1. Naa sangwelo dia Nzambi lo dikambo di’anto?

KƐNƐ kasangoya Nzambi lo dikambo di’anto ekɔ diambo efula. Nde akatonge pami ka ntondo la womoto la ntondo, mbuta ate Adama la Eva, dia vɔ mbidjasɛ lo ekambɔ ka dimɛna efula. Sangwelo diande aki dia vɔ monga la ana, mbetɛ nkɛtɛ k’otondo paradiso, ndo nkokɛ waa nyama.—Etatelo 1:28; 2:8, 9, 15; enda nɔtɛ ka la koma 6.

2. a) Ngande weyaso dia Nzambi ayokotsha kɛnɛ kakandasangoya? b) Kakɔna kata Bible lo kɛnɛ kendana la mbidjasɛ pondjo pondjo la nkɛtɛ?

² Onde wɛ fɔnyaka dia tayɔsɛna lushi lɔmɔtshi lo paradiso? Jehowa totɛka ate: “Dimi lakadisangoya ndo dimi layodishidiya.” (Isaya 46:9-11; 55:11) Eelo, nde ayokotsha kɛnɛ kakandasangoya ndo ndooko kɛnɛ kayowoshimba. Jehowa mbutaka dia nde akatonge nkɛtɛ l’ɔtɛ w’ɔkɔkɔ ɔmɔtshi. Nde “kondjitonga otongatonga.” (Isaya 45:18) Nde nangaka di’anto tshɛ mbidjasɛ laadiko dia nkɛtɛ. Weho akɔna w’anto walanga Nzambi dia vɔ mbidjasɛ la nkɛtɛ, ndo lo edja ka ngande? Bible mbutaka ɔnɛ: “Anto w’ɛlɔlɔ [kana wele l’okitanyiya] wayokita nkɛtɛ, ndo wayodjasɛka lɔkɔ pondjo pondjo.”—Osambo 37:29; Ɛnyɛlɔ 21:3, 4.

3. Lam’ele anto tataka hemɔ ndo mvɔka, kakɔna kakokayɛ ndjambola?

³ Koko ɛlɔ kɛnɛ, anto tataka hemɔ ndo mvɔka. L’ahole efula, anto ndɔshanaka ndo ndjakanaka lam’asawɔ. Koko lo mɛtɛ, aha kɛsɔ mbakasangoya Nzambi. Ko kakɔna kakatombe, ndo lande na? Paka Bible mbakoka tolembetshiya.

4, 5. a) Akɔna akatɛkɛta la Eva lo tshimbo y’oloyi lo ekambɔ k’Ɛdɛna? b) Ngande wakoka onto ɔmɔtshi lele la lɔkɛwɔ l’ɔlɔlɔ ndjokoma wovi?

⁴ Bible totɛka dia Nzambi ekɔ la otunyi ɔmɔtshi “welamɛ Diabolo ndo Satana.” Satana akakambe la oloyi dia ntɛkɛta la Eva lo ekambɔ k’Ɛdɛna. (Ɛnyɛlɔ 12:9; Etatelo 3:1) Nde akasale dia mɛnama oko oloyi mbakatɛkɛtaka.—Enda nɔtɛ ka la koma 7.

⁵ Ko onde Nzambi akatonge Satana Diabolo? Ndooko! Ondjelo ɔmɔtshi waki l’olongo etena kakalɔngɔsɔlaka Nzambi nkɛtɛ lo dikambo di’Adama la Eva akayotshikitana ndo akayokoma Diabolo. (Jɔbɔ 38:4, 7) Ngande wakakoke dikambo sɔ salema? Ngande wakoka onto laki la lɔkɛwɔ l’ɔlɔlɔ ntshikitana ko ndjokoma wovi? Nde kombotama wovi. Koko nde amboyokombola ɛngɔ kɛmɔtshi kele bu kande. Nde ambotetemala kanyiya dia ɛngɔ kakɔ, ndo nsaki kande ka kɔlɔ kambokoma wolo efula. Oma laasɔ, etena kamondokondja diaaso dimɔtshi, nde ambokiva. Nde amboyaetɛ kanga wovi.—Adia Jakɔba 1:13-15;—Enda nɔtɛ ka la koma 8.

