Yɔsɛfu ambemola Mariya dia mbotɛ losango la wanyandja. Ondjelo wa Jehowa oma la mɛnama le nde lo dɔ, awotɛ ate: “Onɛɛ, ɔsa ɔna la nyango kele nyolawɔ l’Edjibito ndo nyototshikale lɛkɔ edja ndo lam’ayomonyotɛ dui, nɛ dia Hɛrɔdɛ ekɔ suke la nyanga ɔna dia mbodiaka.”​—Mateo 2:13.

Mbala kakɔ ɔtɔi, Yɔsɛfu la Mariya ndo ɔnawɔ wakalawɔ l’otsho. Vɔ wakasale dui sɔ la wonya wa dimɛna, nɛ dia Hɛrɔdɛ akeye dia ambeyi w’akambo wa tɔɔtɔ wambokesa. Nde akawatɛ dia nkalola le nde dia ndjowotɛ. Koko, vɔ wakamɔ oma lo wodja akɔ aha la nsala dui sɔ. Hɛrɔdɛ akomala nkɛlɛ k’efula. Lam’ele nde akatetemala nyanga dia ndjaka Yeso, nde akadjanga dia ndjaka ana tshɛ w’apami wa la Bɛtɛlɛhɛma ndo wa lo ngelo yosukanyi waki oma l’ɛnɔnyi ehende oya l’ɛse. Nde akashikikɛ ɛnɔnyi ɛsɔ lo ndjela kɛnɛ kakawotɛ ambeyi w’akambo wa tɔɔtɔ wakaye oma lo Ɛstɛ ntondo ka laasɔ.

Odiakelo wa ana w’apami asɔ tshɛ aki dui dia kɔlɔ efula! Hatokoke mbeya lofulo la ana lakadiakema, koko ɔkɛyi ndo alelo wa wamato wakavusha ana awɔ akakotsha prɔfɛsiya ka lo Bible kakashama lo tshimbo ya omvutshi wa Nzambi, Jɛrɛmiya.​—Jɛrɛmiya 31:15.

Lo etena kɛsɔ, Yɔsɛfu nde la nkumbo kande wakalawɔ l’Edjibito ndo wakatotetemala mbidjasɛ lɛkɔ. L’otsho ɔmɔtshi, ondjelo waki Jehowa akɛnama nto le Yɔsɛfu lo dɔ. Ondjelo akate ate: “Onɛɛ, ɔsa ɔna la nyango kele tshɔka lo wodja w’Isariyɛlɛ, nɛ dia wanɛ wakayangaka lɔsɛnɔ l’ɔna wambovɔ.” (Mateo 2:20) Ko Yɔsɛfu akɛnyi dia ambokoka dia nkumbo kande nkalola lo wodja awɔ wa lootɔ. Lo yoho shɔ prɔfɛsiya kekina ka lo Bible kakakotshama, mbuta ate Ɔna Nzambi ambelamɛ oma l’Edjbito.​—Hɔsɛya 11:1.

 Mɛnamaka dia Yɔsɛfu akalange dia nkumbo kande todjasɛ la Judeya, ondo suke l’osomba wa Bɛtɛlɛhɛma, lɛnɛ akawadjasɛka la ntondo ka vɔ ndawɔ otsha l’Edjibito. Koko nde akoke dia Arakɛlawo ɔna aki Hɛrɔdɛ la kɔlɔ mbakolɛka la Judeya l’etena kɛsɔ. Lo dɔ dikina, Nzambi akahɛmɔla Yɔsɛfu oma lo waale ɔsɔ. Ɔnkɔnɛ, Yɔsɛfu nde la nkumbo kande wakatshu etale lo lɛkɛ la nɔrdɛ ndo wakatodjasɛ l’osomba wa Nazarɛtɛ l’ɛtshi ka nkɛtɛ ka Ngalileya, mangana etale efula la osomba wakalɔmbɔmaka ɔtɛmwɛlɔ w’ase Juda. Lɛkɔ mbakatolaka Yeso, dui sɔ diakakotsha prɔfɛsiya kekina kata ɔnɛ: “Wayowelɛ ɔnɛ ose Nazarɛtɛ.”​—Mateo 2:23.