1. Ɛnya kɛnɛ kakasalaka amvutshi wa Jehowa waki todjamu ndo kɛnɛ kakete oma laasɔ.

DJAMU mɔtshi mbidjasɛ laadiko dia mpele dia Jɛrusalɛma, akɛsakɛsa etena katɔtɔ wonya. Nde ekɔ lo nshishima lo tshalola. Mbala kakɔ ɔtɔi, nde ambɔsa dimama diande ambolodia lomu l’asasa ande ndo amboda dimama dia mpɛmɔla anto ɔnɛ asɔlayi w’ase Babilɔna woyaye! Koko, wanɛ waki la wendjudi wakadjasɛka l’osomba takiwɔ nto l’etena ka nsala dui dimɔtshi lo ndjela ɔhɛmwɛlɔ wa djamu. L’edja k’ɛnɔnyi akumi, todjamu takasɔnɛ Jehowa kana amvutshi wakewolaka anto dia lushi lɔsɔ layoya, koko anto akɔ wakatone mpokamɛ ɔhɛmwɛlɔ akɔ. Kakianɛ, asɔlayi w’ase Babilɔna wambodinga osomba. L’ɔkɔngɔ wa ngɔndɔ efula y’odingelo, asɔlayi wakatondola wesho lo mpele di’osomba, wakalanya tɛmpɛlɔ, wakadiake ndo wakande ase Jɛrusalɛma waki komonga la mbetawɔ ndo wakatɛmɔlaka dikishi.

2, 3. a) Kakɔna kayanga nkomɛ anto tshɛ wa la nkɛtɛ keema edja? b) Ambola akɔna wayotɔsɛdingola?

² Ɛlɔ kɛnɛ, alembe wa Jehowa wekɔ lo ndjaye dia ndjɔlɔsha anto wa la nkɛtɛ wele bu la mbetawɔ. (Ɛny. 17:12-14) Ta sɔ diayonga kondoko ya mfɔnu koleki tshɛ woke ka l’ɔkɔndɔ w’ana w’anto. (Mat. 24:21) Koko wonya wekekɔ w’anto efula nsala dui dimɔtshi  lo kɛnɛ kendana la ɔhɛmwɛlɔ w’oma le wanɛ wakasɔnɛ Jehowa dia nsala olimu wa djamu.

³ Kakɔna kakatshutshuya Jehowa dia nsɔna todjamu? Losango la ngande lewoya djamu? Waa na wakakotshaka ɔkɛndɛ ɔsɔ, ndo kakɔna kahombaso nsala? Nyɛsɔ tɔsɛdingole ekadimwelo wa ambola asɔ.

4. Lande na kakasɔnɛ Jehowa todjamu? (Enda osato wele lo mbɔtwɛlɔ.)

⁴ Adia Ɛzɛkiyɛlɛ 33:7. Lo nshi yakafundamaka Bible, mbala efula djamu ya mɛtɛ mɛtɛ akemalaka laadiko dia mpele di’osomba dia nkokɛ anto wa lɔkɔ. Kɛsɔ akɛnyaka dia ɔnɔmbɔdi w’osomba akayakiyanyaka dikambo di’anto ande. Kaanga mbele londjo la dimama lakadaka djamu lakakokaka mbotsha wanɛ waki lo djɔ wɔma, londjo lakɔ laamɛ lakakokaka nshimbɛ nsɛnɔ ya wanɛ wakadjaka yimba lɔkɔ. Woho akɔ waamɛ mbele, Jehowa akasɔnɛ todjamu aha l’ɔtɛ w’ɔnɛ nde akalangaka mbotsha ase Isariyɛlɛ wɔma la losango la mpokoso, koko l’ɔtɛ wakandakokɛka ekambi ande ndo wakandalangaka nshimbɛ nsɛnɔ yawɔ.

5, 6. Naa yoho mɔtshi yɛnama losembwe la Jehowa?

⁵ Etena kakasɔnama Ɛzɛkiyɛlɛ oko djamu, Jehowa akɛnya awui amɔtshi wendana la lonto lande watokeketsha. Nyɛsɔ tende waonga ahende ato l’atei wa waonga asɔ.

