1, 2. Ambola akɔna wayaoka anto mbala la mbala?

ANA mbokaka ambola efula. Wɛ mbeyaka mbalembetshiya dikambo dimɔtshi, koko mbala efula vɔ mimbolaka ɔnɛ: ‘Lande na?’ Ndo etena kahembayɛ mbasha okadimwelo ɔmɔtshi, vɔ mbeyaka kombola nto ɔnɛ: ‘Ko lande na?’

² Oyadi akɛnda kana epalanga, sho tshɛ tekɔ la ambola. Sho mbeyaka monga la ambola wendana la kɛnɛ kayotɔlɛ, kɛnɛ kayotɔlɔta kana kɛnɛ kayotosomba. Kana sho koka monga la ambola w’ohomba wendana la lɔsɛnɔ ndo la nshi yayaye. Koko etena kahatatane ekadimwelo w’amɛna lo ambola asɔ, sho mbeyaka ndjotshika dia nyanga ekadimwelo.

3. Lande na kɔsa anto efula dia hawokoke ntana ekadimwelo lo ambola awɔ w’ohomba?

³ Onde Bible kekɔ l’ekadimwelo lo ambola w’ohomba wambolaso? Anto amɔtshi mbeyaka mfɔnya ngasɔ, koko vɔ mbɔsaka dia Bible kekɔ wolo nshihodia. Vɔ mbeyaka mbɔsa ɔnɛ paka embetsha kana ewandji w’ɛtɛmwɛlɔ mbele l’ekadimwelo. Akina mbokaka nsɔnyi efula mbetawɔ dia haweye ekadimwelo. Ko wɛ atayɛ lo dikambo sɔ?

4, 5. Ambola akɔna w’ohomba wayambolayɛ? Lande na kahombayɛ ntetemala nyanga ekadimwelo?

⁴ Ondo wɛ nangaka nkondja ekadimwelo lo ambola wele oko: Lande na keemi lanɛ? Kakɔna kayonkomɛ lam’ayomovɔ? Ngande wele Nzambi? Yeso, ombetsha wa lokumu akate ate: “Nyotetemale nɔmba, ko wayonyosha; nyotetemale nyanga, ko nyayotana; ndo nyotetemale nkɔkɔla, ko wayonyodihola.” (Mateo 7:7) Tohekɔke  polo wɛ ambotana ekadimwelo wakokayɛ ndjaɛkɛ lɔkɔ.

⁵ Eelo, naka wɛ ‘ntetemala nyanga,’ kete wɛ ayotana ekadimwelo lo Bible. (Tokedi 2:1-5) Ekadimwelo ɛsɔ bu wolo nshihodia. Kɛnɛ kayoyeka kayoleka kosha ɔngɛnɔngɛnɔ lo lɔsɛnɔ oma ko kakianɛ ndo kayokosha elongamelo ka dimɛna efula kendana la nshi yayaye. Ɛsɔ tɔsɛdingole dimbola dimɔtshi diatshindja anto efula wɔɔngɔ.

6. Lande na kafɔnya anto amɔtshi dia Nzambi hayakiyanya dikambo di’asui awɔ?

⁶ Anto efula fɔnyaka dia Nzambi hayakiyanya dikambo diaso. Vɔ mbutaka dia otondongaka Nzambi mɛtɛ ndjakiyanyaka dikambo di’anto, tshike andja ɔnɛ bu woho wewɔ ɔnɛ. Tekɔ lo mɛna ata, lohetsho ndo asui ahole tshɛ. Anto wekɔ lo ntata hemɔ, wekɔ lo nsowa, ndo wekɔ lo mvɔ. Anto amɔtshi ndjambolaka ɔnɛ: ‘Naka Nzambi ndjakiyanyaka dikambo diaso, lande na kahandakomiya asui anɛ tshɛ?’

7. a) Ngande wetsha ewandji w’ɛtɛmwɛlɔ anto dia Nzambi ekɔ otema wolo? b) Lande na kakokaso monga l’eshikikelo dia aha Nzambi mbele l’onongo w’akambo wa kɔlɔ wasalema?

