Ɛnɔnyi ndekana 400 l’ɔkɔngɔ wa mpele dia Jɛrusalɛma mbikama nto, ɔlɔmbɛdi wakawelɛka Zɛkariya nde la wadɛnde Elizabɛtɛ wakadjasɛka suke l’osomba. Vɔ wakatshukana l’edja k’ɛnɔnyi efula koko kombota. Lushi lɔmɔtshi etena kakatshumbaka Zɛkariya tshɔ lo tɛmpɛlɔ, ondjelo Ngabriyɛlɛ akɛnama le nde. Zɛkariya akoke wɔma, koko Ngabriyɛlɛ akawotɛ ate: ‘Tokake wɔma. Lambokela losango l’ɔlɔlɔ l’oma le Jehowa. Wadɛyɛ Elizabɛtɛ ayota ɔna pami ndo lokombo lande ayonga Joani. Jehowa ambɔsɔna Joani dia nkamba olimu wa laande.’ Zɛkariya akambola ate: ‘Ngande wakokami mbetawɔ kɛnɛ katayɛ? Dimi la wadɛmi taya esombe efula dia mbota.’ Ngabriyɛlɛ akate ate: ‘Dimi lakatomami oma le Nzambi dia ndjokewoya losango lɔnɛ. Koko lam’ele wɛ hetawɔ kɛnɛ katami, wɛ ayonga lomi polo l’ɔkɔngɔ w’ɔna mbotɔ.’

Zɛkariya akatshikala edja efula lo tɛmpɛlɔ otshikitanyi la mbala nkina. Ɔnkɔnɛ lam’akandayotombaka, anto wakakongaka l’andja dia mbeya kɛnɛ kambotomba. Zɛkariya kokoka ntɛkɛta. Nde akakokaka tsho nsala tɔjɛstɛ l’anya ande. Ko anto wakashihodia dia Zɛkariya akalongola losango l’oma le Nzambi.

L’edjedja ka wonya, Elizabɛtɛ akayotshɔ diemi ndo nde akote ɔna pami oko wakate ondjelo. Angɛnyi ndo ewotɔ ande wakaye ndjenda ɔna. Vɔ waki l’ɔngɛnɔngɛnɔ efula lo dikambo diande. Elizabɛtɛ akate ate: ‘Lokombo lande Joani.’ Vɔ wakate vate: ‘Ndooko onto lo nkumbo kayɛ lelamɛ Joani. Ɔlɛnde Zɛkariya lokombo la she.’ Koko Zɛkariya akafunde ɛtɛkɛta ɛnɛ ate: ‘Lokombo lande Joani.’ L’etena kɛsɔ, Zɛkariya akakoke ntɛkɛta nto! Losango lendana l’ɔna ɔsɔ lakadiangana la Judeya y’otondo ndo anto wakambolaka ɔnɛ: ‘Ngande wayonga ɔna ɔsɔ lam’ayondola?’

 Ko Zɛkariya akalodiama la nyuma k’ekila. Nde akate ate: ‘Jehowa atombɔme. Nde akalake Abrahama dia Nde ayotoma ombitshi, Mɛsiya dia ndjotoshimbɛ. Joani ayonga omvutshi ndo nde ayɔlɔngɔsɔlɛ Mɛsiya mboka.’

Dui dimɔtshi dia laande diakakomɛ nto Mariya w’owotɔ w’Elizabɛtɛ. Tayɛna dui sɔ lo tshapita yayela.