KIOMBO YA WETSHELO 19A
Ɛkɛdi w’ɛtshɔkɔ w’oma le Jehowa
Tɔsɛdingole avɛsa amɔtshi wa lo Bible wakamba la tɔtɛkɛta tele oko “ɔkɛdi” ndo “ashi” dia ntɛkɛta lo yoho ya didjidji dikambo dia ɛtshɔkɔ wakɛla oma le Jehowa. Etena kadiaso ɛkɔndɔ ɛsɔ tshɛ, sho keketshamaka efula dia mbeya woho watɔtshɔkɔla Jehowa. Lo ngande?
JƆƐLƐ 3:18 Prɔfɛsiya kɛnɛ tɛkɛtaka dikambo dia ɛtɛkɔ kaya oma lo tɛmpɛlɔ k’ekila. Tɔ kɛlaka ndo ndɔyaka dihole dia womu dia “Okidi w’esongo wa Akasia.” Laasɔ, oyadi Jɔɛlɛ kana Ɛzɛkiyɛlɛ wakɛnyi ɔkɛdi washa dihole dia womu lɔsɛnɔ. L’ɛkɔndɔ akɔ ehende, ɔkɛdi tombaka oma lo luudu la Jehowa kana tɛmpɛlɔ.
ZƐKARIYA 14:8 Omvutshi Zɛkariya akɛnyi “ashi wa lɔsɛnɔ” wakɛla oma l’osomba wa Jɛrusalɛma. K’ahende ɔtɔi k’ashi asɔ wakakɛlaka otsha lo ndjale ka lo ɛstɛ kana Ndjale Kambovɔ, ndo k’ahende ɔtɔi k’ashi akina wakakɛlaka otsha lo ndjale ka l’owɛstɛ, kana Ndjale ka Mediteraneya. Jɛrusalɛma aki “osomba wa Nkumekanga ka woke,” mbuta ate Jehowa Nzambi. (Mat. 5:35) Woho watɛkɛta Zɛkariya dikambo di’osomba ɔsɔ toholaka lowandji la Jehowa laadiko dia nkɛtɛ k’otondo lo nshi yayaye. Aya edja kambotoshihodia dia ashi wa lo prɔfɛsiya kɛnɛ mɛnyaka dia Jehowa ayɔtshɔkɔla elui ehende w’anto wele la kɔlamelo lo paradiso, mbuta ate wanɛ wayohandɔ lo mfɔnu ka woke ndo wanɛ wayolwama l’ɔkɔngɔ.
ƐNYƐLƆ 22:1, 2 Ɔpɔstɔlɔ Joani akɛnyi ɔkɛdi wa didjidji woleki wɔnɛ wakɛnyi Ɛzɛkiyɛlɛ. Koko, vɔ wekɔ lo ntomba aha oma lo tɛmpɛlɔ, koko oma lo kiti ka lowandji ka Jehowa. Ɔnkɔnɛ l’ɛnyɛlɔ k’ɛnɛlɔ ka Zɛkariya, mɛnamaka di’ɛnɛlɔ kɛnɛ tɔtɔmiyaka ɛtshɔkɔ w’oma lo lowandji la Nzambi l’Ɛnɔnyi Kinunu.
Lo mɛtɛ, ekɔ tsho yema y’otshikitanu tshitshɛ lam’asa ɛtshɔkɔ waya oma l’ɛlɔmbwɛlɔ ka Jehowa la wɛnɛ wele didjidji dia ɔkɛdi wakɛnyi Ɛzɛkiyɛlɛ l’ɛnɛlɔ. Ɛtshɔkɔ ɛsɔ tshɛ ndjaka oma le Jehowa ndo vɔ kɛlaka le ekambi ande tshɛ wele la kɔlamelo.
OSAMBO 46:4 Tolembete woho wele mɛnamaka dia divɛsa nɛ tɛkɛtaka awui akɔ ahende, mbuta ate ɔtɛmwɛlɔ ndo ɛlɔmbwɛlɔ. Lanɛ, tekɔ lo mɛna dia ɔkɛdi ɔmɔtshi wekɔ lo mbela ɔngɛnɔngɛnɔ lo “osomba wa Nzambi,” lo ntɛkɛta dikambo dia Diolelo kaamɛ la ɛlɔmbwɛlɔ, ndo “tabɛrnaklɛ k’ekila ka diambo ka Ɔnɛ-Laheme-Tshɛ,” lo ntɛkɛta dikambo di’ɔtɛmwɛlɔ wa pudipudi.
Lo tshɛ kawɔ, avɛsa anɛ toshikikɛka dia Jehowa ayɔtshɔkɔla anto wele la kɔlamelo lo toho tohende. Tayokondja wahɔ pondjo pondjo, ntondotondo oma l’ɛlɔmbwɛlɔ kande ndo yoho ya hende oma lo kɛnɛ kakandakongɛ dikambo di’ɔtɛmwɛlɔ wa pudipudi. Ɔnkɔnɛ, nyɛsɔ toyashikikɛ oma ko kakianɛ dia ntetemala nyanga “ashi wa lɔsɛnɔ” oma le Jehowa Nzambi l’Ɔnande, mbuta ate kɛnɛ katoshawɔ la ngandji tshɛ dikambo dia lɔsɛnɔ la pondjo!—Jɛr. 2:13; Jni. 4:10.
