1, 2. Kakɔna kayambola anto efula?

DIDIMU DIA NKƐTƐ diakasalema l’ashi (Tsunami), ashi wakambɔmbɔ ko wakalanya ngelo kɛmɔtshi. Onto ɔmɔtshi laki la okoma akakande lo luudu lɔmɔtshi l’ɔtɛmwɛlɔ, akahomuya ndo akadiake anto efula. Mama kɛmɔtshi akavu la hemɔ ka kansɛrɛ ndo akatshike ana atanu.

² Etena katomba mpokoso ya ngasɔ, anto efula ndjambolaka ɔnɛ: “Lande na nganɛ na?” Anto efula ndjambolaka lande na kambolola andja la lohetsho ndo la asui. Onde wɛ atayaokaka ambola asɔ?

3, 4. a) Ambola akɔna wakambola Habakuka? b) Ngande wakookadimola Jehowa?

³ Bible totɛka di’anto waki la mbetawɔ k’efula le Nzambi wakayambola ndo vɔ lawɔ ambola asɔ. Ɛnyɛlɔ, omvutshi Habakuka akambola Jehowa ate: “Lande na kamɛnyayɛ awui wa kɔlɔ? Ndo lande na katshikayɛ ɔhɛnyɔhɛnyɔ? Lande na kele elanyelo ndo awui wa ngala la ntondo kami? Ndo lande na kambofula ewanu la ɔlɔshanelo?”—Habakuka 1:3.

⁴ Sho tanaka lo Habakuka 2:2, 3 okadimwelo wakasha Nzambi lo ambola waki Habakuka ndo daka diande dia nɔngɔsɔla akambo asɔ. Jehowa mbokaka anto ngandji k’efula. Bible mbutaka ɔnɛ: “Nde ndjakiyanyaka dikambo dianyu.” (1 Petero 5:7) Lo mɛtɛ, Nzambi mboleki hangɛnangɛna mɛna asui oko wahatangɛnangɛna mɛna asui. (Isaya 55:8, 9) Ɔnkɔnɛ, nyɛsɔ tɔkɛtshanya dimbola diata ɔnɛ: Lande na kele asui efula l’andja?

5. Kakɔna kata ɛtɛmwɛlɔ efula lo dikambo di’asui? Kakɔna ketsha Bible?

⁵ Waa pastɛrɛ, ewandji w’ɛtɛmwɛlɔ, esambisha mbutaka mbala efula dia Nzambi mbalanga di’anto nsowa. Amɔtshi mbutaka dia kɛnɛ tshɛ kakomɛ onto mbidja ndo mpokoso, Nzambi amboshilaka kikongɛ ndo hatoshihodiaki pondjo lande na. Akina komaka polo lo mbuta dia etena kavɔ anto, mbidja ndo ana w’akɛnda ekɔ dia vɔ tonga kaamɛ la Nzambi l’olongo. Koko dui sɔ bu mɛtɛ. Jehowa hongaki pondjo lo kiɔkɔ y’akambo wa kɔlɔ wasalema. Bible mbutaka ɔnɛ: “Nzambi ka mɛtɛ bu la kanyi ya nsala akambo lo yoho ya kɔlɔ, Kanga-Wolo-Tshɛ bu la kanyi ya nsala kɔlɔ!”—Jɔbɔ 34:10.

6. Lande na kamama anto efula Nzambi onongo w’asui tshɛ wele l’andja?

⁶ Anto efula mamaka Nzambi onongo w’asui tshɛ wele l’andja nɛ dia vɔ fɔnyaka dia nde mbalɔmbɔla andja. Koko oko wakateke lo Tshapita 3, Satana Diabolo mbele ɔnɔmbɔdi wa mɛtɛ w’andja.

7, 8. Lande na kambofulanɛ asui l’andja?

⁷ Bible totɛka dia “andja w’otondo wekɔ lo nɔmbɔma oma le kanga kɔlɔ.” (1 Joani 5:19) Satana mbele ɔnɔmbɔdi w’andja ɔnɛ, nde ekɔ djawudi ndo ngala. Nde mbele “ɔnɛ langanyiya nkɛtɛ k’otondo.” (Ɛnyɛlɔ 12:9) Anto efula mbowokoyaka. Ndo ɔsɔ ekɔ ɔkɔkɔ ɔmɔtshi wele andja wambolola la kashi, lohetsho ndo l’awui wa ngala.

⁸ Ɛkɔkɔ ekina wekɔ wɛnya lande na kambofulanɛ asui l’andja. L’ɔkɔngɔ wa Adama l’Eva ntɔmbɔkɔ, vɔ wakasambiya anawɔ pɛkato. Ndo l’ɔtɛ wa pɛkato, anto wekɔ lo soyana lam’asawɔ. Mbala efula vɔ nangaka dia  monga anto woleki anto akina ohomba. Vɔ ndɔshanaka, tshɔka lo ata ndo soyaka anto akina. (Ondaki 4:1; 8:9) Tena dimɔtshi, anto sowaka l’ɔtɛ wa “tena ndo awui wa shashimoya.” (Ondaki 9:11) Etena katanemawɔ lo dihole dia kɔlɔ wonya wa kɔlɔ, aksida ndo akambo akina wa kɔlɔ koka mbakomɛ.

