1. Akokayɛ ndjambola l’ɔkɔngɔ wa wɛ mbeka dibuku nɛ dimɛna dimɛna?

WƐ AMBEKA akambo wa mɛtɛ efula wa lo Bible lo wekelo ayɛ wa dibuku nɛ. Ɛnyɛlɔ, daka dia Nzambi dia lɔsɛnɔ la pondjo, woho wele wanɛ wambovɔ ndo elongamelo ka eolwelo. (Ondaki 9:5; Luka 23:43; Joani 5:28, 29; Ɛnyɛlɔ 21:3, 4) Ondo wɛ ambotatɛka mbɔtɔ lo nsanganya y’Ɛmɛnyi wa Jehowa ndo wɛ mbetawɔka dia vɔ wekɔ l’ɔtɛmwɛlɔ wa mɛtɛ. (Joani 13:35) Ondo wɛ ambotatɛ monga la diɔtɔnganelo dia ma ma la Jehowa ndo ondo wɛ ambɔsa yɛdikɔ ya mbokambɛ.  Ɔnkɔnɛ, wɛ koka ndjambola ɔnɛ: ‘Kakɔna kahombami nsala kakianɛ dia kambɛ Nzambi?’

2. Lande na kakalange pami k’ose Etiyɔpiya batizama?

² Kɛsɔ mbakayambola pami kɛmɔtshi k’ose Etiyɔpiya kakasɛnaka lo nshi ya Yeso. L’etena kɛmɔtshi l’ɔkɔngɔ wa Yeso mbolɔ, Filipɛ k’ombeki wa Yeso akasambisha pami kɛsɔ. Filipɛ akoshikikɛ dia Yeso mbaki Mɛsiya. Kɛnɛ kakeke pami k’ose Etiyɔpiya kɛsɔ, kakananda otema ande efula diakɔ diele mbala kakɔ ɔtɔi nde akate ate: “Enda ashi vɔ anɛ, kakɔna kashimba dia dimi batizama?”—Etsha 8:26-36.

3. a) Didjango diakɔna diakadjɛ Yeso ambeki ande? b) Ngande wahomba onto batizama?

³ Bible mɛnyaka hwe dia naka wɛ nangaka kambɛ Jehowa, kete wɛ pombaka batizama. Yeso akatɛ ambeki ande ate: “Nyetɛ anto wa lo wedja tshɛ ambeki, nyaabatize.” (Mateo 28:19) Yeso ndamɛ akasha ɛnyɛlɔ lo batizama lo ashi. Nde akadindjama tshɛ l’ashi, koko vɔ kombotɛ tɔpɔpɔ t’ashi l’ɔtɛ. (Mateo 3:16) Ɛlɔ kɛnɛ, etena kabatizama Okristo, nde lawɔ pombaka dindjama kana tambiyama tshɛ l’ashi.

4. Kakɔna kɛnya batisimu kayɛ anto akina?

⁴ Etena kabatizamayɛ, dui sɔ mɛnyaka anto akina dia wɛ nangaka mɛtɛ monga ɔngɛnyi wa Nzambi ndo mbokambɛ. (Osambo 40:7, 8) Ɔnkɔnɛ, wɛ mbeyaka ndjambola ɔnɛ: ‘Ahombami nsala dia batizama?’

5. a) Dia wɛ batizama, ena kakɔna ka ntondo kahombayɛ ntakola? b) Lande na kele nsanganya y’Akristo ohomba?

⁵ La ntondo ka wɛ batizama, wɛ pombaka mbeka dia mbeya Jehowa la Yeso. Wɛ ambotatɛka nsala dui sɔ lo mbeka Bible. (Adia Joani 17:3.) Koko aha laasɔ ato. Bible mbutaka dia wɛ pombaka “ndodiama la ewo  k’oshika” ka lolango la Jehowa. (Kɔlɔsayi 1:9) Nsanganya y’Ɛmɛnyi wa Jehowa yayokokimanyiya dia monga la diɔtɔnganelo dia ma ma la Jehowa. Ɔsɔ ekɔ ɔkɔkɔ ɔmɔtshi w’ohomba wahombayɛ mbɔtɔka lo nsanganya shɔ mbala la mbala.—Hɛbɛru 10:24, 25.

