TSHAPITA 26
“Ndooko onto l’atei anyu layoshisha lɔsɛnɔ”
Etena kakahandjɔ masuwa, Pɔɔlɔ akɛnya mbetawɔ ka wolo ndo ngandji kakandokaka anto
Lo ndjela Etsha 27:1–28:10
1, 2. Lɔkɛndɔ lakɔna lakatandaka Pɔɔlɔ ndo awui akɔna ondo wakokiyanyaka?
PƆƆLƆ akakanyiyaka wonya tshɛ ɛtɛkɛta wakandoke nɛ dia vɔ wayonga la shɛngiya ya wolo lo kɛnɛ kendana la nshi yande yayaye. Nguvɛrnɛrɛ Fɛsto akawotɛ ɔnɛ: “Wɛ pombaka ntshɔ le Kayisa.” Aya ɛnɔnyi ehende wadiɛnɛ Pɔɔlɔ lo lokanu, laasɔ lɔkɛndɔ l’otale l’otsha la Rɔmɔ layotshikitanya yema akambo. (Ets. 25:12) Koko lo kɛnɛ kendana la nkɛndɔ yakandande lo masuwa, Pɔɔlɔ kombohɔka tsho hiɛlɛlɛ ya dimɛna ndo diangɔ di’amɛna diakandɛnaka l’emamu w’ashi. Koko lɔkɛndɔ latandatshu dia tɛnama le Kayisa koka monyiya ambola w’ohomba efula lo yimba ya Pɔɔlɔ.
2 Pɔɔlɔ aki mbala efula lo “waale lo nkushi,” akahande mbala efula lam’akahandjɔka masuwa wakinde lɔkɔ, aketsha otsho w’otondo la yanyi y’otondo l’ashi wa dingunda. (2 Kɔr. 11:25, 26) Ndo nto, lɔkɛndɔ lɔnɛ layotshikitana la nkɛndɔ ya misiɔnɛrɛ yakandande aha oko ose lokanu. Pɔɔlɔ ayanga minda lɔkɛndɔ l’otale efula la kilɔmɛtrɛ oko 3000 oma la Kayisariya polo la Rɔmɔ oko ose lokanu. Onde nde ayokoma dimɛna? Oyadi kaanga nde ayokoma dimɛna, ko shi waale mbakokongɛka? Tohɔ dia nde ayanga tolomboshama le owandji woleki tshɛ wa l’andja wa Satana wa l’etena kɛsɔ.
3. Eshikikelo kakɔna kaki la Pɔɔlɔ ndo kakɔna kayotɛna lo tshapita nyɛ?
3 Lo ndjela kɛnɛ tshɛ kamboyadia lo dikambo dia Pɔɔlɔ, onde wɛ fɔnyaka dia nde akashisha elongamelo ndo akakɔmɔ l’ɔtɛ wa kɛnɛ kakookongɛka? Ndooko! Nde akeyaka di’ekakatanu wakookongɛka, koko nde kombeyaka ekakatanu akɔ shikaa. Takandakoke nshisha ɔngɛnɔngɛnɔ ande l’esambishelo lo tayakiyanyaka di’awui wahandakoke nkandola. (Mat. 6:27, 34) Pɔɔlɔ akeyaka dia Jehowa akalangaka dia nde nkamba la diaaso tshɛ dia nsambisha kaanga ewandji wa l’andja ɔnɛ lokumu l’ɔlɔlɔ la Diolelo dia Nzambi. (Ets. 9:15) Pɔɔlɔ akayashikikɛ dia nkotsha ɔkɛndɛ ande oyadi la ntondo k’okakatanu akɔna tshɛ. Shi eshikikelo kɛsɔ mbele ndo la so? Nyɛsɔ totshinde Pɔɔlɔ lo lɔkɛndɔ lɔsɔ ndo tende wetshelo wakokaso nkondja oma l’ɛnyɛlɔ kande.
Etsha 27:1-7a)
“Lɔpɛpɛ lakayaka oma la ntondo kaso” (4. Lo woho akɔna wa masuwa wakatatɛ Pɔɔlɔ minda lɔkɛndɔ, ndo nde la waa na?
