Mariya aya la diemi ngɔndɔ nyɛi. Tohɔ dia nde aketsha ngɔndɔ ya ntondo ya diemi diande lam’akandatshu dia tenda Elizabɛtɛ w’owotɔ ande lo akona wa la Judeya lo sidɛ. Koko wonya ɔnɛ Mariya ambokalola lakawɔ la Nazarɛtɛ. Lɛkɔ, diemi diande diayeyama le anto tshɛ keema edja. Ohokanyiya woho wotshindja dui sɔ wɔɔngɔ!

Kɛnɛ kaleka mbetsha dui sɔ kɔlɔ ele Mariya akambemɛ le Yɔsɛfu, otshudi w’abaya ɔmɔtshi wa lo ngelo kawɔ. Ndo nde akeyaka dia lo ndjela Ɛlɛmbɛ wakasha Nzambi ase Isariyɛlɛ, womoto lakambemɛ lakeyanaka la pami kekina la lolango lande akahombaka mbokama ave polo ndo nde mvɔ. (Eohwelo k’Ɛlɛmbɛ 22:23, 24) Laasɔ, kaanga mbele Mariya kosala awui wa mindo wa dieyanelo, ondo nde akayambolaka woho wakokande mbutɛ Yɔsɛfu dia nde aya la diemi ndo kɛnɛ kayotomba.

Mariya akatshu ngɔndɔ shato, ɔnkɔnɛ sho koka monga l’eshikikelo dia Yɔsɛfu ekɔ lo nomɔlomɔ dia mbɛna. Etena kakawɛnana, Mariya akawewoya dia nde aya la diemi, nde akasale tshɛ dia mbolembetshiya dia nde otshwe diemi l’ekimanyielo ka nyuma k’ekila kaki Nzambi. Koko oko wakokaso mfɔnya, ɔsɔ aki dui dia wolo dia Yɔsɛfu nshihodia ndo mbetawɔ.

Yɔsɛfu akeyaka dia Mariya aki womoto l’ɔlɔlɔ ndo di’ɔnɛ nde aki la lokumu la dimɛna. Ndo nde akolangaka efula. Koko, oyadi kɛnɛ kakate Mariya, akɛnama dia Yɔsɛfu akɔshi dia nde otshwe diemi la pami kekina. Yɔsɛfu konanga dia Mariya mbokama ave polo ndo nde mvɔ kana mbishama nsɔnyi lo sɛkɛ; ɔnkɔnɛ nde akakanyiya  dia ndjaka diwala lo woshɛshɛ. Lo nshi shɔ, anto wakambanɛ wakɔsamaka oko anto wambotshukana ndo wakahombaka ndjaka diwala dia vɔ nkakitɔna.

L’ɔkɔngɔ diko, etena kakakanaka Yɔsɛfu yimba lo akambo asɔ, nde akatshu dia tolala. Ondjelo wa Jehowa akɛnama le nde lo dɔ ndo akawotɛ ate: “Tokake wɔma dia mbɔsa Mariya wadɛyɛ lakayɛ, nɛ dia oma lo wolo wa nyuma k’ekila mbamondotshɔ diemi. Nde ayota ɔna pami, kowɔlɛ Yeso, nɛ dia nde mbayoshimbɛ anto ande oma lo pɛkato yawɔ.”​—Mateo 1:20, 21.

Lam’akemɔ Yɔsɛfu, nde aki l’ɔngɛnɔngɛnɔ efula lo woho wakandɛnyi wɛma lo dikambo sɔ! Nde k’otshimbatshimba dia nsala kɛnɛ kakawotɛ ondjelo. Nde akɔshi Mariya lakande. Ɔsɔ aki sɛlɛmɔnyi ka lo sɛkɛ kakɛnya dia Yɔsɛfu la Mariya wambotshukana. Koko, Yɔsɛfu kombeyana la Mariya l’edja tshɛ kakinde la diemi dia Yeso.

Ngɔndɔ efula l’ɔkɔngɔ, Yɔsɛfu la Mariya, laki diemi diaya tsho, wakahombe ndjalɔngɔsɔla dia minda lɔkɛndɔ otsha la Nazarɛtɛ. Lende akawahombe ntshɔ l’etena kɛsɔ kaki Mariya aya suke la mbota?