1, 2. a) Onde wɛ mbeyaka mɛtɛ onto ɔmɔtshi la lokumu lo mbeya tsho lokombo lande? Lembetshiya. b) Kakɔna kata anto lo dikambo dia Yeso?

ANTO efula wa lokumu wekɔ lo andja ɔnɛ. Ondo wɛ mbeyaka lokombo l’onto ɔmɔtshi la lokumu. Koko mbeya tsho lokombo lande halembetshiya dia wɛ mbeeyaka dimɛna. Dui sɔ halembetshiya dia wɛ mbeyaka kiambokambo tshɛ yendana la lɔsɛnɔ lande ndo woho w’onto wende mɛtɛ.

² Ondo wɛ ambokaka akambo wendana la Yeso Kristo, kaanga mbele ambeta ɛnɔnyi oko 2 000 wakandasɛnɛ lanɛ la nkɛtɛ. Koko anto efula haweye woho w’onto waki Yeso. Amɔtshi mbutaka dia nde aki tsho pami kɛmɔtshi k’ɔlɔlɔ, akina mbutaka dia nde aki omvutshi ɔmɔtshi ndo akina nto fɔnyaka dia nde kele Nzambi. Ko wɛ akanyiyayɛ lo dikambo sɔ?—Enda nɔtɛ ka la koma 12.

3. Lande na kele ekɔ ohomba dia wɛ mbeya Jehowa Nzambi ndo Yeso Kristo?

³ Ekɔ ohomba wɛ mbeya mɛtɛ lo dikambo dia Yeso. Lande na? Bible totɛka ɔnɛ: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.” (Joani 17:3) Eelo, mbeya mɛtɛ lo dikambo dia Jehowa ndo dia Yeso koka nkonya onto dia ndjɔsɛna pondjo pondjo lo paradiso ka la nkɛtɛ. (Joani 14:6) Ndo nto, mbeya akambo wendana la Yeso ayokokimanyiya, nɛ dia nde kele ɛnyɛlɔ koleki tshɛ ka woho wahombaso nsɛna ndo salɛ anto akina akambo. (Joani 13:34, 35) Lo tshapita 1 ya dibuku nɛ, takatɛkɛta  dia kɛnɛ kele mɛtɛ lo dikambo dia Nzambi. Kakianɛ, tayanga nsɛdingola kɛnɛ ketsha Bible lo dikambo dia Yeso.

4. Kakɔna kalembetshiya tɔtɛkɛta “Mɛsiya” ndo “Kristo”?

⁴ Ɛnɔnyi efula la ntondo ka Yeso mbotɔ, Jehowa akalake lo Bible dia nde ayotoma Mɛsiya kana Kristo. Tshɛkɛta “Mɛsiya” ndja oma lo tshɛkɛta ya lo Hɛbɛru ndo “Kristo” ndja oma lo tshɛkɛta ya lo Grɛkɛ. Titrɛ shɔ tshɛ mɛnyaka dia Nzambi akahombe nsɔna Mɛsiya wakalakema ndo mbokitsha lo dihole dimɔtshi dia laande. Mɛsiya ayosala dia alaka tshɛ waki Nzambi kotshama. Yeso koka nto kokimanyiya oma ko kakianɛ. Koko la ntondo ka Yeso mbotɔ, anto efula wakayambolaka ɔnɛ: ‘Akɔna ayonga Mɛsiya?’

5. Onde ambeki waki Yeso waketawɔ dia nde mbaki Mɛsiya?

⁵ Ambeki waki Yeso wakashikikɛ mɛtɛ dia nde kele Mɛsiya wakalakema. (Joani 1:41) Ɛnyɛlɔ, Simɔna Petero, akatɛ Yeso ate: “Wɛ ekɔ Kristo.” (Mateo 16:16) Ngande wakokaso monga l’eshikikelo dia Yeso mbele Mɛsiya?

