L’ɔkɔngɔ wa fɛtɛ ka diwala la Kana, Yeso akatshu otsha la Kapɛrnauma. Nyango ndo akosɛnde w’apami, mbuta ate Jakɔba, Yɔsɛfu, Simɔna ndo Judasɛ wakatatshɔka kaamɛ la nde.

Ko lande na kakatshu Yeso otsha la Kapɛrnauma? Osomba ɔsɔ waki lo dihole dia dimɛna ndeka Nazarɛtɛ ndo Kana ndo mɛnamaka dia vɔ wakaleke woke. Ndo nto, ambeki wa Yeso w’eyoyo wakadjasɛka la Kapɛrnauma kana suke la Kapɛrnauma. Ɔnkɔnɛ, Yeso akakoke mbowaetsha awui amɔtshi l’ɛtshi ka nkɛtɛ kakawotɔ.

Etena kakinde la Kapɛrnauma, Yeso akasale nto akambo wa diambo. Ɔnkɔnɛ, anto efula wa l’osomba ɔsɔ ndo wa lo ngelo yosukanyi la wɔ, wakoke akambo wakandasalaka lɛkɔ. Koko Yeso nde la asekande, wanɛ waki ase Juda wakayashaka efula l’ɔtɛmwɛlɔ, wakahombe minda lɔkɛndɔ kem’edja otsha la Jɛrusalɛma lo dambo di’Elekanelo dia l’ɔnɔnyi 30 T.D.

Lam’akiwɔ lo tɛmpɛlɔ la Jɛrusalɛma, ambeki wa Yeso wakɛnyi dui dimɔtshi diendana la Yeso diakawawambiya efula, diakatshikitana la kɛnɛ kakawɛnyi ntondo.

Ɛlɛmbɛ wa Nzambi wakalɔmbaka ase Isariyɛlɛ dia nambola elambo wa nyama lo tɛmpɛlɔ ndo angɛndangɛnda wakongaka l’ohomba wa mbo ya ndɛ lo nshi yakiwɔ lɛkɔ. Ɔnkɔnɛ, Ɛlɛmbɛ waketawɔka dia wanɛ wakayaka la Jɛrusalɛma oma lo ahole wa ntale ndja la falanga dia ndjosomba “ngɔmbɛ, ɔkɔkɔ, mbudi,” ndo diangɔ dikina diaki la wɔ ohomba lo nshi yakawatshikalaka la Jɛrusalɛma. (Eohwelo k’Ɛlɛmbɛ 14:24-26) Etombelo waki la dui sɔ ele, amundji w’okanda wa la Jɛrusalɛma wakasondjaka nyama kana tofudu l’etei ka sɛkɛ dia woke dia tɛmpɛlɔ. Ndo amɔtshi l’atei awɔ wakakesaka anto lo mbadjɛ diangɔ oshinga wolo efula.

Oko wakandadunganɛ la nkɛlɛ, Yeso akatshola ekenga wa falanga y’amengodi, akasokola mɛsa awɔ ndo akawatshanya. Ko Yeso akate ate: “Nyonya diangɔ nɛ oma lanɛ! Takonyetɛ luudu la Papa luudu l’okanda!”​—Joani 2:16.

Lam’akɛnyi ambeki wa Yeso dui sɔ, vɔ wakohɔ prɔfɛsiya kendana la Ɔna Nzambi kata ɔnɛ: “Ohetoheto lo dikambo dia luudu layɛ kayɔndɛ.” Koko ase Juda wakambola vate: “Djembetelo yakɔna yakokayɛ tɛnya dia wɛ ekɔ la lotshungɔ la nsala akambo anɛ?” Yeso akakadimola ate: “Nyonyukole tɛmpɛlɔ kɛnɛ, ko dimi layokika lo nshi 3.”​—Joani 2:17-19; Osambo 69:9.

Ase Juda wakɔshi dia Yeso akatɛkɛtaka dikambo dia tɛmpɛlɔ ka mɛtɛ mɛtɛ kaki lɛkɔ la Jɛrusalɛma, ko vɔ wakambola vate: “Tɛmpɛlɔ kɛnɛ kakakama l’edja k’ɛnɔnyi 46, ko wɛ ayokika lo nshi 3?” (Joani 2:20) Koko, Yeso akatɛkɛtaka dikambo dia demba diande oko diɔ diekɔ tɛmpɛlɔ. Ɛnɔnyi esato l’ɔkɔngɔ, ambeki ande wakohɔ ɛtɛkɛta ɛsɔ etena kakandolɔ.