⁷ Mbala mɔtshi ewandji w’ɛtɛmwɛlɔ mbetawoyaka anto ɔnɛ Nzambi ekɔ otema wolo. Etena katomba mpokoso kɛmɔtshi, vɔ mbutaka ɔnɛ ongo ekɔ lolango la Nzambi. Vɔ mbutaka dia Nzambi mbakalange dia tɔ salema. Etena katawɔ ngasɔ, vɔ mɛtɛ wekɔ lo ma ma Nzambi onongo. Koko Bible mbetshaka dia Nzambi bu pondjo lo kiɔkɔ y’awui wa kɔlɔ. Jakɔba 1:13 totɛka dia Nzambi hahembe onto la akambo wa kɔlɔ. Divɛsa sɔ mbutaka ɔnɛ: “Onto atotake lam’ayondohembama ate: ‘Nzambi kampemba.’ Nɛ dia Nzambi hakoke pembama  la akambo wa kɔlɔ ndo nde hahembe ndooko onto.” Kɛsɔ mɛnyaka dia kaanga mbele Nzambi hashimbe di’akambo wa kɔlɔ nkomɛ anto, nde hongaki pondjo lo kiɔkɔ yawɔ. (Adia Jɔbɔ 34:10-12.) Tɔshi ɛnyɛlɔ.

8, 9. Lande na kele bu dimɛna mɛndja Nzambi onongo w’ekakatanu aso? Sha ɛnyɛlɔ.

⁸ Ohɔsa dia ɔlɔngɔlɔngɔ ɔmɔtshi ekɔ lo nsɛna kaamɛ l’ambutshi ande. Papa kande mbookaka ngandji efula ndo akawetsha woho wakokande mbɔsa tɛdikɔ t’amɛna. Ko ɔlɔngɔlɔngɔ akɔ ambɔtɔmbɔkwɛ she ndo ambonɔ oma l’angelo. Nde ambotosala akambo wa kɔlɔ ndo ambotohomana l’ekakatanu. Onde wɛ ayota dia she mbele l’onongo wa kɛnɛ kambookomɛ l’ɔtɛ wakinde koshimba ɔnande diaha nde monɔ oma l’angelo? Ndooko! (Luka 15:11-13) L’ɛnyɛlɔ ka papa kɛsɔ, Nzambi hashimbe anto etena kasɔnawɔ dia ntɔmbɔkɔ ndo nsala kɛnɛ kele kɔlɔ. Diakɔ diele, etena katomba dui dia kɔlɔ, sho pombaka mbohɔ dia aha Nzambi mbele lo kiɔkɔ yadiɔ. Bu dui dia dimɛna mɛndja Nzambi onongo.

⁹ Nzambi ekɔ l’ɔkɔkɔ w’oshika wende atashimbe dia aha akambo wa kɔlɔ salema. Lo Tshapita 11, wɛ ayeka kɛnɛ kata Bible lo dikambo sɔ. Koko wɛ koka monga l’eshikikelo dia Nzambi tokaka ngandji ndo nde bu pondjo l’onongo w’ekakatanu wele la so. Lo mɛtɛ, paka Ndamɛ oto mbakoka nkandola ekakatanu akɔ.—Isaya 33:2.

10. Lande na kakokaso monga l’eshikikelo dia Nzambi ayɔlɔngɔsɔla awui wa kɔlɔ tshɛ wakasale anto wa kɔlɔ?

¹⁰ Nzambi ekɔ ekila. (Isaya 6:3) Kɛnɛ tshɛ kasalande kekɔ pudipudi ndo dimɛna. Diakɔ diele sho koka ndjaɛkɛ le nde. Anto bu ngasɔ. Mbala mɔtshi, vɔ salaka akambo wa kɔlɔ. Ndo oyadi kaanga owandji woleki tshɛ losembwe bu la wolo wa nɔngɔsɔla awui tshɛ wa kɔlɔ wasala anto wa kɔlɔ. Ndooko onto lele la wolo efula oko  Nzambi. Nde koka ndo ayɔlɔngɔsɔla awui wa kɔlɔ tshɛ wakasale anto wa kɔlɔ. Nde ayonya awui wa kɔlɔ tshɛ lo pondjo.—Adia Osambo 37:9-11.