6. Ngande wakimanyiya Jehowa anto wele l’etema w’ɛlɔlɔ dia mbeya Mɛsiya?

⁶ Edja efula la ntondo ka Yeso mbotɔ, amvutshi waki Nzambi wakafunde akambo efula wakahombe nkimanyiya anto dia vɔ mbeya Mɛsiya. Ngande wakakoke akambo asɔ nkimanyiya? Ohɔsa dia wambokɔlɔmba dia ntshɔ lo dihole dimɔtshi diele anto woho w’anyanya diatemalaka mituka dia wɛ tolongola onto ɔmɔtshi leyɛ atɛnaka. Naka onto ɔmɔtshi kolembetshiya dimɛna woho wele onto akɔ, kete wɛ ayonga l’akoka wa mbowɛna. Woho akɔ waamɛ mbele, Jehowa  akakambe l’amvutshi ande, dia totɛ kɛnɛ kakahombe Mɛsiya ndjosala ndo akambo wakahombe ndjokomɛ. Ekotshamelo ka prɔfɛsiya shɔ tshɛ kimanyiyaka anto wele la etema w’ɛlɔlɔ dia mbeya dia Yeso kele Mɛsiya.

7. Naa prɔfɛsiya hiende yɛnya dia Yeso mbele Mɛsiya?

⁷ Tɔsɛdingole prɔfɛsiya hiende tsho. Ka ntondo, ɛnɔnyi 700 la ntondo ka Yeso mbotɔ, Mika akate dia Mɛsiya akahombe mbotɔ l’osomba wa tshitshɛ wa Bɛtɛlɛhɛma. (Mika 5:2) L’osomba ɔsɔ mbakotɔ Yeso! (Mateo 2:1, 3-9) Ka hende, Danyɛlɛ akate dia Mɛsiya akahombe mɛnama l’ɔnɔnyi wa 29 T.D. (Danyɛlɛ 9:25) Ɔnɛ ekɔ prɔfɛsiya hiende tsho l’atei wa prɔfɛsiya efula yɛnya hwe dia Yeso mbele Mɛsiya wakalakema.—Enda nɔtɛ ka la koma 13.

8, 9. Kakɔna kakatombe lam’akabatizama Yeso kakɛnya dia nde mbele Mɛsiya?

⁸ Jehowa akɛnya hwe dia Yeso mbele Mɛsiya. Nzambi akalake dia mbisha Joani Obatizanyi djembetelo yakandakoke mbeya Mɛsiya. Etena kakatshu Yeso le Joani dia tobatizama l’ɔkɛdi wa Jɔrɔdana l’ɔnɔnyi 29 T.D. Joani akɛnyi djembetelo yakɔ. Bible totɛka kɛnɛ kakatombe ɔnɛ: “L’ɔkɔngɔ wa nde batizama, mbala kakɔ ɔtɔi, Yeso akatombe oma l’ashi; nyolonge, olongo wakadihɔ, ko nde akɛnyi nyuma ka Nzambi kayaholɔ oko fudu k’enga, ko tɔ kakayowahema. Ndo nto, nyolonge, dui diakokɛma oma l’olongo diata ɔnɛ: ‘Ɔnɛ ele Ɔnami, lokami ngandji, ɔnɛ lamometawɔ.’” (Mateo 3:16, 17) Lam’akandɛnyi ndo wakandoke  djembetelo shɔ, nde akeye dia Yeso mbaki Mɛsiya. (Joani 1:32-34) Lushi lɔsɔ, etena kakotshulwɛ Jehowa nyuma kande, Yeso akakome Mɛsiya. Nde mbele onto lakasɔnɛ Nzambi dia monga Ɔnɔmbɔdi ndo Nkumekanga.—Isaya 55:4.

⁹ Prɔfɛsiya ya lo Bible, ɛtɛkɛta wa Jehowa ndamɛ ndo djembetelo yakandasha lo batisimu ka Yeso  mɛnyaka dia Yeso mbele Mɛsiya. Ko Yeso oma le nde akandaye ndo woho akɔna w’onto wakinde? Nyɛsɔ tende kɛnɛ kata Bible.

