1, 2. Lande na kele Bible ekɔ woshasha w’oma le Nzambi washa ɔngɛnɔngɛnɔ w’efula?

NGANDE wayaokayɛ naka ɔngɛnyi ayɛ ɔmɔtshi ambokokashimola la woshasha ɔmɔtshi? Wɛ hatotshimbatshimba dia mbotola woshasha akɔ, ndo wɛ ekɔ l’ɔngɛnɔngɛnɔ lo woho wakakokanɛ ɔngɛnyi ayɛ. Wɛ ayowosha losaka.

² Bible kekɔ woshasha w’oma le Nzambi. Tɔ tosholɛka akambo wahatakoke ntana dihole dikina. Ɛnyɛlɔ, tɔ totɛka dia Nzambi akatonge olongo, nkɛtɛ ndo pami ka ntondo la womoto la ntondo. Bible kekɔ l’atɔndɔ wakoka tokimanyiya etena keso l’ekakatanu. Lo Bible, sho mbekaka woho wayokotsha Nzambi sangwelo diande dia mbetɛ nkɛtɛ dihole dioleki tshɛ dimɛna. Bible mɛtɛ kekɔ woshasha washa ɔngɛnɔngɛnɔ w’efula!

3. Kakɔna kayoyeya etena kekayɛ Bible?

³ Etena kayoyeka Bible, wɛ ayoshola dia Nzambi nangaka dia wɛ monga ɔngɛnyi ande. Lo yɛdikɔ yayoyoleka mbeka akambo wendana la nde, mbayoleka lɔngɛnyi lasayɛ la nde monga ma ma.

4. Kakɔna kakambiya lo kɛnɛ kendana la Bible?

⁴ Bible kambokadimɔma lo ɛtɛkɛta oko 2 600 ndo kɔpi miliyara yambotondjama. Ndekana pursa 90 y’anto wa lo andja w’otondo koka mbadɛ Bible l’ɔtɛkɛta awɔ hita. Ndo lomingu tshɛ, anto ndekana miliyɔ ɔtɔi wekɔ lo nkondja Bible! Lo mɛtɛ, ndooko dibuku dikina diele oko Bible.

5. Lande na kakokaso mbuta dia Bible ‘kakasambiyama oma le Nzambi’?

 ⁵ Bible ‘kakasambiyama oma le Nzambi.’ (Adia 2 Timɔte 3:16.) Koko anto amɔtshi mbeyaka mbuta ɔnɛ: ‘Anto mbakafunde Bible, laasɔ, ngande wakokatɔ ndja oma le Nzambi?’ Bible kadimolaka ɔnɛ: “Anto wakate akambo w’oma le Nzambi nɛ dia wakasokoyama [kana nɔmbwama] oma le nyuma k’ekila.” (2 Petero 1:21) Ɔsɔ ekɔ oko owandji ɔmɔtshi mbatɛ sekeletɛlɛ kande dia mfunda mukanda. Ele kanga mukanda ɔsɔ? Vɔ wekɔ waki owandji ɔsɔ koko aha wa sekeletɛlɛ. Woho akɔ waamɛ mbele, Nzambi mbele kiɔkɔ ya Bible koko aha anto wakakambe la nde dia kifunda. Nzambi akawalɔmbɔla dia vɔ mfunda tokanyi tande. Bible kekɔ  mɛtɛ “ɔtɛkɛta wa Nzambi.”—1 Tɛsalɔnika 2:13; enda nɔtɛ ka la koma 2.

6, 7. Lande na kakokaso mbuta dia Bible mbɔtɔnɛka?