4 Owandji w’asɔlayi w’ose Rɔmɔ Juliyo mbakawasha ɔkɛndɛ wa ntshɔ la Pɔɔlɔ l’ase lokanu akina ndo nde akɔtɔ la wɔ lo masuwa w’amundji w’okanda wakakome la Kayisariya. Masuwa akɔ wakaye oma la Adaramutiyo, dibongo dia lo owɛstɛ ka Asie Mineure mbɛlanɛ l’osomba wa Mitilɛnɛ wele lo disɛnga dia Lesbos. Masuwa wakatshu otsha lo nɔrdɛ, ko totshɔ otsha l’owɛstɛ watemala dia nɔngɔla ndo nɔnga diangɔ. Masuwa wa ngasɔ kosalema dia mɛmba anto dimɛna, djekoleko ase lokanu. (Enda kiombo yele l’ɔtɛ a dui ɔnɛ: “ Minda lɔkɛndɔ lo masuwa w’amundji w’okanda.”) Diɛsɛ ko aha Pɔɔlɔ oto mbaki Okristo l’atei w’andjakanyi waki lo masuwa. Asekande w’Akristo ahende wakatatshɔka la nde, mbuta ate Aristarako la Luka. Luka mbakafunde ɔkɔndɔ wa lɔkɛndɔ lɔsɔ. Hateye kana asekande ahende wa kɔlamelo asɔ wakafute vɔamɛ atikɛ ko kana wakɔtɔ lo masuwa oko atshindedi wa Pɔɔlɔ.—Ets. 27:1, 2.
5. Ngande wakalongola anangɛso wa la Sidɔna Pɔɔlɔ ndo wetshelo akɔna wakondjaso oma lo dikambo sɔ?
5 L’ɔkɔngɔ wa vɔ nkɛndakɛnda lo masuwa lushi l’otondo otsha lo nɔrdɛ ndo nsala kilɔmɛtrɛ oko 110, masuwa wakemala la Sidɔna l’omamu wa Suriya. Mɛnamaka dia Juliyo kosalɛ Pɔɔlɔ awui oko ondjakanyi, ondo l’ɔtɛ waki Pɔɔlɔ ose Rɔmɔ, koko watawosandja. (Ets. 22:27, 28; 26:31, 32) Juliyo aketawɔ dia Pɔɔlɔ kita dia tɛnana l’asekande Akristo. Anangɛso l’akadiyɛso waki mɛtɛ l’ɔngɛnɔngɛnɔ dia nongola Pɔɔlɔ l’ɔkɔngɔ wa nde mbetsha ɛnɔnyi ehende lo lokanu! Onde wɛ koka nkanyiya waaso wakokayɛ nongola anto lakayɛ ndo keketshama oma lo dikambo sɔ?—Ets. 27:3.
6-8. Ngande wakete lɔkɛndɔ la Pɔɔlɔ oma la Sidɔna polo la Kinidɛ ndo waaso akɔna ondo wakakambe la Pɔɔlɔ dia nsambisha?
6 Oma la Sidɔna, masuwa wakatetemala ntshɔ l’omamu ndo wakalekana Kilikiya, suke la Taraso, osomba wakotɔ Pɔɔlɔ. Luka kɔtɛkɛta di’ahole akina wakemala masuwa, koko nde akate losango la kɔlɔ l’ɔnɛ “lɔpɛpɛ lakayaka oma la ntondo kaso.” (Ets. 27:4, 5) Koko Pɔɔlɔ akakambaka la diaaso tshɛ dia nsambisha lokumu l’ɔlɔlɔ. Ndooko onyake nde akasambisha asekande ase lokanu waki lo masuwa, anto wakakambaka lo masuwa, asɔlayi kaamɛ ndo anto waki l’abongo wakat’emalaka masuwa. Onde sho lawɔ kambaka la diaaso tshɛ diakondjaso dia nsambisha?
