Yeso akakambe la toho efula ta tshutshuya anto dia vɔ nkana yimba lo kɛnɛ kendana la diɔtɔnganelo diasawɔ la Nzambi. Diaaso dikina diakɛnama l’ɔkɔngɔ wa nde ntɛkɛta l’anto l’andja wa luudu la Ofarisɛ ɔmɔtshi.

Amɔtshi l’atei awɔ wakatɛkɛta dia mpokoso kakasalema. Vɔ wakate dikambo “di’ase Ngalileya wanɛ wele Pilato [nguvɛrnɛrɛ ka Rɔmɔ Pɔsɔ] akasɔhanya dikila diawɔ la elambo awɔ.” (Luka 13:1) Kakɔna kakawalange mbuta?

Ondo ase Ngalileya asɔ wekɔ anto wakadiakema etena kakatone ase Juda dia Pilato nkamba la falanga y’oma lo eombelo k’oma lo tɛmpɛlɔ dia nsala ɔlɔnda wa mbɔtshiya ashi la Jɛrusalɛma. Ondo Pilato akakondja falanga shɔ lo mbokana la ewandji wa tɛmpɛlɔ. Ondo wanɛ wakakɔndɔla mpokoso kɛsɔ wakɔsaka dia ase Ngalileya asɔ wakokala waale l’ɔtɛ wakawasalaka akambo wa kɔlɔ. Yeso kombetawɔ kanyi shɔ.

Nde akambola ate: “Onde nyu fɔnyaka di’ase Ngalileya asɔ waki atshi wa pɛkato efula oleki ase Ngalileya akina tshɛ l’ɔtɛ wa kɛnɛ kakaakomɛ kɛsɔ?” Okadimwelo ande ele ɔnɛ ndooko. Koko nde akakambe la mpokoso kɛsɔ dia pɛmɔla ase Juda ate: “Naka nyu hanyoyatshumoyisha, kete nyu tshɛ nyayolanyema woho akɔ waamɛ.” (Luka 13:2, 3) Ko Yeso akatɛkɛta dia mpokoso kekina kakasalema ondo atete edja ndo mbeyaka monga ko kakɔtɔnɛka la wokelo w’ɔlɔnda w’ashi ɔsɔ lo mimbola ate:

“Anto 18 asɔ wakakamamɛ la ehele ka Silɔama ndo wakavu, onde nyu fɔnyaka dia vɔ waki atshi wa kɔlɔ efula oleki anto akina wadjasɛ la Jɛrusalɛma?” (Luka 13:4) Olui w’anto wakakokaka mbɔsa di’anto asɔ wakavu l’ɔtɛ wakawasale akambo wa kɔlɔ. Ndo lanɛ nto Yeso kombetawɔ kanyi shɔ. Nde akeyaka dia “tena ndo awui wa shashimoya” tombaka ndo ondo vɔ mbele lo kiɔkɔ ya mpokoso kɛsɔ nto. (Ondaki 9:11) Koko anto pombaka nkondja wetshelo oma lo mpokoso kɛsɔ. Yeso akate ate: “Naka nyu hanyoyatshumoyisha, kete nyu tshɛ nyayolanyema oko vɔ.” (Luka 13:5) Ko lande na katɛtɛnde lo wetshelo ɔsɔ kakianɛ?

Dui sɔ mendanaka la lɛnɛ ayande lo kɛnɛ kendana l’olimu ande w’esambishelo ndo nde akɛnya dui sɔ lo nkamba l’ɛnyɛlɔ kɛnɛ: “Onto ɔmɔtshi akonɛ osongo wa fingo lo ekambɔ kande ka vinyɔ, ndo nde akaye ndjenda kana elowa wekɔ lɔkɔ, koko nde kotana ndooko olowa. Ko nde akatɛ ose olimu wa l’ekambɔ ka vinyɔ ate: ‘Aya ɛnɔnyi 3 wayami ndjoyanga elowa l’osongo ɔnɛ wa fingo, koko haatane ndooko olowa. Kɔtawɔ! Lande na kɔsawɔ dihole wɔsɔsa?’ Nde akookadimola ate: ‘Owandji, nyomowotshika ɔnɔnyi ɔnɛ, tokotshima difuku l’omamu awɔ ndo tokodja diangɔ di’ɛtɛtɔ. Naka vɔ wamboyɔtɔ elowa, kete dimɛna. Ko naka bu, ko wɛ ndjɔɔkɔta.’”​—Luka 13:6-9.