⁶ Ndekana ɛnɔnyi 1 600 wakɔsama dia mfunda Bible. Afundji atɔ wakasɛnaka lo tena diotshikitanyi. Amɔtshi waki anto wakeke mukanda efula ndo akina kombeka mukanda efula. Ɛnyɛlɔ, ɔmɔtshi aki dɔkɔtɛlɛ. Akina waki akambi wa dikambɔ, amundji wa nse, alami w’ɛkɔkɔ, amvutshi, toshushi ndo nkumi ya dikanga. Kaanga mbetɔ la afundji wotshikitanyi, tenyi tshɛ dia Bible mbɔtɔnɛka. Tɔ hate dui dimɔtshi lo tshapita mɔtshi ko dui diotshikitanyi lo tshapita nkina. *

⁷ Totshapita ta ntondo ta lo Bible totɛka woho wakatatɛ ekakatanu wa l’andja ɔnɛ, ndo totshapita t’ekomelo totɛka woho wayokandola Nzambi ekakatanu ɛsɔ lo mbetɛ nkɛtɛ paradiso. Bible tɛkɛtaka dikambo dia nunu di’ɛnɔnyi w’ɔkɔndɔ w’anto ndo mɛnyaka dia sangwelo diaki Nzambi kotshamaka nshi tshɛ.

8. Sha bɛnyɛlɔ diɛnya dia Bible mbutaka mɛtɛ lo awui wa siansɛ.

⁸ Bible kofundama dia mbetsha awui wa siansɛ kana dia monga dibuku dimɔtshi dia mbetshaka anto lo kalasa, koko kɛnɛ katatɔ lo awui wa siansɛ mongaka nshi tshɛ mɛtɛ. Kɛsɔ mbahombaso nongamɛ lo dibuku dioye oma le Nzambi. Ɛnyɛlɔ, dibuku di’Akambo w’ase Lɛwi diekɔ l’ɛlɛmbɛ w’oma le Nzambi lo woho wendana la woho wakakoke ase Isariyɛlɛ nsala dia aha hemɔ sambemɛ le anto akina. Kɛsɔ akafundama edja efula la ntondo k’anto ndjeya woho  wele mikrɔbɛ lo kiɔkɔ ya hemɔ. Bible mbetshaka nto dia nkɛtɛ kekɔ lo nɛndalɛnda lam’aha ndooko ɛngɔ. (Jɔbɔ 26:7) Ndo etena kaketawɔka anto efula dia nkɛtɛ kekɔ ebamubamu, Bible kakate dia nkɛtɛ kekɔ obolonga.—Isaya 40:22.

9. Losembwe l’afundji wa Bible tokimanyiyaka dia sho nshihodia dui diakɔna?

⁹ Etena katɛkɛta Bible dikambo di’ɛkɔndɔ, tɔ mbutaka nshi tshɛ mɛtɛ. Koko abuku efula w’ɛkɔndɔ hawote akambo tshɛ mɛtɛ nɛ dia afundji awɔ hawote kɛnɛ kele mɛtɛ. Ɛnyɛlɔ, mbala tshɛ vɔ hawotofundaka akambo wendana la tena diakalɛndjama wodja awɔ lo ta. Koko, afundji wa Bible wakafunde kɛnɛ kele mɛtɛ oyadi kaanga etena kakalɛndjama Isariyɛlɛ. Vɔ wakafunde nto munga yawɔ hita. Ɛnyɛlɔ, lo dibuku dia Bible dielɛwɔ Walelo, Mɔsɛ totɛka dia nde akasale munga ka woke ndo di’ɔnɛ Nzambi akawosha dilanya lo dikambo diakɔ. (Walelo 20:2-12) Woho wakafunde afundji wa Bible kɛnɛ kele mɛtɛ mɛnyaka dia Bible ndja oma le Nzambi. Kɛsɔ nembetshiyaka dia sho koka ndjaɛkɛ lo Bible.

