1, 2. Lande na kɔsayɛ dia dɔmbɛlɔ ekɔ woshasha wa laande ndo lande na kahombaso mbeya kɛnɛ ketsha Bible lo dikambo dia dɔmbɛlɔ?

LO MBƐDIKA l’andja, nkɛtɛ kekɔ tshitshɛ efula. Etena kenda Jehowa nkɛtɛ, anto ndo wedja tshɛ mɛnamaka tshitshɛ efula oko dipɔpɔ di’ashi lo mbaka. (Osambo 115:15; Isaya 40:15) Kaanga mbeso totshitshɛ efula lo mbɛdika l’andja, Osambo 145:18, 19 mbutaka ɔnɛ: “Jehowa ekɔ suke la wanɛ tshɛ wawelɛ, wanɛ tshɛ wawelɛ lo mɛtɛ. Nde kotshaka nsaki ka wanɛ wawoka wɔma; nde mbokaka delo diawɔ dialɔmbawɔ ekimanyielo ndo nde mbatshaka.” Ande diɛsɛ dia diambo diele la so lee! Jehowa, Otungi Kanga-Wolo-Tshɛ, nangaka dia monga suke la so ndo nde nangaka mpokamɛ alɔmbɛlɔ aso. Eelo, dɔmbɛlɔ diekɔ tshondo ya diɛsɛ, woshasha wa laande wakasha Jehowa ɔmɔmɔ la l’atei aso.

² Koko Jehowa ayotohokamɛ paka naka sho nsawola la nde lo yoho yetawɔnde. Ngande wakokaso nsala dui sɔ? Ɛsɔ tende kɛnɛ kata Bible lo dikambo dia dɔmbɛlɔ.

3. Lande na kahombayɛ nɔmbaka Jehowa?

³ Jehowa nangaka dia wɛ mbɔlɔmba kana ntɛkɛta la nde. Ngande weyaso dui sɔ? Lam’alangayɛ, adia Filipɛ 4:6, 7. Ohokana yimba lo dikambo dia leeta la dimɛna lɔsɔ. Owandji w’andja w’otondo ndjashaka efula le yɛ ndo nangaka dia wɛ mbotɛ woho wayaokayɛ ndo ekakatanu wele la yɛ.

4. Ngande wakeketsha alɔmbɛlɔ wa mbala la mbala w’otsha le Jehowa lɔngɛnyi lele lam’asayɛ la nde?

 ⁴ Dɔmbɛlɔ tokimanyiyaka dia monga la lɔngɛnyi la ma ma la Jehowa. Etena kasawola angɛnyi mbala la mbala lam’asawɔ lo kɛnɛ kendana la tokanyi tawɔ, ekiyanu awɔ, ndo nsaki yawɔ, lɔngɛnyi lawɔ tetemalaka mpama. Woho akɔ waamɛ mbele dɔmbɛlɔ otsha le Jehowa. Lo tshimbo ya Bible, nde totɛka tokanyi tande ndo nsaki yande oya le so ndo nde totɛka kɛnɛ kayondosala lo nshi yayaye. Wɛ kokaka mbotɛ kaanga nsaki yayɛ ya l’etei k’otema lo sawolaka la nde mbala la mbala. Lo nsala ngasɔ, lɔngɛnyi lasayɛ la Jehowa layoleka monga wolo.—Jakɔba 4:8.

5. Ngande weyaso dia Jehowa hahokamɛ alɔmbɛlɔ tshɛ?

⁵ Onde Jehowa mpokamɛka alɔmbɛlɔ tshɛ? Ndooko. Lo nshi y’omvutshi Isaya, Jehowa akatɛ ase Isariyɛlɛ ɔnɛ: “Kaanga mbasalanyu alɔmbɛlɔ efula, dimi haahokamɛ; anya anyu wambolola tɔɔ la dikila.” (Isaya 1:15) Ɔnkɔnɛ, naka hatendji ɔlɔlɔ, sho koka ndjosala awui  amɔtshi wayotanganya la Jehowa, lo mbokonya diaha nde mpokamɛ alɔmbɛlɔ aso.