11. Ngande wayaoka Nzambi etena kakɛnande asowa?

¹¹ Ngande wayaoka Nzambi etena kɛnande awui weta l’andja ɔnɛ ndo wakokomɛ lo lɔsɛnɔ layɛ? Bible mbetshaka dia Nzambi “nangaka losembwe.” (Osambo 37:28) Ɔnkɔnɛ, nde ndjakiyanyaka efula lo dikambo dia kɛnɛ kele ɔlɔlɔ la kɛnɛ kele kɔlɔ. Nde hangɛnangɛna etena kasowa anto. Bible mbutaka dia “otema ande waki la lɔkɔnyɔ” etena kakandɛnyi andja wambolola la awui wa kɔlɔ lo nshi yakete. (Etatelo 6:5, 6) Nzambi atatshikitana. (Malaki 3:6) Bible mbutaka dia Nzambi ndjakiyanyaka mɛtɛ dikambo dianyu.—Adia 1 Petero 5:7.

12, 13. a) Lande na kokaso anto ngandji ndo kayakiyanyaso dikambo di’anto akina, ndo ngande wayaokaso lo kɛnɛ kendana la asui wa l’andja ɔnɛ? b) Lande na kakokaso monga l’eshikikelo dia Nzambi ayonya asui tshɛ ndo awui waha la losembwe?

¹² Bible mbutaka nto dia Nzambi akatotonge l’efanelo kande. (Etatelo 1:26) Kɛsɔ nembetshiyaka dia Nzambi akatotonge la waonga w’amɛna wele la nde. Ɔnkɔnɛ, naka wɛ mbokaka kɔlɔ etena kɛnayɛ anto waha l’onongo wasowa, Nzambi mbahomba mboka kɔlɔ koleki tshɛ etena kɛnande dikambo sɔ! Ngande weyaso dui sɔ?

¹³ Bible tetshaka dia “Nzambi ekɔ ngandji.” (1 Joani 4:8) Ngandji mbatshutshuya Nzambi dia nsala kɛnɛ tshɛ kasalande. Ɔnkɔnɛ, sho mbokanaka ngandji nɛ dia Nzambi ekɔ ngandji. Ohokanyiya dui nɛ: Naka wɛ ekɔ la wolo, shi wɛ otonya asui tshɛ ndo awui waha la losembwe wele l’andja? Eelo, mɛtɛ wɛ otokoka nsala dui sɔ nɛ dia wɛ mbokaka anto ngandji. Ko kayotota lo  dikambo dia Nzambi? Nde ekɔ la wolo, ndo lam’ele nde tokaka ngandji, nde ayonya asui tshɛ ndo awui waha la losembwe. Wɛ koka monga l’eshikikelo dia alaka tshɛ waki Nzambi wɔtɛkɛtami l’etatelo ka dibuku nɛ wayokotshama! Koko dia wɛ ndjaɛkɛ lo alaka asɔ, wɛ pombaka mbeya akambo efula wendana la Nzambi.

14. Nzambi lokombo lande, ndo ngande weyaso dia sho pombaka nkamba la lɔ?

¹⁴ Naka wɛ nangaka mbɔtɔ l’onto ɔmɔtshi ɔngɛnyi, naa dui dia ntondo diayoyowotɛ? Lokombo layɛ. Ko onde Nzambi ekɔ la lokombo? Ɛtɛmwɛlɔ efula mbutaka ɔnɛ lokombo lande ko Nzambi kana Nkumadiɔndjɔ, koko ɔsɔ bu etondo wa nkombo. Ɔsɔ ekɔ titrɛ yele oko “nkumekanga” kana “prezida.” Nzambi akatotɛ dia Jehowa mbele lokombo lande. Osambo 83:18 mbutaka ɔnɛ: “Anto weye dia wɛ, lele lokombo layɛ Jehowa, wɛmɛ kele Ɔnɛ-Laheme-Tshɛ lo nkɛtɛ k’otondo.” Afundji wa Bible wakakambe la lokombo laki Nzambi mbala nunu. Jehowa nangaka dia wɛ mbeya lokombo lande ndo nkamba la lɔ. Nde akakotɛ lokombo lande dia wɛ monga ɔngɛnyi ande.

