Ɔlɔmbɛdi a laadiko Eli aki la ana ahende w’apami wakakambaka oko ɛlɔmbɛdi lo tabɛrnaklɛ. Nkombo yawɔ aki Hɔfɛni la Finehasi. Vɔ kokitanyiyaka ɛlɛmbɛ wa Jehowa ndo wakasalɛka anto akambo wa kɔlɔ efula. Etena kakayaka ase Isariyɛlɛ l’elambo dia ndjolambola Jehowa, Hɔfɛni la Finehasi wakɔsaka emunyi wa nyama woleki dimɛna. Eli akoke awui wakasalaka anande, koko nde kosala ndooko dui. Onde Jehowa akahombe ntshika dia dui sɔ ntetemala?

Kaanga mbele Samuɛlɛ aki dikɛnda efula la ntondo ka Hɔfɛni la Finehasi, nde kombaokoya. Jehowa akangɛnangɛnaka Samuɛlɛ. L’otsho ɔmɔtshi etena kakinde lo djɔ, Samuɛlɛ akoke onto ɔmɔtshi awelɛ. Nde akemɔ, ko akalawɔ otsha le Eli ndo akatowotɛ ate: ‘Dimi ɔnɛ!’ Koko Eli akate ate: ‘Dimi hakele. Kalola toshame.’ Samuɛlɛ akakalola lo mbeto. Ko dui sɔ diakasalema nto. Etena kakoke Samuɛlɛ onto aweta mbala ka sato, Eli akashihodia dia ekɔ Jehowa mbelɛ Samuɛlɛ. Nde akatɛ Samuɛlɛ dia naka nde amboka onto awelɛ nto ko nde nkadimola ɔnɛ: ‘Jehowa tɛkɛta. Okambi ayɛ ekɔ lo kohokamɛ.’

Samuɛlɛ akakalola lo mbeto. Ko nde akoke onto aweta ɔnɛ: ‘Samuɛlɛ! Samuɛlɛ!’ Nde akakadimola ate: ‘Tɛkɛta, okambi ayɛ  ekɔ lo kohokamɛ.’ Jehowa akawotɛ ate: ‘Tote Eli dia dimi layanga mbosha nde la nkumbo kande dilanya. Nde mbeyaka akambo wa kɔlɔ wasala anande lo tabɛrnaklɛ kami, koko nde hasale ndooko dikambo.’ La wedi a pindju, Samuɛlɛ akadihola nkuke ya tabɛrnaklɛ oko waki mbekelo kande. Nde akoke wɔma mbutɛ ɔlɔmbɛdi a laadiko kɛnɛ kakate Jehowa. Koko Eli akawelɛ ndo akawotɛ ate: ‘Ɔnami, kakɔna kakakote Jehowa? Ombute oseka dui tshɛ.’ Ko Samuɛlɛ akatɛ Eli oseka dui tshɛ.

Lam’akatolaka Samuɛlɛ, Jehowa akatetemala monga kaamɛ la nde. Oma lo koma mɔtshi ya wodja polo lo koma kina, ase Isariyɛlɛ tshɛ wakeyaka ɔnɛ Jehowa akasɔnɛ Samuɛlɛ dia nde monga omvutshi ndo shushi.