1, 2. a) Sho tshɛ tekɔ la ntondo k’ɔsɔnwɛlɔ akɔna? b) Kakɔna kakasale ondjelo wa kɔlamelo etena kakawalange mbɔtɛmɔla?

ONTO tshɛ la l’atei aso pombaka nkadimola lo dimbola di’ohomba nɛ: Akɔna ayomɔtɛmɔla? Anto efula kokaka mbuta dia dimbola sɔ diekɔ wolo ndo ɔsɔnwɛlɔ koka mbidja onto l’okandokando. Koko lo mɛtɛ, ɔsɔnwɛlɔ wekɔ hwe ndo wɔdu. Sho koka nsɔna dia ntɛmɔla Jehowa Nzambi kana ntɛmɔla Satana Diabolo.

² Satana ekɔ la nsaki k’efula ka tɛmɔma. Dui sɔ diakɛnama hwe etena kakandahembe Yeso. Oko wakatadiɛnyi lo tshapita ya ntondo ya dibuku nɛ, Satana akasha Yeso ɛngɔ kɛmɔtshi ka diambo mbuta ate, lowandji laadiko dia waolelo tshɛ wa la nkɛtɛ. Kakɔna kakalongamɛ Diabolo lo mbosha waolelo asɔ? Nde akatɛ Yeso ate: “Nsala tshelo 1 ya tɛmɔlami.” (Mat. 4:9) Otshikitanyi la Diabolo, ondjelo wakɛnya ɔpɔstɔlɔ Joani ɛnɛlɔ akatone dia nde tɛmɔma. (Adia Ɛnyɛlɔ 22:8, 9.) Etena kakalange Joani ntɛmɔla ondjelo akɔ, ɔna Nzambi la lo nyuma lele l’okitshakitsha ɔsɔ akate ate: “Tosalake ngango!” Lo dihole dia mbuta ate: ‘Ɔntɛmɔlɛ,’ ondjelo ɔsɔ akate ate: “Tɛmɔla Nzambi.”

3. a) Naa oyango wele la dibuku nɛ? b) Kakɔna kayangaso nsɛdingola?

³ Oyango wa dibuku nɛ ekɔ wa nkeketsha yɛdikɔ yaso dia nsala oko wakadjanga ondjelo ɔsɔ dia ntɛmɔla paka Jehowa Nzambi  ndamɛ oto. (Eoh. 10:20; Mat. 4:10) Nyɛsɔ tovusole lo tshena pe kɛnɛ kamboteka lo dikambo dia ɔtɛmwɛlɔ wa pudipudi oma lo prɔfɛsiya ndo waɛnɛlɔ wa Ɛzɛkiyɛlɛ. Oma laasɔ, l’ekimanyielo k’Afundelo, tayoka washo otsha la ntondo etena kayohomana onto tshɛ la la nkɛtɛ l’ohemba w’ekomelo, mbuta ate ohemba wayoshikikɛ ɔnɛ layohomba nsɛna ndo mɛna woho wayokaloyama tshɛ lo tshɛ ɔtɛmwɛlɔ wa pudipudi wa Jehowa lo pondjo.

4. Naa ɛtɛ w’awui esato wɔtɔtɔmiyami lo dibuku dia Ɛzɛkiyɛlɛ?

⁴ Dibuku dia Ɛzɛkiyɛlɛ tetshaka dia ɔtɛmwɛlɔ wa pudipudi halemanɛ tsho la nsala sɛlɛmɔnyi mɔtshi yendana l’ɔtɛmwɛlɔ. Vɔ nɔmbaka dia sho 1) mamema Jehowa paka ndamɛ oto, 2) ntshikala kaamɛ l’ɔtɛmwɛlɔ wa pudipudi ndo 3) mɛnya ngandji kokaso anto akina. Nyɛsɔ tɔsɛdingole woho watɔtɔmiya prɔfɛsiya ndo waɛnɛlɔ wakateke lo dibuku nɛ ɛtɛ w’awui esato ɛsɔ.

5-9. Wetshelo akɔna wambotokondja lo kɛnɛ kendana la mamema paka Jehowa ndamɛ oto?