9. Lande na kakokaso monga l’eshikikelo dia Jehowa ekɔ l’ɔkɔkɔ w’oshika wetawɔnde di’asui ntetemala?

⁹ Jehowa hongaki pondjo lo kiɔkɔ y’asui. Aha nde mbatonga ata, diakatanelo ndo ɔsɔkishelo. Nzambi bu lo kiɔkɔ ya mpokoso yele oko, adidimu wa nkɛtɛ, mpɛpɛ ya wolo ndo dola di’ashi. Koko wɛ koka ndjambola ɔnɛ: ‘Naka Jehowa mbele onto loleki tshɛ wolo l’andja w’otondo, lande na kahandashimbe diaha akambo wa kɔlɔ asɔ salema?’ Sho mbeyaka dia Nzambi ndjakiyanyaka efula dikambo diaso, laasɔ nde pombaka monga l’ɔkɔkɔ w’oshika wetawɔnde di’asui ntetemala.—1 Joani 4:8.

10. Kakɔna kakate Satana lo dikambo dia Jehowa?

¹⁰ L’ekambɔ k’Ɛdɛna, Diabolo akakese Adama l’Eva. Satana akate dia Nzambi ekɔ Ɔnɔmbɔdi wa kɔlɔ. Nde akate dia Nzambi akadimaka Adama l’Eva dui dimɔtshi dia dimɛna. Satana akalange dia vɔ mbetawɔ dia nde ayonga ɔnɔmbɔdi wa dimɛna efula ndeka Jehowa ndo di’ɔnɛ vɔ bu l’ohomba wa Nzambi.—Etatelo 3:2-5; enda nɔtɛ ka la koma 27.

11. Dimbola diakɔna diahombaso nkadimola?

¹¹ Adama l’Eva wakahindolɛ Jehowa ndo wakɔtɔmbɔkwɛ. Vɔ wakɔshi dia vɔ wekɔ la lotshungɔ la vɔamɛ nshikikɛ kɛnɛ kaki ɔlɔlɔ la kaki kɔlɔ. Ngande wakakoke Jehowa mɛnya dia atɔmbɔki asɔ wakayakese ndo di’ɔnɛ nde mbeyaka kɛnɛ koleki dimɛna le so?

12, 13. a) Lande na kaki Jehowa kondjaka atɔmbɔki asɔ mbala kakɔ ɔtɔi? b) Lande na kaketawɔ Jehowa dia Satana monga owandji w’andja ɔnɛ ndo di’anto ndjalɔmbɔla vɔamɛ?

 ¹² Jehowa kondjaka Adama l’Eva mbala kakɔ ɔtɔi. Koko, nde akaatshike dia vɔ mbota ana. Oma laasɔ, Jehowa akayosala dia ana w’Adama l’Eva nsɔna onto lalangawɔ dia monga owandji awɔ. Sangwelo dia Jehowa aki dia ndodia nkɛtɛ l’anto wa kokele ndo dui sɔ diayokotshama oyadi kakɔna tshɛ kayosala Diabolo.—Etatelo 1:28; Isaya 55:10, 11.

¹³ Satana akadje Jehowa tɔfwɛfwɛ la ntondo ka miliyɔ y’andjelo. (Jɔbɔ 38:7; Danyɛlɛ 7:10) Ɔnkɔnɛ, Jehowa akatshikɛ Satana etena dia nde mɛnya kana kɛnɛ kakandate kaki mɛtɛ. Nde akatshikɛ nto anto etena dia vɔ nshikikɛ mandji yawɔ hita l’ɛlɔmbwɛlɔ ka Satana dia mɛnya dia kana vɔ wayoyalɔmbɔla dimɛna aha l’ekimanyielo kaki Nzambi.

14. Kakɔna kambɛnya etena kambeta?

¹⁴ L’edja ka nunu di’ɛnɔnyi, anto wamboyanga dia ndjalɔmbɔla vɔamɛ, koko vɔ wambokita tatala. Ambɛnama dia Satana ekɔ kanga kashi. Anto wekɔ l’ohomba w’ekimanyielo kaki Nzambi. Omvutshi Jɛrɛmiya aki la shadiya etena kakandate ɔnɛ: “Jehowa le, dimi mbeyaka dimɛna dia onto bu l’akoka wa ndjalɔmbɔla. Lam’akɛndakɛnda onto, nde bu la lotshungɔ la nɔmbɔla kaanga ekolo ande.”—Jɛrɛmiya 10:23.

15, 16. a) Lande na kambotshika Jehowa di’asui ntetemala edja efula nganɛ? b) Lande na kahakandola Jehowa ekakatanu watondja Satana?

¹⁵ Lande na kambotshika Jehowa asui edja efula nganɛ? Lande na kahandashimbe di’akambo wa kɔlɔ salema? Akahombe mbɔsa etena k’otale dia mɛnya dia ɛlɔmbwɛlɔ kaki Satana kambokita  tatala. Anto wambohemba weho tshɛ wa mandji koko hawotondoya. Kaanga mbambowosala ehamelo efula l’akambo wa siansɛ ndo wa tshulatshula, awui waha la losembwe, wola, diakatanelo ndo ata wamboleka salema oleki nshi ya ntondo. Hatokoke ntondoya dia ndjalɔmbɔla shoamɛ aha l’ekimanyielo ka Nzambi.

