1 Sa. 4:10) Koko, etena  kakayatshumoya ase Isariyɛlɛ ndo kakawakalolɛ Jehowa, nde akaatshungola. Nde akatondja apami wele oko Samisɔna, Saolo ndo Davidɛ dia ntshungola ekambi Ande. (Emb. 13:5, 24; 1 Sa. 9:15-17; 18:6, 7) Ndo oko wakadite Ɛzɛkiyɛlɛ, ase Filistiya wakayoshama “alanya wa la nkɛlɛ” etena kakɔtwɛ ase Babilɔna ndo l’ɔkɔngɔ diko ase Ngirika wodja awɔ la ta.​—Ɛzk. 25:15-17.

16, 17. Wetshelo akɔna wakokaso nkondja oma lo diɔtɔ- nganelo diaki lam’asa ase Isariyɛlɛ la ase Filistiya?

¹⁶ Wetshelo akɔna wakokaso nkondja oma lo diɔtɔnganelo diaki lam’asa ase Isariyɛlɛ la ase Filistiya? Ekambi wa Jehowa wa nshi nyɛ wekɔ lo mpomana l’ɔlɔshamelo oma le wedja ɛmɔtshi woleki wolo wolɛ anto. Otshikitanyi l’ase Isariyɛlɛ, sho tetemalaka ntshikala la kɔlamelo le Jehowa. Kaanga mbediɔ ngasɔ, atunyi w’ɔtɛmwɛlɔ wa pudipudi mbeyaka mɛna lo tena dimɔtshi oko wambotondoya. Ɛnyɛlɔ, l’etatelo ka ntambe ka 20, ewandji wa lɛɛta wa l’États-Unis wakahembe memadia olimu w’ekambi wa Jehowa lo mbidja wanɛ wakalɔmbɔlaka okongamelo ɔsɔ lo lokanu l’edja k’ɛnɔnyi efula. Etena kakalɔmaka Ta dia hende dia l’andja w’otondo, ase Nazi wa l’Allemagne wakasale la wolo dia nshila ekambi wa Nzambi oshiki, lo mbidja nunu diawɔ lo lokanu ndo lo ndjaka nkama ya l’atei awɔ. L’ɔkɔngɔ wa ta sɔ, ase Union soviétique wakatatɛ nsala kapanyɛ kakaviya ɛnɔnyi efula dia ndɔsha Ɛmɛnyi wa Jehowa, lo ntoma anangɛso lo mpango yakandjawɔ anto elimu la wolo kana lo mbatoma lo lɔhɔmbɔ l’ahole wa ntale wa lo wodja.

¹⁷ Ewandji wa lɛɛta koka ntetemala nshimba olimu w’esambishelo, lo mbidja ekambi wa Nzambi lo lokanu, ndo kaanga lo ndjaka amɔtshi l’atei aso. Onde awui asɔ koka tokonya dia mboka wɔma kana nshisha mbetawɔ kaso? Ndooko! Jehowa ayoshimbɛ ekambi ande wa kɔlamelo. (Adia Mateo 10:28-31.) Tamboshilaka mɛna ewandji wa lɛɛta wa wolo, wa ngala ɛsɔ wakita tatala, koko ekambi wa Jehowa wekɔ lo tatetemala mpama. Keema edja, ewandji tshɛ w’ana w’anto wayolongola dilanya diafɔna la nɛ diakalongola  ase Filistiya, mbuta ate wayotshutshuyama dia mbeya Jehowa. Ndo l’ɛnyɛlɔ k’ase Filistiya, vɔ hawotoyala nto!

18. Woho akɔna wa diolelo diaki Tura?

¹⁸ Osomba w’edjedja wa Tura * waki diolelo dimɔtshi diakalekaka salema okanda lo nshi yakete. Lo owɛstɛ, Tura aki la etadimbo efula wakasalemaka okanda wakakonyaka lo Ndjale ka Mediteraneya. Lo ɛstɛ ka Tura, mbaki etadimbo w’etale wakakonyaka lo wedja wakangana etale la wɔ. L’edja k’ɛnɔnyi nkama, Tura akakotshaka lo adepo awɔ wa weke ɛngɔnyi w’oma l’ahole wa ntale asɔ. Amundji w’okanda wa lɛkɔ wakayokoma ɛngɔnyi efula diakɔ diakawayoyaɔsaka oko ewandji.​—Isa. 23:8.