⁵ Tshapita 3: * Ɛnɛlɔ ka diambo ka Jehowa odingami la ngolo ndo ahemi laadiko dia ditongami dia wolo dia lo nyuma tɛnyaka dui di’ohomba efula di’ɔnɛ: Kanga-Wolo-Tshɛ ndamɛ oto mbahombaso ntɛmɔla.​—Ɛzk. 1:4, 15-28.

⁶ Tshapita 5: Aki dui dia kɔlɔ efula dia mɛna ɛnɛlɔ ka tɛmpɛlɔ ka Jehowa kambodjama mindo! Ɛnɛlɔ kɛsɔ kakɛnya dia ndooko ɛngɔ koshɛmi lo washo wa Jehowa. Nde mɛnaka ditshelo diaha la kɔlamelo, ɛnyɛlɔ etena katɛmɔla ekambi ande dikishi oyadi kaanga etena kahɛnyi anto dikambo sɔ. Nde mongaka la lonyangu l’ɔtɛ wa ditshelo dia kɔlɔ dia ngasɔ ndo nde mbishaka wanɛ wadisala dilanya.​—Ɛzk. 8:1-18.

⁷ Tshapita 7: Kilombo kakatama lo dikambo dia wedja wakadinge Isariyɛlɛ wakawatɛka “ɛtɛkɛta wa diɔnyɔ” mɛnyaka dia Jehowa ayoyokoya la wanɛ wahɛnyahɛnya ekambi ande. (Ɛzk. 25:6) Koko takakondja wetshelo okina oma lo diɔtɔnganelo diaki lam’asa Isariyɛlɛ la wedja ɛsɔ, mbuta ate sho pombaka mbetsha kɔlamelo yaso le Jehowa la ntondo k’oseka dikambo tshɛ. Hatohombe pondjo nkitshakitsha ɛlɛmbɛ aso dia mbokana l’ewotɔ aso wahatɛmɔla Jehowa kana hatohombe mbetsha wɛkamu aso l’ɔngɔnyi kana ndanya lomangemange laso lo mbisha mandji y’ana w’anto kɛnɛ kahomba paka Jehowa oto nongola.

⁸ Tshapita 13 ndo 14: Ɛnɛlɔ ka tɛmpɛlɔ lo dikona di’otale tetshaka dia sho pombaka nsɛna lo yoho yɔtɔnɛ l’atɔndɔ wa Jehowa wa laadiko teya shate nde ekɔ laadiko dia tozambizambi tokina tshɛ.​—Ɛzk. 40:1–48:35.

 ⁹ Tshapita 15: Elembetshielo wa prɔfɛsiya lo dikambo dia Isariyɛlɛ ndo Juda oko waa numba toholaka dia monanyi ka lo nyuma ekɔ dui dia wɔnɔnyi le Jehowa.​—Ɛzk., tshap. 16, 23.

10-14. Ngande wodjami dikako vɔlɛ l’ohomba wa sho ntshikala kaamɛ l’ɔtɛmwɛlɔ wa pudipudi?

¹⁰ Tshapita 8: Prɔfɛsiya yakalake dia Jehowa ayotondja “olami w’ɛkɔkɔ ɔmɔtshi” dia nama ekambi Ande mbidjaka dikako vɔlɛ l’ohomba wa sho nkamba kaamɛ ndo lo wɔladi l’ɛlɔmbwɛlɔ ka Yeso.​​​​​​​​​​​—Ɛzk. 34:23, 24; 37:24-28.

¹¹ Tshapita 9: Prɔfɛsiya ya Ɛzɛkiyɛlɛ yendana l’otshungwelo w’ekambi wa Nzambi oma lo lɔhɔmbɔ la la Babilɔna ndo okalwelo awɔ lo wodja awɔ wa lootɔ yekɔ la losango le wanɛ walanga ngɛnyangɛnya Jehowa ɛlɔ kɛnɛ. Atɛmɔdi wa pudipudi wa Jehowa pombaka mpembola losambi ndo ntshungɔ oma lo shɛngiya ya kɔlɔ y’oma l’ɛtɛmwɛlɔ wa kashi. Kaanga mboyeso oma lo lokema l’ɛtɛmwɛlɔ, kaanga mbeso l’ekondjelo kotshikitanyi, ndo mboyeso oma lo ahole w’otshikitanyi, sho pombaka nama kaamɛ kakimanyiya dia sho mbeyama oko ekambi wa Nzambi.​—Ɛzk. 11:17, 18; 12:24; Jni. 17:20-23.

