L’ɔkɔngɔ w’ondjelo Ngabriyɛlɛ mbewoya osekaseka Mariya dia nde ayota ɔna layowɔlɛ Yeso ndo layolɛ oko Nkumekanga pondjo pondjo, Mariya akambola ate: “Woho akɔna wayosalema dikambo sɔ, lam’ele dimi lateyanaka la pami?”​—Luka 1:34.

Ngabriyɛlɛ akakadimola ate: “Nyuma k’ekila kayoya le yɛ ndo wolo wa Ɔnɛ-Laheme-Tshɛ wayokokomba. Diakɔ diele ɔna layotɔ ayelamɛ ɔnɛ ekila, Ɔna Nzambi.”​—Luka 1:35.

Ondo dia nkimanyiya Mariya dia mbetawɔ losango lande, Ngabriyɛlɛ akakotsha ate: “Hokamɛ, owotɔ ayɛ Elizabɛtɛ lakawelɛka ekomba ambotshɔ diemi nde lawɔ l’osombe ande, aya ngɔndɔ 6; nɛ dia le Nzambi, ndooko etelo kahakoke salema.”​—Luka 1:36, 37.

Oko wadiɛnya okadimwelo ande, Mariya aketawɔ kɛnɛ kakawotɛ Ngabriyɛlɛ. Nde akate ate: “Eenda, okambi waki Jehowa wa womoto kemi! Diatshame le mi oko watayɛ.”​—Luka 1:38.

Kam’akatshu Ngabriyɛlɛ, Mariya akayalɔngɔsɔla dia tenda Elizabɛtɛ, lakadjasɛka nde l’omɛnde, Zɛkariya, suke la Jɛrusalɛma l’omamu wa akona wa la Judeya. Dia mimɔ oma lo ngelo ka Mariya la Nazarɛtɛ dia tokoma lɛkɔ, lɔkɛndɔ lɔsɔ lakahombe mbɔsa nshi shato kana nyɛi.

L’ekomelo, Mariya akatokoma lo luudu laki Zɛkariya. Etena kakandɔtɔ, nde akasha Elizabɛtɛ w’owotɔ ande mɔyɔ. Lo wonya akɔ, Elizabɛtɛ akalodiama la nyuma k’ekila ndo nde akatɛ Mariya ate: “Wɛ ambɔtshɔkwama l’atei a wamato tshɛ ndo ɔna lele l’otema ayɛ atshɔkwame! Ande diɛsɛ diele la mi dia nyango Nkumadiɔndjɔ ndja le mi lee! Nɛ dia, kam’akamoki wondjo wa mɔyɔ ayɛ lo atoyi ami, ɔna lele l’otema ami akakunywekunywe l’ɔlɔ.”​—Luka 1:42-44.

Oma laasɔ, Mariya akakadimola l’otema wa lowando tshɛ ate: “Anima ami watombole Jehowa, ndo otema ami wayololaka nshi tshɛ l’ɔngɛnɔngɛnɔ lo dikambo dia Nzambi, Oshimbedi ami, nɛ dia nde akɛnyi dia okambi ande wa womoto bu onto la lokumu. Ntatɛ oma ko kakianɛ, anto wa lo nɔnga tshɛ wayotaka dia lekɔ kanga ɔngɛnɔngɛnɔ, nɛ dia Kanga nkudu ambonsalɛ akambo wa weke.” Tambɛna dia kaanga mbakatombɔma Mariya, nde akasha Nzambi lotombo lɔsɔ tshɛ. Nde akate ate: “Lokombo lande lekɔ ekila. Ndo nde ayokaka wanɛ wawoka wɔma lo nɔnga la nɔnga kɛtshi.”​—Luka 1:46-50.

Lo nkamba l’ɛtɛkɛta wa prɔfɛsiya wakasambiyama, Mariya akatetemala ntombola Nzambi, ata ate: “Nde ambosala akambo wa wolo la lonya lande; nde ambodianganya wanɛ wele la lotamanya l’etema awɔ. Nde amboholoya akanga wa wolo oma lo kiti yawɔ ya lowandji ndo ambodiya akanga w’okitshakitsha; nde ambolotsha wanɛ wele la ndjala la diangɔ di’amɛna ndo ambokaloya akanga w’ɛngɔnyi anya hwe. Nde ambokimanyiya okambi ande Isariyɛlɛ dia mbohɔ kɛtshi kande, le Abrahama ndo le kanula yande pondjo pondjo, oko wakandatɛ watshɛso.”​—Luka 1:51-55.

Mariya akatshikala la Elizabɛtɛ ngɔndɔ oko shato, ondo lo mbokimanyiya lo mingu y’ekomelo ya diemi dia Elizabɛtɛ. Aki mɛtɛ dikambo di’ɔngɛnɔngɛnɔ efula dia wamato ahende wa kɔlamelo asɔ, wele vɔ akɔ ahende waki la waemi l’ekimanyielo ka Nzambi monga kaamɛ lo etena ka lo lɔsɛnɔ lawɔ kɛsɔ!

Ndo tolembete woho wakatombɔma Yeso kaanga la ntondo ka nde mbotɔ. Elizabɛtɛ akawelɛ ate “Nkumɛmi,” ndo ɔna laki l’otema ande ‘akakunyɔkunyɔ l’ɔlɔ’ etena kakaye Mariya. Koko woho wakayosalɛ anto akina Mariya nde l’ɔnande laki atotɔ akambo l’ɔkɔngɔ akatshikitana, oko wayotodiɛna.