6. Ngande wakakome ondjelo ɔmɔtshi otunyi wa Nzambi?

⁶ Kɛsɔ mbakakomɛ ondjelo akɔ. L’ɔkɔngɔ wa Jehowa ntonga Adama la Eva, nde akawatɛ dia mbota ana ndo dia ‘ndodia nkɛtɛ.’ (Etatelo 1:27, 28) Ondo kanyi nyɛ mbakayɛ ondjelo ɔsɔ lo yimba: ‘Anto asɔ tshɛ kokaka tɛmɔlami lo dihole dia ntɛmɔla Jehowa!’ Lam’akandatalekaka nkanyiya dia dikambo sɔ, mbakandatalekaka nkombola kɛnɛ kele kaki Jehowa. Ondjelo ɔsɔ akakombola di’anto mbɔtɛmɔla. Ɔnkɔnɛ, nde akakese Eva ndo akawonganyiya. (Adia Etatelo 3:1-5.) Lo nsala ngasɔ, nde akakome Satana Diabolo, otunyi wa Nzambi.

7. a) Lande na kakavu Adama la Eva? b) Lande na katshundaso esombe ndo kavɔso?

 ⁷ Adama la Eva wakahindolɛ Nzambi ndo wakale olowa. (Etatelo 2:17; 3:6) Vɔ wakasalɛ Jehowa pɛkato, ndo oma laasɔ vɔ wakayovɔka oko wakate Jehowa. (Etatelo 3:17-19) Ana waki Adama la Eva waki atshi wa pɛkato, diakɔ diakawavu. (Adia Rɔmɔ 5:12.) Dia tokimanyiya dia nshihodia lande na kele ndo ana waki Adama la Eva mbaki atshi wa pɛkato, tɔsɛdingole ɛnyɛlɔ kɛnɛ. Tɔshi dia wɛ ekɔ lo nsala mapa lo mpanu kɛmɔtshi kele la ɛkɔmɔ. Mapa tshɛ wayotomba oma lɔkɔ wayonga la ɛkɔmɔ kakɔ kaamɛ. Etena kakahindolɛ Adama Nzambi, Adama akakome otshi wa pɛkato. Lam’ele sho tekɔ ana waki Adama, sho tshɛ tekɔ atshi wa pɛkato, kana tekɔ la “ɛkɔmɔ” kakɔ kaamɛ. Ndo lam’ele sho tshɛ tekɔ atshi wa pɛkato, sho tshundaka esombe ndo mvɔka.—Rɔmɔ 3:23; enda nɔtɛ ka la koma 9.

8, 9. a) Kakɔna kakalange Satana dia Adama la Eva mbetawɔ? b) Lande na kaki Jehowa kondjaka atɔmbɔki asɔ mbala kakɔ ɔtɔi?

⁸ Satana akatatɛ tɔmbɔkwɛ Jehowa etena kakandatshutshuya Adama la Eva dia vɔ mpindolɛ Nzambi. Nde akalange dia Adama la Eva mbetawɔ dia Jehowa ekɔ kanga kashi ndo ɔnɔmbɔdi wa kɔlɔ waki kombakombolɛka kɛnɛ koleki ɔlɔlɔ. Satana akataka di’anto bu l’ohomba wa Nzambi mbatɛ kɛnɛ kahombawɔ nsala ndo dia Adama la Eva wakahombe mbɔsa yɛdikɔ vɔamɛ dia nsala kɛnɛ kele ɔlɔlɔ kana kɛnɛ kele kɔlɔ. Ko kakɔna kakahombe Jehowa nsala? Nde akahombe ndjaka atɔmbɔki asɔ ndo nkomiya la ɔtɔmbɔkwɛlɔ awɔ. Ko onde dui sɔ diotɛnya dia Satana ekɔ kanga kashi? Ndooko.

