Yeso ekɔ lo ndjole la Nazarɛtɛ, shombasomba ya tshitshɛ ndo yele bu ohomba. Yɔ tanemaka lo nɔrdɛ ka Judeya lo ɛtshi ka nkɛtɛ k’akona ka dihole dielamɛ Ngalileya, otsha lo owɛstɛ ka Ndjale ka Woke kelamɛ oduwa wa Ngalileya.

Etena kakinde ondo l’ɛnɔnyi ehende, Yɔsɛfu la Mariya wakatshu la Yeso lɛkɔ oma l’Edjibito. Mɛnamaka dia l’etena kɛsɔ, ndamɛ mbakikɔ tshɔi yawɔ y’ɔna. Koko l’ɔkɔngɔ diko, akosɛnde w’apami anɛ wakayotɔ: Jakɔba, Yɔsɛfu, Simɔna ndo Judasɛ. Yɔsɛfu la Mariya wakote nto ana wa wamato, mbuta ate akose waki Yeso wa wamato. Eelo, Yeso akikɔ oko la akose w’apami la wa wamato asamalo.

Lo mɛtɛ, Yeso akikɔ la ewotɔ ekina. Takashile mbeya dikambo dia Elizabɛtɛ ndo dia Joani y’ɔnande. Nde akadjasɛka kilɔmɛtɛlɛ efula lo sidɛ, la Judeya. Salɔme akadjasɛka suke la wɔ la Ngalileya, lele ondo ekɔ kadiyɛki Mariya ndo laasɔ nde ekɔ kosɛki nyango Yeso. Zebede mbaki omɛki Salɔme. Anawɔ ahende, Jakɔba la Joani, mbele anto wa ntondo waki vɔ la Yeso ana la ana. Hateye kana Yeso aketsha wenya efula la ana asɔ etena kakawayolaka, koko l’ekomelo, vɔ wakayokoma angɛnyi ande wa ma ma, lo nkamba oko apɔstɔlɔ ahende wa Yeso.

Yɔsɛfu akahombe nkamba la wolo dia nkotsha ehomba wa nkumbo kande kakatafulaka. Nde aki otshudi w’abaya. Yɔsɛfu akodia Yeso oko ɔnande hita, diakɔ diakelamɛ Yeso ɔnɛ “ɔna aki otshudi w’abaya.” (Mateo 13:55) Yɔsɛfu aketsha Yeso woho wa nde monga otshudi w’abaya oko nde,  ndo nde akayele wetshelo ɔsɔ dimɛna. Diakɔ diele, l’ɔkɔngɔ diko anto wakayota lo dikambo dia Yeso ɔnɛ: “Otshudi w’abaya kende.”​—Makɔ 6:3.

Lɔsɛnɔ la nkumbo kaki Yɔsɛfu lakalekaka mendana la ɔtɛmwɛlɔ wa Jehowa. Lo nama Ɛlɛmbɛ waki Nzambi, Yɔsɛfu nde la Mariya waketsha ana awɔ awui wa lo nyuma ‘etena kakawadjasɛka lo luudu lawɔ, etena kakawakɛndakɛndaka lo mboka, etena kakawetamaka ndo etena kakawetɔka.’ (Eohwelo k’Ɛlɛmbɛ 6:6-9) Shinangɔnga kɛmɔtshi kaki la Nazarɛtɛ. Sho koka monga l’eshikikelo dia Yɔsɛfu akatshɔka mbala la mbala la nkumbo kande dia tɔtɛmɔla lɛkɔ. Akayotama l’ɔkɔngɔ dia “oko waki mbekelo kande lushi la Sabato,” Yeso akatshu lo shinangɔnga. (Luka 4:16) Nkumbo kawɔ kaki nto l’ɔngɛnɔngɛnɔ w’efula etena kakawatshɔka mbala la mbala lo tɛmpɛlɔ ka Jehowa la Jɛrusalɛma.