Ngɔndɔ shamalo l’ɔkɔngɔ wa Joani Obatizanyi ntatɛ nsambisha, Yeso laki aya l’ɛnɔnyi oko 30, akaye le nde l’Ɔkɛdi wa Jɔrdana. La oyango akɔna? Aha tsho dia ndjowenda. Kana Yeso konanga tsho ndjɛna woho watahame olimu wa Joani. Yeso akaye dia ndjɔlɔmba Joani dia mbobatiza.

Joani akatone ata ate: “Dimi mbahomba batizama le yɛ, ko wɛ oyaye le mi?” (Mateo 3:14) Joani mbeyaka dia Yeso ekɔ Ɔna Nzambi la laande. Tohɔ dia etena kakinde eke l’otema wa nyango, Joani akakunyɔkunyɔ l’ɔngɛnɔngɛnɔ etena kakaye Mariya laki la diemi dia Yeso dia ndjenda Elizabɛtɛ wa nyango Joani. Aha la taamu, nyango aki Joani akayowotɛ dikambo sɔ l’ɔkɔngɔ. Ndo nde akahombe nto mbeya awui wendana la diewoyelo diakasha ondjelo diendana la eotwelo ka Yeso ndo dikambo dia andjelo wakɛnama le alami w’ɛkɔkɔ l’otsho wakotɔ Yeso.

Joani akashihodia dia batisimu kakandabatizaka anto ekɔ ka wanɛ wakayatshumoyaka oma lo pɛkato yawɔ. Koko Yeso komonga la pɛkato. Kaanga mbakatone Joani, Yeso akatɛtɛ ɔnɛ: “Toketawɔ, nɛ dia kɛsɔ mbahombama dia sho nkotsha kɛnɛ tshɛ kele ɔlɔlɔ.”​—Mateo 3:15.

Lande na kele aki dimɛna dia Yeso batizama? Yeso kobatizama oko djembetelo ya ndjatshumoya oma lo pɛkato. Batisimu kande mɛnyaka dia nde amboyakimɔ ndamɛ dia nsala lolango la She. (Hɛbɛru 10:5-7) Yeso aki otshudi w’abaya, koko etena kakakoke le nde dia ntatɛ olimu wakotome She lele l’olongo dia ndjosala la nkɛtɛ. Onde wɛ fɔnyaka dia Joani akalongamɛ dia dui dimɔtshi diahatasalemaka diayosalema etena kakandabatizaka Yeso?

Joani akayota l’ɔkɔngɔ ɔnɛ: “Ɔnɛ lakantome dia ndjobatiza anto l’ashi akambutɛ ate: ‘Onto tshɛ layoyɛna nyuma kayaholɔ ko tɔ ndjotshikala le nde, nde kayobatiza anto la nyuma k’ekila.’” (Joani 1:33) Ɔnkɔnɛ, Joani akalongamɛka dia mɛna nyuma ka Nzambi kaya le onto ɔmɔtshi labatizande. Kam’akatombe Yeso oma l’ashi, ondo Joani komamba dia mɛna “nyuma ka Nzambi kayaholɔ oko fudu k’enga, ko tɔ kakay[ahema Yeso].”​—Mateo 3:16.

Koko dui dikina dioleki sɔ diakasalema lo batisimu  ka Yeso. ‘Olongo wakadihɔ le nde.’ Kakɔna kalembetshiya dui sɔ? Ondo diɔ nembetshiyaka dia l’etena kakabatizamaka Yeso, nde akohɔ lɔsɛnɔ laki la nde l’olongo la ntondo ka nde ndjotɔ oko onto. Yeso akohɔ lɔsɛnɔ lande la ɔna la lo nyuma la Jehowa mbidja ndo akambo wa mɛtɛ wakawetsha Nzambi l’olongo la ntondo ka nde ndja la nkɛtɛ.

Ndo nto, lo batisimu ka Yeso, dui diakaye oma l’olongo diakate ɔnɛ: “Ɔnɛ ele Ɔnami, lokami ngandji, ɔnɛ lamometawɔ.” (Mateo 3:17) Ɔsɔ aki dui diakina? Ɔsɔ komonga dui dia Yeso; nɛ dia nde akikɔ nde la Joani. Ɔsɔ aki dui dia Nzambi. Mbokɛmaka hwe dia Yeso ekɔ Ɔna Nzambi. Nde bu Nzambi.

Ekɔ mɛtɛ dia Yeso ekɔ ɔna Nzambi, lakayotɔ oko onto woho waki Adama pami ka ntondo. L’ɔkɔngɔ diko, ombeki Luka akayɔkɔndɔla batisimu ka Yeso lo mfunda ɔnɛ: “Lam’akatatɛ Yeso olimu ande, nde aki l’ɛnɔnyi oko 30, ndo oko wakataka anto, nde aki ɔna Yɔsɛfu, ɔna Heli, . . . ɔna Davidɛ, . . . ɔna Abrahama, . . . ɔna Nɔa, . . . ɔna Adama, ɔna Nzambi.”​—Luka 3:23-38.

Oko waki Adama “ɔna Nzambi,” ngasɔ mbaki ndo Yeso. Lo batisimu kande, Yeso akɔtɔ lo diɔtɔnganelo di’oyoyo nde la Nzambi lo nkoma Ɔna Nzambi la lo nyuma. Ɔnkɔnɛ, Yeso ekɔ lo dihole dia dimɛna dia mbetsha akambo wa mɛtɛ wendana la Nzambi ndo dia tɛnya yoho ya lɔsɛnɔ la sho nsɛna. Yeso ambotatɛ yoho ya lɔsɛnɔ yayoyokonya l’edjedja ka wonya lo nkimɔ lɔsɛnɔ lande l’onto oko olambo lo wahɔ w’atshi wa pɛkato.