⁹ Ɔnkɔnɛ, Jehowa kondjaka atɔmbɔki asɔ mbala kakɔ ɔtɔi. Koko nde akatshike etena di’anto ndjalɔmbɔla vɔamɛ. Dui sɔ mbakahombe mɛnya hwe dia Satana ekɔ kanga kashi ndo ɔnɛ Jehowa mbeyaka kɛnɛ koleki ɔlɔlɔ  le anto. Tayeka akambo efula wendana la dui sɔ lo Tshapita 11. Ko kakɔna kafɔnyayɛ lo kɛnɛ kendana la yɛdikɔ yakɔshi Adama la Eva? Onde aki ɔlɔlɔ dia vɔ mbetawɔ Satana ndo mpindolɛ Nzambi? Jehowa akasha Adama la Eva ɛngɔ tshɛ kakiwɔ la tɔ ohomba. Nde akawasha lɔsɛnɔ la kokele, dihole di’olangala efula dia vɔ mbidjasɛ ndo olimu wakawashaka ɔngɛnɔngɛnɔ. Koko Satana  kombasalɛ kaanga dikambo ɔtɔi dia dimɛna. Otoyonga lawɔ, kakɔna kotoyosala?

10. Ɔsɔnwɛlɔ akɔna w’ohomba wahombaso sho tshɛ nsala?

¹⁰ Ɛlɔ kɛnɛ, sho tshɛ pombaka nsala ɔsɔnwɛlɔ akɔ waamɛ, ndo lɔsɛnɔ laso nemanɛka la ɔsɔnwɛlɔ akɔ. Sho kokaka nsɔna dia nkitanyiya Jehowa oko wende Ɔnɔmbɔdi aso ndo nkimanyiya dia mɛnya dia Satana ekɔ kanga kashi. Kana sho kokaka nsɔna Satana oko ɔnɔmbɔdi aso. (Osambo 73:28; adia Tokedi 27:11.) Anto yema tshitshɛ tsho mbakitanyiya Nzambi l’andja ɔnɛ. Lo mɛtɛ, nde keema ɔnɔmbɔdi w’andja ɔnɛ. Ko naka Nzambi keema Ɔnɔmbɔdi w’andja ɔnɛ, akɔna ele ɔnɔmbɔdi w’andja ɔnɛ na?

11, 12. a) Wetshelo akɔna wakondjaso oma lo kɛnɛ kakalange Satana mbisha Yeso? b) Avɛsa akɔna wa lo Bible wɛnya dia Satana mbalɔmbɔla andja ɔnɛ?

¹¹ Yeso akeyaka mɛtɛ ele ɔnɔmbɔdi w’andja ɔnɛ. Lo diaaso dimɔtshi, Satana “akawɛnya waolelo tshɛ wa l’andja ɔnɛ la lotombo lawɔ.” Oma laasɔ, Satana akalake Yeso ate: “Layokosha diangɔ nɛ tshɛ naka wɛ kusamɛmi ndo nsala tshelo 1 ya tɛmɔlami.” (Mateo 4:8, 9; Luka 4:5, 6) Yambola wate: ‘Otondonga waolelo asɔ komonga waki Satana, onde nde otowasha Yeso?’ Ndooko. Mandji tshɛ yekɔ yaki Satana.

¹² Wɛ mbeyaka ndjambola wate: ‘Ngande wakoka Satana monga ɔnɔmbɔdi w’andja ɔnɛ? Shi Jehowa Nzambi Kanga-Wolo-Tshɛ mbakatonge andja w’otondo?’ (Ɛnyɛlɔ 4:11) Eelo, nde mbakatonge, koko Yeso akelɛ Satana ɔnɛ “owandji w’andja ɔnɛ.” (Joani 12:31; 14:30; 16:11) Ɔpɔstɔlɔ Pɔɔlɔ akelɛ Satana Diabolo “nzambi ka dikongɛ nɛ di’akambo.” (2 Kɔrɛtɔ 4:3, 4) Ndo ɔpɔstɔlɔ Joani akafunde dia “andja w’otondo wekɔ lo nɔmbɔma oma le kanga kɔlɔ.”—1 Joani 5:19.