Ambolekana ɛnɔnyi esato, Yeso ekɔ lo nyanga dia ase Juda monga la mbetawɔ. Koko, paka anto yema tshitshɛ ato mbakakome ambeki ande ndo mbakoka mbɔsama oko elowa w’oma l’olimu ande wa wolo. Kakianɛ, l’ɔnɔnyi wa nɛi w’olimu ande w’esambishelo, nde ekɔ lo ndeka mbidja welo. Ekɔ oko nde ekɔ lo ntshima difuku l’omamu ndo ekɔ lo mbidja diangɔ diɛtɛtɔ l’osongo wa fingo w’ase Juda lo nsambisha ndo lo mbetsha la Judeya ndo la Pereya. Etombelo akɔna wakandakondja? Paka ase Juda yema tshitshɛ  tsho mbaketawɔ. Oko wodja, vɔ wakatone ndjatshumoya ndo wekɔ lo mboka k’elanyelo.

Wendjudi w’efula ka l’atei awɔ wakɛnama nto lo sɛkɛ yema tshitshɛ l’ɔkɔngɔ lushi la Sabato. Yeso aketshaka lo shinangɔnga. Nde akɛnyi womoto ɔmɔtshi lele l’ɔtɛ wa ɔdiɛngɛ wakɔhɛnyahɛnyaka ambokotama l’edja k’ɛnɔnyi 18. Yeso akawoke kɛtshi ndo akawotɛ ate: “Womoto, wɛ ambotshungɔ oma l’ɔlɛmbɛlɔ ayɛ.” (Luka 13:12) Yeso akawahɛ lonya ndo mbala kakɔ ɔtɔi nde akasembɔ ndo akatatɛ ntombola Nzambi.

Dui sɔ diakomadia owandji wa shinangɔnga ko nde akate ate: “Nshi 6 yekɔ yahombanyu nkamba olimu, nshi shɔ mbahombanyu ndjaaka dia vɔ ndjonyɔkɔnɔla, koko aha lushi la Sabato.” (Luka 13:14) Owandji ɔsɔ kombidjaka taamu dia Yeso ekɔ la wolo wa nkɔnɔla, koko nde ekɔ lo mpangwɛ anto lo woho wayawɔ ndjɔkɔnɔ lushi la Sabato! Yeso akakadimola la ekanelo ka yimba kokɛma ɔnɛ: “Nyu akanga wa dungi pende le, onde l’atei anyu ndooko onto lakelekola ngɔmbɛ kana mponda kande ndo kitɔla dia tɔ tɔnɔ ashi lushi la Sabato? Onde womoto ɔnɛ lele ɔna Abrahama ndo lele Satana akookeleka l’edja k’ɛnɔnyi 18, takandakoki kelekɔma oma l’ɛkɔdi lushi la Sabato?”​—Luka 13:15, 16.

Atunyi ande wakoke nsɔnyi, koko elui w’anto wakangɛnangɛna l’ɔtɛ w’akambo wa diambo wɛnawɔ Yeso asala. Ko Yeso akakalolɛ lanɛ nto la Judeya bɛnyɛlɔ pende dia prɔfɛsiya diendana la Diolelo diakandakambe ladiɔ ntondo lam’akinde lo waato lo Ndjale ka Ngalileya.​—Mateo 13:31-33; Luka 13:18-21.