Osomba w’ase Asuriya wakawelɛka Niniva waki l’anto wa kɔlɔ efula. Jehowa akatɛ omvutshi ande Jɔna dia ntshɔ la Niniva dia towahɛmɔla dia vɔ ntshikitanya etsha awɔ. Koko Jɔna akalawɔ otsha lo lɛkɛ lokina. Nde akatane masuwa w’otsha la Tarashishi ndo akatshu lɔkɔ.

Etena kaki masuwa l’atei wa ndjale, lɔpɛpɛ la wolo lakafufe ko ase masuwa wakoke wɔma w’efula. Vɔ wakalɔmbɛ tozambizambi tawɔ ndo wakayambola ɔnɛ: ‘Lande na kambosalema dikambo dia nganɛ?’ L’ekomelo a shimu, Jɔna akayowatɛ ate: ‘Dimi mbele lo kiɔkɔ ya dikambo nɛ. Lekɔ lo talawɔ ɔkɛndɛ wakambisha Jehowa dia dimi nkotsha. Nyombikasha lo ndjale ko lɔpɛpɛ layɔlɛmbɔhala.’ Ase masuwa konanga mbikasha Jɔna oma lo masuwa, koko nde akatetemala mbatɛ dia vɔ nsala dui sɔ. Etena kakawawokasha lo ndjale, lɔpɛpɛ lakɔlama.

Jɔna akafɔnya dia nde ayanga mvɔ. Etena kakandatalekaka dinda lo ndjale, nde akalɔmbɛ Jehowa. Ko Jehowa akatome lose la woke. Lɔ lakamɛnɛ Jɔna, koko kombodiaka. Etena kakinde lo dikundju dia lose, Jɔna akalɔmbɛ ate: ‘Dimi layokokitanyiaka nshi tshɛ.’ Jehowa akakokɛ Jɔna l’otema wa lose l’edja ka nshi shato ndo oma laasɔ nde akasale dia lose lɔsɔ tohɔ Jɔna lo nkɛtɛ y’ofumbo.

Lam’ele Jehowa akashimbɛ Jɔna, onde dui sɔ nembetshiyaka dia nde takandahombe ndjotshɔ l’ɔkɔngɔ otsha la Nininva? Ndooko. Jehowa akatɛ Jɔna nto dia nde ntshɔ lɛkɔ. Mbala kɛsɔ, Jɔna  akayokitanyiyaka. Nde akatshu lɛkɔ ndo akatotɛ anto wa kɔlɔ asɔ ate: ‘L’ɔkɔngɔ wa nshi 40, Niniva ayolanyema.’ Dui dimɔtshi diakinde konongamɛka diakasalema, ase Niniva wakahokamɛ ndo wakatshikitanya etsha awɔ. Nkumekanga ka Niniva akatɛ anto ande ate: ‘Nyɔlɔmbɛ Nzambi ndo nyoyatshumoya. Ko ondo nde hototolanya.’ Lam’akɛnyi Jehowa dia wodja wamboyatshumoya, nde kondanya Niniva.

Jɔna akomala lo woho waki osomba ɔsɔ kondanyema. Ohokanyiya yema: Jehowa aki la solo dia lotutsha ndo la kɛtshi otsha le Jɔna, koko Jɔna komonga la kɛtshi otsha le ase Niniva. Jɔna akatodjasɛ l’andja w’osomba lo dɛdi dia dambo dia dimɔkɛ ele wombo su. Oma laasɔ, dambo dia dimɔkɛ diakavu ko Jɔna akomala. Ko Jehowa akawotɛ ate: ‘Wɛ ekɔ lo ndjakiyanya efula dikambo dia dambo dia dimɔkɛ oleki woho wayakiyanyayɛ dikambo dia ase Niniva. Dimi lambowaoka kɛtshi ndo vɔ wamboshimbamɛ.’ Wetshelo akɔna waki la dikambo sɔ? Ase Niniva waki la nɛmɔ di’efula ndeka oseka etombatomba tshɛ.