Nshi dikumi l’ɔkɔngɔ wa Yeso nkalola l’olongo, ambeki ande wakalongola nyuma k’ekila. Aki lo Pɛntɛkɔsta ka lo 33 T.D., ndo anto wakaye oma l’ahole efula oya la Jɛrusalɛma dia ndjosala fɛtɛ. Ambeki oko 120 waki Yeso wakasangana lo luudu la la diko. La shashimoya, dikambo dimɔtshi dia diambo diakatombe. Yangɔ mɔtshi yele oko loombe la dja yakɛnama laadiko di’ɔtɛ w’ombeki tshɛ, ko vɔ wakatatɛ ntɛkɛta lo ɛtɛkɛta wotshikitanyi. Londjo la wolo lele oko la lɔpɛpɛ la wolo lakalole lo luudu.

Angɛndangɛnda wakaye oma lo wedja ekina oya la Jɛrusalɛma wakoke londjo lakɔ ndo wakalawɔ otsha lo luudu lakɔ dia tenda kɛnɛ kambotomba. Vɔ wakaambe etena kakawoke ambeki watɛkɛta ɛtɛkɛta ɛsɔ. Vɔ wakate vate: ‘Anto anɛ shi ase Ngalileya kewɔ? Ko ngande wowɔtɛkɛta ɛtɛkɛta aso?’

Ko Petero ndo apɔstɔlɔ akina wakemala la ntondo k’olui w’anto. Petero akatɛ anto woho wakadiakema Yeso ndo ɔnɛ  Jehowa akawolola oma lo nyɔi. Petero akate ate: ‘Wonya ɔnɛ Yeso ekɔ l’olongo lo lonya l’omi la Nzambi ndo nde ambototshulwɛ nyuma k’ekila kakandatolake. Diakɔ diɛnanyu ndo diokanyu ahindo anɛ.’

Anto wakanandema efula l’ɛtɛkɛta wa Petero ɛsɔ, ndo wakawombola vate: “Ko ahombaso nsala na?” Nde akawatɛ ate: ‘Nyoyatshumoya oma lo pɛkato yanyu ndo nyobatizame lo lokombo la Yeso. Nyayolongola ndo nyu lawɔ woshasha wa nyuma k’ekila.’ Ko lushi lɔsɔ, anto oko 3 000 wakabatizama. Oma laasɔ, ambeki wakatatɛ mpama la Jɛrusalɛma esadi esadi. L’ekimanyielo ka nyuma k’ekila, apɔstɔlɔ wakakenge tshumanelo efula dia vɔ mbetsha ambeki akambo tshɛ wakawadjangɛ Yeso.