7 Ko masuwa wakatokomaka la Mira, dibongo diele l’omamu wa Asie Mineure. Lɛkɔ, Pɔɔlɔ ndo anto akina wakatɔɔtɔ lo masuwa okina wakahombe mbakonya lɛnɛ akawatatshɔka la Rɔmɔ. (Ets. 27:6) Nshi shɔ diangɔ dia ndɛ diaki la Rɔmɔ diakayaka oma l’Edjibito oma lo dibongo dia Mira. Juliyo akɛnyi masuwa wɛmba diangɔ ko akɔtshiya ase lokanu ndo asɔlayi lɔkɔ. Masuwa ɔsɔ wakaleke wa ntondo woke. Vɔ wakatɛmbaka diangɔ dia ndɛ kaamɛ ndo anto 276, mbuta ate wanɛ wakakambaka lo masuwa, asɔlayi, ase lokanu ndo ondo anto akina wakatatshɔka la Rɔmɔ. Masuwa wa woke ɔsɔ wakakimanyiya Pɔɔlɔ dia monga l’anto efula wa nsambisha ndo nde akakambe la diaaso sɔ dimɛna.
8 Oma laasɔ, masuwa wakatemala la Kinidɛ lo sidɛ ɛstɛ k’omamu wa Asie Mineure. Naka lɔpɛpɛ lekɔ dimɛna masuwa salaka lushi ɔtɔi. Koko Luka mbutaka ɔnɛ: “L’ɔkɔngɔ wa sho ntshɔ nshi efula ɔkɔkɛ, takatokomaka la Kinidɛ l’okakatanu w’efula.” (Ets. 27:7a) Lɔkɛndɔ laki paa nɛ dia lɔpɛpɛ lakayaka oma la ntondo. (Enda kiombo yele l’ɔtɛ a dui ɔnɛ: “ Lɔpɛpɛ l’oma la ntondo la lo Mediteraneya.”) Anto waki lo masuwa wakadiɛnɛ la lɔpɛpɛ la wolo ndo l’asuku w’ashi.
“Lɔpɛpɛ lakatosutshasutshaka wolo” (Etsha 27:7b-26)
9, 10. Ekakatanu akɔna wakatombe suke la Kɛrɛtɛ?
9 Oma la Kinidɛ, kapitɛnyi akalange dia vɔ ntetemala otsha lo owɛstɛ, koko Luka laki lawɔ mbutaka ɔnɛ “lɔpɛpɛ lakatokaloyaka ɛkɔngɔkɔngɔ.” (Ets. 27:7b) Lam’akonɛ masuwa oma lo dibongo, lɔpɛpɛ la wolo l’oma lo nɔrdɛ ɛstɛ lakatshindjiya masuwa otsha lo sidɛ ondo la lowango l’efula. Oko wakaakokɛ disɛnga dia Kupiro oma lo mpɛpɛ yakayaka oma la ntondo lo masuwa wakawɔtɔ ntondo, mbala kɛnɛ nto disɛnga dia Kɛrɛtɛ diakaakokɛ oma lo lɔpɛpɛ lakayaka oma la ntondo. Lam’akalekana masuwa Salimɔnɛ kaki lo ɛstɛ ka disɛnga dia Kɛrɛtɛ, lɔpɛpɛ lakakitakita yema. Lande na? Nɛ dia masuwa wakakome lo sidɛ ka disɛnga laasɔ aki oko vɔ wakakokamɛ oma lo lɔpɛpɛ la wolo. Anto waki lo masuwa waki l’ɔngɛnɔngɛnɔ efula kaanga mbakiwɔ wa lo tshanda ya tshitshɛ! L’edja tshɛ kaki masuwa lo ndjale, wanɛ wakakambaka lo masuwa wakeyaka dia nshi ya tshitshi yakayasukanaka. Diakɔ diakawayakiyanyaka.
10 Luka shikikɛka ɔnɛ: “L’ɔkɔngɔ wa sho mbeta l’omamu wa disɛnga [Kɛrɛtɛ] l’okakatanu, takakome lo dihole dimɔtshi dielamɛ ɔnɛ Dibongo dia Dimɛna.” Kaanga mbele akona wakakokɛ masuwa oma lo lɔpɛpɛ la wolo, aki paka wolo dia masuwa kɛndakɛnda dimɛna. Koko l’ekomelo, wakayɛna dibongo dia tshitshɛ diakawakoke temala, dibongo diele la ntondo ka dihole di’ɛtɔla otsha lo nɔrdɛ. Edja ka ngande kakawetsha lo dihole sɔ? Luka mbutaka dia “etena k’otale kakete.” Koko ɔsɔ aki etena ka paa le wɔ. Lo Ngɔndɔ ka divwa/ka dikumi aki waale efula minda lɔkɛndɔ lo masuwa.—Ets. 27:8, 9.