6. Ewo ka Bible ka ngande kahomba monga la yɛ la ntondo ka wɛ batizama?

⁶ Ekɔ mɛtɛ dia Jehowa halongamɛ dia paka wɛ mbeya kiambokambo tshɛ ya lo Bible la ntondo ka wɛ batizama. Nde konongamɛ dia pami k’ose Etiyɔpiya mbeya oseka kiambokambo tshɛ la ntondo ka nde batizama. (Etsha 8:30, 31) Ndo tayotetemala mbeka akambo wendana la Nzambi pondjo pondjo. (Ondaki 3:11) Koko dia wɛ batizama, wɛ pombaka mbeya ndo mbetawɔ wetshelo w’etatelo wa lo Bible.—Hɛbɛru 5:12.

7. Ngande wambokokimanyiya wekelo ayɛ wa Bible?

⁷ Bible mbutaka ɔnɛ: “Onto lele bu la mbetawɔ hakoke ngɛnyangɛnya Nzambi.” (Hɛbɛru 11:6) Ɔnkɔnɛ, wɛ pombaka monga la mbetawɔ la ntondo ka wɛ batizama. Bible totɛka dia anto amɔtshi wa l’osomba w’edjedja wa Kɔrɛtɔ wakahokamɛ kɛnɛ kaketshaka ambeki wa Yeso, ndo etombelo waki la dui sɔ ele vɔ “waketawɔ ndo wakabatizama.” (Etsha 18:8) Woho akɔ waamɛ mbele, wekelo ayɛ wa Bible wambokokimanyiya dia wɛ monga la mbetawɔ lo alaka waki Nzambi ndo lo wolo w’olambo waki Yeso wakoka toshimbɛ oma lo pɛkato la nyɔi.—Jashua 23:14; Etsha 4:12; 2 Timɔte 3:16, 17.

8. Kakɔna kayokotshutshuya dia mbewoya anto akina awui wekayɛ?

⁸ Etena kayoyeka akambo efula oma lo Bible ndo kayoyɛna woho wakokimanyiyawɔ lo lɔsɛnɔ layɛ,  mbetawɔ kayɛ kayonga nge. Wɛ ayolanga mbewoya anto akina awui wekayɛ. (Jɛrɛmiya 20:9; 2 Kɔrɛtɔ 4:13) Ko waa na wahombayɛ mbewoya?

9, 10. a) Waa na wakokayɛ ntatɛ nsambisha kɛnɛ kekayɛ? b) Ahombayɛ nsala naka wɛ olanga nsambisha kaamɛ l’etshumanelo?

⁹ Wɛ mbeyaka ntatɛ mbewoya ewotɔ ayɛ, angɛnyi ayɛ, asukanyi ayɛ ndo asekayɛ wa l’olimu awui wekayɛ. Ekɔ dimɛna nsala ngasɔ, koko wɛ pombaka salaka dui sɔ nshi tshɛ lo yoho ya dimɛna ndo la ngandji. L’edjedja ka wonya, wɛ ayoyonga l’akoka wa ntatɛ nsambisha kaamɛ la etshumanelo. Etena kayaokayɛ dia wɛ aya suke dia nsala dui sɔ, wɛ koka nsawola l’Ɔmɛnyi wa Jehowa weka la yɛ Bible ndo mbotɛ dia wɛ olanga ntatɛ nsambisha kaamɛ la etshumanelo. Naka Ɔmɛnyi ɔsɔ mɛnaka dia wɛ aya suke ndo naka wɛ ekɔ lo nsɛna lo yoho yɔtɔnɛ l’ɛlɛmbɛ wa lo Bible, kete wɛ la nde nyayosawola la dikumanyi dihende dia l’etshumanelo.

