Opandjudi wa Diolelo wa ngandji:

Ohokanyiya dia ndo wɛ mbele ɔtɔi ɔmɔtshi l’atei w’apɔstɔlɔ wemadi lo dikona di’Esongo w’Ɔlivɛ. Yeso ambɛnama la ntondo kanyu. Yema tshitshɛ la ntondo ka nde mbidɛ l’olongo, nde ambonyotɛ ate: “Nyu nyayolongola wolo lam’ayoya nyuma k’ekila le nyu ndo nyayoyala ɛmɛnyi ami la Jɛrusalɛma, lo Judeya y’otondo, la Samariya polo ndo l’ahole woleki etale wa lo nkɛtɛ.” (Ets. 1:8) Kakɔna kotoyosala?

Ondo wɛ otatɛ asolo l’ɔtɛ wa woke woke w’olimu. Ondo wɛ otoyambola ɔnɛ: ‘Ngande wayotokoka​—sho djui ya tshitshɛ y’ambeki​—nsambisha “polo ndo l’ahole woleki etale wa lo nkɛtɛ”?’ Wɛ otokoka mbohɔ ɔhɛmwɛlɔ wakasha Yeso l’otsho wa la ntondo ka nyɔi kande ɔnɛ: “Ose olimu haleki owandji ande. Naka vɔ wakampɛnyahɛnya, kete wayonyɔhɛnyahɛnya ndo nyu. Naka vɔ wakakitanyiya awui ami, kete wayokitanyiya ndo awui anyu. Koko vɔ wayonyosalɛ akambo asɔ tshɛ lo lokombo lami, nɛ dia vɔ haweye Ɔnɛ lakantome.” (Jni. 15:20, 21) Lo kana yimba l’ɛtɛkɛta ɛsɔ, wɛ otokoka ndjambola ɔnɛ: ‘Ngande wakokami nsambisha dimɛna dimɛna la ntondo k’ɔlɔshamelo ndo k’ɛhɛnyɔhɛnyɔ?’

Ɛlɔ kɛnɛ sho ndjakiyanyaka l’akambo asɔ. Oko weso Ɛmɛnyi wa Jehowa, olimu aso ele wa nsambisha dimɛna dimɛna “polo ndo l’ahole woleki etale wa lo nkɛtɛ” le “anto wa lo wedja tshɛ.” (Mat. 28:19, 20) Ngande wakoka olimu ɔsɔ nsalema, djekoleko la ntondo k’ɔlɔshamelo wa wolo?

Dibuku di’Etsha w’apɔstɔlɔ diekɔ ɔkɔndɔ wa dimɛna wa woho waki apɔstɔlɔ ndo asekawɔ Akristo akina wa lo ntambe ka ntondo T.D., l’akoka wa nkotsha ɔkɛndɛ awɔ l’ekimanyielo ka Jehowa. Dibuku diadayɛ kakiye diakatondjama dia kokimanyiya dia wɛ nsɛdingola ɔkɔndɔ ɔsɔ ndo ɛkɔndɔ ekina wa diambo wele lɔkɔ. Wɛ ayamba dia mɛna woho wafɔna awui wakahomana l’ekambi wa Nzambi wa lo ntambe ka ntondo la wanɛ wahomana l’ekambi ande wa nshi nyɛ. Wɛ ayɛna dia diɔtɔnganelo sɔ hendana tsho l’olimu wasalaso, koko ndo la woho wokongɛmiso dia mbosala. Lo kana yimba l’awui asɔ, wɛ ayokeketsha aha la taamu dietawɔ diayɛ di’ɔnɛ Jehowa Nzambi ekɔ lo ntetemala nɔmbɔla etenyi ka la nkɛtɛ k’okongamelo ande.

Sho nongamɛka ndo nɔmbaka dia ɔsɛdingwelo wa dibuku di’Etsha nkeketsha mbetawɔ kayɛ k’ɔnɛ Jehowa ayokokimanyiya ndo ɔnɛ nyuma kande k’ekila kayokosukɛ. Tekɔ lo kokeketsha dia wɛ ntetemala “nsambisha dimɛna dimɛna” akambo wendana la Diolelo dia Nzambi ndo nkimanyiya anto akina dia vɔ mbɔtɔ lo mboka ka panda.​—Ets. 28:23; 1 Tim. 4:16.