Lo nshi yakete, ekanda aso wakataka dia Lokristokristo lekɔ didjidji dia Jɛrusalɛma ya apɔsta. Woho waki anto komonga la kɔlamelo la Jɛrusalɛma, mbuta ate woho wakawatɛmɔlaka dikishi, woho wakadiangana awui wa kɔlɔ toholaka aha la taamu kɛnɛ kasalema lo Lokristokristo. Koko l’ɛnɔnyi weke ka mbeta, ekanda aso mbidja ndo wɔnɛ wadiayɛ kakianɛ hawoyolembetshiya awui wa didjidji ndo okotshamelo awɔ lo kɛnɛ kendana la prɔfɛsiya naka ndooko ɔkɔkɔ wa shikaa w’oma lo Bible wa nsala dui sɔ. Onde ekɔ ɔkɔkɔ shikaa w’oma l’Afundelo wɛnya dia Lokristokristo lekɔ didjidji dia Jɛrusalɛma? Ndooko.

Tɔsɛdingole awui wayela anɛ: L’etena kɛmɔtshi Jɛrusalɛma aki dihole diakalɔmbɔmaka ɔtɛmwɛlɔ wa pudipudi, l’ɔkɔngɔ diko anto wakadjasɛka lɛkɔ wakayongaka waa apɔsta. Otshikitanyi la wɔ, Lokristokristo latongaka ndooko lushi l’ɔtɛmwɛlɔ wa pudipudi. Ntatɛ lam’akalamɛ lo ntambe ka nɛi T.D., Lokristokristo mbetshaka nshi tshɛ paka wetshelo wa kashi.

Laadiko dia laasɔ, l’ɔkɔngɔ wa Jɛrusalɛma ndanyema oma le ase Babilɔna, Jehowa akayetawɔka osomba ɔsɔ nto ndo vɔ wakayokoma dihole diakalɔmbɔmaka ɔtɛmwɛlɔ wa mɛtɛ. Koko Lokristokristo latetawɔmaka ndooko lushi oma le Nzambi ndo kamayololanyema lo mfɔnu ka woke, lɔ halonɛki nto pondjo.

Lo menda kɛnɛ kambotɔsɛdingola, kakɔna kakokaso mbuta? Etena kasɛdingolaso prɔfɛsiya ya lo Bible yakakotshama le ase Jɛrusalɛma waki komonga la kɔlamelo, sho koka mbuta ɔnɛ: ‘Dui nɛ kana dui sɔ toholaka kɛnɛ kɛnaso lo Lokristokristo ɛlɔ kɛnɛ.’ Koko ndooko ɔkɔkɔ w’oma l’Afundelo wɛnya dia Lokristokristo lekɔ didjidji dia Jɛrusalɛma.