15. Kakɔna kalembetshiya lokombo Jehowa?

¹⁵ Jehowa, lokombo laki Nzambi lekɔ la kitshimudi  y’ohomba efula. Lɔ nembetshiyaka dia Nzambi koka nkotsha daka tshɛ dialakande ndo koka nkotsha sangwelo diande. Ndooko kakoka mboshimba. Paka Jehowa oto mbakoka monga la lokombo lɔsɔ. *

16, 17. Kakɔna kalembetshiya a) “Kanga-Wolo-Tshɛ”? b) “Nkumekanga ka pondjo”? c) “Otungi”?

¹⁶ Oko wakatadisha ntondo, Osambo 83:18 mbutaka lo dikambo diaki Jehowa ɔnɛ: “Wɛmɛ kele  Ɔnɛ-Laheme-Tshɛ.” Ndo Ɛnyɛlɔ 15:3 mbutaka ɔnɛ: “Jehowa Nzambi Kanga-Wolo-Tshɛ le, ande etsha ayɛ weke ndo diambo lee! Mboka yayɛ yekɔ losembwe ndo mɛtɛ, wɛ Nkumekanga ka pondjo.” Kakɔna kalembetshiya titrɛ “Kanga-Wolo-Tshɛ”? Tɔ nembetshiyaka dia Jehowa mboleki tshɛ wolo l’andja w’otondo. Ndo titrɛ “Nkumekanga ka pondjo” nembetshiyaka dia nde okongaka nshi tshɛ. Osambo 90:2 mɛnyaka dia nde ookongaka oma ko mɔmbɔkɔmbɔla ndo pondjo pondjo. Shi ɔsɔ ekɔ dui dia diambo!

¹⁷ Paka Jehowa oto mbele Otungi. Ɛnyɛlɔ 4:11 mbutaka ɔnɛ: “Wɛ Jehowa Nzambi kaso, wɛ kasungana nongola lotombo, kɛnɛmɔ ndo wolo, nɛ dia wɛ kakatonge diangɔ tshɛ, ndo oma lo lolango layɛ mbakadionge ndo mbakadiatongama.” Eelo, ntatɛ oma le andjelo ndo tɔɔtɔ ta l’olongo polo lo elowa wa l’esongo ndo lo nse ya lo ndjale, Jehowa mbakatonge oseka ɛngɔ tshɛ kakokayɛ nkanyiya!

18. Lande na kafɔnya anto amɔtshi dia hawokokaki pondjo monga angɛnyi wa Nzambi? Bible atatɔ lo dikambo sɔ?

¹⁸ Etena kadiawɔ awui wendana la waonga waki Jehowa wa diambo, anto amɔtshi mbokaka wɔma ndo mbutaka ɔnɛ: ‘Nzambi ekɔ la wolo wahadjama anya, ekɔ onto l’ohomba efula ndo mangana la so etale efula, ngande wakokande ndjakiyanya dikambo diami?’ Ko onde ngasɔ mbalanga Nzambi sho ndjaoka? Ndooko. Jehowa nangaka monga suke la so. Bible mbutaka dia Nzambi “bu etale oma le ɔmɔmɔ la l’atei aso.” (Etsha 17:27) Nzambi nangaka dia wɛ ndjasukanya la nde ndo nde ndakaka dia ‘ayoyasukanya la yɛ.’—Jakɔba 4:8.

19. a) Ngande wakokayɛ nkoma ɔngɛnyi waki Nzambi? b) Dionga diakɔna lo waonga waki Jehowa dialekayɛ ngɛnangɛna?

