Ɛnɔnyi 17 wambeta ntatɛ lam’aki Yeso l’ɛnɔnyi 12 etena kakandokaka embetsha ambola lo tɛmpɛlɔ. Taya lo eleko kamɔnga akatshi ka lo 29 T.D. Anto efula wekɔ lo ntɛkɛta awui efula wendana la Joani y’owotɔ wa Yeso, ɔnɛ lasambisha l’ɛtshi ka nkɛtɛ tshɛ ka lo wekeke wa owɛstɛ wa Ɔkɛndi wa Jɔrdana.

Joani aki onto ɔmɔtshi la diambo efula, lo ɛnamelo ndo lo ɛtɛkɛta. Ahɔndɔ ande wakasalema la wɛɔsa wa kamɛlɔ ndo nde akalɔtaka oya w’ekoho ka nyama lo lokende. Nde akalɛka ɛndjɔ, mbuta ate woho ɔmɔtshi w’akata ndo osanga. Losango lakɔna lakandewoyaka? “Nyoyatshumoya, nɛ dia Diolelo dia l’olongo diaya suke.”​—Mateo 3:2.

Losango la Joani lakatshutshuyaka wanɛ wakayaka dia ndjoohokamɛ. Efula wakashihodia ohomba wa ndjatshumoya, mbuta ate ntshikitanya dionga ndo lɔkɛwɔ lawɔ, lo ntona yoho yawɔ ya lɔsɛnɔ l’edjedja ndo liɔsa oko lɔsɛnɔ la kɔlɔ. Wanɛ wakayaka le nde wakaye oma la “Jɛrusalɛma la ase Judeya tshɛ ndo wedja tshɛ waki suke la Jɔrdana.” (Mateo 3:5) Anto efula wakayaka le Joani wakayatshumoyaka. Nde akabatizaka lo mbadindja lo ashi wa Jɔrdana. Lande na?

Nde akabatizaka anto oko djembetelo kana lo woho wakawetawɔka l’otema ɔtɔi dia ndjatshumoya lo pɛkato yendana la sheke y’Ɛlɛmbɛ wa Nzambi. (Etsha 19:4) Koko, aha anto tshɛ mbakakotshaka kɛnɛ kalɔmbama. Etena kakaye ewandji w’ɛtɛmwɛlɔ ɛmɔtshi, Afarisɛ ndo Asadukɛ le nde, Joani akawaelɛ ɔnɛ “ana w’akuha.” Nde akate ate: “Nyɔtɔ elowa wɛnya ndjatshumoya. Tanyotake la lotamanya tshɛ ɔnɛ: ‘Abrahama kele shɛso.’ Nɛ dia lambonyotɛ nte: Nzambi ekɔ la akoka wa tondjɛ Abrahama ana oma lo ave anɛ. Shɔka yamboshila kitshama l’ɛse k’esongo. Ɔnkɔnɛ, osongo tshɛ wahatɔ elowa w’ɛlɔlɔ wayɔkɔtama ndo wayokadjema lo dja.”​—Mateo 3:7-10.

Lam’ele Joani akakotolaka yambalo y’anto efula, akewoyaka losango laki la nkudu k’efula ndo akabatizaka anto efula, ɛlɔmbɛdi ndo ase Lɛwi wakatome anto dia towombola ɔnɛ: “Wɛ eeyɛ?”

Joani akate ate: “Dimi keema Kristo.”

Vɔ wakawombola vate: “Eeyɛ? Onde Elidja?”

Nde akakadimola ɔnɛ: “Dimi bu Elidja.”

Vɔ wakawombola vate: “Onde omvutshi keyɛ?” Lo ntɛkɛta dikambo dia Omvutshi wa woke wakate Mɔsɛ dia nde ayoya.​—Eohwelo k’Ɛlɛmbɛ 18:15, 18.

Joani akakadimola ate: “Keema!”

Vɔ wakatɛtɛ lo mbombola ɔnɛ: “Wɛ na? Otote kele kateye woho wa tokadimola wanɛ wakatotome. Atayɛ, eeyɛ?” Joani akate ate: “Dimi lekɔ dui di’onto ɔmɔtshi lada ombeka l’oswe ɔnɛ: ‘Nyosembole mboka ka Jehowa,’ oko wakate omvutshi Isaya.”​—Joani 1:19-23.

Ɔnkɔnɛ vɔ wakalange mbeya lo mbombola ɔnɛ: “Ko lande na kabatizayɛ anto naka wɛ bu Kristo kana Elidja kana Omvutshi?” Nde akasha okadimwelo wa dimɛna efula ɔnɛ: “Dimi lekɔ lo batiza anto l’ashi. Onto lahanyeye ekɔ l’atei anyu, nde kayaye l’ɔkɔngɔ ami.”​—Joani 1:25-27.

Eelo, Joani akeye dia nde aki lo nɔngɔsɔla mboka dia nɔngɔsɔla anto wele l’etema w’ɛlɔlɔ dia mbetawɔ Mɛsiya, wakatama ɔnɛ ayonga Nkumekanga. Joani akate lo dikambo diande ɔnɛ: “Ɔnɛ layaye l’ɔkɔngɔ ami ndekami wolo, dimi haasungana mbokolola sabata. Nde ayonyobatiza la nyuma k’ekila ndo la dja.” (Mateo 3:11) Lo mɛtɛ, Joani akate ate: “Ɔnɛ layaye l’ɔkɔngɔ ami aki la ntondo kami dikambo nde akasɛnaka la ntondo kami.”​—Joani 1:15.

Ɔnkɔnɛ, losango la Joani l’ɔnɛ: “Nyoyatshumoya, nɛ dia Diolelo dia l’olongo diaya suke” laki mɛtɛ losango la dimɛna. (Mateo 3:2) Lɔ laki oko diewoyelo dia lo sɛkɛ di’ɔnɛ olimu wa Nkumekanga ka Jehowa kayaye, mbuta ate Yeso Kristo, wayanga ntatɛ.