¹⁶ Koko, Jehowa atakandola ekakatanu watondja Satana. Naka nde mbakandola, kɛsɔ ayolembetshiya dia Nzambi ekɔ lo sukɛ ɛlɔmbwɛlɔ kaki Satana ndo Nde hasalaki dui sɔ pondjo. Ndo nto, anto wayɔsa dia vɔ wambotondoya dia ndjalɔmbɔla vɔamɛ. Koko ɔsɔ ekɔ kashi ndo Jehowa hasukɛ kashi kɛsɔ. Nde hataka kashi pondjo.—Hɛbɛru 6:18.

17, 18. Kakɔna kayosala Jehowa lo dikambo di’awui wa kɔlɔ tshɛ wambosala Satana?

¹⁷ Onde Jehowa kokaka nɔngɔsɔla awui wa kɔlɔ tshɛ wakaye oma l’ɔtɔmbɔkwɛlɔ wa Satana ndo w’anto? Eelo. Nzambi koka nsala oseka dikambo tshɛ. Jehowa mbeyaka etena kayokadimɔma dimɛna dimɛna tɔfwɛfwɛ tshɛ takadje Satana. Oma laasɔ, nde ayetɛ nkɛtɛ paradiso oko wakatahombe monga. Wanɛ tshɛ “wele lo waombo wohɔma” wayolɔ. (Joani 5:28, 29) Anto hawototata nto hemɔ kana mvɔ. Yeso ayɔlɔngɔsɔla akambo wa kɔlɔ tshɛ wakatondja Satana. Jehowa ayokamba la Yeso dia “ndanya etsha wa Diabolo.” (1 Joani 3:8) Tekɔ la lowando nɛ dia l’etena kɛnɛ Jehowa ekɔ la solo dia lotutsha oya le so woho wa sho mbeka dia mboweya ndo mbɔsa yɛdikɔ y’ɔnɛ nde mbalangaso dia monga Owandji aso. (Adia 2 Petero 3:9, 10.) Kaanga etena kasowaso, nde tokimanyiyaka dia sho mbikikɛ.—Joani 4:23; adia 1 Kɔrɛtɔ 10:13.

¹⁸ Jehowa hatotshutshuya la wolo dia mbɔsɔna oko Owandji aso. Nde mbishaka anto lotshungɔ la vɔamɛ  nsɔna. Nyɛsɔ tɔsɛdingole kitshimudi yele la woshasha wa nɛmɔ ɔsɔ le so.

19. Naa woshasha wa diambo wakatosha Jehowa? Lande na kahombaso monga la lowando lo woshasha akɔ?

¹⁹ Woshasha wa nɛmɔ efula wa lotshungɔ la nsɔna wakatosha Jehowa totshikitanyaka tshɛ lo tshɛ la waa nyama. Yɔ salaka tsho akambo la yimba yawɔ ya lootɔ koko sho kokaka nsɔna woho wahombaso nsɛna ndo mbɔsa yɛdikɔ ya ngɛnyangɛnya Jehowa. (Tokedi 30:24) Ndo nto, sho bu oko mashinyi wasala paka kɛnɛ kakawakongɛ dia vɔ salaka. Sho tekɔ la lotshungɔ la nsɔna woho w’onto walangaso monga, anto walangaso monga angɛnyi aso ndo kɛnɛ kalangaso nsala lo lɔsɛnɔ laso. Jehowa nangaka dia sho ngɛnangɛna la lɔsɛnɔ.

20, 21. Naa ɔsɔnwɛlɔ woleki tshɛ dimɛna wakokayɛ nsala ɛlɔ kɛnɛ?

²⁰ Jehowa nangaka dia sho mbooka ngandji. (Mateo 22:37, 38) Nde ekɔ oko papa kele l’ɔngɛnɔngɛnɔ dia mboka ɔnande awotɛ ɔnɛ: “Dimi kolangaka,” etena kata ɔnɔsɔ ndamɛ dui dioye oma l’otema ande koko aha lo nde tshutshuyama la wolo. Jehowa toshaka lotshungɔ la nsɔna dia mbokambɛ kana bu. Satana, Adama ndo Eva wakasɔnɛ dia mboka Jehowa ɔkɔngɔ. Ngande wayoyokamba la woshasha ayɛ wa lotshungɔ la nsɔna?

²¹ Kamba la lotshungɔ lele layɛ dia kambɛ Jehowa. Miliyɔ y’anto wekɔ lo nsɔna dia ngɛnyangɛnya Nzambi ndo mboka Satana ɔkɔngɔ. (Tokedi 27:11) Kakɔna kakokayɛ nsala ɛlɔ kɛnɛ dia wɛ ndjonga l’andja w’oyoyo waki Nzambi etena kayondonya asui tshɛ? Tshapita yayela yayokadimola lo dimbola sɔ.