La ntondo ka fɛtɛ k’Elekanelo ka l’ɔnɔnyi wa 32 T.D., apɔstɔlɔ wakakalola oma lɛnɛ akawatshu tosambisha. Vɔ wakalɛmbɛ ko Yeso akatshu la wɔ lo waato la Bɛtɛsayida lɛnɛ akawakoke tomuya. Koko la ntondo ka waato nkoma suke l’omamu, Yeso akɛnyi dia nunu di’anto wakaayele lɛkɔ. Kaanga mbele Yeso akalange monga nde la apɔstɔlɔ ande ato dia momuya, nde akalongola anto asɔ la ngandji tshɛ. Nde akakɔnɔla wanɛ waki la hemɔ ndo akatatɛ mbowaetsha. Lushi l’otondo, Yeso akawaetsha awui wendana la Diolelo dia Nzambi. Lam’akakoke dikɔlɔ, apɔstɔlɔ ande wakaye le nde ndo wakawotɛ vate: ‘Anto anɛ wekɔ la ndjala. Tshikawɔ watshu dia toyanga yangɔ ya ndɛ.’

Yeso akate ate: ‘Hawohombe ntshɔ. Nyowasha yangɔ ya ndɛ lanɛ.’ Apɔstɔlɔ wakawombola vate: ‘Onde wɛ nangaka sho ntshɔ ndo tosomba mbo ya ndɛ dikambo diawɔ?’ Filipɛ, ɔpɔstɔlɔ ande ɔmɔtshi akate ate: ‘Oyadi sho kongaka la falanga efula, hatotokoka nsomba mbo ya ndɛ yayokoka le olui w’anto ɔnɛ.’

Yeso akambola ate: ‘Mbo ya ndɛ yakɔna yele la so?’ Andɛlɛ akate ate: ‘Tekɔ la mapa etanu la tosese tohende. Diangɔ sɔ hokoka le wɔ.’ Yeso akate ate: ‘Nyombela mapa la nse yakɔ.’ Nde akatɛ anto dia vɔ mbidjasɛ l’adiyo l’elui w’anto 50 ndo 100. Yeso akɔshi mapa la nse, akaalɛ l’olongo ndo akalɔmbɛ. Oma laasɔ nde akasha apɔstɔlɔ mbo ya ndɛ yakɔ ko vɔ wakayikahɛ anto. Apami 5 000 mbidja ndo wamato la ana wakale ndo wakalote. L’ɔkɔngɔ diko,  apɔstɔlɔ wakatɔngɔna kɛnɛ kakatshikala di’aha ndooko ɛngɔ ndana. Aki asaka 12 tɔɔ! Ɔsɔ aki dihindo dia diambo, nshi mɛtɛ?

Anto wakaambe efula diakɔ diakawalange mbetɛ Yeso nkumekanga kawɔ. Koko Yeso akeye dia etena ka Jehowa katakoke dia nde monga nkumekanga. Ɔnkɔnɛ, nde akakɛndja elui w’anto ndo akatɛ apɔstɔlɔ ande dia vɔ ntehɔ lo wedi okina wa Ndjale ka Ngalileya. Vɔ wakɔtɔ lo waato awɔ ndo Yeso akadɛ lo dikona ndamɛ. Lande na? Nɛ dia nde aki l’ohomba wa etena ka nɔmba She. Oyadi wesanu waki la nde, Yeso akayatshungolɛka mbala tshɛ etena dia nɔmba.