10. Lande na kele alako wa lo Bible wekɔ ohomba le so ɛlɔ kɛnɛ?

¹⁰ Bible ‘kakasambiyama oma le Nzambi ndo kekɔ ohomba dia mbetsha, dia mpangwɛ, dia mbidja akambo l’ɔnɔngɔ.’ (2 Timɔte 3:16) Eelo, alako wa lo Bible tokimanyiyaka efula ɛlɔ kɛnɛ. Jehowa mbeyaka woho wakatatongama, diakɔ diele nde shihodiaka woho wakanyiyaso ndo wayaokaso. Nde teyaka dimɛna ndeka woho wayaeyaso shoamɛ ndo nde nangaka dia sho monga l’ɔngɛnɔngɛnɔ. Nde mbeyaka kɛnɛ kele ɔlɔlɔ le so ndo kɛnɛ kele kɔlɔ le so.

11, 12. a) Alako akɔna w’amɛna wakasha Yeso lo Mateo tshapita 5 polo 7? b) Akokaso mbeka nto oma lo Bible?

 ¹¹ Lo Mateo tshapita 5 polo 7, sho tanaka alako w’amɛna wakasha Yeso lo woho wa monga l’ɔngɛnɔngɛnɔ, woho wa nshidiya ewanu, woho wa nɔmba ndo woho wahombaso mbɔsa falanga. Kaanga mbele ambeta ɛnɔnyi 2 000 wakandasha alako asɔ, vɔ wekɔ la wolo ndo kimanyiyaka efula ɛlɔ kɛnɛ.

¹² Lo Bible, Jehowa tetshaka nto atɔndɔ watokimanyiya dia monga la lɔsɛnɔ la nkumbo loleki dimɛna, dia monga ase olimu w’eshika ndo dia nsɛna lo wɔladi l’anto akina. Atɔndɔ wa lo Bible koka tokimanyiya nshi tshɛ oyadi onto akɔna eso, oyadi dihole diasɛnaso kana ekakatanu wele la so.—Adia Isaya 48:17;enda nɔtɛ ka la koma 3.

13. Kakɔna kakate Isaya kakahombe komɛ osomba wa Babilɔna?

¹³ Prɔfɛsiya efula ya lo Bible yamboshilaka la kotshama. Ɛnyɛlɔ, Isaya akate dia Babilɔna akahombe ndanyema. (Isaya 13:19) Nde akate l’eshikikelo tshɛ woho wakakoke osomba ɔsɔ nɛndjama. Nkuke ya weke ndo ashi wakakokɛka osomba ɔsɔ. Koko Isaya akatatshi la ntondo dia ashi wayoma ndo nkuke yayotshikala hwe. Andɔshi wakahombe mbɔsa osomba aha la ndɔ ta. Isaya akatatshi dia pami kelɛwɔ Kurɔ mbakahombe nɛndja Babilɔna.—Adia Isaya 44:27–45:2; enda nɔtɛ ka la koma 4.

14, 15. Ngande wakakotshama prɔfɛsiya k’Isaya?

¹⁴ Ɛnɔnyi nkama hiende l’ɔkɔngɔ wa prɔfɛsiya kɛsɔ fundama, asɔlayi amɔtshi wakaye ndo waki suke dia ndɔsha Babilɔna. Onto akɔna lakayalɔmbɔlaka asɔlayi akɔ? Aki Kurɔ nkumekanga k’ase Pɛrɛsiya oko wakate prɔfɛsiya. Awui tshɛ wakalɔngɔsɔma dia akambo akina tshɛ wa prɔfɛsiya kotshama.

 ¹⁵ L’otsho wakawalɔshama, ase Babilɔna waki lo fɛtɛ. Vɔ kondjaokaka dia wekɔ lo waale nɛ dia mpele dia weke ndo ashi wakaakokɛka. L’andja w’osomba, Kurɔ la asɔlayi ande wakatshime dia mbɛtɔya ashi w’ɔkɛdi dia vɔ nkitakita. Ashi wakakitakita polo ndo lo yɛdikɔ ya asɔlayi w’ase Pɛrɛsiya nkɛndakɛnda lɔkɔ. Ko ngande wakakoke asɔlayi ndekana mpele dia Babilɔna?  Paka oko wakate prɔfɛsiya, nkuke y’osomba yakatshikala hwe, ɔnkɔnɛ, asɔlayi wakɔshi osomba aha la ndɔ ta.

