L’ɔkɔngɔ wa Yeso nsambisha l’edja kele oko ɔnɔnyi l’etenyi, nde akahombe mbɔsa yɛdikɔ y’ohomba efula. Waa na wakandahombe nsɔna dia nkamba sukesuke la nde? Waa na wakandahombe ndowanya dia nɔmbɔla etshumanelo k’Akristo? Dia mbɔsa tɛdikɔ tɔsɔ, Yeso aki l’ohomba wa ɛlɔmbwɛlɔ ka Jehowa. Ɔnkɔnɛ nde akatshu lo dikona lɛnɛ akandakoke monga ndamɛ ndo akalɔmbɛ otsho w’otondo. La pindju, Yeso akelɛ ambeki ande amɔtshi ndo akasɔnɛ apɔstɔlɔ ande 12. Naa nkombo yawɔ yeyayɛ? Nkombo yawɔ yɔ nyɛ: Petero, Andɛlɛ, Jakɔba, Joani, Filipɛ, Bartɛlɛmi, Tɔma, Mateo, Jakɔba ɔna Alafayo, Tadɛyo, Simɔna ndo Judasɛ Iskariyɔtɛ.

Apɔstɔlɔ dikumi l’ahende wakahombe tetetaka la nde. L’ɔkɔngɔ wa nde mbalowanya, nde akaatome dia vɔamɛ tosambisha. Jehowa akawasha wolo wa ntondja ɛdiɛngɛ ndo wa nkɔnɔla anto waki la hemɔ.

Yeso akelɛka apɔstɔlɔ dikumi l’ahende asɔ angɛnyi ande ndo akayaɛkɛka le wɔ. Afarisɛ wakɔsaka dia apɔstɔlɔ kɔmbɔtɔ kalasa  ndo waki anto k’anto. Koko Yeso akawasha olowanyelo wendana l’olimu awɔ. Vɔ wakahombe monga kaamɛ la Yeso lo tena diakaleke ohomba lo lɔsɛnɔ lande, ɛnyɛlɔ la ntondo ka nyɔi kande ndo l’ɔkɔngɔ wa eolwelo kande. Oko waki Yeso, efula ka l’atei w’apɔstɔlɔ dikumi l’ahende asɔ waki ase Ngalileya. Amɔtshi l’atei awɔ waki la wadi.

Apɔstɔlɔ waki anto wele bu kokele wakasalaka munga. Tena dimɔtshi vɔ wakatɛkɛtaka la ntondo ka nkana yimba ndo wakɔsaka tɛdikɔ ta kɔlɔ. Tena dimɔtshi vɔ kɔkɛnɛmɔla solo dia lotutsha. Vɔ wakakome polo ndo lo mana lam’asawɔ dia mbeya ɔnɛ lakaleke woke. Koko vɔ waki anto w’ɔlɔlɔ wakokaka Jehowa ngandji. Vɔ mbakahombe monga etshina k’etshumanelo k’Akristo l’ɔkɔngɔ wa Yeso.