La Filipɛ mbaki okambi ɔmɔtshi wa womoto waki l’ɔdiɛngɛ lo demba diande. Ɔdiɛngɛ akɔ akakambaka la ɔna womoto akɔ dia nde mbutaka akambo wahataye ndo nde akakondjɛka akumɛnde falanga efula lo yoho shɔ. Etena kakaye Pɔɔlɔ la Silasɛ la Filipɛ, ɔna womoto akɔ akatawayelaka l’edja ka nshi efula. Ɔdiɛngɛ ɔsɔ akokonyaka dia nde mpangɔhangɔ ate: “Apami anɛ wekɔ ekambi wa Nzambi Kaheme-Tshɛ.” L’ekomelo, Pɔɔlɔ akatɛ ɔdiɛngɛ akɔ ate: ‘Lo lokombo la Yeso Kristo, tomba oma le nde!’ Ɔdiɛngɛ akɔ akatombe oma le ɔna womoto akɔ.

Etena kakeye akumɛnde dia nde hayowakondjɛ falanga nto, vɔ wakomala efula. Vɔ wakande Pɔɔlɔ nde la Silasɛ ko wakaatɔlɛ le toshushi, wata vate: ‘Apami anɛ wekɔ lo mɔnyɔla ɛlɛmbɛ ndo wekɔ lo mbidja osomba w’otondo lo lofunge!’ Toshushi wakadjanga dia Pɔɔlɔ la Silasɛ kɔmama ndo mbidjama lo lokanu. Olami wa lokanu, akawadje lo lokanu lakaleke l’ɛse ndo wodjima efula ndo akawadje lo lowete.

Etena kakatombolaka Pɔɔlɔ la Silasɛ Jehowa l’esambo, ase lokanu akina wakokaka. La shashimoya, l’atei wa deke, didimu dia nkɛtɛ dia wolo diakasutshasutsha lokanu oma la diko polo l’ɛsɛ. Nkuke ya lokanu yakadihɔ ndo mɔlɔla wakawakeleka ase lokanu wakahembɔ ndo lowete lakakakitɔ. Olami wa lokanu akalawɔ esadi otsha lo lokanu la l’ɛse ko akɛnyi dia nkuke yakadihwe. Nde akafɔnya dia ase lokanu wakalawe, ko nde akɔshi lokuwa dia ndjaadiaka.

Ko Pɔɔlɔ akate la dui dia wolo ate: ‘Toyasalɛke kɔlɔ! Sho tshɛ tekɔ laawɔ!’ Olami wa lokanu akalawɔ esadi otsha l’etei ko akayakɔsha la ntondo ka Pɔɔlɔ la Silasɛ. Nde akawambola ate: “Ahombami nsala dia dimi shimbamɛ?” Vɔ wakawotɛ vate: ‘Wɛ la ase luudu layɛ pombaka monga la mbetawɔ le Yeso.’ Oma laasɔ Pɔɔlɔ la Silasɛ wakawaetsha ɔtɛkɛta wa Jehowa, ko olami akɔ wa lokanu l’ase luudu lande tshɛ wakabatizama.