⁶ Losembwe: Losembwe la Jehowa mɛnamaka lo woho watosalɛnde akambo l’onto ndo l’onto aha la shɔnɔdi. Ɛnyɛlɔ, kaanga mbele elui w’anto wakoke ndo wakatone losango la Ɛzɛkiyɛlɛ, Jehowa kosalɛ ase Isariyɛlɛ tshɛ akambo oko olui w’anto wakatɔmbɔkɔ, koko nde akalange mɛna kɛnɛ kakakoke onto l’onto nsala. Mbala la mbala nde akatɛkɛta dia mbutɛ “kanga kɔlɔ” ndo “onto ɔlɔlɔ.” Ɔnkɔnɛ, Jehowa akela kilombo lo menda la woho wakasalaka onto l’onto akambo lo ndjela losango lakɔ.​—Ɛzk. 33:8, 18-20.

7. Etena kalomboshande anto, Jehowa mbidjaka yimba lo awui akɔna?

⁷ Losembwe la Jehowa koka mɛnama nto lo woho walomboshande anto. Jehowa mbikoyaka l’anto aha lo kɛnɛ kakawasale lo nshi yakete, koko lo woho wasalawɔ akambo nshi nyɛ etena kaahɛmɔlawɔ. Jehowa akatɛ Ɛzɛkiyɛlɛ ate: “Etena katɛmi kanga kɔlɔ nte: ‘Wɛ mɛtɛ ayovɔ,’ ko nde ambokadimɔ oma lo pɛkato kande ndo ambosala kɛnɛ kosembwe ndo kele ɔlɔlɔ, . . . nde mɛtɛ ayotshikala la lɔsɛnɔ.” Oma laasɔ, Jehowa akakotsha dui dimɔtshi dia diambo lo mbuta ate: “Ndooko pɛkato kakandasale kayohɔma lo dikambo diande.” (Ɛzk. 33:14-16) Lo wedi okina, wanɛ wasala awui w’ɛlɔlɔ hawokoke nongamɛ dia woho wakiwɔ l’okitanyiya lo nshi yakete monga yɛkɛ nɛndɛ dia vɔ tɔmbɔkɔ nshi nyɛ. Jehowa akate dia naka onto “amboyaɛkɛ lo ɔlɔlɔ ande hita ndo ambosala kɛnɛ kele kɔlɔ, ndooko ditshelo diande di’ɔlɔlɔ diayohɔma, koko nde ayovɔ l’ɔtɛ wa kɔlɔ kamondosala.”​—Ɛzk. 33:13.

8. Kakɔna katetsha ɛhɛmwɛlɔ wa prɔfɛsiya lo dikambo dia losembwe la Jehowa?

 ⁸ Losembwe la Jehowa mɛnamaka nto hwe lo woho wele nde mbishaka ɛhɛmwɛlɔ edja efula la ntondo ka nde ndjɔsa yɛdikɔ. Ɛzɛkiyɛlɛ akatatɛ nsala olimu ande ɛnɔnyi oko esamalo la ntondo k’asɔlayi w’ase Babilɔna ndanya Jɛrusalɛma. Koko, Ɛzɛkiyɛlɛ komonga onto la ntondo la mbewola ekambi wa Nzambi ndo mbatɛ ɔnɛ vɔ wakahombe ndjokoya la Nzambi. Ɛnɔnyi ndekana lokama la ntondo ka elanyelo ka Jɛrusalɛma, Jehowa akatome omvutshi Hɔsɛya, Isaya, Mika, Ɔdɛdɛ, ndo Jɛrɛmiya dia vɔ monga oko todjamu. Jehowa akatɛ Jɛrɛmiya dia nde mbohola ase Isariyɛlɛ ɔnɛ: “Dimi lakasɔnɛ todjamu takate ɔnɛ: ‘Nyodje yimba lo wondjo wa wɔɔndjɔ!’” (Jɛr. 6:17) Oyadi Jehowa kana todjamu tɔsɔ ndooko onto lakahombe monga l’onongo wa nsɛnɔ y’anto asɔ etena kakayoyaka ase Babilɔna dia mbela kilombo k’oma le Jehowa.