13. Lande na keso l’ohomba w’andja w’oyoyo?

¹³ Andja ɔnɛ wekɔ lo taleke monga waale efula. Tekɔ lo mɛna awui w’ata, wa lokeso, wa dungi pende ndo wa ngala l’ahole wodjashiso. Anto hawokoke minya awui asɔ tshɛ, oyadi welo akɔna wayowodja. Koko kem’edja, Nzambi ayanga ndanya andja ɔnɛ wa kɔlɔ lo ta diande di’Aramangɛdɔna. Andja w’oyoyo wa losembwe mbayɔhɛna andja ɔnɛ.—Ɛnyɛlɔ 16:14-16, enda nɔtɛ ka la koma 10.

14. Onto akɔna akasɔnama oma le Nzambi dia monga Nkumekanga ka Diolelo diande? Ndo kakɔna kakatatshi Bible lo dikambo dia Yeso?

¹⁴ Jehowa Nzambi akasɔnɛ Yeso Kristo dia monga Nkumekanga ka lowandji Lande la l’olongo, kana Diolelo. Ɛnɔnyi nunu la ntondo, Bible kakatatshi dia Yeso ayolɛ oko “Owandji wa Ki” ndo ɔnɛ lowandji lande lɔsɔ hatonga l’ekomelo. (Isaya 9:6, 7) Yeso aketsha ambeki ande dia nɔmbaka lo dikambo dia lowandji lɔsɔ ɔnɛ: “Diolelo diayɛ diaye. Lolango layɛ latshame la nkɛtɛ oko watshamalɔ l’olongo.” (Mateo 6:10) Lo Tshapita 8, tayeka woho wayɔhɛna Diolelo diaki Nzambi mandji ya l’andja ɔnɛ. (Adia Danyɛlɛ 2:44.) Oma laasɔ, Diolelo diaki Nzambi diayetɛ nkɛtɛ k’otondo paradiso ka dimɛna efula.—Enda nɔtɛ ka la koma 11.

15. Elɛwɔ “nkɛtɛ k’oyoyo”?

¹⁵ Bible ndakaka ɔnɛ: “Tekɔ lo nkonga olongo w’oyoyo ndo nkɛtɛ k’oyoyo, lɛnɛ ayongaka losembwe.” (2 Petero 3:13; Isaya 65:17) Mbala mɔtshi, etena katɛkɛta Bible dikambo dia “nkɛtɛ,” tɔ nembetshiyaka anto wasɛna la nkɛtɛ. (Etatelo 11:1) Ɔnkɔnɛ, “nkɛtɛ k’oyoyo” ka losembwe nembetshiyaka tshunda di’anto tshɛ wakitanyiya Nzambi ndo watshɔkwama oma le nde.

16. Naa woshasha wa diambo wayosha Nzambi wanɛ wayɔsɛna l’andja w’oyoyo ndo akokaso nsala dia sho ndjokondja woshasha ɔsɔ?

 ¹⁶ Yeso akalake dia wanɛ wayɔsɛna lo andja w’oyoyo waki Nzambi wayokondja “lɔsɛnɔ la pondjo.” (Makɔ 10:30) Kakɔna kakokaso nsala dia nkondja woshasha ɔsɔ? Lam’alangayɛ, adia Joani 3:16 ndo 17:3 dia wɛ ntana okadimwelo. Nyɛsɔ kakianɛ tende kɛnɛ kata Bible lo woho wayonga lɔsɛnɔ lo paradiso ka la nkɛtɛ.

17, 18. Ngande weyaso dia wɔladi wayonga l’ahole tshɛ wa la nkɛtɛ ndo dia tayɔsɛnaka lo lotui tshitshi?

¹⁷ Awui wa kɔlɔ, ata, diakatanelo ndo awui wa ngala wayoshila. Ndooko onto la kɔlɔ layoyala nto la nkɛtɛ. (Osambo 37:10, 11) Nzambi ‘ayokomiya ata lo nkɛtɛ k’otondo.’ (Osambo 46:9; Isaya 2:4) Nkɛtɛ kayolola la anto woka Nzambi ngandji ndo wele l’okitanyiya otsha le nde. Wɔladi wayongaka pondjo pondjo.—Osambo 72:7.