11. Dako diakɔna diakasha Pɔɔlɔ ase masuwa, ko yɛdikɔ yakɔna yakawɔshi?
11 Ondo waa pasase wakambola Pɔɔlɔ kanyi l’ɔtɛ wakandandaka nkɛndɔ efula lo Mediteraneya. Pɔɔlɔ akawatɛ diaha ntetemala la lɔkɛndɔ lo masuwa nɛ dia “lɔkɛndɔ lɔnɛ layonga la waale ndo tayoshisha efula,” kaanga nsɛnɔ y’anto. Koko kapitɛnyi ndo nkanga masuwa konanga nɛ dia vɔ wakalange nkoma la masuwa lo dihole dia dimɛna. Vɔ waketawoya Juliyo ndo anto efula waki lo masuwa dia wakahombe nsala la wolo dia nkoma la Feniksɛ lɛnɛ ele ondo dibongo diakaleke woke ndo dihole dia dimɛna dia vɔ mbetsha nshi ya tshitshi. Ɔnkɔnɛ lam’akapɛpɛ yema ya lɔpɛpɛ y’oma lo sidɛ, vɔ wakonyiya masuwa koko lɔpɛpɛ lakɔ kombiviya.—Ets. 27:10-13.
12. L’ɔkɔngɔ wa vɔ monɛ oma la Kɛrɛtɛ, ngande wakakɛndakɛnda masuwa, ndo kakɔna kakasale ase masuwa dia mbewɔ waale?
12 Ko wakahomana l’okakatanu okina wa wolo, mbuta ate “lɔpɛpɛ la wolo” l’oma lo nɔrdɛ ɛstɛ. Lo tshanda mɔtshi, vɔ waki l’ekokelo lo “disɛnga dimɔtshi dia tshitshɛ dielɛwɔ Kauda” diaki lo kilɔmɛtrɛ 65 oma lo Dibongo dia Dimɛna. Koko masuwa waki paka lo waale wa mɛmbama la lɔpɛpɛ otsha lo sidɛ ko tɔkɔmama lo lɔkɔngɔ laki l’omamu w’Afrikɛ. L’ɔtɛ wa wɔma ɔsɔ, ase masuwa wakalange mbidiya waato wa tshitshɛ wakakelekama lo masuwa. Koko waki l’okakatanu efula nɛ dia waato akɔ wakalole l’ashi. Oma laasɔ, vɔ wakadinge masuwa l’ɛkɔdi kana la mɔlɔla wa weke diaha abaya pandjɔ. Ko vɔ wakakitshakitsha apɛma, ahɔndɔ ndo eshinga wakakimanyiyaka dia lɔpɛpɛ kɛndjakɛndja masuwa ndo wakasalaka tshɛ dia masuwa mbɛlɛ otsha lɛnɛ akayaka lɔpɛpɛ. Vɔ mɛtɛ wakɛnyi wonya oko lɛdi! Kɛnɛ tshɛ kakawasale komonga l’etombelo w’amɛna nɛ dia ‘lɔpɛpɛ lakaasutshasutshaka wolo.’ Lushi la sato dia masuwa monga osadi ndo nteha dimɛna wakakasha diangɔ diaki lo masuwa l’ashi.—Ets. 27:14-19.
13. Ngande waki awui lo masuwa etena kakapɛpaka lɔpɛpɛ la wolo?
13 Efula k’anto wakasakaka lokomba la wɔma. Koko Pɔɔlɔ l’asekande waki la dihonga. Ntondo ka laasɔ, Nkumadiɔndjɔ akashikikɛ Pɔɔlɔ dia nde ayotosambisha la Rɔmɔ ndo l’ɔkɔngɔ diko ondjelo ɔmɔtshi akoshikikɛ dikambo sɔ. (Ets. 19:21; 23:11) Koko vɔ wakadiɛnɛ la lɔpɛpɛ ndo kotetemala la lɔkɛndɔ lawɔ mingu hiende otsho oko otsho ndo yanyi oko yanyi. Mvula kakatetemalaka ndɔ ndo wange w’edima wakasale diaha esase wa wonya ndo wa tɔɔtɔ mɛnama. Ko kapitɛnyi aki l’okakatanu dia mbeya dihole diakiwɔ ndo lɛnɛ akawahombe ntshɔ. Vɔ kɔndɛ kaanga yangɔ. Ndooko onto laki la mposa ka ndɛ l’ɔtɛ wa wɔma, wa tshitshi, mvula ndo woho wakambɔmbɔka ndjale.
