Anangɛso l’akadiyɛso wa ngandji:

Ngandji kokaso Nzambi ndo anto totshutshuyaka dia nkitanyiya ɛtɛkɛta wata ɔnɛ: “Nyotshu ndo nyetɛ anto wa lo wedja tshɛ ambeki, nyaabatize.” (Mat. 28:19, 20; Makɔ 12:28-31) Ngandji kaha la lokaki kekɔ la wolo efula. Tɔ koka minanda etema wa wanɛ wele “suke dia mbetawɔ akambo wa mɛtɛ wakonya lo lɔsɛnɔ la pondjo.”​—Ets. 13:48.

Lo nshi yakete, takayashaka lo nkimɛ mbɔtwɛlɔ l’ɔtɛ ndo lo mbisha anto ekanda. Nshi nyɛ, tosala la wolo dia ndowanya akoka aso wa nsawola l’anto. Sho nangaka mɛnya anto ngandji kawaokaso lo ntɛkɛta la wɔ akambo wayashawɔ lɔkɔ. Kɛsɔ nembetshiyaka dia monga suke dia ndjaɔtɔnganyiya ndo mbidja yimba l’awui wakiyanya onto l’onto ndo wayashande lɔkɔ. Ngande wayotokimanyiya biukubuku nyɛ dia nsala dui sɔ?

Biukubuku nyɛ yekɔ la wekelo 12 watɛnya waonga wahombaso monga lawɔ dia mboka anto ngandji ndo mbowaetɛ ambeki. Wekelo tshɛ ntomba oma l’ɔkɔndɔ wa lo Bible wɛnya woho wakakɛnɛmɔla Yeso kana osambisha okina wa lo ntambe ka ntondo dionga diakɔ l’esambishelo. Oyango bu wa nkimɛ mbɔtwɛlɔ l’ɔtɛ, koko dia tɛnya woho wakokaso mɛnya anto ngandji kawaokaso. Kaanga mbele dionga tshɛ diekɔ ohomba l’esambishelo, tayɛna woho wele paka monga la waonga amɔtshi shikaa etena katatɛso nsawola l’anto, kasalaso wendelo w’eyoyo kana kekaso l’anto Bible.

Etena kasɛdingolanyu wekelo tshɛ, nyokanyiya dimɛna dimɛna woho wakokanyu nkɛnɛmɔla dionga diɔtɛkɛtami lɔkɔ etena kasawolanyu l’anto wa lɛnɛ enyu. Sala la wolo dia mfudia ngandji kokayɛ Jehowa ndo anto. Ngandji kɛsɔ oleki dui dikina tshɛ kayokokimanyiya dia nkotsha oyango ayɛ wa mbetɛ anto ambeki.

Tekɔ lo ngɛnangɛna diɛsɛ diele laso dia nkamba lanyu dihɛka lo dihɛka. (Zɛf. 3:9) Jehowa anyɔtshɔkɔlɛ efula etena katetemalanyu mboka anto ngandji ndo kawaetɛnyu ambeki!