¹² Tshapita 10: Ɔtɛ a dui wendana la kaamɛ wakatɔtɔmiyama lo ɛnɛlɔ ka weka wamboma wakayonga la lɔsɛnɔ. Ande diɛsɛ diele la so dia monga l’atei w’olui w’atɛmɔdi wambɛdiama ndo wambokaloyama wakamba kaamɛ oko olui w’alembe lee!​—Ɛzk. 37:1-14.

¹³ Tshapita 12: Kaamɛ kakatɔtɔmiyama djekoleko lo prɔfɛsiya ka totenyi t’esongo tohende takayokoma tshɔi. Ande dui diakeketsha mbetawɔ dia mɛna woho wakotsha akitami ndo ɛkɔkɔ ekina prɔfɛsiya kɛnɛ lee! Kaanga mbasɛnaso l’andja wambatɔna oma le ɛtɛmwɛlɔ ndo oma lo lohetsho l’ase pɔlitikɛ, sho tshikalaka kaamɛ oma lo ngandji la kɔlamelo.​—Ɛzk. 37:15-23.

¹⁴ Tshapita 16: Ɛnɛlɔ ka pami kele la ashi wa mukanda ndo apami wokime dihomɔ dia ta dia ntɛtshatɛtsha kekɔ la ɔhɛmwɛlɔ w’ohomba w’ɔnɛ paka wanɛ wayɔtɔ lo “mfɔnu ka woke” oko wanɛ watɛmɔla Jehowa lo yoho yetawɔnde mbayodjama djembetelo dia nkondja panda.​—Mat. 24:21; Ɛzk. 9:1-11.

15-18. Lande na kahombaso ntetemala nkɛnɛmɔla ngandji ndo ngande wakokaso nsala dui sɔ?

¹⁵ Tshapita 4: Ɛnɛlɔ ka ditongami nɛi diasɛna kakatetsha akambo wendana la waonga wa Jehowa, ndo ngandji mbele dionga dioleki tshɛ. Etena katɛkɛtaso ndo kasalaso akambo la ngandji, sho mɛnyaka dia Jehowa ekɔ Nzambi kaso.​—Ɛzk. 1:5-14; 1 Jni. 4:8.

¹⁶ Tshapita 6 ndo 11: Ngandji ka Nzambi kakootshutshuya dia nsɔna todjamu tele oko Ɛzɛkiyɛlɛ. Lam’ele Nzambi ekɔ ngandji,  nde halange ndooko onto ndanyema etena kayondokomiya ɛlɔmbwɛlɔ kaki Satana la nkɛtɛ. (2 Pe. 3:9) Tekɔ la diɛsɛ dia nkɛnɛmɔla ngandji ka Nzambi lo nkotsha ɔkɛndɛ aso wa nsukɛ olimu wa djamu ya nshi nyɛ.​—Ɛzk. 33:1-9.

¹⁷ Tshapita 17 ndo 18: Jehowa mbeyaka dia anto efula wayotona kɛtshi kande ndo wayoyanga dia nshila atɛmɔdi ande wa kɔlamelo oshiki. Ngandji ayotshutshuya Jehowa dia mamɛ ekambi ande etena kayɔlɔsha “Ngɔngɔ ka lo wodja wa Mangɔngɔ” wanɛ wele la kɔlamelo le Nde. Ngandji kokaso anto akina totshutshuyaka dia mpɛmɔla anto efula ɔnɛ Jehowa ayolanya wanɛ wasɔkisha ekambi ande.​—Ɛzk. 38:1–39:20; 2 Tɛs. 1:6, 7.

