Yɔsɛfu la Mariya wakatshikala la Bɛtɛlɛhɛma lo dihole dia nkalola la Nazarɛtɛ. Lam’akakotsha Yeso nshi enanɛi, vɔ wakawonya mpota, oko wakadjangɛka Ɛlɛmbɛ wa Nzambi ase Isariyɛlɛ. (Akambo w’ase Lɛwi 12:2, 3) Vɔ waki nto la mbekelo ka mbɔlɛ ɔna lokombo lushi lɔsɔ. Vɔ wakɔlɛ ɔnawɔ Yeso, oko wakate ondjelo Ngabriyɛlɛ.

Ambolekana ngɔndɔ k’otondo oma lam’akotɔ Yeso, ndo nde ambokotsha nshi 40. Lende akɔtɔlɛ ambutshi ande? Lo tɛmpɛlɔ la Jɛrusalɛma, yakangana kilɔmɛtɛlɛ ngana tsho la lɛnɛ akawadjasɛka. Ɛlɛmbɛ wakataka dia nshi 40 l’ɔkɔngɔ wa mbota ɔna pami, nyango akahombaka nkimɔ olambo wa wɛdiɛlɔ lo tɛmpɛlɔ.​—Akambo w’ase Lɛwi 12:4-8.

Kɛsɔ mbakasale Mariya. Nde akela olambo wa tofudu tohende ta totshitshɛ. Kɛsɔ toshaka nkanyi lo kɛnɛ kendana la ekondjelo kaki la Yɔsɛfu nde la Mariya. Lo ndjela Ɛlɛmbɛ, onto akahombaka nkimɔ ɔsɔngɔ w’ɔkɔkɔ w’omi ndo fudu. Koko naka womoto akɔ hakoke nkondja ɔsɔngɔ w’ɔkɔkɔ w’omi, kete nde akakokaka nkimɔ benga pende kana tokudumba tohende. Ekondjelo ka ngasɔ mbaki la Mariya ndo kɛsɔ mbakandakimɔ.

Lo tɛmpɛlɔ, osombe ɔmɔtshi wa pami akaye le Yɔsɛfu la Mariya. Lokombo lande Simɛyɔna. Nzambi akawotɛ dia la ntondo ka nde mvɔ, nde ayɛna Kristo ka Jehowa kakalakema kana Mɛsiya. Lushi lɔsɔ nyuma k’ekila kakalɔmbɔla Simɛyɔna lo tɛmpɛlɔ lɛnɛ akandatotana Yɔsɛfu la Mariya kaamɛ ndo ɔnawɔ. Simɛyɔna akɛmbɛ ɔnakɔ.

Etena kakandɛmbɛ Yeso, Simɛyɔna akasha Nzambi losaka ɔnɛ: “Nkum’Olongo Nkumadiɔndjɔ, kakianɛ wɛ ambetawɔ dia okambi ayɛ mvɔ la ki lo ndjela kɛnɛ kakayate, nɛ dia washo ami wambɛna ehomɔ kayɛ ka panda kamboyɔlɔngɔsɔla lo washo w’anto tshɛ, osase dia minya wodjima oma lo wedja ndo lotombo la wodja ayɛ Isariyɛlɛ.”​—Luka 2:29-32.

Yɔsɛfu la Mariya wakambe dia mboka dui sɔ. Simɛyɔna akaatshɔkɔla ndo akatɛ Mariya dia ɔnande “ambɔsɔnama dikambo dia ɔkwɛlɔ ndo wetwelo w’anto efula lo Isariyɛlɛ” ndo lonyangu lele oko lukuwa la mpɛmɔ layowotondola.​—Luka 2:34.

Onto okina nto akikɔ laawɔ lushi lɔsɔ. Onto akɔ ko omvutshi wa womoto Anna, laki l’ɛnɔnyi 84. Ndooko lushi lakandetsha lo tɛmpɛlɔ. Lo wonya ɔsɔ, nde akaye le Yɔsɛfu, Mariya ndo Yeso laki eke ɔna ashashi. Anna akatatɛ mboka Nzambi losaka ndo mbewoya anto tshɛ wakohokamɛka awui wendana la Yeso.

Wɛ koka nkanyiya ɔngɛnɔngɛnɔ waki la Yɔsɛfu la Mariya lo kɛnɛ kendana la akambo asɔ wakete lo tɛmpɛlɔ! Lo mɛtɛ, awui asɔ tshɛ wakawashikikɛ dia ɔnawɔ ekɔ Ɔna Nzambi lakalakema.