Nyu wanɛ woka Jehowa ngandji,

Aki l’ɔnɔnyi wa 1971. Wanɛ wakɔtɔ lo Losanganya la distrikɛ laki l’ɔtɛ a dui ɔnɛ: “Lokombo la Nzambi” lakasalema l’ɔnɔnyi ɔsɔ wakangɛnangɛna dia nongola ekanda efula w’eyoyo. Lo kɛnɛ kendana l’ekanda ɛsɔ, “ndooko onto lakalongamɛka dia wayowalongola efula ngasɔ.” Lo dikambo di’okanda ɔmɔtshi l’atei w’ekanda w’eyoyo ɛsɔ, ɔnangɛso ɔmɔtshi akate ate: “Vɔ wekɔ dɛtɔ dia dimɛna efula diendana l’akambo wa lo nshi yayaye weso tatɛnaka!” Okanda akɔna wakandataka? Aki dibuku diele l’ɔtɛ a dui ɔnɛ: “Les nations sauront que je suis Jéhovah”​—Comment? Ko lande na kakasha dibuku sɔ ɔngɛnɔngɛnɔ wa ngasɔ? Nɛ dia diɔ diaki l’elembetshielo w’eyoyo wa prɔfɛsiya ya lo Bible yatanaso lo dibuku dia Ɛzɛkiyɛlɛ, mbuta ate prɔfɛsiya yele la shɛngiya lo nshi yayaye y’anto tshɛ.

Lo ɛnɔnyi wakayele ntatɛ lam’akatombe dibuku ‘Nations sauront,’ lofulo l’ekambi wa Nzambi lakahame esadi oma lo miliyɔ 1,5 polo lo ndekana miliyɔ 8. (Isa. 60:22) Miliyɔ y’ekambi wa Jehowa ɛsɔ tɛkɛtaka ɛtɛkɛta ndekana 900. (Zɛk. 8:23) Efula ka l’atei awɔ watakondjaka diaaso dia mbeka dibuku dialembetshiya dimɛna prɔfɛsiya yakasambiyama yakafunde omvutshi Ɛzɛkiyɛlɛ.

Laadiko dia laasɔ, ɛnɔnyi akumi ntatɛ oma lo 1971, eokelo kaso k’akambo wa mɛtɛ efula w’oma lo Bible kamboleka ndowana oko wataleke osase ngamɔ. (Tok. 4:18) Lo 1985 takatatɛ mɛna hwe woho wɔsama “ɛkɔkɔ ekina” anto w’ɛlɔlɔ oko angɛnyi wa Nzambi. (Jni. 10:16; Rɔmɔ 5:18; Jak. 2:23) Oma laasɔ, lo 1995 takashihodia mbala ka ntondo dia kilombo k’ekomelo ka “ɛkɔkɔ” la “mbudi” kayosalema lo “mfɔnu ka woke” kayaye. (Mat. 24:21; 25:31, 32) Etshikitanu ɛsɔ tshɛ wekɔ la shɛngiya lo eokelo kaso ka dibuku dia Ɛzɛkiyɛlɛ.

L’ɛnɔnyi weke ka mbeta, osase wakatetemala ngamɔ. Tɔsɛdingole wetshelo wakatakondja lo wɛɛla wa Yeso. Efula ka wetshelo ɛsɔ mbokɛmaka hwe nshi nyɛ lo timba ndo l’etema aso. Efula ka wɛɛla ɛsɔ mendanaka l’akambo wayanga salema keema edja lo mfɔnu ka woke kaya k’emembe. Woho akɔ waamɛ mbele, eokelo kaso ka prɔfɛsiya mɔtshi yatanema lo dibuku dia Ɛzɛkiyɛlɛ kamboleka ndowanyema. L’atei wa prɔfɛsiya shɔ kele ndo prɔfɛsiya ka Ngɔngɔ ka la Mangɔngɔ (tshapita 38 ndo 39), olimu wa pami kele la ɔlɔndɔ w’ashi wa mukanda wa sekeletɛlɛ (tshapita 9), ndo okidi wele la weka wamboma ndo omamatanyelo wa didjidji wa totenyi t’esongo tohende (tshapita 37). Elembetshielo w’eyoyo ɛsɔ ndowanyaka wɛnɛ wakafundama ɛnɔnyi efula la ntondo lo dibuku ‘Nations sauront.’