¹⁸ Tshapita 19, 20, ndo 21: Ngandji koka Jehowa ekambi ande mɛnamaka hwe lo waɛnɛlɔ w’ɔkɛdi w’ashi washa lɔsɛnɔ ndo l’okahanyelo wa wodja. Waɛnɛlɔ asɔ mɛnyaka etombelo w’oma lo tshelo ya Jehowa yoleki tshɛ ya ngandji, mbuta ate nkimɔ lɔsɛnɔ l’Ɔnande dia pɛkato yaso dimanyiyama ndo dia sho monga la lɔsɛnɔ la kokele oko etenyi kɛmɔtshi ka nkumbo ka Nzambi. Yoho mɔtshi yoleki dimɛna ya sho mɛnya ngandji kokaso anto akina ele lo mbaewoya akambo wendana la nshi yayaye ya dimɛna efula yakalɔngɔsɔlɛ Jehowa wanɛ wele la mbetawɔ le Ɔnande.​—Ɛzk. 45:1-7; 47:1–48:35; Ɛny. 21:1-4; 22:17.

19. Kakɔna kayosala Yeso l’Ɛlɔmbwɛlɔ k’Ɛnɔnyi Kinunu? (Enda kiombo yele l’ɔtɛ a dui ɔnɛ: “Ohemba w’ekomelo.”)

¹⁹ L’Ɛlɔmbwɛlɔ k’Ɛnɔnyi Kinunu, Yeso ayolola miliyara y’anto ndo ayɔkɔnɔla paa k’oma le ‘otunyi aso, nyɔi.’ (1 Kɔr. 15:26; Makɔ 5:38-42; Ets. 24:15) Ɔkɔndɔ w’ana w’anto aki oko ɔkɔndɔ woludi la lɔkɔnyɔ ndo l’awui washa paa efula. Koko oko wayolɔka lɔlɔnga la lɔlɔnga, Yeso ayodimola ɔkɔndɔ wa paa ɔsɔ ndo ayosha wanɛ wayolɔ diaaso dia vɔ mfunda ɔkɔndɔ woleki tshɛ dimɛna. Lo tshimbo y’olambo w’oshinga w’etshungwelo, nde ayonya paa tshɛ yaya oma lo hemɔ, ata elando ndo ndjala. Kɛnɛ koleki tshɛ ele, nde ayotokimanyiya dia ndanya odio w’ekiyanu aso mbuta ate, pɛkato kakatahowɔ oma le Adama. (Rɔmɔ 5:18, 19) Yeso “[ayolanya] etsha wa Diabolo” tshɛ lo tshɛ. (1 Jni. 3:8) Ko, kakɔna kayosalema l’ɔkɔngɔ?

20. Ngande wayɔkɛnɛmɔla Yeso ndo anto 144 000 okitshakitsha wa diambo? Lembetshiya. (Enda osato wele lo mbɔtwɛlɔ.)

²⁰ Adia 1 Kɔrɛtɔ 15:24-28. Etena kayonga anto tshɛ la lɔsɛnɔ la kokele ndo kayokadimɔ nkɛtɛ k’otondo paradiso oko wakalake Jehowa oma l’etatelo, Yeso nde la anto 144 000 wayolɛ kaamɛ la nde wayɛnya okitshakitsha wa diambo efula lo nkaloya Diolelo le Jehowa. La lolango tshɛ ndo la wɔladi tshɛ, wayokaloya lowandji lakawakambe la lɔ l’edja k’ɛnɔnyi kinunu. Kɛnɛ tshɛ kakasale Diolelo kayotshikala pondjo.

21, 22. a) Ngande wayonga andja l’ekomelo k’ɛnɔnyi kinunu? b) Lande na kayotshungola Jehowa Satana l’ɛdiɛngɛ?

