L’ɔkɔngɔ wa nde mbetsha nshi 40 l’oswe ndo la ntondo ka nde nkalola otsha la Ngalileya, Yeso akakalola le Joani, ɔnɛ lakobatiza. Etena kakayasukanaka Yeso, Joani akotshume lohita ndo akatɛ anto waki lawɔ ate: “Enda Ɔna Ɔkɔkɔ wa Nzambi ɔnɛ lanya pɛkato ya l’andja! Lo dikambo diande kakamate nte: ‘Ɔnɛ layaye l’ɔkɔngɔ ami akete la ntondo kami, nɛ dia nde akasɛnaka la ntondo kami.’” (Joani 1:29, 30) Kaanga mbele Joani aki enondo waki Yeso, nde akeyaka dia Yeso akasɛnaka la ntondo ka nde oko onto la lo nyuma l’olongo.

Mingu ngana la ntondo, etena kakaye Yeso dia ndjobatizama, akɛnamaka dia Joani komonga l’eshikelo dia Yeso mbakahombe monga Mɛsiya. Joani akate ate: “Kaanga dimi kombeeya, koko ɔkɔkɔ wakamaye ndjobatiza anto l’ashi ele dia ndjoweyanya le ase Isariyɛlɛ.”​—Joani 1:31.

Joani akatetemala kɔndɔlɛ anto wakohokamɛka kɛnɛ kakete etena kakandabatizaka Yeso ate: “Dimi lakɛnyi nyuma kayaholɔ oma l’olongo oko fudu k’enga ndo tɔ kakayotshikala le nde. Kaanga dimi kombeeya, koko Ɔnɛ lakantome dia ndjobatiza anto l’ashi akambutɛ ate: ‘Onto tshɛ layoyɛna nyuma kayaholɔ ko tɔ ndjotshikala le nde, nde kayobatiza anto la nyuma k’ekila.’ Dimi lakakiɛnyi ndo lakasanya dia nde ekɔ Ɔna Nzambi.”​—Joani 1:32-34.

Joani aki kaamɛ l’ambeki ande ahende la wedi a pindju lam’akayayaka Yeso. Joani akate ate: “Enda Ɔna Ɔkɔkɔ wa Nzambi!” (Joani 1:36) Oma laasɔ, ambeki ahende asɔ waki Joani obatizanyi wakayele Yeso. Ɔmɔtshi la l’atei awɔ lokombo lande Andɛlɛ. Mbeyaka monga ko ombeki okina ɔsɔ lelamɛ Joani, mbakayɔkɔndɔlaka ɔkɔndɔ ɔnɛ. Mɛnamaka dia Joani shɔ aki la Yeso ana la ana, oko wakinde ɔna Salɔme. Mbokɛmaka hwe dia Salɔme aki kadiyɔ la Mariya, ndo omɛnde aki Zebede.

Etena kakandɛwɔ ndo kakandɛnyi Andɛlɛ la Joani wayoyele, Yeso akawambola ate: “Ayanganyu?”

Vɔ wakawombola vɔ ate: “Rabi, lende ohangiyɛ?”

Yeso akakadimola ate: “Nyoye, nyoyende.”​—Joani 1:37-39.

Dui sɔ diakasalema otsha lo eshidi ɛnɛi l’ɔkɔngɔ wa midi, ndo Andɛlɛ la Joani wakatshikala la Yeso l’etenyi ka lushi lɔsɔ. Andɛlɛ aki l’ɔngɛnɔngɛnɔ efula diakɔ diele lam’akandɛnana la Simɔna k’ɔnango, lakawelɛka nto Petero, nde akawotɛ ate: “Tambɛna Mɛsiya.” (Joani 1:41) Andɛlɛ akaye la Petero le Yeso. Awui wakayeta l’ɔkɔngɔ mɛnyaka dia Joani nde lawɔ akatelɛ Jakɔba y’ɔnango ndo akaye la nde le Yeso; koko Joani hatɛkɛta awui wakinde hita etena kakɔndɔlande awui asɔ.

 La wedi a pindju, Yeso akɛnana la Filipɛ k’ose Bɛtɛsayida. Aki lo nɔrdɛ suke l’omamu w’oduwa wa Ngalileya ndo ɔsɔ mbaki osomba wakotɔ Andɛlɛ ndo Petero. Yeso akelɛ Filipɛ ate: “Ondjele.”​—Joani 1:43.

Filipɛ akatɛnana la Natanayɛlɛ lakawelɛka nto Bartɛlɛmi ndo akawotɛ ate: “Tambɛna ɔnɛ lele Mɔsɛ akate lo Ɛlɛmbɛ ndo amvutshi wakafunde dikambo diande, mbuta ate Yeso y’ose Nazarɛtɛ, ɔna Yɔsɛfu.” Natanayɛlɛ kombetawɔ ndo akatɛ Filipɛ ate: “Onde dikambo di’ɔlɔlɔ koka ntomba oma la Nazarɛtɛ?”

Filipɛ akawotɛ ate: “Yaka, yende.” Yeso akɛnyi Natanayɛlɛ ayaye ndo akate ate: “Nyende ose Isariyɛlɛ la mɛtɛ lele bu la lokeso.”

Natanayɛlɛ akambola ate: “Ngande wambeyayɛ?”

Yeso akookadimola ate: “La ntondo ka Filipɛ kelɛ, etena kakiyɛ l’ɛse k’osongo wa fingo, dimi lakakɛnyi.”

Natanayɛlɛ akakadimola la diambo tshɛ ɔnɛ: “Rabi, wɛ ekɔ Ɔna Nzambi, wɛ ekɔ Nkumekanga ka Isariyɛlɛ.”

Yeso akawombola ate: “Wɛ ambetawɔ dikambo lambokotɛ nte, lakakɛnyi l’ɛse k’osongo wa fingo? Wɛ ayɛna akambo woleki wanɛ weke.” Ko Yeso akalake ate: “Lo mɛtɛ kanyotɛmi nte, nyu nyayɛna olongo wadihɔ ndo andjelo wa Nzambi wadɛ ndo waholɔ oya le Ɔna onto.”​—Joani 1:45-51.

Yema tshitshɛ l’ɔkɔngɔ wa laasɔ, Yeso kaamɛ l’ambeki ande w’eyoyo wakamɔ oma l’Okidi wa Jɔrdana ko wakatshu la Ngalileya.