9. Ngande wakɛnya Jehowa ngandji ka kɔlamelo?

⁹ Ngandji: Jehowa akɛnya ngandji kande ka kɔlamelo lo ntoma todjamu tande aha tsho dia ndjɔhɛmɔla anto w’ɛlɔlɔ, koko ndo anto wa kɔlɔ, mbuta ate anto tshɛ wakoonyangiya ndo wakalanya lokumu lande. Ohokanyiya dui nɛ, ase Isariyɛlɛ wakeyamaka oko ekambi wa Jehowa, koko vɔ wakawokaka ɔkɔngɔ mbala la mbala dia ntɛmɔla tozambizambi ta kashi! Jehowa akanyange efula lo dikambo dia kɔlɔ sɔ polo ndo nde ndjɛdika wodja ɔsɔ la wadi la loseka. (Ɛzk. 16:32) Kaanga mbakidiɔ ngasɔ, Jehowa kombahekɔ esadi. Nde akayange dia mbokana la wɔ nto, koko aha dia mbasɔmbɔya. Jehowa okoshaka ekambi ande diaaso dia vɔ nsala etshikitanu. Lande na? Nde akatɛ Ɛzɛkiyɛlɛ ate: “Dimi haangɛnangɛna nyɔi ka kanga kɔlɔ, koko dimi ngɛnangɛnaka dia  kanga kɔlɔ ntshikitanya dionga diande dia nde ntshikala la lɔsɛnɔ.” (Ɛzk. 33:11) Ngasɔ mbakayaoke Jehowa l’etena kɛsɔ ndo ngasɔ mbayaokande ɛlɔ kɛnɛ.​—Mal. 3:6.

10, 11. Wetshelo akɔna wakokaso nkondja oma lo yoho yakasalɛ Jehowa ekambi ande akambo?

¹⁰ Wetshelo akɔna wakokaso nkondja oma lo yoho yakasalɛ Jehowa ase Isariyɛlɛ akambo la losembwe ndo la ngandji? Wetshelo ɔmɔtshi ele, sho pombaka mbɔsa anto wasambishaso, aha oko olui w’anto koko oko onto l’onto. Ayonga dindja dia sho kanɛ onto kɔlɔ lo mfɔnya ɔnɛ nde hatoka losango lasambishaso l’ɔtɛ wa lɔkɛwɔ lande la lo nshi yakete kana l’ɔtɛ wa dioho, lokoho la demba, ekondjelo kana ɔtɛkɛta ande! Jehowa akasha ɔpɔstɔlɔ Petero wetshelo ɔmɔtshi wele ohomba polo ndo ɛlɔ kɛnɛ w’ɔnɛ: “Nzambi keema la shɔnɔdi, koko lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde.”​—Ets. 10:34, 35.

¹¹ Wetshelo okina w’ohomba ele sho pombaka ndjalamaka dimɛna, mbuta ate akambo w’ɛlɔlɔ wakatasalaka lo nshi y’edjedja hawokoke monga yɛkɛ nɛndɛ ya nsala kɔlɔ nshi nyɛ. Ekɔ dimɛna sho mbohɔka dia tekɔ la nsaki yaamɛ ya nsala pɛkato oko wele wanɛ wasambishaso la yɔ. Dako diakasha ɔpɔstɔlɔ Pɔɔlɔ etshumanelo ka la Kɔrɛtɔ diekɔ nto ohomba ndo le so, diɔ mbutaka ɔnɛ: “Ɔnɛ lafɔnya ate nde memala, ayalame diaha nde nkɔ. Ndooko ohemba wambonyokomɛ wahatakomɛka anto akina.” (1 Kɔr. 10:12, 13) Hatolange pondjo monga oko onto ‘layaɛkɛ lo ɔlɔlɔ ande hita,’ lo mfɔnya dia hatotoshama dilanya lo nsala akambo wa kɔlɔ lam’ele tekɔ lo nsala ɔlɔlɔ. (Ɛzk. 33:13) Oyadi edja ka ngande kambotokambɛ  Jehowa, ayonga dui di’ohomba dia sho ntetemala monga l’okitshakitsha ndo la yimba y’okitanyiya.