²¹ Oma laasɔ, Jehowa ayosala dui dimɔtshi dia diambo, dui diayɛnya wɛkamu w’efula wele la nde le ekambi ande wele la nkɛtɛ. Nde ayotshungola Satana nde la ɛdiɛngɛ ande oma lo difuku diaha l’ekomelo diakawadjama l’edja k’ɛnɔnyi kinunu. (Adia Ɛnyɛlɔ 20:1-3.) Anto ndo nkɛtɛ kayowoyɛna ayotshikitana tshɛ lo tshɛ la anto ndo nkɛtɛ kakaweyaka ntondo. La ntondo ka Aramangɛdɔna, efula k’anto wakanganyiyama oma le Satana ndo kaamɛ k’anto kakalanyema oma lo lohetsho ndo tshelo ya kananɛ kɔlɔ. (Ɛny. 12:9) Koko l’ekomelo k’ɛnɔnyi kinunu, anto tshɛ wayɔtɛmɔlaka Jehowa oko nkumbo kele kaamɛ ndo kokana ngandji. Nkɛtɛ kayonga paradiso kele la wɔladi.

²² Lande na kayotshungola Jehowa andjakanyi asɔ, mbuta ate, Satana l’ɛdiɛngɛ ande lo nkɛtɛ ya pudipudi shɔ? Nɛ dia kɔlamelo y’anto efula wayonga la lɔsɛnɔ l’ekomelo k’ɛnɔnyi kinunu kɔmbɔtɔ  l’ohemba oko atɛmɔdi wa kɔlamelo wa Jehowa. Efula k’anto wakavu aha la mbeya Jehowa. Vɔ wayolwama lo paradiso. Jehowa hatowasha tsho lɔsɛnɔ, koko nde ayokotsha ehomba awɔ tshɛ, mbuta ate ehomba awɔ wa lo demba ndo wa lo nyuma. Vɔ hawotonga la tɔsɛngiya ta kɔlɔ, koko wayɔsɛngiyamaka paka oma le anto w’ɛlɔlɔ ato. Vɔ wayodingama l’anto walanga Jehowa ndo wokambɛ. Satana koka nsɔngwɛ wanɛ wayolwama woho wakandasɔngwɛ Jɔbɔ lo mbuta ate, vɔ wekɔ lo kambɛ Jehowa nɛ dia nde mbakokɛka ndo mbatshɔkɔlaka. (Jɔbɔ 1:9, 10) Ɔnkɔnɛ, la ntondo ka Jehowa mfunda nkombo yaso lo pondjo lo dibuku dia lɔsɛnɔ, nde ayotosha diaaso dia mɛnya aha la taamu dia tekɔ la kɔlamelo le Nde oko wende Shɛso ndo Owandji aso.​—Ɛny. 20:12, 15.

23. Dui diakɔna diayohomana l’onto tshɛ?

²³ L’etena kɛmɔtshi ka mondo, Satana ayokondja diaaso dia nshimba anto dia kambɛ Nzambi. Ohemba akɔna ɔsɔ? Aha la  taamu, onto tshɛ ayohomana la woho wa dikambo diakahomana l’Adama la Eva, mbuta ate, nsɔna dia mbetawɔ ɛlɛmbɛ wa Jehowa, nsukɛ ɛlɔmbwɛlɔ kande ndo mbɔtɛmɔla kana tɔmbɔkwɛ Nzambi ndo nsukɛ Satana.