10. Kakɔna ketsha Bible lo kɛnɛ kendana la lɔsɛnɔ laki la Yeso la ntondo ka nde ndja la nkɛtɛ?

¹⁰ Bible mbetshaka dia Yeso akasɛnaka l’olongo edja efula la ntondo ka nde ndjoya la nkɛtɛ. Mika akatatshi dia Mɛsiya akatɔngɔ “edja efula la ntondo.” (Mika 5:2) Lo waaso efula, Yeso ndamɛ akate dia nde akasɛnaka l’olongo la ntondo ka nde ndjotɔ oko onto. (Adia Joani 3:13; 6:38, 62; 17:4, 5.) Kaanga la ntondo ka nde ndja la nkɛtɛ, Yeso aki la diɔtɔnganelo dia laande la Jehowa.

11. Lande na kele Yeso la nɛmɔ efula lo washo wa Jehowa?

¹¹ Yeso ekɔ la nɛmɔ efula lo washo wa Jehowa. Lande na? Nɛ dia Nzambi akootonge la ntondo k’oseka ɛngɔ tshɛ ndo k’onto okina tshɛ. Ɔnkɔnɛ, Yeso mbelamɛka “enondo wa diangɔ tshɛ diakatongama.” * (Kɔlɔsayi 1:15) Yeso ekɔ nto la nɛmɔ lo washo wa Jehowa, nɛ dia Jehowa ndamɛ oto mbakandatonge mbala kakɔ ɔtɔi. Diakɔ dielamɛnde “Ɔnande ɛtɔi lakandote.” (Joani 3:16) Jehowa Yeso oto mbakandakambe la nde dia ntonga diangɔ dikina tshɛ. (Kɔlɔsayi 1:16) Ndo paka Yeso oto mbelamɛ nto ɔnɛ “Dui,” nɛ dia Jehowa akakambe la nde dia mbutɛ andjelo ndo anto awui w’oma le Nzambi ndo ɛlɛmbɛ.—Joani 1:14.

12. Ngande weyaso dia Yeso la Nzambi bu onto akɔ ɔtɔi?

¹² Anto amɔtshi mbɔsaka dia Yeso la Nzambi wekɔ onto akɔ ɔtɔi. Koko aha kɛsɔ mbetsha Bible. Bible  mbutaka dia Yeso akatongama, kɛsɔ mɛnyaka dia Yeso aki la etatelo. Koko Jehowa ɔnɛ lakatonge diangɔ tshɛ bu la etatelo. (Osambo 90:2) Oko wende Ɔna Nzambi, ndooko lushi lakakanyiya Yeso dia monga Nzambi. Bible mbetshaka hwe dia Papa ndeka Ɔna. (Adia Joani 14:28; 1 Kɔrɛtɔ 11:3.) Jehowa oto mbele “Nzambi Kanga-Wolo-Tshɛ.” (Etatelo 17:1) Nde mbele onto loleki woke ndo wolo l’andja w’otondo.—Enda nɔtɛ ka la koma 14.

13. Lande na kata Bible dia Yeso ekɔ “efanelo ka Nzambi kahɛnama”?

¹³ Jehowa nde l’Ɔnande Yeso wakakambe kaamɛ l’edja ka miliyara y’ɛnɔnyi la ntondo ka olongo la nkɛtɛ tongama. Vɔ wakahombe mɛtɛ mbokana ngandji k’efula lam’asawɔ! (Joani 3:35; 14:31) Yeso akokoya waonga wa she dimɛna efula diakɔ diawelɛ Bible “efanelo ka Nzambi kahɛnama.”—Kɔlɔsayi 1:15.

14. Ngande wakakoke Ɔna Jehowa la nɛmɔ ndjotɔ oko onto?

¹⁴ Ɔna Jehowa la nɛmɔ ɔsɔ, aketawɔ dia mimɔ oma l’olongo ko ndjotɔ la nkɛtɛ oko onto. Ngande wakakoke dui sɔ salema? Lo dihindo, Jehowa akasangola lɔsɛnɔ laki Ɔnande oma l’olongo ko akalidje l’otema wa womoto ɔmɔtshi l’emuma lakawelɛka Mariya. Lo yoho shɔ, Yeso komonga l’ohomba wa monga la ombutshi wa pami w’onto. Ɔnkɔnɛ, Mariya akote ɔna la kokele ndo akawɔlɛ Yeso.—Luka 1:30-35.

