L’ɔkɔngɔ wa vɔ nsala dambo di’Elekanelo lo eleko kamɔnga akatshi ka lo 30 T.D., Yeso la ambeki ande wakamɔ oma la Jɛrusalɛma. Koko, vɔ kokalola mbala kakɔ ɔtɔi la Ngalileya lo ngelo yawɔ. Vɔ wakatshu lo ɛtshi ka nkɛtɛ ka Judeya, lɛnɛ akawatobatizaka anto efula. Aya oko ɔnɔnyi w’otondo wasala Joani Obatizanyi olimu akɔ waamɛ ndo ambeki ande amɔtshi weke kaamɛ la nde, vɔ waki ondo l’okidi w’Ɔkɛdi wa Jɔrdana.

Yeso ndamɛ kobatiza ndooko onto, koko ambeki ande mbakasalaka dikambo sɔ lo ɛlɔmbwɛlɔ kande. L’etena k’olimu wa Yeso kɛsɔ, Yeso ndo Joani wekɔ lo mbetsha ase Juda wayatshumoya lo pɛkato yakawasale lo kɛnɛ kendana la sheke y’Ɛlɛmbɛ wa Nzambi.​—Etsha 19:4.

Koko ambeki waki Joani wekɔ la kandjema, wambotshɔ towotɛ lo dikambo dia Yeso ɔnɛ: “Onto [Yeso] laki la yɛ . . . ekɔ lo batiza anto ndo anto tshɛ wekɔ lo ntshɔ le nde.” (Joani 3:26) Koko, Joani komonga la kandjema. Nde akangɛnangɛna lo woho wakatatondoyaka Yeso ndo nde akalange dia ambeki ande monga l’ɔngɛnɔngɛnɔ ndo vɔ lawɔ. Joani akawaohola ate: “Nyu nyuamɛ nyekɔ ɛmɛnyi dia dimi lakate nte: ‘Dimi keema Kristo, koko dimi lakatomama la ntondo kande.’” Nde akasha ɛnyɛlɔ kakakoke nkimanyiya anto tshɛ dia vɔ nshihodia dikambo sɔ lo mbuta ɔnɛ: “Onto tshɛ lele la wadi mbele otshuki a wadi. Koko etena kemala ɔngɛnyi w’otshuki a wadi laawɔ ndo kokande dui diande, nde mongaka l’ɔngɛnɔngɛnɔ w’efula l’ɔtɛ wa dui di’otshuki a wadi. Ɔnkɔnɛ, ɔngɛnɔngɛnɔ ami waya efula ka mamba.”​—Joani 3:28, 29.

L’ɛnyɛlɔ k’ɔngɛnyi w’otshuki a wadi, Joani akangɛnangɛna ngɔndɔ efula la ntondo lo mɛnyanya ambeki ande le Yeso. Amɔtshi l’atei awɔ wakayele Yeso ndo wakahombe ndjokitama nyuma k’ekila. Joani akalange nto dia ambeki waki la nde l’etena kɛsɔ ndjela Yeso. Lo mɛtɛ, oyango waki la Joani ele wa nɔngɔsɔla mboka lo kɛnɛ kendana la olimu wa Kristo. Joani akalembetshiya ate: “Onto ɔsɔ pombaka tahamaka tsho, koko dimi layotakitakitaka tsho.”​—Joani 3:30.

Joani nkina, lamboshilaka ntatɛ ndjela Yeso, akayofundaka l’ɔkɔngɔ kɛnɛ kendana la oma lɛnɛ akaye Yeso ndo ɔkɛndɛ w’ohomba efula wele la nde lo kɛnɛ kendana la panda k’anto ate: “Onto lakaye oma la diko ndeka anto akina tshɛ. . . . Papa nangaka Ɔna ndo akakimɔ diangɔ tshɛ l’anya ande. Onto tshɛ lele la mbetawɔ le Ɔna ayokondja lɔsɛnɔ la pondjo. Onto tshɛ lahakitanyiya Ɔna hatɛna lɔsɛnɔ, koko odudu wa Nzambi wekɔ le nde.” (Joani 3:31, 35, 36) Ande dui dia mɛtɛ di’ohomba efula diahomba anto mbeya lee!

Kem’edja l’ɔkɔngɔ wa Joani Obatizanyi mbuta dia ɔkɛndɛ ndo olimu ande pombaka nkitakita, nkumekanga Hɛrɔdɛ akawonde. Hɛrɔdɛ akɔshi Hɛrɔdiasɛ wa wadi aki Filipɛ k’ɔnango oko wadɛnde. Lam’akatondja Joani loseka lɔsɔ lo sɛkɛ, Hɛrɔdɛ akawodje lo lokanu. Lam’akandoke dia Joani ambondama, Yeso akamɔ oma la Judeya nde la ambeki ande ko ‘wakatshu otsha la Ngalileya.’​—Mateo 4:12; Makɔ 1:14.