Prɔfɛsiya ka lo Bible ndo ɔkɔndɔ mɛnyaka dia Yeso akatatɛ mbolɛ oko Nkumekanga l’olongo lo 1914. Ɔsɔ aki etatelo ka nshi y’ekomelo ya dikongɛ diaki Satana lanɛ la nkɛtɛ. Kakɔna kakasale Yeso etena kakandakome Nkumekanga? Onde nde akatshungola ambeki ande wa la nkɛtɛ mbala kakɔ ɔtɔi oma lo lɔhɔmbɔ la Babilɔna ka Woke? Onde nde akasɔnɛ “ɔhɔmbɔ wa kɔlamelo ndo kɛsɔ” lo 1914 ndo akatatɛ la olimu ande wa woke wa dinela?​—Mat. 24:45.

Mɛnamaka hwe dia awui asɔ kosalema. Tohɔ dia ɔpɔstɔlɔ Petero akasambiyama dia mbuta ɔnɛ kilombo kakahombe “ntatɛ lo luudu la Nzambi.” (1 Pe. 4:17) Woho akɔ waamɛ mbele, omvutshi Malaki akatatshi etena kakahombe Jehowa ndja lo luudu Lande l’ɔtɛmwɛlɔ kaamɛ la “ɔkɛndji wa sheke,” mbuta ate Ɔna Nzambi. (Mal. 3:1-5) Etena kɛsɔ kakahombe monga etena ka wɛdiamelo ndo ka mbidjama l’ohemba. Onde awui wa l’ɔkɔndɔ mbɔtɔnɛka l’awui asɔ wa lo prɔfɛsiya?

 Ekɔ ngasɔ! Lo 1914 polo l’etatelo ka 1919 aki etena ka wolo kakadjama l’ohemba ndo kakɛdiama ambeki wa Bible, lokombo lakeyamaka Ɛmɛnyi wa Jehowa l’etena kɛsɔ. Lo 1914, ekambi wa Nzambi efula wa la nkɛtɛ wakakɔmɔ etena kaki ekomelo ka dikongɛ nɛ koondja oko wakawalongamɛka. Vɔ wakayoleka nkɔmɔ lo 1916, etena kakavu ɔnangɛso Charles Taze Russell, ɔnɛ lakalɔmbɔlaka ekambi wa Nzambi. Anto amɔtshi wakayaɛkɛka efula le ɔnangɛso Russell kombetawɔ dia Joseph Franklin Rutherford, lakahɛnɛ Russell nɔmbɔla. Diatɔnelo diakayɔtɔka ndo diakayange nkakitola okongamelo lo 1917. Oma laasɔ, lo 1918, ondo oma lo shɛngiya y’andjashi Nzambi, ɔnangɛso Rutherford la asekande akina esambele wakalomboshama, wakaahindɛ onongo ndo wakadjama lo lokanu. Mbalasa kakalɔmbɔlaka olimu wa l’andja w’otondo la Brooklyn kakadihama. Mbokɛmaka hwe dia laasɔ ko ekambi wa Nzambi watatshungɔ tshɛ lo tshɛ oma lo Babilɔna ka Woke!

Ko, kakɔna kakatombe lo 1919? Akambo wakasalema esadi esadi! L’etatelo k’ɔnɔnyi ɔsɔ, ɔnangɛso Rutherford la asekande wakatshungɔ oma lo lokanu. Ndo wakakalola l’olimu awɔ mbala kakɔ ɔtɔi! Aha la ntshimbatshimba, losanganya la woke lahohamamɛki lakakongɛma ndo periodikɛ kakawelɛka ɔnɛ L’Âge d’Or (nshi nyɛ Emɔ!) kakatombe. Periodikɛ k’oyoyo kɛsɔ kakalɔngɔsɔma dia kambaka la tɔ l’esambishelo ka lo sɛkɛ. Laadiko dia laasɔ, l’etshumanelo tshɛ omendji ɔmɔtshi akasɔnama dia kongɛka ndo nɔmbɔlaka olimu w’esambishelo. L’ɔnɔnyi akɔ waamɛ ɔsɔ, Bulletin (nshi nyɛ Dikatshi dia losanganya la Lɔsɛnɔ ndo olimu aso w’Okristo) diakatondjama dia nkimanyiya apandjudi dia nkongɛ olimu w’esambishelo.

Kakɔna kakatombe? Mɛnamaka hwe dia Kristo akatshungola ekambi ande oma lo lɔhɔmbɔ la Babilɔna ka Woke. Nde akasɔnɛ ɔhɔmbɔ ande wa kɔlamelo ndo kɛsɔ. Olimu wa dinela wakatatɛ salema. Ntatɛ oma k’ɔnɔnyi w’ohomba ɔsɔ wa 1919, olimu wambohama lo yoho ya diambo efula.