L’otsho ɔmɔtshi, nkumekanga Nɛbukadinɛza akɛnyi dɔ dia diambo efula. Dɔ diakɔ diakokiyanya efula woho wakinde kokoka ndala. Nde akelɛ anto ande wakasalaka awui wa maji ndo akawatɛ ate: ‘Nyonembetshiya dɔ nɛ.’ Vɔ wakawotɛ vate: ‘Nkumekanga le, ototɛ dɔ diakɔ.’ Koko Nɛbukadinɛza akawatɛ ate: ‘Ndooko! Nyombute kɛnɛ kakamɛnyi, naka bu, kete layonyodiaka.’ Wakawotɛ nto vate: ‘Otote kɛnɛ kakayɛnyi ko oma laasɔ tayokolembetshiya tɔ.’ Nde akate ate: ‘Nyu tshɛ nyekɔ lo nanga kesami. Nyombute kɛnɛ kakamɛnyi!’ Vɔ wakatɛ nkumekanga vate: ‘Ndooko onto lasɛna lakoka nsala dui sɔ. Kɛnɛ kalɔmbayɛ kɛsɔ hakoke salema.’

Nɛbukadinɛza aki la nkɛlɛ k’efula ndo akadjanga di’apami tshɛ wa lomba wa lo wodja ndjakema. L’atei awɔ mbaki ndo Danyɛlɛ, Shadrakɛ, Meshakɛ ndo Abɛdɛ-Nɛngɔ. Danyɛlɛ akalɔmbɛ nkumekanga dia mbosha yema y’etena. Oma laasɔ, nde l’angɛnyi ande wakalɔmbɛ Jehowa dia mbakimanyiya. Kakɔna kakasale Jehowa?

Lo ɛnɛlɔ kɛmɔtshi, Jehowa akɛnya Danyɛlɛ dɔ diaki Nɛbukadinɛza ndo Danyɛlɛ akawolembetshiyadiɔ. La wedi a pindju, Danyɛlɛ akatshu le okambi wa nkumekanga ndo akawotɛ ate: ‘Todiakake kaanga pami ɔtɔi ka lomba. Dimi koka nembetshiya dɔ dia nkumekanga.’ Okambi akatɔlɛ Danyɛlɛ otsha le Nɛbukadinɛza. Danyɛlɛ akatɛ nkumekanga ate: ‘Nzambi akakɛnya akambo wa lo nshi yayaye. Dɔ diakayɛnyi diɔ nɛ: Wɛ akɛnyi lohingu la woke lele la ɔtɛ wa paonyi, ntolo kalɔ ndo anya alɔ la mfɛsa, dikundju dialɔ ndo pɛlɔhɛlɔ dialɔ la nkonga, ekolo alɔ la lowolo, akaka alɔ waki yema lowolo ndo yema diwomba. Oma laasɔ, dive dimɔtshi diakahanɔ oma lo dikona ko diakakɔmɔla akaka wa lohingu. Lohingu lakatɛtshatɛtshama efushi efushi ndo lakɛmbama la lɔpɛpɛ. Dive diakɔ diakonge dikona dia woke ndo diɔ diakalole nkɛtɛ k’otondo.’

 Oma laasɔ, Danyɛlɛ akate ate: ‘Kitshimudi ya dɔ diayɛ yɔ nyɛ: Diolelo diayɛ diekɔ ɔtɛ wa paonyi. Mfɛsa ele diolelo diayoya l’ɔkɔngɔ ayɛ. Oma laasɔ diolelo diele oko nkonga diayoyala, diɔ diayɔlɔmbɔla nkɛtɛ k’otondo. Diolelo diayonga oma laasɔ diayonga wolo oko lowolo. L’ekomelo, diolelo dimɔtshi diayokahanyema diayoyala, tenyi dimɔtshi diayonga wolo oko lowolo ndo tenyi dikina diayonga wɔdu oko diwomba. Dive diayohanɔ oma lo dikona ekɔ Diolelo diaki Nzambi. Diɔ diayɔtɛtshatɛtsha waolelo tshɛ ndo diɔ diayotshikalaka pondjo pondjo.’

Nɛbukadinɛza akakɔ la nkɛtɛ la ntondo ka Danyɛlɛ ɔkɔlɛ elongi lo nkɛtɛ. Nde akate ate: ‘Nzambi kayɛ ambokosholɛ dɔ nɛ. Ndooko Nzambi kekina kele oko nde.’ Lo dihole dia ndjaka Danyɛlɛ, Nɛbukadinɛza akawetɛ owandji w’apami tshɛ wa lomba ndo omboledi wa prɔvɛnsɛ ka Babilɔna. Onde wɛ ambɛna woho wakakadimola Jehowa dɔmbɛlɔ diaki Danyɛlɛ?