Tekɔ lo eleko kamɔnga akatshi. Etena kambokoka ka nkumbo ka Yɔsɛfu kaamɛ la angɛnyi ndo ewotɔ dia minda lɔkɛndɔ lakawandaka ɔnɔnyi tshɛ otsha la Jɛrusalɛma. Vɔ wakatshɔka lɛkɔ dia tosala dambo di’Elekanelo, oko woho wakalɔmbaka Ɛlɛmbɛ. (Eohwelo k’Ɛlɛmbɛ 16:16) Lɔkɛndɔ l’oma la Nazarɛtɛ otsha la Jɛrusalɛma laki kilɔmɛtɛlɛ oko 120. Ɔsɔ aki etena kakiwɔ la wesanu ndo k’ɔngɛnɔngɛnɔ efula le anto tshɛ. Wonya ɔnɛ Yeso aya l’ɛnɔnyi 12, nde akalongamɛka l’asolo wa lomɔlomɔ dia ntshɔ lo fɛtɛ ka laande kɛsɔ ndo diaaso dia monga nto suke la tɛmpɛlɔ.

Le Yeso la nkumbo kande, dambo di’Elekanelo komonga tsho dui dia lushi ɔtɔi. Lushi ɔtɔi l’ɔkɔngɔ wa dambo di’Elekanelo, akikɔ etatelo ka Fɛtɛ ka nshi esambele ka mapa waha la wodoya. (Makɔ 14:1) Fɛtɛ kakɔ kakɔsamaka oko etenyi kɛmɔtshi ka eleko ka Elekanelo. Lɔkɛndɔ l’oma lakawɔ la Nazarɛtɛ, nshi yakawetshaka la Jɛrusalɛma ndo okalwelo otsha la ngelo kawɔ, akɔsaka oko mingu hiende. Koko ɔnɔnyi ɔsɔ, l’ɔtɛ wa dui dimɔtshi diakakomɛ Yeso, lɔ lakaleke mbiviya. Dui sɔ mendanaka la dikambo dimɔtshi diakɛnama hwe lam’akawayakalolaka oma la Jɛrusalɛma.

Etena kakiwɔ lo mboka, Yɔsɛfu nde la Mariya wakafɔnya dia Yeso ekɔ kaamɛ la ewotɔ ndo l’angɛnyi wakatatshɔka kaamɛ otsha lo nɔrdɛ. Koko, etena kakadje wonya, vɔ kombɛna. Ɔnkɔnɛ, vɔ wakoyange l’atei w’asekawɔ, koko nde komonga. Ɔnawɔ kotanema ndooko dihole! Yɔsɛfu la Mariya wakakalola la Jɛrusalɛma dia tooyanga.

Vɔ wakoyange lushi l’otondo ndo vɔ kombɛna. Vɔ wakoyange nto ndo lushi la hende koko kombɛna. L’ekomelo, lushi la sato, vɔ wakatotanaka ɔnawɔ lo tɛmpɛlɔ, lo shambrɛ mɔtshi. Vɔ wakɛnyi Yeso odjashi l’atei wa embetsha ɛmɔtshi w’ase Juda. Nde akaahokamɛka, awaoka ambola ndo vɔ wakambe efula lo woho wakandashihodiaka akambo.

Mariya akawombola ate: “Ɔnami, lande na katosalɛyɛ nganɛ? Dimi la shɔ tambohandjɔ wɔɔngɔ la takoyange.”​—Luka 2:48.

Yeso akambe lo woho wakiwɔ kombeya lɛnɛ akandahombe monga. Nde akawambola ate: “Lande na katanyanyange? Onde nyu hanyeye dia dimi pombaka monga lo luudu la Papa?”​—Luka 2:49.

Wonya ɔnɛ wambowonga kaamɛ nto, Yeso akakawola la Nazarɛtɛ nde la Yɔsɛfu la Mariya ndo nde akatetemala mbakitanyiya. Nde akatahamaka lo lomba ndo lo demba. Kaanga mbakinde eke dikɛnda, nde akahomɔ lokolo l’ɔlɔlɔ lo washo wa Nzambi ndo w’anto. Eelo, oma ko dikɛnda diande, Yeso akatshike ɛnyɛlɔ ka dimɛna aha tsho lo nyanga wahɔ wa lo nyuma koko ndo lo monga la dilɛmiɛlɔ otsha le ambutshi ande.