24. Lande na kelamɛ wanɛ wayɔtɔmbɔkɔ ɔnɛ Ngɔngɔ la Mangɔngɔ?

²⁴ Adia Ɛnyɛlɔ 20:7-10. Wanɛ wayɔtɔmbɔkɔ l’ekomelo ka ɛnɔnyi kinunu mbelamɛka Ngɔngɔ la Mangɔngɔ. Vɔ wayɔkɛnɛmɔla waonga wele oko wanɛ wakakɛnɛmɔla atɔmbɔki wakate Ɛzɛkiyɛlɛ lo prɔfɛsiya dia wayɔlɔsha ekambi wa Nzambi lo mfɔnu ka woke. Olui w’anto ɔsɔ, mbuta ate, “Ngɔngɔ ka lo wodja wa Mangɔngɔ,” wakatanemaka lo wedja wakalɔshanaka la ɛlɔmbwɛlɔ ka lowandji la Jehowa. (Ɛzk. 38:2) Woho akɔ waamɛ mbele, wanɛ wayɔtɔmbɔkɔ l’ekomelo k’Ɛlɔmbwɛlɔ ka Kristo k’Ɛnɔnyi Kinunu mbelamɛka “wedja.” Okambelo wa la tshɛkɛta “wedja” ekɔ dui di’ohomba. Lande na? Nɛ dia l’Ɛlɔmbwɛlɔ k’Ɛnɔnyi Kinunu, elelo tshɛ wendana la wedja wayonyɛma ndo anto tshɛ wayonga ambolami wa lowandji ɔtɔi, mbuta ate Diolelo dia Nzambi. Sho tshɛ tayonga lo wodja ɔtɔi wa lo nyuma. Lo mbelɛ atɔmbɔki asɔ ɔnɛ Ngɔngɔ la Mangɔngɔ ndo lo mbuta dia vɔ wekɔ “wedja,” prɔfɛsiya  kɛsɔ mɛnyaka dia Satana ayotondoya dia mbidja diatɔnelo l’atei w’ekambi ɛmɔtshi wa Nzambi. Ndooko onto layotshutshuyama la wolo dia mbeta lo wedi wa Satana. Onto tshɛ la kokele ayosala ɔsɔnwɛlɔ ande ndamɛ.

25, 26. Anto angana wayeta lo wedi wa Satana ndo kakɔna kayowakomɛ?

²⁵ Anto angana wayeta lo wedi wa Satana? Lofulo la wanɛ wayɔtɔmbɔkɔ lekɔ “oko lɔkɔngɔ la lo ndjale.” Etelo kɛsɔ halange nembetshiya dia weho akɔ tshɛ lofulo la woke l’anto wayɔtɔmbɔkɔ. Ngande weyaso dui sɔ? Tɔsɛdingole daka diakasha Nzambi Abrahama. Jehowa akate dia tokanula ta Abrahama tayonga oko “nsɛkɛ ya lɔkɔngɔ la l’omamu wa ndjale.” (Eta. 22:17, 18) Koko lofulo la wanɛ wakenga tokanula tande lekɔ anto 144 001. (Ngal. 3:16, 29) Lofulo lɔsɔ kaanga mbelɔ efula, lekɔ tsho yema tshitshɛ lo mbɛdika la lofulo tshɛ l’anto. Woho akɔ waamɛ mbele, lofulo l’anto wayeta lo wedi wa Satana mbeyaka monga efula, koko hatonga efula kambotamba elelo. Atɔmbɔki hawotonga waale w’efula le ekambi wa Jehowa wa kɔlamelo.

²⁶ Wanɛ wayɔtɔmbɔkɔ wayolanyema esadi eto. Vɔ la Satana l’ɛdiɛngɛ hawotonga nto, mbuta ate hawotonga l’elongamelo ka  mbolɔ. Paka tɛdikɔ tawɔ ta kɔlɔ ndo etombelo w’oma lo tɛdikɔ tɔsɔ mbayohɔmaka tena tshɛ.​—Ɛny. 20:10.

27-29. Kakɔna kakongɛɛ wanɛ wayoshika ntanga l’ohemba w’ekomelo?

²⁷ Lo wedi okina, wanɛ wayoshika ntanga l’ohemba w’ekomelo, nkombo yawɔ yayofundama pondjo lo “dibuku dia lɔsɛnɔ.” (Ɛny. 20:15) Oma laasɔ, oko nkumbo kele kaamɛ, ana wa Jehowa tshɛ wa kɔlamelo w’apami ndo wa wamato wayowɔtɛmɔlaka paka ndamɛ oto nɛ dia nde mɛtɛ kahomba tɛmɔma.

²⁸ Ohokanyiya dikambo dia nshi yayaye shɔ. Lɔsɛnɔ lele l’olimu wa dimɛna kana lɔngɛnyi la dimɛna lekɔ lo kokongɛ. Wɛ la wanɛ wokayɛ ngandji hanyosowaki nto pondjo. Wɛ hatonga nto l’ohomba w’olambo wa Yeso dia wɛ memala la ntondo ka Jehowa. Onto tshɛ ayonga la lɔngɛnyi la dimɛna la Nzambi. Ndo kɛnɛ koleki tshɛ ele, ɔtɛmwɛlɔ wa pudipudi wayosalema lo yoho ya kokele l’olongo ndo la nkɛtɛ. Ɔsɔ mbayoyala okaloyelo wa tshɛ w’ɔtɛmwɛlɔ wa pudipudi!