¹⁰ Kakɔna kayonyosawola lo losanganya lɔsɔ? Dikumanyi wayosawola la yɛ dia menda kana wɛ shihodiaka ndo mbetawɔka wetshelo w’etatelo wa lo Bible, dia kana wɛ ekɔ lo nkitanyiya kɛnɛ kata Bible lo lɔsɛnɔ layɛ la lushi la lushi ndo kana mɛtɛ mboyolanga nkoma Ɔmɛnyi wa Jehowa. Tohɛke dia dikumanyi kokɛka ase etshumanelo tshɛ kodja ndo wɛ, diakɔ diele tokake wɔma dia nsawola la wɔ. (Etsha 20:28; 1 Petero 5:2, 3) L’ɔkɔngɔ wa losanganya lɔsɔ, dikumanyi wayokewoya dia kana wɛ koka ntatɛ nsambisha kaamɛ l’etshumanelo.

11. Lande na kele ekɔ ohomba efula dia nsala etshikitanu la ntondo ka wɛ nsambisha kaamɛ la etshumanelo?

¹¹ Dikumanyi mbeyaka kotɛ dia wɛ akahombe nyomosala etshikitanu la ntondo ka wɛ ntatɛ nsambisha  kaamɛ la etshumanelo. Lande na kele ekɔ ohomba efula nsala etshikitanu ɛsɔ? Nɛ dia etena katɛso anto akina akambo wendana la Nzambi, tekɔ enyimpala wa Jehowa ndo sho pombaka nsɛna lo yoho yawosha kɛnɛmɔ.—1 Kɔrɛtɔ 6:9, 10; Ngalatiya 5:19-21.

12. Lande na kahomba anto tshɛ ndjatshumoya?

¹² Ekɔ wanya akina nto wahombayɛ ntakola la ntondo ka wɛ batizama. Ɔpɔstɔlɔ Petero akate ate: “Ɔnkɔnɛ, nyoyatshumoya ndo nyokadimole etema dia pɛkato yanyu dimɔ.” (Etsha 3:19) Ndjatshumoya kɛdikɛdi na? Ndjatshumoya kɛdikɛdi monga la lonyangu l’efula l’ɔtɛ wa kɔlɔ kɛmɔtshi kakatasale. Ɛnyɛlɔ, naka wɛ akayasha l’awui wa mindo wadieyanelo, kete wɛ pombaka ndjatshumoya. Ndo oyadi kaanga lo lɔsɛnɔ layɛ l’otondo wɛ akasalaka la wolo dia nsala kɛnɛ kele ɔlɔlɔ, wɛ ekɔ paka l’ohomba wa ndjatshumoya nɛ dia sho tshɛ salaka pɛkato ndo sho pombaka nɔmba Nzambi dia nde todimanyiya.—Rɔmɔ 3:23; 5:12.

13. ‘Nkadimola otema’ kɛdikɛdi na?

¹³ Onde monga tsho la lonyangu l’ɔtɛ wa kɛnɛ kakayasale kete ambokoka? Ndooko. Petero akate dia wɛ pombaka nto ‘nkadimola otema.’ Kɛsɔ nembetshiyaka dia wɛ pombaka ntona lɔkɛwɔ l’edjedja la kɔlɔ ndo ntatɛ nsala kɛnɛ kele ɔlɔlɔ. Ɛnyɛlɔ, ohɔsa dia wɛ ekɔ lo tande lɔkɛndɔ otsha lo dihole dimɔtshi mbala ka ntondo. L’ɔkɔngɔ wa tshanda mɔtshi, wɛ amboshola dia wɛ ekɔ lotatshu lo mboka kekina. Kakɔna kayoyosala? Aha la taamu, wɛ ayemala, ayokadimɔ, oma laasɔ, ko wɛ ntshɔ lo mboka ka dimɛna. Woho akɔ waamɛ mbele, etena kekayɛ Bible wɛ mbeyaka mbishola dia ekɔ mbekelo mɔtshi kana awui amɔtshi wa lo lɔsɛnɔ  layɛ wahombayɛ nsala etshikitanu lɔkɔ. Etawɔ dia ‘nkadimola otema,’ mbuta ate sala etshikitanu wahombama ndo ntatɛ nsala kɛnɛ kele ɔlɔlɔ.