6. Lande na kele mbetawɔ kekɔ ohomba efula? Ngande wɛnyayɛ dia wɛ ekɔ la mbetawɔ?

⁶ Naka sho nangaka dia Jehowa mpokamɛ alɔmbɛlɔ aso, sho pombaka monga la mbetawɔ le nde. (Makɔ 11:24) Ɔpɔstɔlɔ Pɔɔlɔ akalembetshiya ate: “Onto lele bu la mbetawɔ hakoke ngɛnyangɛnya Nzambi, nɛ dia ɔnɛ layasukanya la Nzambi pombaka mbetawɔ dia nde ekɔ, ndo nde ndjalaka ofutshi wa wanɛ wooyanga l’otema ɔtɔi.” (Hɛbɛru 11:6) Koko hatohombe tsho nkomɛ lo mbuta dia tekɔ la mbetawɔ. Sho pombaka mɛnya mbetawɔ kaso hwe lo kitanyiyaka Jehowa lushi tshɛ.—Adia Jakɔba 2:26.

7. a) Lande na kahombaso monga l’okitshakitsha ndo la dilɛmiɛlɔ etena kalɔmbaso Jehowa? b) Ngande wakokaso mɛnya dia tekɔ lo mbuta akambo hwe etena kalɔmbaso?

⁷ Sho pombaka monga l’okitshakitsha ndo la dilɛmiɛlɔ etena kalɔmbaso Jehowa. Lande na? Naka sho pombaka ntɛkɛta la nkumekanga kana prezida kɛmɔtshi, sho pombaka nsala dikambo sɔ la dilɛmiɛlɔ tshɛ. Jehowa mbele Nzambi Kanga-Wolo-Tshɛ, shi laasɔ sho pombaka ndeka monga la dilɛmiɛlɔ ndo l’okitshakitsha etena katɛkɛtaso la nde? (Etatelo 17:1; Osambo 138:6) Sho pombaka nto mbuta akambo hwe ndo nɔmba Jehowa oma k’ɛse otema, aha la kalolɛka mbala la mbala ɛtɛkɛta akɔ waamɛ.—Mateo 6:7, 8.

8. Etena kalɔmbaso lo kɛnɛ kendana la dikambo dimɔtshi, kakɔna kahombaso nto nsala?

⁸ Ndo nto, etena kalɔmbaso l’ɔtɛ wa dikambo dimɔtshi, sho pombaka nsala kɛnɛ tshɛ kakokaso nsala dia mbɔtɔnganyiya etsha aso la kɛnɛ kalɔmbaso. Ɛnyɛlɔ, naka sho nɔmba Jehowa lo dikambo di’ehomba aso wa lushi la lushi, kete hatohombe nkɔma anya ndo nongamɛ dia Jehowa tosha diangɔ tshɛ dieso kaanga l’akoka  wa nkamba dia ditana. Sho pombaka nkamba la wolo ndo mbetawɔ olimu tshɛ weso l’akoka wa nkamba. (Mateo 6:11; 2 Tɛsalɔnika 3:10) Kana naka tekɔ lo nɔmba Jehowa dia tokimanyiya dia ntshika nsala awui amɔtshi wa kɔlɔ, kete sho pombaka mbewɔ dui tshɛ diakoka tokonya l’ohemba. (Kɔlɔsayi 3:5) Nyɛsɔ tɔsɛdingole kakianɛ ambola amɔtshi waleka anto ndjambola lo dikambo dia dɔmbɛlɔ.

9. Onto akɔna ahombaso nɔmbaka? Kakɔna katetsha Joani 14:6 lo dikambo dia dɔmbɛlɔ?

⁹ Onto akɔna ahombaso nɔmba? Yeso aketsha ambeki ande dia nɔmba “Shɛso lele l’olongo.” (Mateo 6:9) Nde akate nto ate: “Dimi lekɔ mboka, mɛtɛ ndo lɔsɛnɔ. Ndooko onto laya le Papa paka lo tshimbo yami.” (Joani 14:6) Ɔnkɔnɛ, sho pombaka nɔmbaka paka Jehowa lo tshimbo ya Yeso. Kakɔna kalembetshiya nɔmba lo tshimbo ya Yeso? Dia Jehowa mboka alɔmbɛlɔ aso, sho pombaka mɛnya dilɛmiɛlɔ l’ɔkɛndɛ wa laande wakasha Jehowa Yeso. Oko wakatadieke, Yeso akaye la nkɛtɛ dia ndjotoshimbɛ oma lo pɛkato la nyɔi. (Joani 3:16; Rɔmɔ 5:12) Jehowa akasɔnɛ nto Yeso oko Ɔlɔmbɛdi a laadiko ndo Shushi.—Joani 5:22; Hɛbɛru 6:20.

