Yeso aki l’angɛnyi asato wa ma ma wakadjasɛka la Bɛtaniya. Aki Lazaro la akadiyɛnde ahende, Mariya la Maata. Lushi lɔmɔtshi, etena kaki Yeso lo wedi okina wa Jɔrdana, Mariya la Maata wakotomɛ losango la wanyandja ɔnɛ: ‘Lazaro ekɔ la hemɔ efula. Lam’alangayɛ yaka yema esadi!’ Koko Yeso kotshɔ mbala kakɔ ɔtɔi. Nde akakonge nshi nkina hiende ko akatɛ ambeki ande ate: ‘Nyoyete totshu la Bɛtaniya. Lazaro ekɔ lo djɔ ndo layanga towemula.’ Apɔstɔlɔ wakate vate: ‘Naka Lazaro ekɔ lo djɔ, nde ayemɔ.’ Ɔnkɔnɛ Yeso akawatɛ hwe ate: ‘Lazaro ambovɔ.’

Lam’akakome Yeso la Bɛtaniya, ko Lazaro ambokundɛma nshi nyɛi. Elui w’anto wakaye ndjosamba Maata la Mariya. Lam’akoke Maata dia Yeso amboya, nde akalawɔ dia tohomana la nde. Nde akate ate: “Nkumadiɔndjɔ, otondonga wɛ aki lanɛ, tshike ɔnalengo havwe.” Yeso akawotɛ ate: ‘Ɔnanyɔ ayɔsɛna nto. Onde wɛ mbetawɔka dui sɔ Maata?’ Maata akate ate: ‘Dimi mbetawɔka dia nde ayolɔ lo eolwelo.’ Yeso akawotɛ ate: “Dimi lekɔ eolwelo ndo lɔsɛnɔ.”

Ko Maata akatshu le Mariya ko nde akatowotɛ ate: ‘Yeso amboya.’ Mariya akalawɔ otsha le Yeso ndo olui w’anto wakoyele. Nde akakusama l’ekolo ande ndo nde kotshika ndela. Mariya akate ate: ‘Nkumadiɔndjɔ, otondonga wɛ aki lanɛ, ɔnangɛso ototetemala la nsɛna!’ Yeso akɛnyi lɔkɔnyɔ laki la nde, ko nde lawɔ akatatɛ ndela. Lam’akɛnyi olui w’anto nde alela vɔ wakate vate: ‘Ohonyenda woho wakalangaka Yeso Lazaro.’ Koko amɔtshi wakayambola vate: ‘Lande na kahandashimbe ɔngɛnyi ande?’ Kakɔna kakahombe Yeso nsala oma laasɔ?

Yeso akatshu lo diombo, lɛnɛ akawakitsha dive dia woke lo soko. Nde akadjanga ate: ‘Nyonya dive ndo.’ Maata akate ate: ‘Aya nshi nyɛi yamondokundɛma! Nde aya nsolo.’ Koko, vɔ wakanya dive ndo Yeso akalɔmbɛ ate: ‘Papa, losaka lo woho wa mpokamɛyɛ. Dimi mbeyaka dia wɛ atompokamɛka tena tshɛ, koko lambɔtɛkɛta la dui dia wolo di’anto anɛ mbeya dia wɛ  mbakantome.’ Ko nde akelɛ la dui dia wolo ate: “Lazaro, tomba!” Dui dia diambo nɛ diakasalema: Lazaro akatombe oma lo diombo ɔmbami l’ahɔndɔ wa linɛnɛ. Yeso akate ate: “Nyowɔmbɔlɛ ndo nyootshike atshu.”

Anto efula wakɛnyi dui sɔ, waki la mbetawɔ le Yeso. Koko amɔtshi wakatshu ndo wakatotɛ Afarisɛ. Ntatɛ lushi lɔsɔ, Afarisɛ wakayange dia ndjaka ndo Lazaro ndo Yeso. Judasɛ Iskariyɔtɛ, ɔmɔtshi wa l’atei w’apɔstɔlɔ 12, akatshu lo woshɛshɛ le Afarisɛ ndo akatowambola ate: ‘Falanga ngana yayonyombisha naka dimi nyokimanyiya dia nyu minda Yeso?’ Vɔ waketawɔ mbosha ekenga wa mfɛsa 30, ko Judasɛ akatatɛ nyanga diaaso dia nkimɔ Yeso le Afarisɛ.