12. Naka takasale pɛkato ya weke lo nshi yakete, kakɔna kahombaso mbohɔka?

¹² Ko, kayotota naka takasale pɛkato ya weke lo nshi yakete ko tekɔ lo ndjaɛndja onongo ɛlɔ kɛnɛ? Lo tshimbo ya losango la Ɛzɛkiyɛlɛ, tambokondja wetshelo dia Jehowa ayosha atshi wa kɔlɔ wahayatshumoya dilanya. Ndo, tambeka nto dia Jehowa ekɔ ntondotondo Nzambi ka ngandji, koko aha kasɔmbɔya. (1 Jni. 4:8) Naka sho mɛnya oma lo etsha aso dia tekɔ anto wayatshumoya, kete hatokoke pondjo mfɔnya dia Nzambi hakoke toka kɛtshi l’ɔtɛ wa pɛkato yaso. (Jak. 5:14, 15) Jehowa aki suke dia dimanyiya ase Isariyɛlɛ wakasale loseka la lo nyuma, ndo nde ekɔ suke dia todimanyiya.​—Os. 86:5.

13, 14. a) Woho akɔna wa losango lakewoyaka todjamu? b) Losango lakɔna lakewoya Isaya?

¹³ Adia Ɛzɛkiyɛlɛ 33:2, 3. Losango la ngande lakewoyaka todjamu ta Jehowa? Etenyi kɛmɔtshi k’ohomba k’olimu awɔ aki dia mpɛmɔla anto. Koko vɔ wakewoyaka ndo lokumu l’ɔlɔlɔ. Tɔsɛdingole bɛnyɛlɔ dimɔtshi.

¹⁴ Isaya, lakakambe ntatɛ oya lo 778 polo lo 732 N.T.D., akasha ɛhɛmwɛlɔ w’ɔnɛ ase Babilɔna wayolanya Jɛrusalɛma ndo wayɔtɔla anto wa lɔkɔ lo lɔhɔmbɔ. (Isa. 39:5-7) Koko nde akasambiyama nto dia mfunda ɔnɛ: “Hokamɛ! Todjamu tayɛ wambodiya awui awɔ. Vɔ wamboda ekoko w’ɔngɛnɔngɛnɔ kaamɛ, nɛ dia vɔ wayɛna hwe lam’ayokaloya Jehowa Siɔna.” (Isa. 52:8) Isaya akewoya lokumu l’ɔlɔlɔ loleki tshɛ, mbuta ate ɔtɛmwɛlɔ wa pudipudi wakahombe kaloyama!

15. Losango lakɔna lakewoya Jɛrɛmiya?

¹⁵ Jɛrɛmiya lakakambe oma lo 647 polo lo 580 N.T.D., akɔsamaka mbala efula oko ‘onto lakatɛkɛtaka paka awui wa mpokoso.’ Aha la taamu, nde akasale olimu wa diambo dia mbewola ase Isariyɛlɛ wa kɔlɔ dikambo dia mpokoso yakahombe Jehowa mbaela. * Koko nde akewoya nto lokumu l’ɔlɔlɔ, lo mbewoya okalwelo w’ekambi wa Nzambi lo wodja awɔ ndo okaloyelo w’ɔtɛmwɛlɔ wa pudipudi lɛkɔ.​—Jɛr. 29:10-14; 33:10, 11.

