Kayisa Ogistɛ, owandji w’ase Rɔmɔ akadjanga dia onto tshɛ pombaka tofundja lokombo lo buku dia lɛɛta. Ɔnkɔnɛ Yɔsɛfu nde la Mariya wakahombe minda lɔkɛndɔ otsha lo osomba wakandotɔ, mbuta ate osomba wa Bɛtɛlɛhɛma lo sidɛ ka Jɛrusalɛma.

Anto efula wakaye la Bɛtɛlɛhɛma dia ndjofundja nkombo. Dihole ɔtɔi diakahombe Mariya la Yɔsɛfu tohanga aki lo lokoto lɛnɛ akawalamaka mponda la waa nyama nkina. Lɛkɔ mbakatotɔ Yeso. Mariya akawɔmbɛ la ahɔndɔ ndo akoolasha lo dihole diatowokitshaka diangɔ dialɛ waa nyama.

Nzambi mbakasale dia Kayisa Ogistɛ mbidja ɔlɛmbɛ ɔsɔ wa mfundja nkombo. Lande na? Nɛ dia dui sɔ mbakasale dia Yeso mbotɔ la Bɛtɛlɛhɛma lo ngelo ka nkumekanga Davidɛ ka tshɛnde. Afundelo wakatatshi edja efula dia l’osomba ɔsɔ mbakahombe Omboledi wakalakema mbotɔ.​—Mika 5:2.

Ɔsɔ mɛtɛ aki otsho w’ohomba efula! Osase wa woke wakahɛtɛɛ alami w’ɛkɔkɔ l’oswe. Ɔsɔ aki lotombo la Nzambi! Ondjelo ɔmɔtshi waki Nzambi akatɛ alami w’ɛkɔkɔ ɔnɛ: “Tanyokake wɔma, nɛ dia layanga nyewoya lokumu l’ɔlɔlɔ layosha anto tshɛ ɔngɛnɔngɛnɔ w’efula. Nɛ dia ɛlɔ Kristo Nkumadiɔndjɔ, oshimbedi anyu ambotɔ l’osomba wa Davidɛ. Lambonyosha djembetelo nyɛ: ‘Nyayotana ɔna ashashi ɔmbami ahɔndɔ ndo oshami lo eleelo ka nyama.’” Ko mbala kakɔ ɔtɔi, leemba l’andjelo wakɛnama ndo wakate ɔnɛ: “Lotombo layale le Nzambi lele laadiko di’elongo ndo wɔladi wayale la nkɛtɛ le anto wetawɔnde.”​—Luka 2:10-14.

Etena kakamɔ andjelo asɔ, alami w’ɛkɔkɔ wakatanɛ lam’asawɔ ɔnɛ: “Nyɛsɔ totshu la Bɛtɛlɛhɛma kele totende dikambo diambotomba sɔ ndo diambotewoya Jehowa.” (Luka 2:15) Vɔ wakatshu esadi esadi ndo wakatotana Yeso eke kambotɔ paka lɛnɛ akawatɛ ondjelo. Etena kakatatɛ nkɔndɔla alami w’ɛkɔkɔ kɛnɛ kakawatɛ ondjelo, anto tshɛ wakoke dui sɔ wakambe. Mariya akɔshi ɛtɛkɛta ɛsɔ la nɛmɔ ndo akaalame l’otema ande.

Ɛlɔ kɛnɛ, anto efula mbetawɔka dia Yeso akotɔ lo Ngɔndɔ ka dikumi l’ahende 25. Koko l’ɛtshi ka nkɛtɛ ka la Bɛtɛlɛhɛma, Ngɔndɔ ka dikumi l’ahende ekɔ ngɔndɔ ka amvula efula ndo tshitshi mongaka efula. Lo diaaso dimɔtshi, loonge lekama kɔka. L’etena ka l’ɔnɔnyi kɛsɔ, alami w’ɛkɔkɔ takawahombaka ntshikala l’oswe walama ɛkɔkɔ awɔ. Ndo nto, hatokoke nkanyiya dia nkumekanga k’ase Rɔmɔ kɛsɔ akakoke mbutɛ anto waki suke la mbɔtɔmbɔkwɛ dia minda lɔkɛndɔ la nshi efula l’etena ka tshitshi kɛsɔ dia tofundja lokombo laka lɛɛta. Mɛnamaka dia Yeso akootɔ yema otsha lo Ngɔndɔ ka dikumi.