15. Ngande wakokayɛ ndeka mbeya Jehowa dimɛna?

¹⁵ Wɛ koka la mbeka akambo efula wendana la Yeso, lɔsɛnɔ lande ndo waonga ande lo mbadia dibuku dia lo Bible dia Mateo, Makɔ, Luka ndo Joani. Abuku asɔ mbelamɛka Evanjiliɔ. Lam’ele Yeso ekɔ oko She, kɛnɛ kayoyadia ayokokimanyiya nto  dia wɛ ndeka mbeya Jehowa dimɛna. Diakɔ diakate Yeso ate: “Onto tshɛ lambɔmɛna ambɛna ndo Papa.”—Joani 14:9.

16. Kakɔna kaketsha Yeso? Oma le nde akaye kɛnɛ kaketshaka Yeso?

¹⁶ Anto efula wakelɛka Yeso “Ombetsha.” (Joani 1:38; 13:13) Dui dimɔtshi dioleki ohomba diakandetsha aki “lokumu l’ɔlɔlɔ la Diolelo.” Diolelo diakɔna sɔ? Ɔsɔ Ekɔ lowandji laki Nzambi layolɛ nkɛtɛ k’otondo oma l’olongo ndo layela anto wele l’okitanyiya le Nzambi ɛtshɔkɔ. (Mateo 4:23) Akambo tshɛ waketsha Yeso wakaye oma le Jehowa. Yeso akate ate: “Kɛnɛ ketshami haye oma le mi, koko ndja oma le Ɔnɛ lakantome.” (Joani 7:16) Yeso akeyaka dia Jehowa nangaka dia anto mboka lokumu l’ɔlɔlɔ l’ɔnɛ Diolelo diaki Nzambi diayolɛ nkɛtɛ k’otondo.

17. Lo ahole akɔna waketshaka Yeso? Lande na kakandadje welo efula dia mbetsha anto akina?

¹⁷ Lo ahole akɔna waketshaka Yeso? Lo dihole tshɛ diakandatanaka anto. Nde aketshaka lo tosamba, lo esomba, lo ngelo, lo bingu, l’ahole w’ɔtɛmwɛlɔ ndo lo mvudu y’anto. Nde kokongɛka dia anto ndja oya le nde. Mbala efula nde akatshɔka otsha le wɔ. (Makɔ 6:56; Luka 19:5, 6) Yeso akakambaka la wolo, aketshaka wenya efula ndo akadjaka welo efula dia mbetsha anto. Lande na? Nɛ dia nde akeyaka dia Nzambi akalangaka dia nde nsala ngasɔ ndo nɛ dia mbala tshɛ nde akakitanyiyaka She. (Joani 8:28, 29) Yeso akasambishaka nɛ dia nde akokaka anto kɛtshi. (Adia Mateo 9:35, 36.) Nde akakokaka mɛna dia ewandji w’ɛtɛmwɛlɔ kombetshaka mɛtɛ lo kɛnɛ kendana la Nzambi ndo la Diolelo diande. Ɔnkɔnɛ, nde akalange nkimanyiya anto efula dia vɔ mboka lokumu l’ɔlɔlɔ.

18. Waonga akɔna waki Yeso waleka kɔngɛnyangɛnya?

 ¹⁸ Yeso akokaka anto kɛtshi ndo akayakiyanyaka dikambo diawɔ. Nde aki onto ɔlɔlɔ ndo akadjaka anto lo demba. Kaanga ana w’akɛnda wakangɛnangɛnaka lalende. (Makɔ 10:13-16) Yeso aki nshi tshɛ la ekanelo k’ɔlɔlɔ. Nde akahetshaka awui wa lokeso ndo waha la losembwe. (Mateo 21:12, 13) Nde akasɛnaka lo etena kaki wamato komonga la ntshungɔ efula ndo anto kombasalɛka akambo la dilɛmiɛlɔ. Koko Yeso aki nshi tshɛ la dilɛmiɛlɔ otsha le wamato ndo akawashaka kɛnɛmɔ. (Joani 4:9, 27) Yeso aki nto l’okitshakitsha w’efula. Ɛnyɛlɔ, la dikɔlɔ dimɔtshi, nde akasole ekolo waki apɔstɔlɔ ande, olimu wakakambemaka mbala efula oma le dibɔyi.—Joani 13:2-5, 12-17.

