Lam’aki ɔpɔstɔlɔ Joani lo lokanu lo disɛnga dia Patɛmɔsɛ, Yeso akawɛnya waɛnɛlɔ, kana esato 16 w’akambo wa lo nshi yayaye. Waɛnɛlɔ ɛsɔ wakɛnya woho wayokidiama lokombo la Jehowa, woho wayoya Diolelo diande ndo woho wayosalema lolango lande la nkɛtɛ oko l’olongo.

Lo ɛnɛlɔ kɛmɔtshi, Joani akɛnyi Jehowa lo kiti kande ka lowandji ka lotombo l’olongo, odingami la dikumanyi 24 diakalɔtɛ ahɔndɔ wa wɛma ndo alɛmbɔ wa nkoso wa paonyi l’ɛtɛ awɔ. Angadimu ndo akungola wakatombaka oma lo kiti kakɔ ka lowandji. Dikumanyi 24 diakakusama la ntondo ka Jehowa ndo wakɔtɛmɔla. Lo ɛnɛlɔ kekina, Joani akɛnyi olui a woke w’anto w’oma lo wedja tshɛ, weho w’anto tshɛ ndo ɛtɛkɛta tshɛ watɛmɔla Jehowa. Ɔna Ɔkɔkɔ, lele Yeso awalama ndo awalɔmbɔla otsha lo ashi wa lɔsɛnɔ. Oma laasɔ, lo ɛnɛlɔ kekina, Yeso ambotatɛ nɔmbɔla oko Nkumekanga l’olongo, kaamɛ la dikumanyi 24. Lo ɛnɛlɔ kayela, Joani akɛnyi Yeso alɔsha dragɔ lele Satana, ndo ɛdiɛngɛ ande. Yeso ambowatshanya oma l’olongo oya la nkɛtɛ.

 Oma laasɔ Joani akɛnyi osato wa dimɛna efula w’Ɔna Ɔkɔkɔ nde la anto 144 000 wemadi lo Dikona dia Siɔna. Nde akɛnyi nto ondjelo ɔmɔtshi atafumbɔ lo nkɛtɛ k’otondo, atatɛ anto dia vɔ mboka Nzambi wɔma ndo mbotombola.

Lo ɛnɛlɔ kekina, ta dia Aramangɛdɔna diambɔlɔma. Lo ta sɔ, Yeso l’alembe ande wambɔlɛndja dikongɛ dia Satana dia kɔlɔ. Lo ɛnɛlɔ k’ekomelo, Joani akɛnyi diɔtɔnganelo dia kokele lam’asa olongo la nkɛtɛ. Satana la kanula yande wambolanyema pondjo. Anto tshɛ wele l’olongo ndo wa la nkɛtɛ wɔsa lokombo la Jehowa oko ekila ndo wowɔtɛmɔla paka ndamɛ.