14. Ngande wayakimɔ onto le Nzambi?

¹⁴ Ena kekina k’ohomba kahombayɛ ntakola la ntondo ka wɛ batizama ele ndjakimɔ le Jehowa. Etena kayakimɔyɛ le Jehowa, wɛ mbotɛka lo dɔmbɛlɔ dia wɛ ambolaka dia mbɔtɛmɔlaka paka ndamɛ oto ndo dia mbetɛ lolango lande dui dioleki ohomba lo lɔsɛnɔ layɛ.—Eohwelo k’Ɛlɛmbɛ 6:15.

15, 16. Kakɔna katshutshuya onto dia ndjakimɔ le Nzambi?

¹⁵ Daka dia kambɛ paka Jehowa oto ekɔ oko daka dia mbetsha nshi yayɛ ya lɔsɛnɔ yambotshikala la onto ɔmɔtshi lokayɛ ngandji. Ohɔsa dia pami kɛmɔtshi la womoto ɔmɔtshi wekɔ lo membɔna dia ntshukana. Etena kayotalekaka pami mbeya womoto akɔ dimɛna, nde ayowoka ngandji ndo ayolanga dia mbotshuka. Kaanga mbele ɔsɔ ekɔ yɛdikɔ y’ohomba efula, pami kɛsɔ mbetawɔka ɔkɛndɛ ɔsɔ nɛ dia nde nangaka womoto akɔ.

¹⁶ Etena kekayɛ akambo wendana la Jehowa, wɛ ayowoka ngandji ndo ayolanga nsala kɛnɛ tshɛ kakokayɛ nsala dia mbokambɛ. Kɛsɔ ayokotshutshuya dia nsala dɔmbɛlɔ diolakayɛ dia mbokambɛ. Bible mbutaka dia onto tshɛ lalanga ndjela Yeso pombaka ‘ndjasɛka.’ (Makɔ 8:34) Kakɔna kalembetshiya dui sɔ? Diɔ nembetshiyaka mbetsha okitanyiya wa Jehowa lo dihole dia ntondo lo lɔsɛnɔ layɛ. Kɛnɛ kalanga Jehowa ndeka nsaki ndo eyango ayɛ ohomba la fwa.—Adia 1 Petero 4:2.

17. Lande na kahayakimɔ anto amɔtshi le Jehowa?

¹⁷ Anto amɔtshi tonaka dia ndjakimɔ le Jehowa, nɛ dia vɔ mbokaka wɔma dia hawototetemala la nkitanyiya daka diawɔ dia mbokambɛ. Vɔ hawolange nyangiya Jehowa ndo vɔ mbeyaka monga l’ekanelo ka yimba k’ɔnɛ, naka hawoyakimwe le nde, kete Jehowa hatoyokoya lawɔ lo kɛnɛ kasalawɔ.

18. Kakɔna kakoka kokimanyiya dia ntondoya wɔma wa nyangiya Jehowa?

¹⁸ Ngandji kokayɛ Jehowa kayokokimanyiya dia ntondoya wɔma wa mbonyangiya. Lam’ele wɛ mbookaka ngandji, wɛ ayosala tshɛ kakokayɛ nsala dia nkitanyiya daka diakayolake. (Ondaki 5:4; Kɔlɔsayi 1:10) Wɛ hatɔsa dia nsala lolango laki Jehowa ekɔ dui diamboleka wolo. Ɔpɔstɔlɔ Joani akafunde ate: “Kɛnɛ kalembetshiya nanga Nzambi tɔ kɛnɛ: dia sho nkitanyiya ɛlɛmbɛ ande, koko ɛlɛmbɛ ande bu wotsho.”—1 Joani 5:3.

19. Lande na kahayahombe mboka wɔma dia ndjakimɔ le Jehowa?

¹⁹ Aha paka wɛ kongi kokele ko wɛ ndjakimɔ le Jehowa. Nde halongamɛki pondjo dia sho nsala kɛnɛ kahatakoke nsala. (Osambo 103:14) Nde ayokokimanyiya dia wɛ nsala kɛnɛ kele ɔlɔlɔ. (Isaya 41:10) Yaɛkɛ le Jehowa l’otema ayɛ tshɛ “ko nde ayokosembolɛ ɛsɛsɛ ayɛ.”—Tokedi 3:5, 6.