16. Wahɔ akɔna wakakondja wanɛ waki lo lɔhɔmbɔ la Babilɔna oma lo losango la Ɛzɛkiyɛlɛ?

¹⁶ Ɛzɛkiyɛlɛ akasɔnama oko djamu lo 613 N.T.D., ndo nde akatetemala nkotsha ɔkɛndɛ ande polo lo 591 N.T.D. Oko wakatɛnyi lo tshapita 5 ndo 6 ya dibuku nɛ, Ɛzɛkiyɛlɛ aki l’ohetoheto lo mbewola ase Isariyɛlɛ lo dikambo dia elanyelo kakahombe mbakomɛ, nde akanguna onongo wa nsɛnɔ yawɔ yakahombe nshishɔ. Lam’akandasalaka dui sɔ, nde kombewola tsho wanɛ waki lo lɔhɔmbɔ ɔnɛ Jehowa akahombe mbisha waa apɔsta wa la Jɛrusalɛma dilanya, koko nde akakimanyiya ndo wanɛ waki lo lɔhɔmbɔ la Babilɔna dia vɔ monga la diɔtɔnganelo dia dimɛna la Jehowa l’oyango wa vɔ ndjalɔngɔsɔla l’olimu waki la ntondo. L’ekomelo k’ɛnɔnyi 70 wa lɔhɔmbɔ, Jehowa akahombe nkaloya atshikadi lo wodja w’Isariyɛlɛ.  (Ɛzk. 36:7-11) Efula k’atshikadi asɔ waki ekana ndo tokanula ta wanɛ wakadje yimba l’ɛhɛmwɛlɔ wa Ɛzɛkiyɛlɛ. Oko wadiɛnya totshapita tokina ta lo etenyi ka 3 ka dibuku nɛ, Ɛzɛkiyɛlɛ aki la nsango efula y’amɛna ya mbewoya dia nshikikɛ dia ɔtɛmwɛlɔ wa pudipudi wakahombe kaloyama la Jɛrusalɛma.

17. Etena kakɔna kakasɔnɛ Jehowa todjamu?

¹⁷ Onde paka amvutshi asɔ wakewoyaka ekambi wa Nzambi akambo l’etena ka suke l’elanyelo ka Jɛrusalɛma lo 607 N.T.D. mbele anto waamɛ wakakambe Jehowa la wɔ oko todjamu? Ndooko. Koko, l’etena tshɛ kakasalema dui dimɔtshi di’ohomba ndo kakakotshamaka sangwelo diaki Jehowa, nde akasɔnaka todjamu dia mbewola atshi wa kɔlɔ ndo dia mbewoya lokumu l’ɔlɔlɔ.

18. Olimu akɔna wakasalaka Joani Obatizanyi?

¹⁸ Lo ntambe ka ntondo T.D., Joani Obatizanyi akakambe oko djamu. Nde akahɛmɔla wodja w’Isariyɛlɛ wa l’emunyi dia keema edja vɔ wayokashema. (Mat. 3:1, 2, 9-11) Koko nde kokomɛ laasɔ. Yeso akate dia Joani aki “dikɛndji” diakatɛkɛtama diakahombe nɔngɔsɔlɛ Mɛsiya mboka. (Mal. 3:1; Mat. 11:7-10) Etenyi kɛmɔtshi k’olimu ɔsɔ aki dia mbewoya lokumu l’ɔlɔlɔ l’ɔnɛ: “Ɔna Ɔkɔkɔ wa Nzambi,” mbuta ate Yeso amboya ndo nde ayonya “pɛkato ya l’andja.”​—Jni. 1:29, 30.

19, 20. Ngande wakasale Yeso ndo ambeki ande akambo oko todjamu?

¹⁹ L’atei wa todjamu tshɛ, Yeso mbaki djamu yakaleke tshɛ. L’ɛnyɛlɔ ka Ɛzɛkiyɛlɛ, Jehowa akootome le “luudu la Isariyɛlɛ.” (Ɛzk. 3:17; Mat. 15:24) Yeso akewoya dia keema edja, wodja w’Isariyɛlɛ wa l’emunyi wayokashema ndo ɔnɛ Jɛrusalɛma yayolanyema. (Mat. 23:37, 38; 24:1, 2; Luka 21:20-24) Koko olimu ande wa ntondo aki wa mbewoya lokumu l’ɔlɔlɔ.​—Luka 4:17-21.

