Diolelo di’ase Asuriya diakalɛndja waoho dikumi wa l’Isariyɛlɛ. Sɛnakɛribɛ, nkumekanga k’Asuriya akalange nɛndja ndo waoho ahende wa lo diolelo dia Juda. Nde akatatɛ nɛndja esomba wa Juda ɔtɔi ɔtɔi. Koko osomba wakandalekaka nkombola aki Jɛrusalɛma. Kɛnɛ kaki Sɛnakɛribɛ kombeyaka ele ɔnɛ Jehowa akakokɛka Jɛrusalɛma.

Hɛzɛkiya nkumekanga ka Juda akasha Sɛnakɛribɛ falanga efula dia nde ntshika Jɛrusalɛma. Kaanga mbakɔshi Sɛnakɛribɛ falanga, nde akatetemala ntoma alembe ande wa wolo dia ndjɔlɔsha Jɛrusalɛma. Anto wa l’osomba wakonge la wɔma nɛ dia ase Asuriya wakayalekaka nsukana. Ko Hɛzɛkiya akawatɛ ate: ‘Tanyokake wɔma. Ase Asuriya wekɔ mɛtɛ la wolo, koko Jehowa ayotosha wolo woleki wɔnɛ wele lawɔ.’

Sɛnakɛribɛ akatome Rabishakɛ otsha la Jɛrusalɛma dia tootsha anto wa l’osomba wɔma. Rabishakɛ akemala l’andja w’osomba ndo akate la dui dia wolo ate: ‘Jehowa hakoke nyokimanyiya. Tanyoyaɛkɛke le Hɛzɛkiya. Ndooko nzambi kakoka nyokokɛ oma leso.’

Hɛzɛkiya akambola Jehowa kɛnɛ ka nsala. Jehowa akokadimola ate: ‘Tokake wɔma lo kɛnɛ kata Rabishakɛ. Sɛnakɛribɛ hatɔlɛndja Jɛrusalɛma.’ Oma laasɔ, Hɛzɛkiya akalongola mikanda ɛmɔtshi oma le Sɛnakɛribɛ. Mikanda akɔ wakataka ɔnɛ: ‘Etawɔ tsho dia wɛ ambɔlɛndjama. Jehowa hakoke koshimbɛ.’ Hɛzɛkiya akalɔmbɛ Jehowa ate: ‘Jehowa le, otoshimbe di’onto tshɛ mbeya ɔnɛ wɛmɛ oto mbele Nzambi ɔtɔi ka mɛtɛ.’ Jehowa akawotɛ ate: ‘Nkumekanga k’Asuriya hatɔtɔ l’etei ka Jɛrusalɛma. Dimi layokokɛ osomba ami.’

Sɛnakɛribɛ aki l’eshikikelo tshɛ dia kem’edja Jɛrusalɛma ayanga monga yande. Koko l’otsho, Jehowa akatome ondjelo lɛnɛ akahange  asɔlayi l’andja w’osomba. Ondjelo akɔ akadiake asɔlayi 185 000. Nkumekanga Sɛnakɛribɛ akashisha asɔlayi ande wakaleke wolo. Nde kombeya kɛnɛ ka nsala diakɔ diakandakalola la ngelo la ɔkɔmwɛlɔ. Jehowa akakokɛ Hɛzɛkiya ndo Jɛrusalɛma paka oko wakandalake. Otondongaka wɛ akikɔ la Jɛrusalɛma, onde wɛ otoyaɛkɛ le Jehowa?