Ɛsɔ tokalole ɛnɔnyi ɛmɔtshi l’ɔkɔngɔ. Nɛhɛmiya, okambi wa nkumekanga Aratashasha aki ose Isariyɛlɛ lakadjasɛka la Shushana osomba ɔmɔtshi wa la Pɛrɛsiya. Ɔnango Nɛhɛmiya akaye oma la Juda la losango la kɔlɔ l’ɔnɛ: ‘Anto wakakalola la Jɛrusalɛma bu lo ekokelo. Mpele di’osomba ndo asoko wakatola ase Babilɔna atalɔngɔsɔma.’ Nɛhɛmiya akakiyana efula. Nde akalange ntshɔ otsha la Jɛrusalɛma dia towakimanyiya, ɔnkɔnɛ nde akalɔmbɛ dia nkumekanga mbokimɔ dia nde ntshɔ.

L’ɔkɔngɔ diko, nkumekanga akɛnyi dia Nɛhɛmiya aya la lonyangu. Nde akate ate: ‘Latakɛnaka nganɛ ndooko lushi. Ambotomba?’ Nɛhɛmiya akate ate: ‘Lande na kahamonge la lonyangu etena kele Jɛrusalɛma osomba ami wambolanyema?’ Nkumekanga akawombola ate: ‘Alangayɛ dimi kosalɛ?’ Mbala kakɔ ɔtɔi, Nɛhɛmiya akalɔmbɛ l’otema. Ko nde akate ate: ‘Lam’alangayɛ, ontshike ntshu la Jɛrusalɛma dia tohika nto mpele diayɔ.’ Nkumekanga Aratashasha akatɛ Nɛhɛmiya dia nde kokaka ntshɔ ndo nkumekanga akayashikikɛ dia ndooko waale wayowokomɛ lo lɔkɛndɔ lande l’otale. Nde aketɛ nto Nɛhɛmiya nguvɛrnɛrɛ ka Juda ndo akawosha esongo dia nsala nkuke y’osomba.

Etena kakakome Nɛhɛmiya la Jɛrusalɛma, nde akasɛdingola mpele di’osomba. Oma laasɔ, nde akatshumanya ɛlɔmbɛdi ndo emboledi ko akawatɛ ate: ‘Ɔnɛ ekɔ dui dia kɔlɔ efula. Sho pombaka monga suke dia nkamba olimu.’ Anto waketawɔ ndo wakatatɛ nyomoka nto mpele.

Koko atunyi amɔtshi w’ase Isariyɛlɛ wakawaɔlaka ndo wakate vate: ‘Ɔkɛngɛ kokaka nyukola ehele kakanyu.’ Ambiki kombidja yimba lo ntɛngɔ y’atunyi awɔ ndo wakatetemala la olimu wa wokelo. Ehele kakatatetemalaka mbidɛ ndo monga wolo.

Atunyi wakɔshi yɛdikɔ ya ndja oma lo bɛkɛ diotshikitanyi ndo ndjɔlɔsha Jɛrusalɛma la shashimoya. Etena kakoke ase Juda sheke yawɔ, vɔ wakoke wɔma. Koko Nɛhɛmiya akate ate: ‘Tanyokake wɔma. Jehowa ekɔ kaamɛ la  so.’ Nde akakitsha alami dia nkokɛ ambiki ndo atunyi kokoka mbalɔsha.

L’edja ka nshi 52, mpele ndo nkuke yakashile. Nɛhɛmiya akela ase Lɛwi tshɛ la Jɛrusalɛma dia ndjosala osapwelo. Nde akaakongɛ lo elui ehende w’amembi. Vɔ wakatshu lo ehele lo mbidɛ lo kibandola lo soko di’Ɛtɛkɔ ndo oma laasɔ vɔ wakatshu otsha lo bɛkɛ diotshikitanyi ninga osomba. Vɔ wakatadaka amama, nsɛmbalɛ watahome nsɛsɛ ndo watembɛ Jehowa. Ɛzɛra akatshu la olui ɔmɔtshi ndo Nɛhɛmiya akatshu la olui okina polo lam’akawakome lo tɛmpɛlɔ. Anto tshɛ, apami, wamato ndo ana wakalambola Jehowa elambo ndo wakasale fɛtɛ. Londjo l’ɔngɛngɔngɛnɔ awɔ lakakoke mbokɛma etale efula.