19, 20. Otshikitanu akɔna waki lam’asa ase Tura la ase Ngibiyɔna?

¹⁹ L’ɛlɔmbwɛlɔ ka nkumekanga Davidɛ ndo ka Sɔlɔmɔna, ase Isariyɛlɛ wakayonga la diɔtɔnganelo l’awui w’okanda kaamɛ l’ase Tura, wanɛ wakakimɔ diangɔ ndo etshudi ewɔ dia nkimanyiya lo wokelo wa luudu la nkumekanga Davidɛ ndo l’ɔkɔngɔ diko tɛmpɛlɔ ka Sɔlɔmɔna. (2 Ɛk. 2:1, 3, 7-16) Ase Tura wakɛnyi dia Jehowa akatshɔkɔla wodja w’Isariyɛlɛ nɛ dia vɔ waki la kɔlamelo le Nde. (1 Ku. 3:10-12; 10:4-9) Ohokanyiya diaaso diaki la nunu di’ase Tura dia mbeka akambo wendana l’ɔtɛmwɛlɔ wa pudipudi, mbeya Jehowa, ndo mɛna ɛtshɔkɔ waya lo kambɛ Nzambi ka mɛtɛ!

²⁰ Koko, kaanga mbakiwɔ la diaaso sɔ, ase Tura wakatetemala ndjasha lo lomombo la l’emunyi. Vɔ kombokoya ɛnyɛlɔ k’ase Ngibiyɔna, osomba wa wolo wa la Kanana, wele anto wa lɛkɔ wakoke tsho akambo wa weke wakasale Jehowa ko wakɔshi yɛdikɔ ya nkoma ekambi ande. (Jas. 9:2, 3, 22–10:2) Lo mɛtɛ, ase Tura wakayokomɛ lo ndɔsha ekambi wa Nzambi ndo nsondja amɔtshi l’atei awɔ lo lɔhɔmbɔ.​—Os. 83:2, 7; Jɔɛ. 3:4, 6; Amɔ. 1:9.

21, 22. Kakɔna kakakomɛ Tura ndo lande na?

²¹ Lo tshimbo ya Ɛzɛkiyɛlɛ, Jehowa akate lo dikambo dia andɔshi asɔ ate: “Tura le, dimi lamboya dia ndjokɔlɔsha ndo dimi layela  wedja efula dia kɔlɔsha oko watelaka ndjale asuku atɔ. Vɔ wayolanya mpele dia Tura, wayotola totshoto tatɔ ndo dimi layɔmba nkɛtɛ ndo layosala dia tɔ monga dive dia ngaingai dia hwe.” (Ɛzk. 26:1-5) Dia ndjakokɛ, ase Tura wakayaɛkɛ lo ɛngɔnyi awɔ wakawɔsaka dia wayowakokɛ oko osomba wa lo disɛnga waki la mpele diaki l’etale wa mɛtrɛ 46 otsha la diko. Vɔ wotosala dimɛna otowodja yimba l’ɔhɛmwɛlɔ wa Sɔlɔmɔna wata ɔnɛ: “Okundji wa kanga ɔngɔnyi ele osomba ande wodingami la mpele; vɔ wekɔ oko ehele k’ekokelo lo yimba yande.”​—Tok. 18:11.

²² Etena kakakotsha ase Babilɔna ndo oma laasɔ, ase Ngirika prɔfɛsiya ka Ɛzɛkiyɛlɛ, ase Tura wakɛnyi dia ekokelo kasha ɔngɔnyi wa l’osomba kana mpele dia mɛtɛ mɛtɛ ekɔ tsho ka lokanyiya. L’ɔkɔngɔ wa Jɛrusalɛma ndanyema, ase Babilɔna wakalɔsha Tura l’edja k’ɛnɔnyi 13. (Ɛzk. 29:17, 18) Ko oma laasɔ, lo 332 N.T.D., Alɛksandrɛ wa Woke akakotsha dui dimɔtshi dia diambo dia l’awui wa lo prɔfɛsiya yakewoya Ɛzɛkiyɛlɛ. * Asɔlayi ande wakasanganya diangɔ diakalanyema l’osomba wa woke wa Tura ndo wakokɛ ave, abaya ndo nkɛtɛ lo ashi dia monga oko kilalo dia mbɔtɔ l’osomba wa lo disɛnga. (Ɛzk. 26:4, 12) Alɛksandrɛ akatondola mpele, akambe diangɔ dia l’osomba, akadiake nunu di’asɔlayi ndo anto k’anto ndo akasondja anto akina nunu akumi lo lɔhɔmbɔ. Ase Tura wakatshutshuyama dia mbeya Jehowa etena kakaweye l’atei wa paa dia “ɔngɔnyi . . . w’efula” hasha onto ekokelo ka pondjo.​—Ɛzk. 27:33, 34.