19. Ɛnyɛlɔ kakɔna kɛnya dia Yeso akeyaka mɛtɛ kɛnɛ kaki anto l’ohomba ndo akalangaka mbakimanyiya?

¹⁹ Yeso akeyaka kɛnɛ mɛtɛ kele la anto la tɔ ohomba ndo akalangaka dia mbakimanyiya. Dui sɔ diakɛnama hwe etena kakandakambaka la wolo wakawosha Nzambi dia nkɔnɔya anto lo dihindo. (Mateo 14:14) Ɛnyɛlɔ, pami kɛmɔtshi kaki la sudi akaye le Yeso ndo akawotɛ ate: “Ɔnkɔnɔlɛ naka wɛ alanga.” Yeso akayadje lo dihole diaki pami kɛsɔ kaki la paa ndo la sui. Nde akawoke kɛtshi ndo akalange mbokimanyiya. Ɔnkɔnɛ, Yeso akasembola lonya, akananda pami kakɔ ndo akate ate: “Dimi nangaka, ɔkɔnɔ.” Ko pami kaki la hemɔ kɛsɔ akakɔnɔ! (Makɔ 1:40-42) Onde wɛ koka la kanyiya woho wakayaoke pami kɛsɔ?

20, 21. Ngande wakatshike Yeso ɛnyɛlɔ koleki dimɛna k’okitanyiya otsha le Nzambi?

²⁰ Yeso akatshike ɛnyɛlɔ koleki dimɛna ka monga l’okitanyiya otsha le Nzambi. Oyadi kɛnɛ tshɛ  kakatombe kana kakoosalɛ atunyi ande, nde aki la kɔlamelo le She. Ɛnyɛlɔ, Yeso kosala pɛkato etena kakohembe Satana. (Mateo 4:1-11) Ase nkumbo ka Yeso amɔtshi kombetawɔ dia nde aki Mɛsiya ndo wakate dia nde “ambodjɔ dadi,” koko Yeso akatetemala nsala olimu waki Nzambi. (Makɔ 3:21) Etena kakosalɛ atunyi ande akambo la esehe tshɛ, Yeso akatshikala la kɔlamelo le Nzambi ndo konyanga pondjo dia mbasalɛ kɔlɔ.—1 Petero 2:21-23.

²¹ Kaanga etena kakandadiakema nyɔi ka la esehe tshɛ ndo ka paa, nde akatshikala la kɔlamelo otsha le Jehowa. (Adia Filipɛ 2:8.) Ohokanyiya akambo efula wakandakikɛ lushi lakandavu. Wakawonde, ɛmɛnyi wa kashi wakɔsɔngwɛ awui wa kashi, akaanyema oma le toshushi ta kɔlɔ, elui w’anto wakawɔlɛ ndo asɔlayi  wakosoya, ndo wakɔkɔkɔla nsɛti l’otamba. Etena kakandakitshiya lomu, nde akate la dui dia wolo ate: “Diambokotshama!” (Joani 19:30) Nshi shato l’ɔkɔngɔ wa Yeso mvɔ, Jehowa akawolola ndo akawosha demba dia lo nyuma. (1 Petero 3:18) Mingu ngana l’ɔkɔngɔ, Yeso akakalola otsha l’olongo, nde “akatodjasɛ lo lonya l’omi la Nzambi,” ndo akakongaka dia Nzambi mbeetɛ Nkumekanga.—Hɛbɛru 10:12, 13.

22. Diaaso diakɔna diele la so ɛlɔ kɛnɛ l’ɔtɛ wakatshikala Yeso la kɔlamelo otsha le She?

²² Lam’ele Yeso akatshikala la kɔlamelo otsha le She, taya kakianɛ la diaaso dia nsɛna pondjo pondjo lo paradiso ka la nkɛtɛ oko waki sangwelo dia Jehowa. Lo tshapita yayela, tayɛna woho wakakoke nyɔi ka Yeso tokimanyiya dia sho nsɛna pondjo pondjo.