Oko wakinde onto la kokele, Yeso kopomana l’ekakatanu ndo ekiyanu efula wahomana l’anto akina. Koko nde akayakiyanyaka efula lo dikambo di’anto. Nde aki suke dia mbasalɛ akambo oleki ndo kɛnɛ kaki ohomba le wɔ. Eelo, kɛtshi kakotshutshuya dia mbakimanyiya. Enda bɛnyɛlɔ diele lo tshapita 32, 37, 57, 99.

Anto wa lo nɔnga tshɛ, mbuta ate akɛnda ndo epalanga wakayaokaka dia vɔ koka sukana la Yeso nɛ dia nde kɔmɛnyaka dia nde ekɔ la wesanu efula kana ekɔ onto l’ohomba efula. Lo mɛna woho wakayashaka Yeso l’otema ɔtɔi le wɔ, anto wakayaokaka dimɛna lalende. Dia mɛna dui sɔ, enda tshapita 25, 27, 95.

Yeso akakadimɔka mbala la mbala le She lo dɔmbɛlɔ dia l’etete lo shɔpɔ kana etena kakinde la atɛmɔdi wa mɛtɛ. Nde akalɔmbaka lo waaso efula koko aha tsho wenya wa ndɛ. Nde akalɔmbaka dia mbisha She losaka, dia mbotombola ndo dia nyanga ɛlɔmbwɛlɔ kande la ntondo ka mbɔsa tɛdikɔ ta weke. Enda bɛnyɛlɔ diele lo tshapita 24, 34, 91, 122, 123.

Tena dimɔtshi, etena kakandakoke momuya kana kɔkɔla demba, Yeso aketshaka waahɔ w’anto akina la ntondo ka wa nde. Nde kombutaka dia onto hayatokɛ mfusa. Lo dikambosɔ nto, nde akatotshikɛ ɛnyɛlɔ kakokaso ndjela dimɛna dimɛna. Enda woho wɔkɛnɛmɔmi ɛnyɛlɔ kɛsɔ lo tshapita 19, 41, 52.

Yeso kokomɛ tsho lo mbetsha ohomba wa dimanyiyaka, nde akadimanyiyaka ambeki ande ndo anto akina. Kana yimba la bɛnyɛlɔ diatanema lo tshapita 26, 40, 64, 85, 131.

Akatatami di’ase Juda efula wayotona dia mbetawɔ Mɛsiya ndo di’ɔnɛ atunyi ande wayowodiaka. Laasɔ Yeso akakoke tsho ndjasha paka yema tshitshɛ dia kimanyiya anto. Koko l’ohetoheto tshɛ nde akasukɛ ɔtɛmwɛlɔ wa mɛtɛ. Nde akatshikɛ ambeki ande tshɛ wahomana la wendjudi ndo kaanga la ɔlɔshamelo ɛnyɛlɔ ka monga l’ohetoheto. Enda tshapita 16, 72, 103.

Yeso akaleke anto wele keema kokele lo toho taheyama mbadia, ɛnyɛlɔ lo ewo ndo lo lomba. Aha la taamu, woho wakinde onto la kokele akawosha akoka wa lo demba ndo wa lo yimba woleki wanɛ waki l’onto tshɛ laki suke la nde. Koko nde akakambɛ anto akina l’okitshakitsha tshɛ. Wɛ ayotana wetshelo wendana la dui sɔ lo tshapita 10, 62, 66, 94, 116.

Mbala la mbala, Yeso akakɛnɛmɔla solo dia lotutsha otsha le apɔstɔlɔ ande ndo anto akina etena kakiwɔ kombokoyaka ɛnyɛlɔ kande kana kakiwɔ kokambaka la kɛnɛ kakandataka. La solo dia lotutsha tshɛ nde akakalolɛka wetshelo waki lawɔ ohomba dia vɔ sukana la Jehowa. Enda bɛnyɛlɔ diɛnya solo dia lotutsha dia Yeso lo tshapita 74, 98, 118, 135.