Aha la taamu, ekambi wa Jehowa efula wakayambola ɔnɛ: “Etena kakɔna kayotokondja dibuku diasha elembetshielo w’eyoyo wa prɔfɛsiya ya Ɛzɛkiyɛlɛ?” Dibuku Ɔtɛmwɛlɔ wa pudipudi wa Jehowa​—wambokaloyama! mbele dibuku diakɔ. Naka wɛ mbadia totshapita 22 tadiɔ ndo kanaka yimba la esato w’amɛna watanema lɔkɔ, kete wɛ ayamba lo mɛna eyangelo tshɛ wa la yambalo wakasalema di’otondjelo adiɔ. Alɔmbɛlɔ efula wakasalema dia nshihodia lande na kakasale Jehowa dia dibuku dia diambo dia lo Bible dia Ɛzɛkiyɛlɛ monga. Yambalo ya laande yakadjama lo ambola wele oko wanɛ: Wetshelo akɔna wa lo dibuku dia Ɛzɛkiyɛlɛ wakakondja wanɛ wakasɛnaka lo nshi ya Ɛzɛkiyɛlɛ ndo wakondjaso ɛlɔ kɛnɛ? Prɔfɛsiya yakɔna yatɛkɛta  di’akambo wayosalema lo nshi yayaye? Onde sho pombaka mbeya didjidji dia prɔfɛsiya ndo okotshamelo awɔ lo prɔfɛsiya ya Ɛzɛkiyɛlɛ? Ekadimwelo wa lo ambola asɔ toshaka eokelo k’oshika ka dibuku dia lo Bible diangɛnangɛnaso sho tshɛ mbadia.

Etena katayadia dibuku dia Ɛzɛkiyɛlɛ oma l’etatelo polo l’ekomelo, wɛ ayɔngɛnangɛna etenyi ka l’olongo k’okongamelo wa Jehowa. Aha la taamu, wɛ ayamba dia mɛna atɔndɔ wa Jehowa wa laadiko wakandadjɛ wanɛ wele l’olongo ndo wanɛ wele la nkɛtɛ walanga mbɔtɛmɔla lo yoho yetawɔnde. Dibuku Ɔtɛmwɛlɔ wa pudipudi diayokokimanyiya dia pamia lowando layɛ lo kɛnɛ kamboshilaka Jehowa salɛ ekambi ande ndo kɛnɛ kayangande mbasalɛ keema edja. Wɛ ayɛna dia dibuku nɛ mbikaka epole ɔsɛkɛ mbala la mbala lo ɛtɛ w’awui ehende. Ɔtɛ a dui wa ntondo, dia ngɛnyangɛnya Jehowa sho pombaka mbeya ndo mbetawɔ dia nde mbele Nkum’Olongo Nkumadiɔndjɔ. Ɔtɛ a dui wa hende, sho pombaka ntɛmɔla Jehowa lo woho wetawɔnde ndo mbɔtɔnganyiya nsɛnɔ yaso l’atɔndɔ ande wa laadiko.

Sho nongamɛka l’otema ɔtɔi dia dibuku nɛ diayokeketsha yɛdikɔ yanyu ya ntɛmɔla Jehowa lo yoho yalɛmiya lokombo lande la woke ndo l’ekila. Etena kakɔ kaamɛ, diɔ mbeyaka nyokeketsha dia nyu ntetemala nongamɛ etena kele wedja tshɛ wayeya dia nde kele Jehowa.​—Ɛzk. 36:23; 38:23.

Jehowa Shɛso ka ngandji atshɔkɔlɛ welo anyu wa nshihodia dibuku diakandasambiya omvutshi Ɛzɛkiyɛlɛ dia mfunda.