23. Wetshelo akɔna wakokaso nkondja oma le ase Tura?

²³ Wetshelo akɔna wakokaso nkondja oma le ase Tura? Hatohombe pondjo mbetawɔ dia “lokeso lele la ɔngɔnyi” tokonya dia ndjaɛkɛ lo lomombo la l’emunyi, lo liɔsa oko ehele kasha ekokelo. (Mat. 13:22) Hatokoke “kambɛ Nzambi la ɛngɔnyi olimu oko ɛhɔmbɔ.” (Adia Mateo 6:24.) Paka wanɛ wakambɛ Jehowa l’anima awɔ tshɛ mbele l’ekokelo ka mɛtɛ. (Mat. 6:31-33; Jni. 10:27-29) Prɔfɛsiya yendana l’ekomelo ka dikongɛ nɛ yayokotshama tshɛ lo tshɛ oko wakakotshama prɔfɛsiya yendana la Tura. L’etena kɛsɔ, wanɛ wayaɛkɛ l’ɔngɔnyi wayotshutshuyama dia mbeya Jehowa etena kayondolanya andja ɔnɛ wa lokaki, wayasha paka l’awui w’okanda.

24-26. a) Lande na kakelɛ Jehowa Edjibito ɔnɛ “tshenyi ya diyo”? b) Ngande wakɔnyɔla nkumekanga Zɛdɛkiya ɛlɔmbwɛlɔ ka Jehowa, ndo etombelo akɔna waki la dui sɔ?

²⁴ Ntatɛ la ntondo ka nshi ya Yɔsɛfu polo etena kakalanya ase Babilɔna Jɛrusalɛma, Edjibito akɔsamaka oko wodja waki la shɛngiya y’efula l’akambo wa pɔlitikɛ l’ɛtshi ka nkɛtɛ ka lo Nkɛtɛ ya Daka. Lam’ele Edjibito akikɔ edja efula, mɛnamaka dia vɔ waki nge l’ɛnyɛlɔ k’osongo wambola. Koko lo mbowɛdika la Jehowa, vɔ waki wɔdu efula ndeka ndo “tshenyi ya diyo.”​—Ɛzk. 29:6.

 ²⁵ Nkumekanga Zɛdɛkiya, laki ɔpɔsta kombeyaka dikambo sɔ lo kɛnɛ kendana l’Edjibito. Lo tshimbo y’omvutshi Jɛrɛmiya, Jehowa akadjangɛ Zɛdɛkiya dia ndjakitshakitsha l’ɛse ka nkumekanga ka Babilɔna. (Jɛr. 27:12) Zɛdɛkiya akatshike ndo dɔkɔlɔkɔ lo lokombo la Jehowa dia nde hatɔtɔmbɔkwɛ Nɛbukadinɛza. Koko, oma laasɔ nde akayɔnyɔla ɛlɔmbwɛlɔ ka Jehowa, nde kookotsha nto dɔkɔlɔkɔ diakandatshike lo dikambo dia Nɛbukadinɛza ndo akayɔlɔmbaka ase Edjibito dia mbokimanyiya dia nde ndɔsha ase Babilɔna. (2 Ɛk. 36:13; Ɛzk. 17:12-20) Koko, ase Isariyɛlɛ wakayaɛkɛ le ewandji wa pɔlitikɛ w’ase Edjibito wakayasalɛ vɔamɛ kɔlɔ k’efula. (Ɛzk. 29:7) Lo kɛnɛ kendana l’Edjibito, vɔ wakakoke mɛnama dia vɔ waki la wolo efula oko “shimamba ka woke.” (Ɛzk. 29:3, 4) Koko, Jehowa akate dia nde ayowonda woho wanda waa mengenga kɔndɛ ya lo Nilɛ, mbuta ate nde ayowɔkɔhɛ tɔdi lo manga yande ko mbɔtɔla otsha l’elanyelo. Nde akasale dui sɔ etena kakandatome ase Babilɔna dia tɔlɛndja wodja w’edjedja ɔsɔ.​—Ɛzk. 29:9-12, 19.