16. a) Kakɔna kakate prɔfɛsiya k’Isaya lo dikambo dia kɛnɛ kakahombe ndjokomɛ Babilɔna? b) Ngande weyaso dia prɔfɛsiya k’Isaya kakakotshama?

¹⁶ Isaya akate dia ndooko onto layodjasɛ nto lo Babilɔna. Nde akafunde ate: “Anto hawodjasɛki lɛkɔ pondjo, ndo tɔ hatonga dihole di’edjaselo lo nɔnga tshɛ.” (Isaya 13:20) Onde dui sɔ diambokotshama? Lo dihole diaki Babilɔna, kilɔmɛtɛlɛ oko 80 lo sidɛ ka Baghdad, lo wodja wa Iraq ekɔ tsho paka tota di’elanyelo. Polo ndo ɛlɔ, ndooko onto lodjashi lawɔ. Jehowa akɔɔmbɛ Babilɔna la “lɔɔmbɔ l’elanyelo.”—Isaya 14:22, 23. *

17. Lande na kahombaso ndjaɛkɛ l’alaka tshɛ waki Nzambi?

¹⁷ Woho wambokotshama prɔfɛsiya efula ya lo Bible mɛnyaka dia sho koka ndjaɛkɛ lo kɛnɛ kata Bible lo kɛnɛ kendana la nshi yayaye. Sho koka monga  l’eshikikelo dia Jehowa ayokotsha daka diande dia mbetɛ nkɛtɛ paradiso. (Adia Walelo 23:19.) Eelo, tekɔ l’elongamelo ka “lɔsɛnɔ la pondjo lakalake Nzambi deko aha nɛ, nde lahakoke mbuta kashi.”—Tito 1:2. *

18. Ngande walembetshiya Pɔɔlɔ “ɔtɛkɛta wa Nzambi”?

¹⁸ Tambeka dia ndooko dibuku dikina diele oko Bible. Tɔ mbɔtɔnɛka ndo etena katɛkɛtatɔ awui wa siansɛ ndo w’ɛkɔndɔ, tɔ mbutaka nshi tshɛ mɛtɛ. Tɔ toshaka nto alako w’amɛna ndo kekɔ la prɔfɛsiya efula yamboshila kotshama, koko Bible hakome laasɔ ato. Ɔpɔstɔlɔ Pɔɔlɔ akafunde ate: “Ɔtɛkɛta wa Nzambi wekɔ la lɔsɛnɔ ndo la wolo.” Kakɔna kalembetshiya dui sɔ?—Adia Hɛbɛru 4:12.

19, 20. a) Ngande wakoka Bible kokimanyiya dia wɛ mbeya woho w’onto weyɛ? b) Ngande wakokayɛ mɛnya lowando layɛ lo woshasha wa Bible?

¹⁹ Bible koka ntshikitanya lɔsɛnɔ layɛ. Tɔ koka kokimanyiya dia wɛ mbeya woho w’onto weyɛ mɛtɛ. Tɔ koka kokimanyiya dia wɛ nshihodia tokanyi ndo nsaki yayɛ yele l’etei. Ɛnyɛlɔ, sho mbeyaka mbuta dia sho mbokaka Nzambi ngandji. Koko dia sho mɛnya dia sho mbookaka ngandji, sho pombaka nkitanyiya kɛnɛ kata Bible.

²⁰ Bible kekɔ mɛtɛ dibuku di’oma le Nzambi. Nde nangaka dia wɛ kiadia, kieka ndo kilanga. Ɛnya lowando layɛ lo woshasha ɔsɔ, ndo tetemala kieka. Ko wɛ ayoshihodia sangwelo diaki Nzambi dikambo di’anto. Lo tshapita yayela, tayɛna akambo efula wendana la sangwelo sɔ.