¹⁹ Ngande wakokayɛ nkoma ɔngɛnyi wa Nzambi? Yeso akate ate: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.” (Joani 17:3) Tetemala mbeka ko wɛ ayeya Jehowa la Yeso. Ko oma laasɔ, wɛ ayokoka nkondja lɔsɛnɔ la pondjo. Ɛnyɛlɔ, takashidi mbeka dia “Nzambi ekɔ ngandji.” (1 Joani 4:16) Koko nde ekɔ la waonga akina efula w’amɛna. Bible totɛka dia Jehowa ekɔ Nzambi “ka kɛtshi ndo kokana kandji, kahoke nkɛlɛ esadi ndo koludi tɔɔ la ngandji ka kɔlamelo ndo la mɛtɛ.” (Etombelo 34:6) Jehowa ekɔ “ɔlɔlɔ ndo suke dia dimanyiya.” (Osambo 86:5) Nzambi ekɔ la solo dia lotutsha ndo la kɔlamelo. (2 Petero 3:9; Ɛnyɛlɔ 15:4) Wɛ ayeka akambo akina efula wendana la waonga ande w’amɛna etena kadiayɛ akambo wendana la nde lo Bible.

20-22. a) Ngande wakokaso ndjaoka dia tekɔ suke la Nzambi naka hatokoke mbɛɛna? b) Kakɔna kahombayɛ nsala naka anto amɔtshi woyanga koshimba dia wɛ mbeka Bible?

²⁰ Ngande wakokayɛ ndjaoka dia wɛ ekɔ suke la  Nzambi naka wɛ hakoke mbɛɛna? (Joani 1:18; 4:24; 1 Timɔte 1:17) Etena kadiayɛ awui wendana la Jehowa lo Bible, wɛ koka mbeeya oko wende Onto la mɛtɛ. (Osambo 27:4; Rɔmɔ 1:20) Etena katayaleke mbeka awui wendana la Jehowa, wɛ ayoleka mbooka ngandji ndo ndeka ndjaoka suke la nde.

²¹ Wɛ ayoshihodia dia Jehowa mbele Shɛso. (Mateo 6:9) Nde toshaka lɔsɛnɔ ndo nde nangaka nto dia sho monga la lɔsɛnɔ loleki dimɛna. Kɛsɔ mbakombolɛ ombutshi wa ngandji anande. (Osambo 36:9) Eelo, Bible mbetshaka dia wɛ koka nkoma ɔngɛnyi waki Jehowa. (Jakɔba 2:23) Ohokanyiya dikambo sɔ! Jehowa, Otungi w’andja w’otondo nangaka dia wɛ nkoma ɔngɛnyi ande.

²² Anto amɔtshi mbeyaka nyanga dia koshimba dia wɛ mbeka Bible. Vɔ mbeyaka mboka wɔma dia wɛ ayanga ntshikitanya ɔtɛmwɛlɔ ayɛ. Koko tetawɔke di’onto koshimba dia wɛ nkoma ɔngɛnyi wa Jehowa. Nde kele Ɔngɛnyi woleki tshɛ wakokayɛ monga la wɔ.

23, 24. a) Lande na kahombayɛ ntetemala mboka ambola? b) Kakɔna kayotɛna lo tshapita yayela?

²³ Etena kekayɛ Bible, wɛ hatoshihodia akambo tshɛ. Tokake nsɔnyi dia mboka ambola kana nyanga ekimanyielo. Yeso akate dia sho pombaka monga l’okitshitshakitsha oko ana w’akɛnda. (Mateo 18:2-4) Ana w’akɛnda mbokaka ambola efula. Nzambi nangaka dia wɛ ntana ekadimwelo. Ɔnkɔnɛ, eka Bible la yambalo tshɛ dia wɛ ndjashikikɛ dia wɛ ekɔ lo mbeka akambo wa mɛtɛ.—Adia Etsha 17:11.

²⁴ Yoho yoleki dimɛna ya mbeka awui wendana la Jehowa ele mbeka Bible. Lo tshapita yayela, tayɛna lande na kotshikitanyi Bible la abuku akina tshɛ.