²⁹ Onde wɛ ayonga laawɔ dia mɛna lushi la woke lɔsɔ? Wɛ ayokoka monga laawɔ naka wɛ ntetemala nkamba la wetshelo esato w’ohomba w’oma lo dibuku dia Ɛzɛkiyɛlɛ, mbuta ate, mamema paka Jehowa ndamɛ oto, ntshikala kaamɛ l’ɔtɛmwɛlɔ wa pudipudi ndo kɛnɛmɔla ngandji kokayɛ anto akina. Prɔfɛsiya ya Ɛzɛkiyɛlɛ  yekɔ la wetshelo w’ekomelo ndo w’ohomba efula. Naa wetshelo akɔ?

30, 31. Kakɔna kayolembetshiya etelo k’ɔnɛ: “Vɔ wayohomba mbeya dia dimi kele Jehowa” a) le atunyi wa Nzambi? b) le ekambi wa Nzambi?

³⁰ Lo dibuku dia Ɛzɛkiyɛlɛ di’otondo, vɔ kalolɛ mbala la mbala etelo k’ɔnɛ: “Vɔ wayohomba mbeya dia dimi kele Jehowa.” (Ɛzk. 6:10; 39:28) Le atunyi wa Nzambi, etelo kɛsɔ kayolembetshiya ta ndo nyɔi. Vɔ wayotshutshuyama diaha komɛ tsho lo mbeya ɔnɛ Jehowa ekɔ. Vɔ wayeka lo yoho ya kɔlɔ kitshimudi ya lokombo lande la woke, mbuta ate “Nde salaka dia ndjaala.” “Jehowa kanga lolembelembe” ayokoma “ɔndɔshi wa ta wa wolo” wayowalɔsha. (1 Sam. 17:45; Eto. 15:3) Kaanga mbayowoyohɔ okanga a kɔngɔlɔ wanyu amboshila, vɔ wayoshihodia mɛtɛ k’ohomba efula lo dikambo dia Jehowa k’ɔnɛ: Ndooko kakoka mboshimba dia nkotsha sangwelo diande.

³¹ Le ekambi wa Nzambi, etelo k’ɔnɛ: “Vɔ wayohomba mbeya dia dimi kele Jehowa” kayolembetshiya wɔladi ndo lɔsɛnɔ. Jehowa ayosala dia sho nkoma woho wakandalange oma k’etatelo dia sho monga, mbuta ate anande w’apami ndo wa wamato wakɛnɛmɔla waonga ande lo yoho ya kokele. (Eta. 1:26) Jehowa amboshilaka monga le so Shɛso ka ngandji ndo Olami w’ɛkɔkɔ watokokɛ. Keema edja nde ayanga nkoma Nkum’ekanga kaso kalɛndja. La ntondo ka lushi lɔsɔ nkoma, nyɛsɔ tolamake l’otema losango la Ɛzɛkiyɛlɛ. Nyɛsɔ tɛnyake oma l’ɛtɛkɛta ndo l’etsha aso lushi tshɛ dia sho mbeyaka ele Jehowa ndo kɛnɛ ketawɔnde. Ko etena kayotshungɔ mpɛpɛ y’elanyelo lo mfɔnu ka woke, hatotoka wɔma. Koko tayonga la dihonga nɛ dia tayeya dia etshungwelo kaso kaya suke. (Luka 21:28) L’etena kaakatakonge dui sɔ, nyɛsɔ tokimanyiya anto wa l’ahole tshɛ dia mbeya ndo mboka Nzambi ɔtɔi kahomba tɛmɔma ngandji, Ɔnɛ lele la lokombo loleki nkombo tshɛ, Jehowa.​—Ɛzk. 28:26.