¹⁸ Atɛmɔdi wa Jehowa wayɔsɛna lo lotui tshitshi. Lo nshi yakafundamaka Bible, etena kaki Isariyɛlɛ l’okitanyiya otsha le Nzambi, vɔ wakasɛnaka lo lotui tshitshi nɛ dia nde akaakokɛka. (Akambo w’ase Lɛwi 25:18, 19) Lo paradiso, hatotoka ndooko onto kana ɛngɔ wɔma. Tayɔsɛnaka nshi tshɛ lo lotui tshitshi!—Adia Isaya 32:18; Mika 4:4.

19. Lande na kakokaso monga l’eshikikelo dia mbo ya ndɛ yayonga tshavutshavu lo andja w’oyoyo waki Nzambi?

¹⁹ Mbo ya ndɛ yayonga tshavutshavu. “Mbo ya ndɛ yayoyala efula la nkɛtɛ; yɔ yayonga tshavutshavu lo tɔsɔdi t’akona.” (Osambo 72:16) Jehowa, “Nzambi kaso ayotɔtshɔkɔla” ndo “nkɛtɛ yayɔngɔnya diangɔ.”—Osambo 67:6.

20. Ngande weyaso dia nkɛtɛ kayokoma paradiso?

²⁰ Nkɛtɛ k’otondo kayokoma paradiso. Anto wayonga la mvudu y’elangala ndo tojardɛ. (Adia Isaya  65:21-24; Ɛnyɛlɔ 11:18.) Nkɛtɛ k’otondo kayonga olangala woho waki ekambɔ ka Ɛdɛna. Jehowa ayotoshaka nshi tshɛ ɛngɔ tshɛ keso latɔ ohomba. Bible mbutaka lo dikambo diande ɔnɛ: “Wɛ kukolaka lonya layɛ ndo kotshaka nsaki ka ɛngɔ tshɛ kasɛna.”—Osambo 145:16.

21. Ngande weyaso dia wɔladi wayonga lam’asa anto la waa nyama?

²¹ Wɔladi wayonga lam’asa anto la waa nyama. Nyama hayotosalɛ nto anto kɔlɔ. Kaanga ana w’akɛnda hawotoyaoka lo waale kaanga l’atei wa nyama yele waale le so ɛlɔ kɛnɛ.—Adia Isaya 11:6-9; 65:25.

22. Kakɔna kayosalɛ Yeso wanɛ wele la hemɔ?

²² Ndooko onto layotata hemɔ. Etena kaki Yeso lanɛ la nkɛtɛ nde akakɔnɔla anto efula waki la hemɔ. (Mateo 9:35; Makɔ 1:40-42; Joani 5:5-9) Koko oko Nkumekanga ka Diolelo diaki Nzambi, Yeso ayɔkɔnɔya oseka onto tshɛ. Ndooko onto layota ate: “Dimi lekɔ la hemɔ.”—Isaya 33:24; 35:5, 6.

23. Kakɔna kayosalɛ Nzambi anto wakavu?

²³ Wanɛ wakavu wayɔsɛna nto. Nzambi ndakaka dia nde ayolola miliyɔ y’anto wakavu. “Eolwelo k’anto w’ɛlɔlɔ ndo k’anto wa kɔlɔ kayoyala.”—Adia Joani 5:28, 29; Etsha 24:15.

24. Ngande wayaokayɛ lo kɛnɛ kendana la nsɛna lo paradiso?

²⁴ Sho tshɛ pombaka nsala ɔsɔnwɛlɔ ɔmɔtshi. Sho koka nsɔna dia mbeka akambo wendana la Jehowa ndo mbokambɛ kana sho kokaka tsho nsala kɛnɛ kalangaso. Naka tambɔsɔna dia kambɛ Jehowa, kete tayokoka monga la nshi yayaye y’amɛna efula. Etena kakalɔmbɛ pami kɛmɔtshi Yeso dia nde mboohɔ l’ɔkɔngɔ wa nyɔi kande, Yeso akoolake ate: “Wɛ ayoyala la mi lo paradiso.” (Luka 23:43) Nyɛsɔ tonyomeka akambo wendana la Yeso Kristo ndo woho wayondosala dia alaka wa diambo waki Nzambi kotshama.