Jɔsiya akakome nkumekanga ka Juda etena kakinde eke l’ɛnɔnyi enanɛi. Lo nshi shɔ, wodja wakasalaka awui wa maji ndo wakatɛmɔlaka dikishi. Etena kaki Jɔsiya la ɛnɔnyi 16, nde akeke dia ntɛmɔla Jehowa lo yoho ya dimɛna. Lam’akinde la ɛnɔnyi 20, nde akamɛ ndanya dikishi ndo diakelo dia lo wodja w’otondo. Ndo etena kaki Jɔsiya l’ɛnɔnyi 26, nde akɔshi tɛdikɔ dia tɛmpɛlɔ kaki Jehowa nɔngɔswama.

Hilikiya ɔlɛmbɛdi a laadiko, akashola wɔɔmbɔ w’Ɛlɛmbɛ wa Jehowa lo tɛmpɛlɔ, ondo Mɔsɛ mbakafunde wɔɔmbɔ ɔsɔ. Shafana laki sekeletɛlɛ ka nkumekanga akatɔlɛ wɔɔmbɔ ɔsɔ otsha le Jɔsiya ko akawadiɛ Ɛlɛmbɛ la dui dia wolo. Etena kakahokamɛ Jɔsiya, nde akashihodia dia wodja wambɔnyɔla Jehowa l’edja k’ɛnɔnyi efula. Nkumekanga Jɔsiya akatɛ Hilikiya ate: ‘Jehowa mɛtɛ ekɔ la nkɛlɛ k’efula oya le so. Tshɔka tɔtɛkɛtɛ la nde. Ko Jehowa ayototɛ kɛnɛ kahombaso nsala.’ Jehowa akasha okadimwelo lo tshimbo ya Huluda omvutshi wa womoto ɔnɛ: ‘Ase Juda wakambɛkɔ. Vɔ wayolongola dilanya koko aha etena kele Jɔsiya nkumekanga, nɛ dia nde akayakitshakitsha.’

Etena kakoke nkumekanga Jɔsiya losango lɔsɔ, nde akatshu lo tɛmpɛlɔ ko akatshumanya ase Juda. Oma laasɔ, nde akadiyɛ wodja w’otondo Ɛlɛmbɛ wa Jehowa la dui dia wolo. Jɔsiya ndo ase wodja wakate dia wayokitanyiyaka Jehowa la etema awɔ tshɛ.

Laasɔ ko ambeta ɛnɔnyi efula wele ase Juda hawosale Dambo di’Elekanelo. Koko etena kakadia Jɔsiya lo Ɛlɛmbɛ ɔnɛ Dambo  di’Ekanelo pombaka salemaka ɔnɔnyi tshɛ, nde akatɛ wodja ate: ‘Tayosala Dambo di’Elekanelo dikambo dia Jehowa.’ Oma laasɔ, Jɔsiya akalɔngɔsɔla dia nkimɔ elambo efula ndo akakongɛ dia olui w’amembi monga lo tɛmpɛlɔ. Oma laasɔ, wodja wakasale Dambo di’Elekanelo diakayelana la Fɛtɛ ka mapa waha la wodoya kakaviyaka nshi esambele. Laasɔ ko ndooko Dambo di’Elekanelo diambosalemaka oko sɔ ntatɛ oma lo nshi ya Samuɛlɛ. Jɔsiya mɛtɛ akalangaka Ɛlɛmbɛ wa Nzambi. Onde wɛ ngɛnangɛnaka mbeka awui wendana la Jehowa?