²⁶ Kakɔna kakakomɛ Zɛdɛkiya laki komonga la kɔlamelo? Lam’ele nde akatɔmbɔkwɛ Jehowa, Ɛzɛkiyɛlɛ akatatshi dia “owandji wa kɔlɔ” ɔsɔ akahombe nshisha dɛmbɔ diande dia nkoso ndo ɔnɛ lowandji lande lakahombe komɛ l’elanyelo. Koko, Ɛzɛkiyɛlɛ akasha nto elongamelo. (Ɛzk. 21:25-27) Jehowa akawotɛ dia nde tatshi dia nkumekanga kɛmɔtshi ka l’ɔlɔndji wa nkumekanga, ɔnɛ “lele la lotshungɔ,” ayoyonga lo kiti ka lowandji. Lo tshapita yayela ya dibuku nɛ, tayɛna onto akɔna ɔsɔ.

27. Wetshelo akɔna wakokaso nkondja oma lo diɔtɔnganelo diaki lam’asa ase Isariyɛlɛ la ase Edjibito?

 ²⁷ Wetshelo akɔna wakokaso nkondja oma lo diɔtɔnganelo diaki lam’asa ase Isariyɛlɛ la ase Edjibito? Ɛlɔ kɛnɛ, ekambi wa Jehowa pombaka mbewɔ dia ndjaɛkɛ le ewandji wa pɔlitikɛ, lo mfɔnya ɔnɛ ewandji akɔ wayowaela ekokelo kaviya. Oyadi lo tokanyi, sho pombaka monga anto wele “keema ase andja ɔnɛ.” (Jni. 15:19; Jak. 4:4) Dikongɛ dia pɔlitikɛ mbeyaka mɛnama oko diekɔ la wolo, koko l’ɛnyɛlɔ k’Edjibito w’edjedja, diɔ diekɔ wɔdu oko tshenyi ya diyo. Ayonga dui di’enginya dia sho ndjaɛkɛ le anto wokovɔ lo dihole dia ndjaɛkɛ le Kanga-Wolo-Tshɛ ndo Omboledi w’andja w’otondo!​—Adia Osambo 146:3-6.

28-30. Otshikitanu akɔna wele lam’asa yoho ‘yayohomba wedja mbeya’ Jehowa la yoho yeyaso Jehowa?

²⁸ Mbala efula lo dibuku di’Ɛzɛkiyɛlɛ, Jehowa mbutaka dia wedja “wayohomba mbeya dia [nde] kele Jehowa.” (Ɛzk. 25:17) Aha la taamu, ɛtɛkɛta ɛsɔ wakakotshama lo nshi y’edjedja etena kakela Jehowa kilombo le atunyi w’ekambi ande. Koko, vɔ wayonyomoleka kotshama lo nshi yaso nyɛ. Lo yoho yakɔna?

²⁹ L’ɛnyɛlɔ k’ekambi wa Nzambi wa lo nshi y’edjedja, sho dingama la wedja watɔsa oko sho bu l’onto latokokɛ oko ɔkɔkɔ wele vɔamɛ. (Ɛzk. 38:10-13) Oko wayotɛna lo tshapita ya 17 ndo 18 ya dibuku nɛ, kem’edja wedja wayanga ndɔsha ekambi wa Nzambi la wolo tshɛ. Koko etena kayowosala dui sɔ, vɔ wayeya kitshimudi ya wolo wa mɛtɛ. Vɔ wayotshutshuyama dia mbeya Jehowa, mbuta ate nshihodia lowandji lande etena kayondaalanya lo ta dia Aramangɛdɔna.​—Ɛny. 16:16; 19:17-21.

³⁰ Koko, Jehowa ayotokokɛ ndo ayotɔtshɔkɔla. Lande na? Nɛ dia tambokamba la diaaso diele laso ɛlɔ kɛnɛ dia mɛnya dia sho mbeyaka Jehowa lo ndjaɛkɛ le nde, lo mbokitanyiya ndo lo mbɔtɛmɔla l’ɔtɛmwɛlɔ wa pudipudi wende la lotshungɔ.​—Adia Ɛzɛkiyɛlɛ 28:26.