14, 15. a) Lam’akandatɛkɛtaka l’anto waki lo masuwa, lande na kakawaohola Pɔɔlɔ ɔhɛmwɛlɔ wakandawasha ntondo? b) Wetshelo akɔna wakondjaso oma lo losango lakewoya Pɔɔlɔ?
14 Pɔɔlɔ akemala. Nde akawaohola kɛnɛ kakandawatɛ la ntondo, koko aha l’oyango wa mbaɔndɔla ɔnɛ: ‘Nshi lakanyotɛ’? Koko woho wakete akambo akɛnya dia vɔ wakahombe nkamba la kɛnɛ kakandawatɛ. Oma laasɔ nde akate ɔnɛ: “Kakianɛ, dimi lambonyɔlɔmba dia nyu monga la dihonga, nɛ dia ndooko onto l’atei anyu layoshisha lɔsɛnɔ, paka masuwa oto mbayolana.” (Ets. 27:21, 22) Ɛtɛkɛta ɛsɔ wakakeketsha anto mɛtɛ! Pɔɔlɔ lo wedi ande akangɛnangɛna efula lo woho wakakambe Jehowa la nde dia mbewoya anto losango l’elongamelo lɔsɔ. Ekɔ ohomba sho mbohɔ dia Jehowa ndjakiyanyaka dikambo dia lɔsɛnɔ l’onto tshɛ. Onto tshɛ ekɔ la nɛmɔ lo washo ande. Ɔpɔstɔlɔ Petero akafunde ɔnɛ: “Jehowa . . . halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.” (2 Pe. 3:9) Diakɔ diele sho pombaka nsala la wolo dia mbewoya anto efula la shamanya tshɛ losango l’elongamelo l’oma le Jehowa! Nsɛnɔ y’anto yekɔ lo waale.
15 Ndooko onyake Pɔɔlɔ akasambisha anto efula waki lo masuwa “elongamelo ka daka diakalake Nzambi.” (Ets. 26:6; Kɔl. 1:5) Etena kɛnɛ kayanga masuwa pandjɔ, nde akasha ɛkɔkɔ ekina w’anto monga l’elongamelo kaanga mbakiwɔ lo waale. Nde akate ɔnɛ: “Lotsho w’ɛlɔ, ondjelo wa Nzambi katɛmɔlami . . . akemadi suke lami ko akatshi ate: ‘Pɔɔlɔ, tokake wɔma. Wɛ ayemala la ntondo ka Kayisa ndo Nzambi ayokokɛ wanɛ tshɛ watatshu la yɛ.’” Pɔɔlɔ akaakeketsha ɔnɛ: “Ɔnkɔnɛ amɛka, nyonge la dihonga, nɛ dia lekɔ la mbetawɔ le Nzambi nte akambo tshɛ wayosalema oko wakawambute. Koko sho pombaka temala lo disɛnga dimɔtshi.”—Ets. 27:23-26.
“Ko vɔ tshɛ wakatombe etondo eto l’okongo” (Etsha 27:27-44)
“Nde . . . akasha Nzambi losaka la ntondo kawɔ vɔ tshɛ.”—Etsha 27:35
16, 17. a) Lo diaaso diakɔna diakalɔmbɛ Pɔɔlɔ ndo shɛngiya yakɔna yaki la dɔmbɛlɔ sɔ? b) Ngande wakakotshama kɛnɛ kakate Pɔɔlɔ?