10. Onde sho pombaka monga la kiongamu mɔtshi ya laande etena kalɔmbaso? Lembetshiya.

¹⁰ Onde sho pombaka monga la kiongamu ya laande etena kalɔmbaso? Keema. Jehowa hatɔlɔmbɛ dia mbika adwe, mbidjasɛ, kana memala etena kalɔmbaso. Bible tetshaka dia sho koka nsawola la Jehowa lo oseka kiongamu tshɛ yɛnya dilɛmiɛlɔ. (1 Ɛkɔndɔ 17:16; Nɛhɛmiya 8:6; Danyɛlɛ 6:10; Makɔ 11:25) Kɛnɛ koleki ohomba le Jehowa, aha kiongamu yele la so etena kalɔmbaso, koko dia sho nsawola la nde la yimba y’ɔlɔlɔ.  Sho koka nɔmba la dui dia wolo kana l’otema dihole tshɛ diatanemaso ndo wonya tshɛ oyadi la yanyi kana l’otsho. Etena kalɔmbaso Jehowa, sho koka monga l’eshikikelo dia nde ayotohokamɛ, oyadi etena kele ndooko onto latohokamɛ.—Nɛhɛmiya 2:1-6.

11. Naa awui amɔtshi wakokaso mbutɛ Jehowa lo dɔmbɛlɔ?

¹¹ Kakɔna kakokaso nɔmba? Sho koka nɔmba dikambo dia ɛngɔ tshɛ ketawɔma le Jehowa. Bible mbutaka ɔnɛ: “Kɛnɛ tshɛ kɔɔlɔmbaso kɔtɔnɛ la lolango lande, nde tokɛka.” (1 Joani 5:14) Onde sho koka nɔmba dia ehomba aso hita? Eelo. Nɔmba Jehowa pombaka monga oko sawo dia l’ɔngɛnyi w’oshika. Sho koka mbutɛ Jehowa kɛnɛ tshɛ kele lo yimba ndo kele l’otema aso. (Osambo 62:8) Sho koka mbɔlɔmba dia nde tosha nyuma kande k’ekila dia tɔ tokimanyiya dia sho nsala kɛnɛ kele ɔlɔlɔ. (Luka 11:13) Sho koka nto nɔmba Jehowa lomba la mbɔsa tɛdikɔ t’amɛna ndo sho koka nɔmba dia nkondja wolo wa ndɔshana l’ekakatanu. (Jakɔba 1:5) Sho pombaka nɔmba Jehowa dia todimanyiya pɛkato yaso. (Ɛfɛsɔ 1:3, 7) Sho pombaka nto nɔmba dikambo di’anto akina, mbidja ndo ase nkumbo kaso ndo anangɛso l’akadiyɛso wa l’etshumanelo.—Etsha 12:5; Kɔlɔsayi 4:12.

12. Kakɔna kahomba ndeka monga ohomba lo alɔmbɛlɔ aso?

¹² Kakɔna kahomba ndeka monga ohomba lo alɔmbɛlɔ aso? Jehowa ndo lolango lande. Sho pombaka mbosha losaka l’oma k’ɛse otema l’ɔtɛ wa kɛnɛ tshɛ katosalɛnde. (1 Ɛkɔndɔ 29:10-13) Sho mbeyaka dui sɔ nɛ dia etena kaki Yeso la nkɛtɛ, nde aketsha ambeki ande woho wa nɔmba. (Adia Mateo 6:9-13.) Nde akate dia vɔ pombaka ntondotondo nɔmba dia lokombo la Nzambi nkidiama, mbuta ate mbɔsama oko ekila. Oma laasɔ, Yeso akɛnya dia sho pombaka nɔmba dia Diolelo dia Nzambi ndja ndo dia lolango la Nzambi salema lo nkɛtɛ k’otondo. Paka l’ɔkɔngɔ wa nɔmba dikambo di’awui  w’ohomba asɔ mbakate Yeso dia sho nɔmba dikambo di’ehomba aso hita. Etena ketshaso Jehowa ndo lolango lande lo dihole dia ntondo lo alɔmbɛlɔ aso, sho mɛnyaka kɛnɛ koleki ohomba le so.

