Yeso akaye la nkɛtɛ dia ndjewoya lokumu l’ɔlɔlɔ la Diolelo diaki Nzambi. Dia mɛnya kɛnɛ kayosala Yeso lam’ayondonga Nkumekanga, Jehowa akawosha nyuma k’ekila dia nde nsala ahindo. Nde akakokaka nkɔnɔla hemɔ tshɛ. Dihole tshɛ diakandatshɔka, anto waki la hemɔ wakayaka le nde dia ndjoyanga ekimanyielo ndo nde akaakɔnɔlaka vɔ tshɛ. Akanga wa totshungu wakakokaka mɛna, akanga wa mpoke wakakokaka mboka, akanga wa dikuse wakakokaka nkɛndakɛnda ndo wanɛ wakahɛnyahɛnyamaka la ɛdiɛngɛ wakatshungɔ oma le ɛdiɛngɛ. Vɔ wakakokaka nkɔnɔ kaanga lo nkimɛ tsho ohembo wa dihɔndɔ diande. Anto wakayelaka Yeso l’ahole tshɛ wakandatshɔka. Kaanga etena kakandalangaka dia momuya yema lo monga ndamɛ, ndooko lushi lakatshanya Yeso anto wakayaka le nde.

Mbala kɛmɔtshi, anto wakaye la pami kɛmɔtshi kaki ekuse lo luudu laaki Yeso. Koko anto wakalole lo luudu, diakɔ diele vɔ kokoka mbɔtɔ. Ɔnkɔnɛ vɔ wakaate nsambe ka luudu ko wakaholoya pami kɛsɔ le Yeso. Ko Yeso akatɛ pami kɛsɔ ate: ‘Onɛɛ ndo nkɛndakɛnda.’ Lam’akandasale dui sɔ, anto wakaambe.

Mbala kekina, lam’akatɔtɔka Yeso lo ngelo kɛmɔtshi, apami dikumi waki la sudi wakemala lo tshalola ndo wakate la dui dia wolo vate: ‘Yeso otokimanyiya!’ Lo nshi shɔ ase sudi kombetawɔmaka dia sukana l’anto akina. Yeso akawatɛ dia vɔ ntshɔ lo tɛmpɛlɔ lo ndjela kɛnɛ kakataka Ɛlɛmbɛ wa Jehowa dia kɛnɛ kakahombe  ase sudi nsala l’ɔkɔngɔ wa vɔ nkɔnɔ. Lo mboka, vɔ wakakɔnɔ. Lam’akɛnyi ose sudi ɔmɔtshi dia nde ambɔkɔnɔ, nde akakalola dia ndjosha Yeso losaka ndo ndjotombola Nzambi. Lo ase sudi asɔ dikumi, paka ɔtɔi ɔsɔ oto mbakasha Yeso losaka.

Womoto ɔmɔtshi laki la hemɔ ɛnɔnyi 12 takinde l’elongamelo dia nde ayɔkɔnɔ. Nde akaye l’ɔkɔngɔ wa Yeso l’atei w’olui w’anto ndo akananda ohembo wa dihɔndɔ diande dia laadiko. Mbala kakɔ ɔtɔi, nde akakɔnɔ. Lam’akasalema dui sɔ, Yeso akambola ate: “Ominandji?” Womoto ɔsɔ akoke wɔma, ko nde akasɛmɛ ndo akawotɛ kɛnɛ kaki mɛtɛ. Yeso akoosambe lo mbuta ɔnɛ: ‘Ɔna womoto, tshɔka lakayɛ la ki.’

Jayiro owandji ɔmɔtshi akasɛngasɛnga Yeso ate: ‘Yaka lo luudu lami! Ɔnami la womoto ekɔ la hemɔ efula.’ Koko la ntondo ka Yeso nkoma lo luudu la Jayiro, ɔna womoto ɔsɔ akavu. Lam’akakome Yeso, nde akatane dia anto efula wakaye dia ndjolela la nkumbo kɛsɔ. Yeso akawatɛ ate: ‘Nyotshike ndela; nde ekɔ lo djɔ.’ Ko nde akakimɛ lonya l’ɔna womoto ɔsɔ ndo akate ate: “Ɔna womoto, etɔ!” Ɔna womoto akɔ aketɔ mbala kakɔ ɔtɔi ndo Yeso akatɛ ambutshi ande dia mbosha yangɔ ya ndɛ. Ohokanyiya ɔlɔ wakoke ambutshi ande!