16 L’ɔkɔngɔ wa diɛnɛ mingu hiende lo masuwa wakatɛmbamaka la lɔpɛpɛ lo kilɔmɛtrɛ suke la 870, ase masuwa wakɛnyi di’awui wayanga ndowana lam’akawoke oko londjo l’asuku wakɔmama lo dibongo. Vɔ wakatambiya nkongo ya masuwa l’ashi diaha vɔ mɛmbama la lɔpɛpɛ ndo wakɛdiya ntondo ka masuwa otsha lo dibongo dia vɔ temala. Ko vɔ wakalange ndawɔ koko asɔlayi wakaashimbe nɛ dia Pɔɔlɔ akatɛ owandji w’asɔlayi ɔnɛ: “Naka anto anɛ hawotshikadi lo masuwa, kete hanyotokoka mbika.” Etena kɛnɛ kahayoleka masuwa nsutshasutshama, Pɔɔlɔ akatɛ anto tshɛ dia ndɛ yangɔ lo mbashikikɛ nto dia ndooko onto layovɔ. Ko Pɔɔlɔ “akasha Nzambi losaka la ntondo kawɔ vɔ tshɛ.” (Ets. 27:31, 35) Lo nsala dɔmbɛlɔ dia eokelo ka losaka sɔ, Pɔɔlɔ akatshikɛ Luka, Aristarako ndo Akristo ɛlɔ kɛnɛ ɛnyɛlɔ ka mbokoya. Onde alɔmbɛlɔ ayɛ wa lo sɛkɛ keketshaka ndo sambaka anto akina?
17 L’ɔkɔngɔ wa dɔmbɛlɔ dia Pɔɔlɔ, “anto tshɛ wakonge la dihonga ndo wakale yangɔ.” (Ets. 27:36) Ko vɔ wakanyomonya wotsho lo masuwa lo mbikasha diangɔ diaki lɔkɔ dia masuwa monga osadi ndo nkoma lo dibongo. Lam’akahotɔ wonya, wanɛ wakamba lo masuwa wakahembola eshinga wa nkongo ya masuwa wakakitshakitsha waa kapi yakatakimanyiyaka dia mɛngɔla masuwa, wakadiya dipɛma dia vɔ ntetemala kɛndakɛnda polo lo dibongo. Ko ntondo ka masuwa kakatɔkɔmamaka wolo lo lɔsɛnga kana lo lɔtɛkɛ, ko masuwa wakatatɛ mbatatɛ. Asɔlayi amɔtshi wakalange ndjaka ase lokanu diaha vɔ ndawɔ, koko Juliyo akaashimbe. Nde akatɛ onto tshɛ dia nsala osale kana mbahema l’ɛngɔ kɛmɔtshi dia nkoma l’okongo. Kɛnɛ kakate Pɔɔlɔ kakakotshama, mbuta ate anto akɔ tshɛ 276 wakake. Eelo, “vɔ tshɛ wakatombe etondo eto l’okongo.” Ko lende akiwɔ?—Ets. 27:44.
Etsha 28:1-10)
“Ɔlɔlɔ w’otema wa mamba” (18-20. Ngande wakɛnya ase Malta “ɔlɔlɔ w’otema wa mamba,” ndo dihindo diakɔna diakasale Nzambi lo tshimbo ya Pɔɔlɔ?
18 Anto wakahande asɔ waki lo disɛnga dia Malta, diaki lo sidɛ ka Kilikiya. (Enda kiombo yele l’ɔtɛ adui ɔnɛ: “ Lende aki disɛnga dia Malta?”) Ase disɛnga diakɔ wakatɛkɛtaka ɔtɛkɛta okina wakawaɛnya “ɔlɔlɔ w’otema wa mamba.” (Ets. 28:2) Vɔ wakahɛtshɛ angɛndangɛnda wakalɔwɛ kɔlɔlɔ ndo wakasakaka lokomba la tshitshi ka mvula asɔ dja. Kɛsɔ akakonya dia dihindo dimɔtshi salema.
19 Dia nkimanyiya anto, Pɔɔlɔ akatɔngɔna kunyi dia mbidja lo dja. Ko oloyi wa lɔlɛngɔ wakatombe oma lo lokunyi ko wakolumata ndo wakalɛndalɛndaka lo lonya lande. Ko ase Malta wakɔshi di’ɔsɔ ekɔ dilanya di’oma le Nzambi. a
20 Ase ngelo kɛsɔ wakɛnyi woho wakalumatama Pɔɔlɔ wakafɔnya dia “lonya lande layoda.” Lo ndjela diksiɔnɛrɛ dimɔtshi, wakakambe lanɛ “la tshɛkɛta y’aseka enganga” l’ɔtɛkɛta wakafundama Bible ntondo. Bu dui dia diambo dia tshɛkɛta ya ngasɔ ndja mbala kakɔ ɔtɔi lo yimba ya “Luka, dɔkɔtɛlɛ diokaso ngandji.” (Ets. 28:6; Kɔl. 4:14) Koko Pɔɔlɔ akanyanginyola oloyi ɔsɔ ndo ndooko kɔlɔ kakokome.