13. Otale wa ngande wahomba monga la alɔmbɛlɔ aso?

¹³ Otale wa ngande wahomba monga la alɔmbɛlɔ aso? Bible hɛnya otale wahomba alɔmbɛlɔ aso monga. Alɔmbɛlɔ aso koka monga tomondo kana etale, nemanɛka l’awui wele la so. Ɛnyɛlɔ, sho koka nsala dɔmbɛlɔ  dia mondo la ntondo ka ndɛ, koko dɔmbɛlɔ di’otale etena kashaso Jehowa losaka kana kawotɛso ekiyanu aso. (1 Samuɛlɛ 1:12, 15) Hatohombe nsala alɔmbɛlɔ w’etale paka dia mambiya anto akina oko wakasalaka anto amɔtshi lo nshi ya Yeso. (Luka 20:46, 47) Jehowa hambiyama la alɔmbɛlɔ wa ngasɔ. Kɛnɛ koleki ohomba le Jehowa ele dia sho nsala alɔmbɛlɔ w’oma k’ɛse otema.

14. Mbala ngana yahombaso nɔmbaka ndo dui sɔ atetshadiɔ lo dikambo dia Jehowa?

¹⁴ Mbala ngana yahombaso nɔmbaka? Jehowa tɔlɔmbaka dia sho sawolaka la nde mbala la mbala. Bible mbutaka ɔnɛ: “Nyotetemale nɔmba.” (Mateo 26:41; Rɔmɔ 12:12; 1 Tɛsalɔnika 5:17) Jehowa mongaka nshi tshɛ suke dia tohokamɛ. Sho koka mbookaka losaka lushi tshɛ l’ɔtɛ wa ngandji ndo wa lokaho lande. Sho koka nto mbɔlɔmba ɛlɔmbwɛlɔ kande, wolo ande ndo esambelo  kande. Naka sho mbɔsaka mɛtɛ la nɛmɔ diɛsɛ diele la so dia nɔmba Jehowa, kete tayokambaka la diaaso tshɛ dia nsawola la nde.

15. Lande na kahombaso mbuta “Aamɛɛ” l’ekomelo ka dɔmbɛlɔ?

¹⁵ Lande na kahombaso mbuta “Aamɛɛ” l’ekomelo ka dɔmbɛlɔ? Tshɛkɛta “Aamɛɛ” nembetshiyaka “mɛtɛ,” kana “ayale ɔsɔku.” Yɔ yekɔ yoho ya mɛnya dia sho mbetawɔka kɛnɛ kotshiso lo dɔmbɛlɔ, mbuta ate tekɔ lo nɔmba l’otema ɔtɔi. (Osambo 41:13) Bible tetshaka dia ekɔ nto dimɛna mbuta “Aamɛɛ,” oyadi l’otema kana la dui dia wolo l’ekomelo ka dɔmbɛlɔ dia lo sɛkɛ dia mɛnya dia sho mbetawɔka kɛnɛ kotami.—1 Ɛkɔndɔ 16:36; 1 Kɔrɛtɔ 14:16.

16. Onde Jehowa mɛtɛ kadimolaka lo alɔmbɛlɔ aso? Lembetshiya.

¹⁶ Onde mɛtɛ Jehowa kadimolaka lo alɔmbɛlɔ aso? Eelo, nde kadimolaka. Bible mbeelɛka ɔnɛ: “Wɛ latokaka dɔmbɛlɔ.” (Osambo 65:2) Jehowa mpokamɛka ndo kadimolaka lo alɔmbɛlɔ wa l’otema ɔtɔi wa miliyɔ y’anto ndo nde salaka dui sɔ lo toho totshikitanyi.

