Yeso komonga tsho la wolo wa nkɔnɔla ase hemɔ ndo mbolola edo, nde aki nto la wolo wa mbahemɛ lɔpɛpɛ ndo mvula. L‘ɔkɔngɔ wa nde nɔmba lo dikona, Yeso akende l’ɛse otsha lo Ndjale ka Ngalileya ndo akɛnyi lɔpɛpɛ la wolo lapɛpa. Apɔstɔlɔ ande waki lo waato awɔ walɔshana la lɔpɛpɛ lakapɛpaka. Yeso akaholɔ ndo akatatɛ nkɛndakɛnda laadiko di’ashi otsha lo waato awɔ. Etena kakɛnyi apɔstɔlɔ onto ɔmɔtshi ayakɛndakɛnda laadiko di’ashi, vɔ wakandama la wɔma. Koko Yeso akawatɛ ate: ‘Dimi. Tanyokake wɔma.’

Petero akate ate: ‘Nkumadiɔndjɔ, naka mɛtɛ wɛ, djanga dia dimi ndja le yɛ.’ Yeso akatɛ Petero ate: ‘Yaka.’ Ɔnkɔnɛ l’atei wa lɔpɛpɛ la wolo, Petero akamɔ oma lo waato ko akakɛndakɛnda laadiko di’ashi otsha le Yeso. Koko lam’akandakome suke la Yeso, Petero akende lɔpɛpɛ ko akoke wɔma. Nde akatatɛ dinda. Petero akate la dui dia wolo ate: ‘Nkumadiɔndjɔ, onshimbee!’ Yeso akokimɛ lo lonya ndo akate ate: ‘Lande na kamboyotatɛ mbidja taamu? Lende ele mbetawɔ kayɛ?’

Yeso nde la Petero wakɔtɔ lo waato, ko mbala kakɔ ɔtɔi lɔpɛpɛ lakɔlama. Onde wɛ koka nkanyiya woho wakayaoke apɔstɔlɔ? Vɔ wakate vate: “Wɛ mɛtɛ ekɔ Ɔna Nzambi.”

Aha etena kɛsɔ keto mbaki Yeso l’akoka wa mbahemɛ lɔpɛpɛ. Etena kekina, lam’akatatehɔka Yeso l’apɔstɔlɔ ande otsha lo wedi okina wa ndjale, Yeso akalale l’ɔkɔngɔ wa waato. Etena kakinde lo djɔ, lɔpɛpɛ la wolo lakaye. Asuku w’ashi wakakɔmɔlaka lo waato ndo ashi wakalole lɔkɔ. Apɔstɔlɔ wakemula Yeso, wata la dui dia wolo vate: ‘Ombetsha, tayanga la mvɔ! Otokimanyiya!’ Yeso akemɔ ndo akatɛ ndjale ate: “Lɛmbɔhala!” Mbala kakɔ ɔtɔi, lɔpɛpɛ ndo ndjale wakɔlama. Yeso akambola apɔstɔlɔ ate: ‘Lende ele mbetawɔ kanyu?’ Vɔ wakatanɛ lam’asawɔ ɔnɛ: “Ndo lɔpɛpɛ ndo ndjale mbokitanyiyaka!” Apɔstɔlɔ wakeye dia naka vɔ ndjaɛkɛ tshɛ le Yeso, kete vɔ bu l’ohomba wa mboka ndooko ɛngɔ wɔma.