21. a) Naa bɛnyɛlɔ dimɔtshi diɛnya dia ɔkɔndɔ wa Luka ɔnɛ wekɔ mɛtɛ? b) Ahindo akɔna wakasale Pɔɔlɔ ndo naa shɛngiya yaki la wɔ le ase Malta?
21 Pubiliyo, ose ɔngɔnyi ɔmɔtshi laki la dikambɔ akadjasɛka lo disɛnga sɔ. Ondo nde mbaki owandji wakaleke wakadje ase Rɔmɔ lo disɛnga dia Malta. Luka mbutaka dia nde aki “Ɔnɛnɛ ɔmɔtshi wa lo disɛnga sɔ,” lo nkamba la titrɛ katanema l’efundelo ehende w’ase Malta. Nde akaalongola dimɛna ndo akahangia Pɔɔlɔ l’anto wakatatshɔka lande l’edja ka nshi shato. Koko she Pubiliyo aki la hemɔ. Lanɛ nto Luka akashikikɛ hemɔ kaki la nde. Nde akafunde dia pami kɛsɔ “aketama lo mbeto la demba dja ndo la lɔkɛdi la dikila.” Pɔɔlɔ akalɔmbɛ, akahɛ pami kɛsɔ anya ko nde akakɔnɔ. Oko wakawambiyama l’ɔtɛ wa dihindo sɔ, anto wa lo ngelo kɛsɔ wakaye l’ɛkɔnyi awɔ dia Pɔɔlɔ ndjakɔnɔla, ndo vɔ wakela Pɔɔlɔ ndo anto wakatatshɔka lande weshasha efula.—Ets. 28:7-10.
22. a) Ngande wakatɛtɛmɔla prɔfɛsɛrɛ kɛmɔtshi ɔkɔndɔ wa Luka wendana la lɔkɛndɔ la Pɔɔlɔ otsha la Rɔmɔ? b) Kakɔna kayotɛna lo tshapita yayela?
22 Ɔkɔndɔ w’etenyi ka lɔkɛndɔ la Pɔɔlɔ wambotɔsɛdingola polo lanɛ wekɔ shikaa ndo tshɛ mɛtɛ. Prɔfɛsɛrɛ kɛmɔtshi akate ɔnɛ: “Ɔkɔndɔ wa Luka . . . ekɔ ɔkɔndɔ watɛkɛta akambo wele tshɛ mɛtɛ ndeka ɛkɔndɔ ekina wa lo Bible. Kɛnɛ katama lɔkɔ lo kɛnɛ kendana la nkɛndɔ ya lo masuwa lo ntambe ka ntondo kekɔ tshɛ mɛtɛ ndo woho watɛkɛtawɔ dia woho wakasalemaka akambo lo ɛstɛ ka Mediteraneya kɛkɔ tshɛ mɛtɛ” wate kana oko wakatafundaka awui akɔ lushi la lushi. Ondo Luka akatafundaka awui akɔ lam’akandatetetaka l’ɔpɔstɔlɔ Pɔɔlɔ. Naka aki ngasɔ, kete etenyi kayela ka lɔkɛndɔ lawɔ akawosha nto diaso dia mfunda awui efula. Kakɔna kakakomɛ Pɔɔlɔ lam’akandatokomaka la Rɔmɔ? Nyɛsɔ tende.
a Woho wakeyaka ase Malta oloyi ɔsɔ mɛnyaka dia eloyi wa ngasɔ wakikɔ lo disɛnga sɔ nshi shɔ. Eloyi ɛsɔ waya bu nshi nyɛ la Malta ondo l’ɔtɛ wele awui wambotshikitana efula l’edja ka nkama y’ɛnɔnyi kana lofulo l’anto waya lɛkɔ lamboshidiya eloyi ɛsɔ.