20. L’ɔkɔngɔ wa wɛ ndjakimɔ le Nzambi, naa ena kayela kahombayɛ ntakola?

²⁰ Onde wɛ mbɔsaka dia wɛ aya suke dia ndjakimɔ le Jehowa? Naka wɛ amboyakimɔ le Jehowa, kete wɛ aya suke dia ntakola ena kayela. Wɛ pombaka batizama.

21, 22. Ngande wakokayɛ nsala “wotelo wa lo sɛkɛ” wa mbetawɔ kayɛ?

 ²¹ Ewoya ɔnɔmbɔdi w’olui wa dikumanyi wa l’etshumanelo kayɛ dia wɛ amboyakimɔ le Jehowa ndo dia wɛ nangaka batizama. Oma laasɔ, nde ayɔsa yɛdikɔ dia dikumanyi dimɔtshi mvusola la yɛ wetshelo w’etatelo wa lo Bible. Naka vɔ wambɛna dia wɛ ambokoka batizama, vɔ wayokotɛ dia wɛ koka batizama lo losanganya layaye la woke l’Ɛmɛnyi wa Jehowa.  Lo losanganya la woke lɔsɔ, sawo dialembetshiya kitshimudi ya batisimu diayoshama. Ɔtɛkɛtshi washa sawo sɔ ayombola wanɛ wayanga batizama ambola ahende wa wɔdu. Lo nkadimola ambola asɔ, wɛ ayosala “wotelo wa lo sɛkɛ” wa mbetawɔ kayɛ.—Rɔmɔ 10:10.

²² Oma laasɔ, wɛ ayoyobatizama. Wayokodindja tshɛ l’ashi. Batisimu ayɛnya onto tshɛ dia wɛ akayakimɔ le Jehowa ndo aya Ɔmɛnyi wa Jehowa.

23. Kakɔna kalembetshiya batizama “lo lokombo la Papa ndo la Ɔna ndo la nyuma k’ekila”?

²³ Yeso akate di’ambeki ande pombaka batizama “lo lokombo la Papa ndo la Ɔna ndo la nyuma k’ekila.” (Adia Mateo 28:19.) Kakɔna kalembetshiya dui sɔ? Diɔ nembetshiyaka dia wɛ pombaka mbeya lowandji la Jehowa ndo ɔkɛndɛ wele la Yeso lo sangwelo dia Nzambi ndo woho wakamba Nzambi la nyuma kande k’ekila dia nsala lolango lande.—Osambo 83:18; Mateo 28:18; Ngalatiya 5:22, 23; 2 Petero 1:21.

24, 25. a) Kakɔna kalembetshiya batisimu? b) Kakɔna kayoteka lo tshapita y’ekomelo?

²⁴ Batisimu ekɔ dui di’ohomba efula. Etena katambiyamayɛ l’ashi, dui sɔ nembetshiyaka dia wɛ ambovɔ kana ambotshika yoho yayɛ ya lɔsɛnɔ y’edjedja. Etena katondjamayɛ oma l’ashi, wɛ ayotatɛ lɔsɛnɔ l’oyoyo lo salaka lolango la Nzambi. Kɛsɔ mɛnyaka dia wɛ ambotatɛ kambɛ Jehowa oma ko etena kɛsɔ. Ohɔ dia wɛ hayakimwe le onto kana le okongamelo ɔmɔtshi kana l’olimu ɔmɔtshi. Wɛ ambokimɔ lɔsɛnɔ layɛ le Jehowa.

²⁵ Ndjakimɔ kayɛ ayokokimanyiya dia wɛ monga la lɔngɛnyi la ma ma la Nzambi. (Osambo 25:14) Kɛsɔ halembetshiya dia onto ayoshimbamɛ paka l’ɔtɛ wamondobatizama. Ɔpɔstɔlɔ Pɔɔlɔ akafunde ate: “Nyotetemale nkamba dikambo dia panda kanyu la wɔma ndo la lokomba.” (Filipɛ 2:12) Batisimu ekɔ tsho etatelo. Ko ngande wakokayɛ ntshikala suke la Jehowa? Tshapita y’ekomelo ya dibuku nɛ yayokadimola lo dimbola sɔ.