Lam’aki Yeso nde l’apɔstɔlɔ ande lo luudu la la diko, nde akawatɛ ate: ‘Nyu tshɛ nyayotshika l’otsho ɔnɛ.’ Petero akate ate: ‘Aha dimi! Oyadi kaanga anto akina tshɛ kokotshikaka, dimi hakotshikaki pondjo.’ Koko Yeso akatɛ Petero ate: ‘La ntondo ka nkɔkɔ mbeka, wɛ ayota mbala shato dia wɛ hambeye.’

Lam’akatɔlɛ asɔlayi Yeso laka Kayifasi, efula k’apɔstɔlɔ ande wakalawɔ. Koko ahende l’atei awɔ wakayayelaka olui w’anto. Petero aki ɔmɔtshi l’atei awɔ. Nde akɔtɔ lo sɛkɛ dia luudu la Kayifasi ndo akokaka dja. L’osase, okambi ɔmɔtshi wa womoto akɛnyi elungi ka Petero ndo akate ate: ‘Dimi keyaka! Wɛ aki kaamɛ la Yeso!’

Petero akate ate: ‘Ndooko, aha dimi! Haloke kɛnɛ katayɛ kɛsɔ!’ Petero akatshu otsha la soko. Koko kem’edja okambi okina wa womoto akawɛnyi ndo akatɛ olui w’anto ate: ‘Pami kɛnɛ aki kaamɛ la Yeso!’ Petero akate ate: ‘Dimi haleye kaanga mbeya Yeso!’ Pami kɛmɔtshi akate ate: ‘Wɛ ekɔ ɔmɔtshi l’atei awɔ! Ɔtɛkɛta ayɛ mɛnyaka dia wɛ ekɔ ose Ngalileya oko Yeso.’ Koko Petero akatshimbe ate: ‘Dimi haloweye!’

L’etena kɛsɔ, nkɔkɔ akeke. Petero akɛnyi Yeso akadimɔ ndo awenda. Nde akohɔ ɛtɛkɛta wa Yeso ndo akatombe l’andja ndo akalele efula.

L’etena kakɔ, ase Tominadi wakokana dia mbidja Yeso lo lokanu lo luudu la Kayifasi. Vɔ wakashile mbɔsa yɛdikɔ ya ndjaka Yeso ndo kakianɛ woyanga ɔkɔkɔ wa mbodiaka. Koko vɔ kokoka ntana ndooko dui dia kɔlɔ dia mbofunda. L’ekomelo, Kayifasi akambola Yeso mbala kakɔ ɔtɔi ate: ‘Onde wɛ ekɔ Ɔna Nzambi?’ Yeso akate ate: ‘Eelo.’ Kayifasi akate ate: ‘Sho bu ndooko l’ohomba wa djembetelo nkina. Nde ambɔtɛnga Nzambi!’ Ase tominadi waketawɔ vate: ‘Pami kɛnɛ pombaka mvɔ.’ Vɔ wakakɔmɔla Yeso,  wakawotɛ nsɔyi, wakodihe washo ndo wakɔkɔmɔla wata vate: ‘Naka wɛ ekɔ omvutshi, otote onto lokɔkɔmɔdi!’

Lam’akahotɔ wonya, vɔ wakatshu la Yeso lo luudu l’ase Tominadi ndo wakawombola nto vate: ‘Onde wɛ ekɔ Ɔna Nzambi?’ Yeso akakadimola ate: ‘Kam’atanyu asɔ mbediɔ.’ Ko vɔ wakofunde ɔnɛ ambɔtɛnga Nzambi ko wakatshu la nde lo luudu la lowandji la Pɔsɔ Pilato, Nguvɛrnɛrɛ k’ose Rɔmɔ. Kakɔna kakatombe oma laasɔ? Ɛsɔ tende.