²⁰ Etena kakinde lanɛ la nkɛtɛ, Yeso akatɛ ambeki ande ate: “Nyosungukalake.” (Mat. 24:42) Vɔ wakakitanyiya didjango diande sɔ ndo wakasale akambo oko todjamu, wakewola anto dia Jehowa ambɔsɛka wodja w’Isariyɛlɛ wa l’emunyi ndo osomba wa la nkɛtɛ wa Jɛrusalɛma. (Rɔmɔ 9:6-8; Ngal. 4:25, 26) L’ɛnyɛlɔ ka todjamu taki la ntondo kawɔ, vɔ waki nto la lokumu l’ɔlɔlɔ la mbewoya. Losango lawɔ laki la diewoyelo dia diambo di’ɔnɛ ase Wedja wayohomba kakianɛ monga l’atei wa wodja w’Isariyɛlɛ wa lo nyuma wa Nzambi wokengami l’akitami ndo wayonga la diɛsɛ dia nkimanyiya Kristo dia nkaloya ɔtɛmwɛlɔ wa pudipudi la nkɛtɛ.​—Ets. 15:14; Ngal. 6:15, 16; Ɛny. 5:9, 10.

21. Ɛnyɛlɔ kakɔna kakasha Pɔɔlɔ?

²¹ L’atei wa todjamu ta lo ntambe ka ntondo, ɔpɔstɔlɔ Pɔɔlɔ aki ɛnyɛlɔ ka dimɛna efula. Nde akakotshaka ɔkɛndɛ ande dimɛna. L’ɛnyɛlɔ ka Ɛzɛkiyɛlɛ, nde akeyaka dia nde ayonga l’onongo wa dikila naka nde hakotshisha ɔkɛndɛ ande dimɛna. (Ets. 20:26, 27) Lo ndjela ɛnyɛlɔ ka todjamu tokina, Pɔɔlɔ kombewola tsho anto akina, koko nde akewoya ndo lokumu l’ɔlɔlɔ. (Ets. 15:35; Rɔmɔ 1:1-4)  L’ɛlɔmbwɛlɔ ka nyuma k’ekila, nde akashile prɔfɛsiya ka Isaya kata ɔnɛ: “Ande amɛna wele ekolo wa ɔnɛ lɛmba lokumu l’ɔlɔlɔ lo akona lee!” Ndo nde akɛnya woho wɔtɔnɛtɔ l’olimu wakasalaka ambeki wa Kristo etena kakawasambishaka akambo wendana la Diolelo dia Nzambi.​—Isa. 52:7, 8; Rɔmɔ 10:13-15.

22. Kakɔna kakatombe l’ɔkɔngɔ wa nyɔi k’apɔstɔlɔ?

²² L’ɔkɔngɔ wa nyɔi ka apɔstɔlɔ, apɔstazi wakatɛkɛtama wakayɔmɛnaka etshumanelo k’Akristo. (Ets. 20:29, 30; 2 Tɛs. 2:3-8) L’etena k’otale, Akristo wa kashi wele oko nkangaka wakaleke ambeki wa Kristo wa kɔlamelo wele oko eponga efula, ndo losango lokɛma hwe lendana la Diolelo dia Nzambi lakayodinyadinyama la wetshelo wa kashi. (Mat. 13:36-43) Koko, lam’akasukana etena ka Jehowa mbɛdia akitami, nkaloya ɔtɛmwɛlɔ wa pudipudi, nsɔna ɔhɔmbɔ wa kɔlamelo ndo kɛsɔ, nde akakɛnɛmɔla nto ngandji ndo losembwe lande lo nsɔna todjamu dia mbewoya ɔhɛmwɛlɔ wokɛma hwe ndo dia mbewoya lokumu l’ɔlɔlɔ. Todjamu takɔna tɔsɔ?

23. Olimu akɔna wakakambe ɔnangɛso Charles Taze Russell nde l’asekande?

²³ Lo ɛnɔnyi wakakonya lo 1914, ɔnangɛso Charles Taze Russell nde l’asekande wakakambe oko “dikɛndji” diakahombe ‘mbɛdia mboka’ la ntondo ka Diolelo dia Mɛsiya shikikɛma. * (Mal. 3:1) Olui ɔsɔ wakakambe nto oko djamu, lo nkamba la periodikɛ Tshoto y’Etangelo ya Siɔna ndo Ɔkɛndji wewoya woongelo wa Kristo (lo falase)  dia mbewola anto lo kɛnɛ kendana la kilombo ka Nzambi ndo dia dianganya lokumu l’ɔlɔlɔ la Diolelo dia Nzambi.