17. Ngande wakamba Jehowa l’andjelo ndo l’ekambi ande wa la nkɛtɛ dia nkadimola lo alɔmbɛlɔ aso?

¹⁷ Jehowa kambaka l’andjelo ndo l’ekambi ande wa la nkɛtɛ dia nkadimola lo alɔmbɛlɔ aso. (Hɛbɛru 1:13, 14) Tekɔ la bɛnyɛlɔ efula di’anto wakalɔmbɛ Nzambi dia nkondja ekimanyielo ka nshihodia Bible, ko yema tshitshɛ l’ɔkɔngɔ wa dɔmbɛlɔ diawɔ, Ɛmɛnyi wa Jehowa wakaye le wɔ. Bible mɛnyaka dia andjelo wekɔ lo ndjasha lo mbewoya “lokumu l’ɔlɔlɔ” lo nkɛtɛ k’otondo. (Adia Ɛnyɛlɔ 14:6.) Ndo nto, efula ka l’atei aso tambɔlɔmbaka Jehowa lo dikambo dimɔtshi shikaa kana ohomba ɔmɔtshi ndo oma laasɔ, takalongola ekimanyielo kahombama oma le ɔnangɛso kana kadiyɛso k’Okristo.—Tokedi 12:25; Jakɔba 2:16.

18. Ngande wakamba Jehowa la nyuma kande k’ekila ndo la Bible dia nkadimola alɔmbɛlɔ aso?

 ¹⁸ Jehowa kambaka nto la nyuma kande k’ekila dia nkadimola lo alɔmbɛlɔ aso. Etena kalɔmbaso ekimanyielo ka ndɔshana la dikambo dimɔtshi, nde mbeyaka nkamba la nyuma kande k’ekila dia tosha ɛlɔmbwɛlɔ ndo wolo. (2 Kɔrɛtɔ 4:7) Jehowa kambaka nto la Bible dia nkadimola lo alɔmbɛlɔ aso ndo dia tokimanyiya dia sho mbɔsa tɛdikɔ ta lomba. Etena kadiaso Bible, sho mbeyaka ntana avɛsa wakoka tokimanyiya. Jehowa koka nto ntshutshuya onto ɔmɔtshi lasha kɔmatɛrɛ lo nsanganya dia nde mbuta kɛnɛ keso l’ohomba dia mboka kana ekumanyi kɛmɔtshi ka l’etshumanelo dia nkɛtshanya la so dui dimɔtshi di’oma lo Bible.—Ngalatiya 6:1.

19. Lande na kakoka mɛnama dia Jehowa hakadimola lo alɔmbɛlɔ aso?

¹⁹ Mbala mɔtshi, sho mbeyaka ndjambola ɔnɛ: ‘Lande na kahakadimola Jehowa lo alɔmbɛlɔ ami?’ Eya dia nde mbeyaka etena ndo woho wakokande nkadimola lo alɔmbɛlɔ aso. Eya dia nde mbeyaka kɛnɛ keso la tɔ ohomba. Sho mbeyaka ntetemala nɔmba lo etena kɛmɔtshi dia mɛnya dia kɛnɛ kawotɛso kekɔ ohomba le so ndo dia mbowɛnya dia tekɔ mɛtɛ la mbetawɔ le nde. (Luka 11:5-10) Tena dimɔtshi Jehowa kadimolaka lo alɔmbɛlɔ aso lo yoho yahatalongamɛ. Ɛnyɛlɔ, sho koka nɔmba dikambo di’okakatanu ɔmɔtshi, koko lo dihole dia tonyɛ okakatanu akɔ, nde mbeyaka tosha wolo wa mbikikɛ.—Adia Filipɛ 4:13.

20. Lande na kahombaso nɔmbaka Jehowa mbala la mbala?

²⁰ Ande diɛsɛ dia diambo diele la so dia nɔmbaka Jehowa lee! Sho koka monga l’eshikikelo dia nde ayotohokamɛ. (Osambo 145:18) Ndo lo yɛdikɔ yayotolekaka nɔmba Jehowa mbala la mbala oma k’ɛse otema mbayoleka lɔngɛnyi lele lam’asaso la nde monga nge.