24. a) Ngande wakasale ɔhɔmbɔ wa kɔlamelo akambo oko djamu? b) Wetshelo akɔna wamboyokondja oma l’ɛnyɛlɔ ka todjamu ta lo nshi y’edjedja? (Enda tablo kele l’ɔtɛ a dui ɔnɛ: “Bɛnyɛlɔ dia todjamu tɔmɔtshi t’amɛna.”)

²⁴ L’ɔkɔngɔ wa Diolelo shikikɛma, Yeso akasɔnɛ djui y’apami dia vɔ nkamba oko ɔhɔmbɔ wa kɔlamelo. (Mat. 24:45-47) Oma ko etena kɛsɔ, ɔhɔmbɔ wa kɔlamelo ɔsɔ, lelɛso kakianɛ Olui-walɔmbɔla ekɔ lo nkamba oko djamu. Olui-walɔmbɔla ɔsɔ ekɔ lo mbisha ɛnyɛlɔ aha tsho dia mbewola anto lo kɛnɛ kendana la “lushi la nsɔmbɔya” koko ndo lo mbewoya “ɔnɔnyi w’ɔlɔlɔ w’otema wa Jehowa.”​—Isa. 61:2; enda ndo lo 2 Kɔrɛtɔ 6:1, 2.

25, 26. a) Olimu akɔna wahomba nsala ambeki wa Kristo tshɛ, ndo ngande wasalemawɔ? b) Kakɔna kayotɔsɛdingola lo tshapita yayela?

²⁵ Etena kasha ɔhɔmbɔ wa kɔlamelo ɛnyɛlɔ l’olimu wa djamu, Yeso nɔmbaka ambeki ande “tshɛ” dia ‘ntetemala nsungukala.’ (Makɔ 13:33-37) Sho kitanyiyaka didjango sɔ lo sungukalaka lo nyuma ndo lo sukɛka la kɔlamelo tshɛ djamu ya nshi nyɛ. Sho mɛnyaka dia tekɔ lo nsungukala lo kotshaka ɔkɛndɛ aso wa nsambisha. (2 Tim. 4:2) Kakɔna katotshutshuya? Lo yɛdikɔ mɔtshi, ekɔ nsaki kele la so ka nshimbɛ nsɛnɔ. (1 Tim. 4:16) Keema edja, lokema l’anto wayovɔ nɛ dia vɔ hawodje yimba l’ɔhɛmwɛlɔ washa djamu ya nshi nyɛ. (Ɛzk. 3:19) Koko, oyango aso woleki tshɛ ele sho nomɔlomɔka dia mbewoya anto lokumu l’ɔlɔlɔ loleki tshɛ l’ɔnɛ ɔtɛmwɛlɔ wa pudipudi wambokaloyama! Nshi nyɛ, lo etena ka “ɔnɔnyi w’ɔlɔlɔ w’otema wa Jehowa,” lokuke lambodihɔ dia anto akina efula nsangana kaamɛ la so dia ntɛmɔla Jehowa Nzambi kaso ka losembwe ndo ka ngandji. Keema edja, anto tshɛ wa la nkɛtɛ wanɛ wayohandɔ oma lo ekomelo ka dikongɛ dia kɔlɔ nɛ wayokondja ɛlɔlɔ w’oma lo ɛlɔmbwɛlɔ koludi la kɛtshi ka Ɔnande, Kristo Yeso. Hatokoke pondjo nkalola ɛkɔngɔkɔngɔ diaha nsukɛ djamu ya nshi nyɛ lo kɛnɛ kendana la mbewoya lokumu l’ɔlɔlɔ!​—Mat. 24:14.

²⁶ Kaanga la ntondo ka dikongɛ di’akambo dia kɔlɔ nɛ nkomɛ, Jehowa ambosanganya ekambi ande kaamɛ lo yoho ya dihindo. Tayɔsɛdingola lo tshapita yayela prɔfɛsiya kendana la totenyi t’esongo tohende takambawɔ la tɔ dia mɛnya woho wambosalema dui sɔ.